Author: Ayesha Rehmani

لاہور:پیٹرولیم ڈیلرز ایسوسی ایشن نے پی ٹی آئی احتجاج اور راستوں کی بندش کے باعث پیٹرولیم مصنوعات کے بحران کا خدشہ ظاہر کیا ہے۔

باغی ٹی وی: پیٹرولیم ڈیلرز ایسوسی ایشن کے سیکریٹری خواجہ عاطف نے کہا کہ پی ٹی آئی احتجاج کی وجہ سے پیٹرولیم مصنوعات کا معاملہ سنگین ہوگیا کیونکہ راستے بند ہونے سے تیل کی سپلائی متاثر ہو رہی ہےصوبائی دارالحکومت سمیت پنجاب بھر میں پیٹرولیم مصنوعات کی قلت پیدا ہونے کا خدشہ بڑھ گیا ہے، اگر یہی صورتحال رہی تو معاملات سنگین ہوسکتے ہیں۔

انہوں نے بتایا کہ صوبائی دارالحکومت کی روزانہ کی کھپت 50 لاکھ لیٹر سے زائد جبکہ پورے پنجاب کی 5 کروڑ لیٹر کے قریب ہے اور اب پمپس کے پاس تیل کا اسٹاک صرف تین دن کا رہ گیا ہے، حکومت فوری پیٹرول کی سپلائی کو بحال کرائےصوبائی دارالحکومت میں 2 سے 3 روز کے پیٹرول کا اسٹاک ہے، حکومت پیٹرولیم کمپنیوں کو سپلائی بحال کرنے کی ہدایت کرے اور سپلائی چین بحال کرانے کیلئے اقدامات کیے جائیں۔

واضح رہے کہ لاہور میں انتظامیہ نے پی ٹی آئی احتجاجی سرگرمیوں کے پیش نظر ایک مرتبہ پھر رنگ روڈ ٹریفک کے لیے بند کردیا ہے، پولیس ذرائع نے بتایا کہ انتظامیہ نے امن و امان کی صورتحال کے پیش نظر رنگ روڑ ٹریفک کیلئے بند کیا ہے،پی ٹی آئی احتجاج کو ناکام بنانے کے لیے پنجاب کی صوبائی حکومت نے لاہور کے تمام داخلی اور خارجی راستے سیل کردیئے تھے گزشتہ روز لاہور کے ذیلی راستوں کو جزوی کھول دیا گیا تھا۔

لاہور: وزیر اعلیٰ پنجاب مریم نواز سے ایشیائی ترقیاتی بینک کی کنٹری ڈائریکٹر برائے پاکستان ریزیڈنٹ مشن کی ڈاکٹر ایما ژاؤچن فین نے ملاقات کی-

باغی ٹی وی : ملاقات میں جاری ترقیاتی منصوبوں، معیشت کی مضبوطی اور بنیادی ڈھانچے کی بہتری کے لیے تعاون پر تبادلہ خیال کیا گیا،اور زراعت، صحت، تعلیم، ماحولیاتی تحفظ اورڈیجیٹل ڈیویلپمنٹ پر تعاون بڑھانے پر غور کیا گیا، جلال پور ایریگیشن پراجیکٹ اور کلین انرجی کے بارے میں بات چیت کی گئی-

ایشیائی ترقیاتی بینک کی کنٹری ڈائریکٹر ڈاکٹر ایما ژاؤچن فین نے وویمن ایمپاورمنٹ اور پنجاب حکومت کے عوامی فلاحی اقدامات کو سراہا -وزیر اعلیٰ نے ایشیائی ترقیاتی بینک کی پنجاب کے مختلف منصوبوں میں مالی و تکنیکی معاونت کی تعریف کی-

وزیراعلیٰ مریم نواز نے اس موقع پر کہاکہ اے ڈی بی کا تعاون عوام کی خوشحالی اور معیشت کی بحالی میں اہم کردار ادا کر رہا ہے، پنجاب حکومت سماجی و اقتصادی ترقی کے لیے جامع منصوبہ بندی کے تحت آگے بڑھ رہی ہے، ایشیائی ترقیاتی بنک کے ساتھ مزید اشتراک کار پنجاب میں ترقی کے مقاصد کو مزید تقویت دے گا۔

ایشیائی ترقیاتی بینک کی کنٹری ڈائریکٹر برائے پاکستان ریزیڈنٹ مشن کی ڈاکٹر ایما ژاؤچن فین نے کہاکہ ایشیائی ترقیاتی بینک پاکستان، خصوصاً پنجاب کے ساتھ تعاون کو مزید وسعت دینے کا خواہاں ہے پنجاب کی کلائیمٹ پالیسی ماحول اور اکانومی کیلئے سودمند ثابت ہوگی-

لاہور: پنجاب حکومت نے صوبے میں دفعہ 144 کے نفاذ میں 3 دن کی توسیع کردی۔

باغی ٹی وی: پنجاب حکومت کی جانب سے جاری نوٹیفکیشن کے مطابق منگل 26 سےجمعرات 28 نومبر تک دفعہ 144کے نفاذ میں توسیع کی گئی ہے،دفعہ 144 میں توسیع کا فیصلہ امن وامان، انسانی جانوں اور املاک کے تحفظ کے لیےکیا گیا ہے،پنجاب میں 3 دن کے لیے ہرقسم کےاحتجاج، جلسے، جلوس، ریلیوں اور دھرنوں پرپابندی عائد کردی گئی ہے۔

خیال رہے کہ صوبائی کابینہ کمیٹی برائے امن وامان کی سفارش پرگزشتہ 3 دنوں سے پنجاب میں دفعہ 144 نافذ ہے۔

دوسری جانب پاکستان تحریک انصاف نےکل پنجاب بھر میں احتجاج کی کال دیدی، پی ٹی آئی رہنما حماد اظہر نے کہا ہے کہ تمام ٹکٹ ہولڈرز کو ہدایات دے دی گئی ہیں، سب دوبارہ احتجاج کیلئے نکلیں گے۔

قائم مقام صدر پی ٹی آئی پنجاب حماد اظہرنے ٹویٹ میں کہا ہے کہ پنجاب کے تمام بڑے شہروں میں دوسرا راؤنڈ ہوگا، سب پی ٹی آئی رہنما وکارکنان اسلام آباد کا رخ کریں گے،نئی حکمت عملی کے مطابق کل پنجاب بھر میں احتجاج کی کال دیدی ہے، اس حوالے تمام پی ٹی آئی ٹکٹ ہولڈرز کو ضروری ہدایات دے دی گئی ہیں۔