Author: ممتاز حیدر

وفاقی حکومت نے جبری گمشدگیوں پر انکوائری کمیشن کی تشکیلِ نو کرتے ہوئے جسٹس (ر) سید ارشد حسین شاہ کو کمیشن کا چیئرمین تعینات کر دیا۔

جبری گمشدگیوں پر قائم انکوائری کمیشن کے جاری کردہ اعلامیہ میں کہا گیا ہے کہ کمیشن کی تشکیل نو کرتے ہوئے جسٹس (ر) نذر اکبر ممبر سندھ، ریٹائرڈ جج محمد بشیر ممبر اسلام آباد اور جسٹس (ر) سید افسر شاہ کو ممبر خیبرپختونخوا تعینات کیا گیا ہے، جسٹس (ر) سید ارشد حسین شاہ کو انکوائری کمیشن کا چیئرمین تعینات کیا گیا ہے اور چیئرمین نے لاہور اور کراچی میں 50 سے زائد کیسز کی سماعت بھی کی ہے، جسٹس (ر) ارشدحسین کے عہدہ سنبھالنے کے بعد جولائی میں کمیشن نے 70 کیسز نمٹائے اور 15 نئی شکایات رجسٹرڈ کیں جبکہ کمیشن نے گمشدہ افرادکے خاندانوں کی مالی معاونت کے لیے 50 لاکھ روپےکے پیکج پر عمل درآمد بھی شروع کردیا ہے،اعلامیہ کے مطابق کمیشن کو اب تک مبینہ جبری گمشدگیوں سے متعلق 10ہزار607 کیسز موصول ہوئے اور 31 جولائی 2025 تک کمیشن نے 8770 کیسز (82 فیصد) کیسز نمٹا دیے۔

اعلامیہ میں کہا گیا ہے کہ چیئرمین کمیشن کی پنجاب، خیبرپختونخوا، اسلام آباد، سندھ کے داخلہ سیکرٹریز، آئی جیز پولیس سے بھی ملاقاتیں ہوئیں جس میں چیئرمین کمیشن نے تمام صوبوں کی مشترکہ تفتیشی ٹیمز اورصوبائی ٹاسک فورسز پر رپورٹس بروقت جمع کرانے پر زور دیا۔

وفاقی دارالحکومت اسلام آباد میں ہوٹلوں کو شراب فروخت کرنے کی قانونی اجازت سے متعلق اہم تفصیلات قومی اسمبلی میں پیش کر دی گئی ہیں۔

وزارت داخلہ کی جانب سے جمع کرائے گئے تحریری جواب میں اس بات کی تصدیق کی گئی ہے کہ اسلام آباد کے پانچ ہوٹلوں کو شراب فروخت کرنے کے لیے باقاعدہ طور پر لائسنس جاری کیے گئے ہیں۔جن میں میریٹ، سرینا، بیسٹ ویسٹرن اور موو اینڈ پک ہوٹل شامل ہیں ،وزارت داخلہ نے بتایا کہ ان ہوٹلوں کو "L-2 لائسنس” جاری کیے گئے ہیں، جو غیر مسلم شہریوں اور غیر ملکی مہمانوں کو شراب کی فراہمی کے لیے استعمال کیے جاتے ہیں۔ اس لائسنس کے تحت ہوٹلوں کو مخصوص شرائط کے ساتھ شراب فروخت کرنے کی اجازت حاصل ہوتی ہے۔تحریری جواب میں مزید بتایا گیا کہ L-2 لائسنس کے حصول کے لیے فیس 5 لاکھ روپے مقرر ہے، جبکہ اس لائسنس کی سالانہ تجدید کے لیے 1 لاکھ 50 ہزار روپے ادا کرنا ضروری ہے۔ذرائع کے مطابق یہ لائسنس ایکسائز اینڈ ٹیکسیشن ڈیپارٹمنٹ کی منظوری سے جاری کیے جاتے ہیں، اور ہر ہوٹل کو مخصوص کوٹے کے تحت شراب کی فروخت کی اجازت دی جاتی ہے۔

وزارت داخلہ نے یہ بھی واضح کیا کہ یہ لائسنس صرف اُن ہوٹلوں کو جاری کیے جاتے ہیں جو قانونی طور پر رجسٹرڈ اور حکومتی قواعد و ضوابط پر پورا اترتے ہیں۔ ان ہوٹلوں میں شراب کی فروخت غیر مسلم صارفین اور غیر ملکی سیاحوں تک محدود ہوتی ہے۔قومی اسمبلی میں بعض اراکین نے اس معاملے پر اظہار خیال کرتے ہوئے مطالبہ کیا کہ حکومت شراب کی فروخت کے حوالے سے شفافیت کو یقینی بنائے اور اس بات کو یقینی بنایا جائے کہ اس سہولت کا غلط استعمال نہ ہو۔

