Author: Ayesha Rehmani

امیر جماعت اسلامی حافظ نعیم الرحمان نے کہا ہے کہ تشدد کی راہ اپنانے والے خود اپنی قبر کھود رہے ہیں۔

باغی ٹی وی : امیر جماعت اسلامی حافظ نعیم الرحمان نے ’ ایکس ‘ پر جاری بیان میں کہا کہ ہمیشہ کہا جو جیتا ہے اسے جیتنے دو، ہارنے والوں کو مسلط نہ کرو، ‏کراچی میئر سے لے کر عام انتخابات تک فارم 47 کی پیداوار نمائندوں کو مسلط کیا گیا، عوام کے جمہوری حقوق پر ڈاکا ماراگیا، ‏یہ بات واضح ہے کہ موجودہ حکومت فارم 47 کی جعلی حکومت ہے۔

انہوں نے کہا کہ عام انتخابات میں تحریک انصاف کو کم از کم دو تہائی اکثریت ملی ہے، ہنگامی بنیادوں پر جوڈیشل کمیشن بناکر فارم 45 کی بنیاد پر عوام کی اصل منتخب کردہ حکومت لائی جائے عمران خان سمیت تمام سیاسی قیدیوں کو رہا کیا جائے، اور 26 ویں آئینی ترمیم کالعدم قراردی جائے،تشدد کی راہ اپنانے والے خود اپنی قبر کھود رہے ہیں۔

دوسری جانب مسلم لیگ ن کے رہنما سینیٹرعرفان صدیقی نے کہا ہے کہ آج کریں یا کل، فیصلہ کرنا پڑے گا کہ کیا بدامنی، لاقانونیت، فتنہ و فساد، قتل و غارت گری اور پاکستان مخالف ایجنڈے پر عمل پیراگروہ ”سیاسی جماعت“ کہلانے کاحق رکھتا ہے؟

سماجی رابطے کی ویب سائٹ ایکس پر بیان میں عرفان صدیقی نے کہا کہ پاکستان کی 77 سالہ تاریخ میں کون سی سیاسی جماعت ہے جس نے صوبائی طاقت کے ذریعے وفاق پر لشکر کشی کی ہو، فائرنگ کی ہو، آنسو گیس پھینکی ہو، نصف درجن اہلکاروں کو قتل اور سیکڑوں کو زخمی کر دیا ہو؟پی ٹی آئی 9 مئی 2023 کے بعد ہرگز سیاسی جماعت نہیں رہی تھی لیکن اسے لمبی ڈھیل دی گئی، نتیجہ یہ کہ سیاسی جھنڈا اٹھائے خونخوار لشکر لاشیں گراتا، خون بہاتا، 9 مئی سے کہیں بڑا 9 مئی ساتھ لئے اسلام آباد تک آن پہنچا ہے۔

سینیٹرعرفان صدیقی کا کہنا تھا کہ لاشیں اُٹھاتی اور جنازے پڑھتی ریاست نے آئینی ذمہ داری پوری کرنے کے لئے ردعمل دیا تو پھر یہ فسادی گروہ مظلومیت کی چادر اوڑھ کر“ سیاسی حقوق“ کا واویلا شروع کر دے گا، پی ٹی آئی کے بارے میں واضح اور دوٹوک فیصلے کا وقت آپہنچا ہے، مزید تاخیر بہت مہنگی پڑے گی۔

اسلام آباد: وزیر اعلیٰ خیبر پختونخوا کے مشیر برائے اطلاعات بیرسٹر سیف نے کہا ہے کہ ہمارے مطالبات پورے کیے بغیر مسئلہ خوشگوار انداز میں حل ہونا ممکن نہیں-

باغی ٹی وی: نجی ٹی وی سے گفتگو کرتے ہوئے کہ بیرسٹر سیف نے کہا کہ ہمارا اعلان ڈی چوک سے متعلق تھا لیکن انتظامیہ کی طرف سے ڈی چوک کی اجازت نہیں مل رہی تھی،انتظامیہ کی تجویز آئی کے اسلام آباد کے مضافات میں جلسہ کریں یہ تجویز ہم بانی پی ٹی آئی کے پاس لے کر گئے جس پر انہوں نے آمادگی کا اظہار کیا، جب مضافات میں جلسے کی تجویز ساتھیوں سے ڈسکس کی تو ساتھیوں نے ماننے سے انکار کیا، بشریٰ بی بی نے کہا کہ وہ ڈی چوک ہی جائیں گی، اس وجہ سے تجویز قبول نہ ہوسکی۔

