Author: Ayesha Rehmani

چین کے دورے پر موجود امریکی نیوز چینل ’فاکس نیوز‘ کی ٹیم کو بیجنگ میں محض دو منٹ کے لیے غلط جگہ گاڑی کھڑی کرنے پر جرمانے کا ٹکٹ تھما دیا گیا۔

فاکس نیوز کے میزبان بریٹ بائر نے بدھ کو بتایا کہ ان کے ڈرائیور نے صرف دو منٹ کے لیے غیر قانونی پارکنگ کی تھی جس پر اسے فوری طور پر موبائل فون پر ایک پیغام موصول ہوا کہ اسے کیمرے کی مدد سے دیکھ لیا گیا ہے اور اس پر چالیس امریکی ڈالر کا جرمانہ عائد کر دیا گیا ہے۔

بریٹ بائر ان دنوں امریکی صدر ڈونلڈ ٹرمپ کے دورہ چین کی کوریج کے لیے بیجنگ میں موجود ہیں جہاں سے وہ اپنے پروگرام کی نشریات کر رہے ہیں بریٹ بائر نے چین میں شہریوں کی کڑی نگرانی اور ہر جگہ نصب کیمروں کے نظام پر حیرت کا اظہار کرتے ہوئے کہا کہ بیجنگ میں ہر طرف کیمرے لگے ہوئے ہیں اور ایسا لگتا ہے جیسے کوئی آپ کو ہر لمحہ دیکھ رہا ہے۔

انہوں نے ایک ریلوے اسٹیشن کے باہر کا منظر بیان کرتے ہوئے کہا کہ میں صرف اس ایک کونے پر کھڑے ہو کر کم از کم بیس کیمرے گن سکتا ہوں صر ف اس سال بیجنگ میں پندرہ سو نئے کیمروں کا اضافہ کیا گیا ہے جو ہر چیز پر نظر رکھتے ہیں یہی وجہ ہے کہ یہاں کوئی بھی شخص سڑک پار کرنے کے لیے ٹر یفک قوانین کی خلاف ورزی نہیں کرتا کیونکہ انہیں معلوم ہے کہ ایسا کرنے پر فوراً جرمانہ ہو جائے گا۔

بریٹ بائر نے چین کی نگرانی کے ان اقدامات پر سوال اٹھاتے ہوئے کہا کہ چینی حکومت کا کہنا ہے یہ سب کچھ لوگوں کی حفاظت کے لیے ہے لیکن شہریوں کی اس طرح نگرانی اور ان کی درجہ بندی کرنے کے حوالے سے کئی اہم سوالات جنم لے رہے ہیں یہ کیمرے ہر جگہ موجود ہیں اور ہر منٹ آپ کی نگرانی کر رہے ہیں۔

ماہرین کے مطابق پورے چین میں اس وقت تقریباً ساٹھ کروڑ کیمرے نصب ہیں جو مصنوعی ذہانت اور چہروں کی شناخت جیسی جدید ٹیکنالوجی سے لیس ہیں،یہ نظام نہ صرف لوگوں کی نقل و حرکت پر نظر رکھتا ہے بلکہ بعض علاقوں میں ڈرونز اور جدید کیمروں کے ذریعے خودکار طریقے سے قانون نافذ کرنے کی منصوبہ بندی بھی کی جا رہی ہے۔

امریکی ارب پتی اور ایمازون کے بانی جیف بیزوس کے والدین نے نیویارک میں بچوں کی ابتدائی تعلیم اور مفت چائلڈ کیئر منصوبوں کیلئے 10 کروڑ ڈالر عطیہ کرنے کا اعلان کردیا۔

امریکی میڈیا کے مطابق نیویارک کی معروف فلاحی تنظیم رابن ہڈ نے اعلان کیا ہے کہ اسے جیف بیزوس کے خاندان کی جانب سے 10 کروڑ ڈالر کا عطیہ موصول ہوا ہے اس رقم سے’’جیکی بیزوس انڈاؤمنٹ فار ارلی چائلڈ ہڈ‘‘ قائم کیا جائے گا، جو ابتدائی تعلیم اور بچوں کی نشوونما کے منصوبوں پر خرچ ہوگی۔

