لاہور:انگلینڈ کے خلاف ٹیسٹ سیریز سے قبل پریکٹس سیشن کے دوران قومی ٹیم کے بیٹر اظہرعلی کو حارث رؤف کا باؤنسر لگ گیا۔اطلاعات کے مطابق ہفتے کے روز قومی کرکٹ ٹیم کے کھلاڑی معمول کے مطابق پریکٹس مشگول تھے، اظہر علی بیٹنگ کی پریکٹس کررہے تھے۔
پریکٹس کےدوران اظہر علی کو حارث رؤف نے تیز رفتار باؤنسر کرائی،گیند ان کے ہیلمٹ پر لگی۔ گیند لگنےکےبعد ٹیم کے ڈاکٹر نے فوری طور پر اظہرعلی کا مکمل معائنہ کیا،یہ بھی اظہرعلی نے کچھ دیر آرام کے دوبارہ پریکٹس سیشن میں شرکت کی۔
واقعے کے بعد پی سی بی کے ترجمان نے کہا کہ اظہر علی بالکل خیریت سے ہیں۔پاکستان اور انگلینڈ کی ٹیموں کے درمیان تین ٹیسٹ میچوں پر مشتمل سیریز کا پہلا میچ یکم دسمبر سے راولپنڈی میں شیڈول ہے۔9 دسمبر سے ملتان میں دوسرا جب کہ تیسرا اور آخری ٹیسٹ میچ 17 دسمبر سے کراچی میں کھیلا جائے گا۔
انگلینڈ کے خلاف 3 ٹیسٹ پر مشتمل سیریز کے اسکواڈ کا اعلان ہونے کے بعد پاکستان کرکٹ کے حلقوں میں ٹیسٹ بیٹر فواد عالم کو ڈراپ کیے جانے کے فیصلے کو اس وقت سب سے زیادہ موضوع بحث سمجھا جارہا ہے۔
قومی ٹیم کے سابق ٹیسٹ کپتان شاہد آفریدی نے بھی اس بارے میں اپنی رائے کا اظہار کیا اور کہا کہ بائیں ہاتھ کے بیٹر کو اسکواڈ میں ہونا چاہیے تھا۔تاہم جب یہ سوال جیو نیوز کے پروگرام ’اسکور‘ میں چیف سلیکٹر محمد وسیم کے سامنے رکھا گیا تو انہوں نے کہا کہ فواد عالم ایک فائٹر ہے، اس نے طویل عرصے بعد قومی ٹیم میں واپسی کے بعد اچھی پرفارمنس دکھائی ہے۔انہوں نے کہا کہ تاہم حالیہ 3 سیریز میں وہ صرف ایک 50 کرسکے ہیں، قائد اعظم ٹرافی میں بھی انہوں نے اوسط درجے کی کارکردگی دکھائی جس کے بعد ہم نے سعود شکیل کو اسکواڈ میں رکھنے کا فیصلہ کیا۔
محمد وسیم نے مزید کہا کہ ہم اس بات سے بخوبی آگاہ ہیں کہ انگلینڈ کی کرکٹ ٹیم اب ٹیسٹ کرکٹ میں بھی جارحا نہ انداز کے ساتھ کھیلتی دکھائی دے رہی ہے اور یہ بات ہمیں یاد رکھنی چاہیے۔انہوں نے اس بات سے اتفاق کیا کہ ٹیسٹ کرکٹ میں ہماری ٹیم کو رن اوسط کے معاملے میں مزید بہتری لانے کی ضرورت ہے اور تیز کھیلنے کی بات ہمارے بیٹرز کے مفاد میں ہی ہوگی کیونکہ اب کھیل کا انداز بدل رہا ہے۔
چیف سلیکٹر نے اس بات کو تسلیم کیا کہ پاکستان ٹیم عموماً 2 سے ڈھائی رن اوسط کے ساتھ ٹیسٹ اننگز میں رنز بناتی ہے جبکہ اب ٹیسٹ کرکٹ میں ٹیمیں عموماً 3 سے ساڑھے 3 کے حساب سے بیٹنگ کر رہی ہیں۔
پاکستان کے لیے 18 ٹیسٹ 25 بین الااقومی ون ڈے کھیلنے والے محمد وسیم کا مزید کہنا تھا کہ انگلینڈ کے خلاف موجودہ ٹیسٹ اسکواڈ کو اس سوچ کو مد نظر رکھتے ہوئے منتخب کیا گیا ہے کہ ہم نے اسکور بورڈ کو بھی چلانا ہے اور آپ کو انگلینڈ کے خلاف سیریز میں یہ بات ہمارے بیٹرز کے کھیل سے بھی دکھائی دے گی۔