بیرسٹر سیف نے کہا کہ ہمارے مطالبات پورے کیے بغیر مسئلہ خوشگوار انداز میں حل ہونا ممکن نہیں،گزشتہ رات کے مذاکرات میں احتجاج اور رہائی سے متعلق مثبت پیشرفت نہ ہوسکی، بانی پی ٹی آئی کی رہائی قانونی عمل سے ہونی ہے، اس قانونی عمل کا بٹن حکومت کے ہاتھ میں ہے، یہ مقدمات پر اثرانداز ہورہے ہیں، احتجاج کی وجہ یہی ہے کہ ہماری قیادت کے خلاف قانون کو غیر قانونی طریقے سے استعمال کیا جارہا ہے۔

دوسری جانب جمیعت علماء اسلام کے سینیٹر کامران مرتضیٰ نے نجی ٹی وی کے پروگرام میں گفتگو کرتے ہوئے بشریٰ بی بی کو اسٹبلشمنٹ سے سپورٹ حاصل ہونے کا امکان ظاہر کیا ہے،’مجھ سے اگر پوچھیں گے تو کہیں نہ کہیں پر ایسا ممکن ہے، اس کے بغیر شاید یہاں تک آنا ممکن نہیں تھا-

اسلام آباد: وفاقی وزیر داخلہ محسن نقوی نے کہا ہے کہ فیصلہ ہوا ہے کہ اب دھرنے والوں سے کوئی مذاکرات کسی صورت نہیں ہوں گے۔

باغی ٹی وی: محسن نقوی نے ڈی چوک پر وزیر اطلاعات عطا تارڑ کے ہمراہ میڈیا سے گفتگو کرتے ہوئے کہا کہ سب نے دیکھ لیا احتجاج کتنا پرامن ہے، ان کی کوشش تھی کی کسی طرح لاشیں لیں ،احتجاج کرنے والے مسلح ہیں، احتجاج والوں سے کسی قسم کی بات نہیں کریں گے ،بہت واضح ہے کہ اب کوئی مذاکرات کسی صورت نہیں ہوں گے، مذاکرات پُرامن لوگوں کے ساتھ ہوتے ہیں، پاکستانی شہریوں کے ساتھ ہوتے ہیں، ان افغانوں کے ساتھ اور انتہا پسندوں کے ساتھ نہیں ہوں گے،موجودہ حالات کی مکمل ذمہ دارایک عورت ہے،

وزیر داخلہ نے کہا کہ وزیراعظم کی ہدایت تھی علاقہ کلیئر رکھنا ہے، انہوں نے آنا تھا آگئے، لیکن اب ان لوگوں سے کسی قسم کے مذاکرات نہیں ہوں گے، وزیراعظم کی میٹنگ میں واضح فیصلہ ہے کہ کوئی مذاکرات نہیں ہوں گے، دو دن میں جو نقصانات ہوئے ہیں اس کی ذمہ دار ایک عورت ہے، یہ غریب کے بچے کو ڈھال بناتے ہیں۔

ریاست کے صبر کو آزمایا جارہا ہے، یہ ریاست کو چیلنج کرنے آئے ہیں ، عطاتارڑ

وزیر اطلاعات عطا اللہ تارڑ نے کہا کہ گولی چلانا بہت آسان کام ہے، ایک چھٹّا ماریں یہ سب کلئیر ہوجائیں گے یہ غریب کے بچے کو ڈھال بناتے ہیں، قاسم کو آگے لے کر آئیں یہاں شیل اور بنٹے مارے گئے، کسی کا خیال ہے کہ یہ بنٹے پھینک کر رہا کر والیں گے تو غلط ہے۔

انہوں نے کہا کہ وزیرداخلہ نے تمام صورتحال میں لیڈ کیا ہے،بیلاروس کے صدر کے دورے میں تعاون کے معاہدوں پر دستخط ہوئے ،پرتشدداحتجاج میں غریبوں کے بچوں کوایندھن بنایا گیا،ریاست بالکل کمزور نہیں ،رٹ کو برقرار رکھیں گے،بشریٰ بی بی اور بانی پی ٹی آئی کے بچے احتجاج میں شامل کیوں نہیں-

عظا تارڑ نے بتایا کہ ایک دیہاڑی دار مزدور نے کہا کہ مجھے پیسے دیئے گئے، ایک بچے نے کہا کہ میں افغانستان سے آیا ہوں بشریٰ بی بی کہہ رہی ہیں علی امین آپ لیڈ کرو میں پیچھے آرہی ہوں، آپ میں ہمت ہے تو اپنے بچے بلاؤ، میں دعوت دیتا ہوں آپ فرنٹ پر آئیں، لیڈ کریں، علی امین بشریٰ بی بی کے جھانسے میں نہیں آرہا، وہ کہہ رہی ہے آگے لگو ہم پیچھے سے آتے ہیں، لیکن اسے بھی پتا ہے آگے لگنے کا مطلب کیا ہوتا ہے-