تنظیم کے مطابق مزید 2 کروڑ 50 لاکھ ڈالر کی اضافی رقم بھی فراہم کی جائے گی، بشرطیکہ اتنی ہی رقم دیگر ذرائع سے جمع کی جائے، جس کے بعد مجموعی فنڈ 15 کروڑ ڈالر تک پہنچ جائے گا جیکی بیزوس، جو جیف بیزوس کی والدہ ہیں، ماضی میں رابن ہڈ تنظیم کے بورڈ کا حصہ بھی رہ چکی ہیں۔

یہ عطیہ ایسے وقت سامنے آیا ہے جب نیویارک کے میئر ظہران ممدانی شہر بھر میں ’’2-K پروگرام‘‘ متعارف کراچکے ہیں، جس کے تحت دو سال کی عمر سے بچوں کیلئے مفت ابتدائی تعلیم اور نگہداشت کو سال بھر کیلئے عام اور قابل رسائی بنانے کا اعلان کیا گیا ہے۔

اگرچہ یہ منصوبہ بیزوس خاندان کی مالی معاونت سے تقویت پا رہا ہے، تاہم میئر ممدانی ماضی میں ارب پتی طبقے پر تنقید کرتے رہے ہیں حالیہ دنوں انہوں نے ارب پتی کاروباری شخصیت کین گرفن کی پرتعیش جائیداد کے باہر ویڈیو جاری کرکے لگژری سیکنڈ ہومز پر نئے ٹیکس کی تجویز دی تھی، جس پر دونوں کے درمیان لفظی جنگ بھی دیکھنے میں آئی۔

میئر ممدانی نے گزشتہ ہفتے مشہور ’’میٹ گالا‘‘ تقریب میں شرکت بھی نہیں کی تھی اور کہا تھا کہ وہ شہر کو مزید سستا اور عام شہریوں کیلئے قابل رہائش بنانے پر توجہ دے رہے ہیں دوسری جانب سٹی ہال کی ترجمان جینا لائل نے کہا کہ پورے نیویارک میں مفت چائلڈ کیئر کا خواب پورا کرنے کیلئے حکومت، فلاحی اداروں، ورکنگ فیملیز اور نجی شعبے سب کو مل کر کام کرنا ہوگا۔

رابن ہڈ تنظیم 1988 میں ہیج فنڈ ارب پتی پال ٹیوڈر جونز نے قائم کی تھی، جبکہ اسے وال اسٹریٹ کی کئی بڑی شخصیات کی حمایت حاصل رہی ہے تنظیم اب تک نیویارک کے پانچوں بورو میں 300 سے زائد فلاحی اداروں کو فنڈنگ فراہم کرچکی ہےرابن ہڈ کے چیف ایگزیکٹو رچرڈ بیوری جونیئر کا کہنا ہے کہ چائلڈ کیئر منصوبوں کیلئے بنیادی ذمہ داری حکومت کی ہے، تاہم فلاحی عطیات ایسے منصوبوں کو مؤثر انداز میں آگے بڑھانے میں اہم کردار ادا کرتے ہیں۔

واضح رہے کہ نیویارک اس وقت شدید بجٹ بحران کا سامنا کررہا ہے اور شہر کو تقریباً 12 ارب ڈالر کے مالی خسارے کا سامنا ہے تاہم میئر ممدانی نے حالیہ بجٹ میں چائلڈ کیئر اور تعلیمی منصوبوں کیلئے تقریباً 6 کروڑ ڈالر مختص کرنے کا اعلان کرتے ہوئے دعویٰ کیا ہے کہ نئے بجٹ سے مالی خسارہ پورا کرلیا جائے گا۔

بھارتی ریاست اتر پردیش میں تیز آندھی، بارش اور ژالہ باری کے باعث شدید طوفانی صورتحال میں تقریباً 90 افراد ہلاک ہو گئے ہیں۔

شمالی ریاست میں مارچ سے جون تک گرم موسم کے دوران طوفان عام ہیں، جس کے بعد مون سون کی بارشیں موسم کو نسبتاً بہتر بنا دیتی ہیں ریاستی ڈیزاسٹر مینجمنٹ اور ریلیف دفتر نے جمعرات کو بتایا بدھ کے روز نامساعد موسمی حالات کے باعث 89 افراد ہلاک ہوئے،ریاست میں طوفان، بارش، ژالہ باری اور آسمانی بجلی گرنے کے واقعات میں 53 افراد زخمی بھی ہوئے، 87 مکانات کو نقصان پہنچا جبکہ 114 مویشی بھی ہلاک ہو گئے۔