دوسری جانب قومی اسمبلی میں قائد حذب اختلاف کا عہدہ خالی ہوگیا ۔قومی اسمبلی سیکرٹیرٹ عہدہ خالی ہونے کا جلد نوٹیفیکیشن جاری کرے گا۔ قائد حذب اختلاف کا عہدہ پی ٹی آئی کے عمر ایوب کے نا اہل ہونے پر خالی ہوا ہے۔

معرکہ حق کے بعد فضائی حدود کی بندش، پاکستان کو کتنا نقصان ہوا؟ وزیر دفاع نے تفصیلات پیش کردیں۔وزیر دفاع خواجہ آصف نے تحریری طور پر قومی اسمبلی کو بتایا کہ بھارتی ایئرلائنز کے لیے فضائی حدود کی بندش سے پاکستان ایوی ایشن اتھارٹی کو 401 ارب روپے کا نقصان ہوا۔ 2019 میں فضائی حدود کی بندش کے نتیجے میں 7.6 ارب روپے کا نقصان ہوا تھا۔ قومی خود مختاری اور سلامتی کے دفاع کا معاملہ ہو تو کوئی قیمت زیادہ نہیں ہوتی،

تحریک انصاف کے عمر ایوب جمشید دستی، احمد چٹھہ ،لطیف چترالی ،صاحبزادہ حامد رضا، زرتاج گل، رائے حسن نواز، اور رائے حیدر علی سابق اراکین قومی اسمبلی ہوگئے ، سپیکر قومی اسمبلی سردار ایاز صادق نے باضابطہ ایوان کو آگاہ کر دیا۔

وفاقی دارالحکومت اسلام آباد میں ضلعی انتظامیہ کی جانب سے پچاس سے زائد مساجد کو تحفظ قدرتی مناظر آرڈیننس 1966ء کے تحت نوٹسز جاری کیے گئے ہیں، فیصل مسجد سمیت کئی قدیمی و سرکاری سطح پر قائم مساجد بھی ان نوٹسز کی زد میں آ گئی ہیں،

ذرائع کے مطابق حالیہ دنوں میں اسلام آباد کے مختلف سیکٹرز اور نواحی علاقوں میں قائم درجنوں مساجد کو تحریری نوٹسز موصول ہوئے ہیں، جن میں کہا گیا ہے کہ ان مساجد کی تعمیرات نے قدرتی مناظر کو نقصان پہنچایا ہے اور یہ 1966ء کے تحفظِ قدرتی مناظر آرڈیننس کی خلاف ورزی ہے۔جن مساجد کو نوٹسز جاری کئے گئے ہیں ان میں اسلام آباد کی سب سے بڑی مسجد فیصل مسجد بھی شامل ہے اسی طرح راول ٹاؤن اسلام آباد کی مسجد جسے کروڑوں کا بجٹ لگا کر سی ڈی اے نے خود تعمیر کیا اسے بھی نوٹس جاری کیا گیا ہے ،ذرائع نے بتایا ہے کہ اسلام آباد انتظامیہ نے نہ صرف نوٹسز جاری کئے ہیں بلکہ مختلف سرکلز کے مجسٹریٹس نے مساجد کی انتظامیہ کو بلا کر تحریری جواب بھی جمع کرنے کا کہا ہے ،

ادھر دوسری طرف ان نوٹسز کے اجراء کے بعد دینی حلقوں میں شدید تشویش اور اشتعال پایا جا رہا ہے ۔ متعدد علمائے کرام، مدارس و مساجد کے منتظمین، اور دینی جماعتوں کے نمائندوں نے اس اقدام کو اسلام آباد انتظامیہ کی نااھلی اور مساجد و مدارس کو بے جا تنگ کرنے کا اقدام قرار دیتے ہوئے شدید الفاظ میں مذمت کی ہے اور تمام مکاتب فکر کے مشترکہ فورم تحریک تحفظ مساجد و مدارس کے قائدین نے اس حوالے سے مشترکہ لائحہ عمل طے کرنے کے لیے سرجوڑ لئے ہیں،تحریک کے ایک ذمہ دار نے ہمیں بتایا کہ اس سلسلے میں جلد اجلاس بلا کر اگلے لائحہ عمل کا اعلان کیا جائے گا ،تاھم اسلام آباد کی ضلعی انتظامیہ کی جانب سے تاحال اس پر کوئی واضح موقف سامنے نہیں آیا۔
رپورٹ، محمد اویس، اسلام آباد