انہوں نے کہا کہ عدالتوں میں مقدمات کا سامنا کرنے کی بجائے جتھہ اپنے مقاصد حاصل کرنا چاہتا ہےریاست کے صبر کو نہ آزمایا جائے،منصوبہ بندی کے تحت یہ لوگ لاشیں گرانا چاہتےہیں،تخریب کار شرپسند اور افغان شہری پرتشدد احتجاج میں ملوث ہیں،آنسو گیس کے شیل ،پتھر رکھنے والوں کو پرامن نہیں کہہ سکتے،عوام کے جان ومال کا تحفظ یقینی بنایا جائے گا-

عطا تارڑ نے کہا کہ کسی قسم کے مذاکرات نہیں ہوں گے، ہم انہیں لاشیں نہیں دیں گے، یہ لاشیں لینے آئی ہیں، ہم ان کے ہاتھوں میں نہیں کھیلیں گے ، ریاست کی کوئی کمزوری نہیں ہے، جو بندے گرفتار ہوئے وہ رو رہے تھےڈی چوک سے جو لوگ گرفتار ہوئے ہیں ان کی اب ضمانتیں نہیں ہوں گی، جو افغان شہری گرفتار ہوئے ہیں ان پر اضافی دفعات لگا رہے ہیں تاکہ آئندہ کوئی غیر ملکی ایسا نہ کرے، وقت آنے پر پی ٹی آئی پر پابندی کی کارروائی بھی کریں گے۔

اسلام آباد: سپریم کورٹ کے جج جسٹس منصور علی شاہ نے پاکستان پیپلزپارٹی (پی پی پی) کے بانی ذوالفقار علی بھٹو کی سزا کے خلاف صدارتی ریفرنس کے فیصلے کے 5 ماہ بعد اضافی نوٹ جاری کردیا ہے۔

باغی ٹی وی: سپریم کورٹ کی ویب سائٹ پر جسٹس منصور علی شاہ کا 6 صفحات پر مشتمل اضافی نوٹ جاری کردیا گیا ہے جس میں انہوں نے کہا ہے کہ ذوالفقار علی بھٹو کا ٹرائل سیاسی ٹرائل کی کلاسیک مثال ہے ذوالفقارعلی بھٹو کیس میں تفتیش کی منظوری غیر قانونی طور پر دی گئی، سیاسی ٹرائل میں من پسند نتائج کے لیےغیر شفاف طریقے آزمائے جاتے ہیں۔

جسٹس منصور علی شاہ نے اپنے نوٹ میں کہا ہے کہ سیاسی ٹرائل میں عموما سابق اتحادیوں کے ہی بیانات لے کر عموما گواہ بنایا جاتا ہےبھٹو نے خود کہا تھا آئین کی چھتری تلے ہی عدلیہ آزاد رہ سکتی ہے اور کہا تھا صحرا میں پھول نہیں کھل سکتے آمرانہ دور میں ججوں کو یاد رکھنا چاہیے ان کی اصل طاقت عہدے پر فائز رہنا نہیں آزادی کو قائم رکھنا ہے، جسٹس دوراب پٹیل نے بھٹو کیس میں جرات مندی سے اختلاف کیا،دوراب پٹیل نے ضیا کے جاری کردہ عبوری آئین کے تحت حلف اٹھانے سے انکار کیا۔

جسٹس منصور علی شاہ نے نوٹ میں کہا کہ سمجھوتہ کر لینے کی میراث چھوڑنے کے بجائے عہدہ کھودینا ایک چھوٹی سی قربانی ہے، جج کی بہادری کا اندازہ بیرونی دباؤ کا مقابلہ کرنے، مداخلت کے خلاف ثابت قدم رہنے سے لگایا جا سکتا ہے، آمرانہ مداخلتوں کا مقابلہ کرنے میں تاخیر قانون کی حکمرانی کے لیے مہلک ثابت ہو سکتی ہے، دراندازیوں کی فوری مزاحمت اور اصلاح کی جانی چاہیے اور عدلیہ کا کردار انصاف کا دفاع کرنا ہے۔

واضح رہے کہ سابق چیف جسٹس قاضی فائز عیسیٰ کی سربراہی میں سپریم کورٹ کی جانب سے ذوالفقار علی بھٹو ریفرنس کا تفصیلی فیصلہ 5 جولائی 2024 کو جاری کیا گیا تھا۔

اسلام آباد: انسپکٹر جنرل (آئی جی) اسلام آباد پولیس علی ناصر رضوی نے کہا ہے کہ ہائیکورٹ کے حکم پر ہر صورت میں عمل کروانا ہے جن کی ایما پر یہ سب کچھ ہو رہا ہے ان کو فوری گرفتار کریں گے-