تیز ہواؤں کے باعث درخت اور بل بورڈ جڑ سے اکھڑ گئے، کچھ گاڑیوں پر گر گئے، جبکہ گرد و غبار اور بادلوں نے سڑک کنارے لگے لکڑی کے اسٹالز کا سامان بھی بکھیر دیا ریاستی ریلیف حکام کے مطابق بعض اموات درخت گرنے اور گھروں کی دیواریں گرنے کے باعث ہوئیں۔

ریاست کے چیف منسٹر، جو وزیراعظم نریندر مودی کی بھارتیہ جنتا پارٹی سے تعلق رکھتے ہیں، نے حکام کو ہدایت دی ہے کہ متاثرین کی مدد کی جائے اور 24 گھنٹوں کے اندر مالی امداد تقسیم کی جائے۔

بیجنگ میں امریکی صدر ڈونلڈ ٹرمپ اور چینی صدر شی جن پنگ کے درمیان ہونے والی اہم ملاقات تقریباً دو گھنٹے جاری رہنے کے بعد ختم ہو گئی ،جس میں چینی صدر شی جن پنگ نے امریکی صدر ڈونلڈ ٹرمپ پر واضح کر دیا ہے کہ تائیوان کا معاملہ چین امریکا تعلقات میں سب سے زیادہ حساس اور اہم حیثیت رکھتا ہے۔

ملاقات کے بعد دونوں رہنماؤں نے بیجنگ میں 600 سال پرانی تاریخی جگہ ’ٹیمپل آف ہیون‘ کا دورہ بھی کیا، جو یونیسکو کے عالمی ثقافتی ورثے میں شامل ہے یہ وہ تاریخی مقام ہے جو 1420 میں منگ خاندان کے دور میں تعمیر کیا گیا تھا اور اسے شاہی قربانیوں اور اچھی فصل کی دعا کے لیے استعمال کیا جاتا تھا۔

امریکی خبر رساں ایجنسی ’ایسوسی ایٹڈ پریس‘ کے مطابق جب امریکی صدر ٹیمپل آف ہیون پہنچے تو ان سے سوال کیا گیا کہ صدر شی جن پنگ کے ساتھ ان کی بات چیت کیسی رہی؟جس پر صدر ٹرمپ نے ان مذاکرات کو ”بہترین“ قرار دیا،لیکن ٹرمپ نے اس حوالے سے پوچھے گئے مزید سوالات کا جواب نہیں دیا کہ آیا ان کے درمیان تائیوان کے معاملے پر بھی بات ہوئی ہے یا نہیں۔

تاہم، چین کی وزارت خارجہ کی ترجمان ماؤ ننگ نے سوشل میڈیا پلیٹ فارم ’ایکس‘ پر جاری بیان میں کہا کہ بیجنگ میں ہونے والی حالیہ ملاقات کے دورا ن چینی صدر شی جن پنگ نے امریکی صدر ڈونلڈ ٹرمپ پر واضح کر دیا ہے کہ تائیوان کا معاملہ چین امریکا تعلقات میں سب سے زیادہ حساس اور اہم حیثیت رکھتا ہے، اگر اس مسئلے کو صحیح طریقے سے حل کیا گیا تو دونوں ملکوں کے تعلقات مستحکم رہیں گے، لیکن اگر اس میں کوتاہی برتی گئی تو دونوں ممالک کے در میان ٹکراؤ اور بڑے تنازعات جنم لے سکتے ہیں جس سے پورے تعلقات خطرے میں پڑ جائیں گے۔

ماؤ ننگ کے مطابق، صدر شی جن پنگ نے زور دیتے ہوئے کہا کہ تائیوان کی آزادی اور آبنائے تائیوان میں امن دو ایسی چیزیں ہیں جو آگ اور پانی کی طرح ایک ساتھ نہیں رہ سکتیں اس خطے میں امن اور استحکام کو برقرار رکھنا ہی چین اور امریکا کے درمیان سب سے بڑا مشترکہ نکتہ ہونا چاہیے۔