Author: Khalid Mehmood Khalid

بھارتی ریاست مہاراشٹر کے شہراورنگ آباد میں انسانیت کو شرمسار کر دینے والا واقعہ سامنے آیا ہے ۔ یہاں ایک بیٹے نے اپنی 90 سال کی بوڑھی ماں کو جنگل میں پھینک دیا اور وہاں سے فرار ہوگیا ۔ خبر ہے کہ عمر رسیدہ خاتون کورونا پازیٹیو تھی ، جس کی وجہ سے گھر کے اراکین ان کو اپنے ساتھ رکھنے کیلئے تیار نہیں تھے ۔ بعد میں اہل خانہ نے رات کے اندھیرے میں بوڑھی خاتون کو اورنگ آباد کے کچی گھاٹی علاقہ کے جنگل میں پھینک دیا اور گھر آگئے ۔ پولیس نے معاملہ درج کرکے اہل خانہ کی تلاش شروع کردی ہے۔
اطلاعات کے مطابق اورنگ آباد کے کچی گھاٹی علاقہ کے جنگل میں لوگوں کو ایک بوڑھی خاتون پڑی ملی ۔ 90 سال کی بوڑھی خاتون کو ایک چادر میں جنگل کے درمیان چھوڑ دیا گیا تھا ۔ واقعہ کی اطلاع ملنے پرپولیس اہلکار وہاں پہنچے اور اس عمر رسیدہ خاتون کو اسپتال میں داخل کیا تو معلوم ہوا کہ وہ کورونا پازیٹیو ہے ۔ بوڑھی خاتون سے پوچھ گچھ میں پتہ چلا کہ کورونا کی خبر اہل خانہ کو ہوگئی تھی اور اس کے بعد اہل خانہ نے اس معمر خاتون کو جنگل میں پھینک دیا اور وہاں سے فرار ہوگئے۔
پولیس کے مطابق معمر خاتون ایک گھنٹے تک جنگل میں تڑپتی رہی ۔ خاتون کو ضلع اسپتال میں بھرتی کرایا گیا ہے ۔ سن رسیدہ خاتون کی حالت مستحکم بتائی جارہی ہے ۔ پولیس نے اس پورے واقعہ کے سلسلہ میں معاملہ درج کرلیا ہے اور اہل خانہ کی تلاش تیز کردی ہے ۔

بھارتی شہر ممبئی میں طوفانی بارش رکنے کے بعد شہر میں کورونا وبائی مرض کے ساتھ ساتھ موسمی بیماریوں کے پھیلنے کاخطرہ بھی بڑھ گیا ہے جس میں لیپٹو اسپائروسس کا خطرہ سب سے زیادہ ہے۔ یہ بیماری بارش کے جمع شدہ پانی یا پانی میں زخمی شخص کے گزرنے سے پھیلتی ہے۔ موسلادھاربارش کے بعد اب وبائی مرض کورونا وائرس کے پھیلاؤ کے خطرہ کے بعد لیپئو اسپائروسس کا بھی خطرہ بڑھ گیا ہے اس لئے بی ایم سی نے شہریوں کو گمبوٹ پہن کر پانی میں گزرنے کا مشورہ دیا ہے اور کہا ہے کہ پانی میں زخمی شخص کے گزرنے سے لیپٹو اسپائروسس ہونے کا خطرہ لاحق ہے اس لئے شہریوں کو احتیاط برتنے کی ضرورت ہے۔ لیپٹو وائرس کے پھیلاؤ کو روکنے کے لئے احتیاط ضروری ہے۔ اگر کوئی زخمی شخص بارش کے پانی میں گزرتاہے تو اس سے بھی لیپٹو اسپائروسس کا پھیلاؤ ہو سکتا ہے۔ ایسی صورت میں زخمی شخص کو 24 یا 72 گھنٹے میں طبی احتیاط کے تحت طبی امداد فراہم کرنا ضروری ہے۔ جو لوگ زیادہ وقت تک بارش کےجمع پانی میں رہتے ہیں ایسے افراد اور بی ایم سی عملہ کے لئے ڈاکٹر کے مشورہ کے بعد وہ ادویات کا استعمال کرسکتےہیں جن کاچھ ہفتہ استعمال کیاجاسکتا ہے۔کیونکہ زیادہ دیرتک پانی میں رہنا بھی خطرناک ہے اسلئے احتیاط ضروری ہے۔ ممبئی عظمیٰ ہیلتھ ڈیپارٹمنٹ کے مطابق، موسم باراں میں بخار، ڈینگو اور ملیریا کا خطرہ زیادہ ہوتا ہے اس لئے چھوٹی یا معمولی بیماری کو بھی نظر انداز نہ کریں بلکہ فورا ڈاکٹر سے رابطہ کریں۔ اگر آپ پانی سے گز ررہے ہیں تو پیر کو صابن سے اچھی طرح دھو لیں۔ اگر بخار ہے تو فورا ڈاکٹر سے رجوع کریں۔ گھروں اور آس پڑوس میں کچرا جمع نہ کریں اور چوہوں سے حفاظت کے لئے صاف صفائی اور پانی جمع نہ ہونے دیں کیونکہ پانی کے سبب ہی یہ بیماری پھیلتی ہے۔

بھارتی اپوزیشن لیڈر اور کانگریس کے سابق صدر راہول گاندھی نے کورونا وائرس کے حوالہ سے مودی حکومت پر حملہ کرتے ہوئے کہا ہے کہ ملک میں کوروناوائرس کے کیسز 20 لاکھ سے تجاوز کر چکے ہیں لیکن حالات کو قابو کرنے کے لئے کوئی ٹھوس قدم نہیں اٹھا ئے جارہے ہیں۔ راہول گاندھی نے جمعہ کو طنزیہ لہجے میں حکومت پر حملہ کرتے ہوئے ٹوئٹ کیا، ’’20 لاکھ کے اعداد پار، غائب ہے مودی سرکار‘‘۔انہوں نے 17جولائی کو کورونا کیسز کے بارے میں ایک ٹویٹ پوسٹ کیا تھا ، جس میں انہوں نے کہا تھا’’1000000 کے اعداد پار ۔ اسی تیزی سے کووڈ۔ 19 پھیلا تو 10 اگست تک ملک میں 2000000 سے زیادہ متاثرین ہوں گے‘‘۔ انہوں نے اس وقت یہ مشورہ دیا تھا کہ حکومت اس وبا کو روکنے کے لئے ٹھوس اور منظم طریقے سے اقدامات کرے۔ واضح رہے کہ بھارت میں کورونا وائرس کے بڑھتے قہر کے گزشتہ 24 گھنٹوں کے دوران 62 ہزار سے زائد کیسز رپورٹ ہوئے۔ جمعہ کے روز وزارت صحت کی جانب سے جاری تازہ ترین اعداد و شمار کے مطابق کورونا وائرس کے کیسز کی تعداد بڑھ کر 2027075 ہوگئی ہے اور 886 افراد کی ہلاکت کے ساتھ ہی اموات کی مجموعی تعداد 41585 ہوگئی ہے