باغی ٹی وی : آئی جی اسلام آباد نے پولیس افسران اور اہلکاروں سے خطاب کیا اور ان کا حوصلہ بلند کیا اس موقع پر ان کا کہنا تھاکہ ہائیکورٹ کے حکم پر ہر صورت میں عمل کروانا ہے، شرپسندوں سے اسلام آباد کو فوری خالی کروانا ہے،انہوں نے ہدایت کی کہ کسی شرپسند کے ساتھ کوئی نرمی نہ برتی جائے، قانون کے مطابق کارروائی کریں۔

آئی جی اسلام آباد کا کہنا تھاکہ جن کی ایما پر یہ سب کچھ ہو رہا ہے ان کو فوری گرفتار کریں گے، شرپسندوں نے پولیس پر فائرنگ کی، ہمارے کئی جوان زخمی ہیں، احتجاج کی آڑ میں غیر ملکی شرپسند عناصر جھتے میں موجود ہیں، غیر ملکی شرپسندوں کی نشاندہی کرکے ان کا قلع قمع کرنا ہے،آئی جی اسلام آباد نے ڈی چوک پر پولیس کے تازہ دم دستے بھجوا دیئے۔

دوسری جانب تحریک انصاف کے احتجاجی مظاہرین نے آج اسلام آباد میں خیبرپختونخوا کے وزیراعلیٰ علی امین گنڈاپور کو شدید مزاحمت کا سامنا کرتے ہوئے انہیں کسی بھی جگہ جانے سے روک دیا،مظاہرین نے 7ویں ایوینیو پر کلثوم انٹرنیشنل اسپتال کے سامنے جمع ہو کر وزیراعلیٰ خیبر پختونخوا کو لینے آنے والی گاڑی کو روک دیا۔

وزیراعلیٰ علی امین گنڈا پور کو کسی ضروری کام کے لیے روانہ ہونا تھا، تاہم مظاہرین نے انہیں جانے کی اجازت نہیں دی اور ان کے خلاف سخت نعرے بازی کی،مظاہرین کا کہنا تھا کہ "اس بار علی امین گنڈاپور کو نہیں بھاگنے دیں گے، احتجاجی کارکنان نے ڈی چوک کے نعرے بھی لگائے اور گنڈاپور کے خلاف تنقید کی، ان کا کہنا تھا کہ عوام گولیاں کھا رہی ہیں، اور وزیراعلیٰ خود گاڑیوں میں آرام سے بیٹھے ہیں۔

دبئی: متحدہ عرب امارات (یو اے ای)نے پاکستان کے لیے ویزوں کی پابندی کے حوالے سے پھیلائی جانے والی افواہوں کی سختی سے تردید کی ہے۔

باغی ٹی وی : یو اے ای کے قونصل جنرل ڈاکٹر بخیت عتیق ال رمیثی نے ایک تقریب کے دوران کہا کہ ’یہ جھوٹا دعویٰ کیا جا رہا ہے کہ یو اے ای پاکستانیوں کو ویزے نہیں دے رہا، ’جو بھی ویزا حاصل کرنا چاہتا ہے وہ یو اے ای ویزا سینٹر آئے۔‘

قونصل جنرل نے اسلام آباد کے ساتھ یو اے ای کی حمایت کو بھی دوبارہ یاد دلایا اور کہا کہ ’ہمیں اپنے حکومت سے پاکستان کے ساتھ کھڑا ہونے کا حکم ملا ہے، آئندہ ایک یا دو ماہ میں پاکستان میں سرمایہ کاری کے حوالے سے اہم ترقی دیکھنے کو ملے گی۔

یہ بیان اُس وقت سامنے آیا جب گزشتہ ہفتے پاکستان کی سفارتخانے نے میڈیا رپورٹس کو مسترد کیا جن میں کہا گیا تھا کہ یو اے ای حکومت نے پاکستانیوں پر ویزا پابندی لگانے کے حوالے سے ایک دستاویز جاری کی تھی، ان رپورٹس میں یہ بھی دعویٰ کیا گیا تھا کہ یو اے ای کابینہ کے اجلاس میں پاکستانیوں کے ویزے پر پابندی عائد کرنے پر غور کیا گیا تھا۔

اس سے قبل اگست میں بھی یو اے ای قونصل جنرل نے ایسی افواہوں کی تردید کی تھی اور کہا تھا کہ پاکستانیوں کو سوشل میڈیا پر اپنے ملک، اداروں یا سیاستدانوں کے خلاف پروپیگنڈا کرنے سے بچنا چاہیے،چاہے آپ پاکستان میں ہوں یا یو اے ای میں، جو کچھ بھی آپ سوشل میڈیا پر شیئر یا لائیک کرتے ہیں وہ آپ کے لیے ایک ڈیجیٹل نشان چھوڑتا ہے، اگر آپ کچھ غلط شیئر کرتے ہیں تو اس کا نتیجہ ویزا رد یا بین ہو سکتا ہے۔