راجن پور۔(اے پی پی) سوشل میڈیا پر اسلحہ کی نمائش کرنے والا شخص گرفتار۔ تفصیلات کے مطابق تھانہ صدر جام پور کی حدود میں ایس ایچ او تھانہ صدر جام پور نے سوشل میڈیا پر اسلحہ کی نمائش کرنے والے شخص سلیمان ولد قبول قوم لاکھا سکنہ کوٹ طاہر کو گرفتار لیا۔ مزکورہ نے چند روز سے ایک سوشل سائٹ پر اسلحہ سمیت اپنی تصاویر وائرل کرنے کا سلسلہ جاری رکھا ہوا تھا۔ پولیس نے سراغ لگا کر ملزم کو گرفتار کر کے مقدمہ درج کر لیا۔ اس موقع پر ایس ایچ او سیف اللہ کا کہنا تھا کہ علاقے میں شر پسند عناصر کے خلاف پولیس کا گھیرا تنگ رہے گا۔ آئندہ بھی علاقہ میں اس طرح کی غیر قانونی اسلحہ کی نمائش کی کوئی گنجائش نہیں۔
Author: Regional News
ڈپٹی کمشنر راجن پور کا تحصیل روجھان مزاری کا دورہ
راجن پور۔ (اے پی پی)ڈپٹی کمشنر راجن پور محمد افضل ناصر خان کا تحصیل روجھان مزاری کا تفصیلی دورہ۔ دورہ کے دوران انہوں نے تحصیل ہیڈ کوارٹر ہسپتال روجھان اوربنیادی مرکز صحت کوٹلہ حسن شاہ کا معائنہ کیا، جہاں پر انہوں نے ایمرجنسی وارڈ، جنرل وارڈ،میڈیسن سٹور،لیبارٹری کے علاوہ ایکسرے اور ڈاکٹر اور پیرا میڈیکل اسٹاف کی حاضری کو چیک کیا۔انہوں نے وارڈ میں داخل مریضوں سے خیریت دریافت کی اور فری طبی سہولیات بارے استفسار کیا۔ اس موقع پر اسسٹنٹ کمشنر روجھان عثمان غنی، ڈپٹی ڈائریکٹر کالجز ارشاد بخاری، ڈپٹی ڈائریکٹر ڈویلپمنٹ فہد خان، اسسٹنٹ ڈائریکٹر لوکل گورنمنٹ یعقوب شیروانی، ایجوکیشن آفیسر عتیق احمد اور سیاسی سماجی شخصیت منصور خان سنجرانی بھی ہمراہ تھے۔ قبل ازیں ڈپٹی کمشنر نے سنٹر آف ایکسی لینس کے گرلزاور بوائز ونگ کا دورہ کیا اور کلاسز کا معائنہ کیا۔ اس موقع پر پرنسپل سنٹر آف ایکسی لینس میجر(ر) ولی اللہ طارق نے بریفنگ دی۔ بعد ازاں ڈپٹی کمشنر نے سنٹر آف ایکسی لینس میں منعقدہ ڈینگی سیمینار میں بھی شرکت کی اور شرکاء سے خطاب کیا۔
جاری ترقیاتی سکیموں کو جلد مکمل کیا جائے، ڈی سی کا الٹی میٹم
راجن پور۔ (اے پی پی)ڈپٹی کمشنر راجن پور محمدافضل ناصر خان نے کہا ہے کہ جاری ترقیاتی سکیموں کو جلد از جلد مکمل کیا جائے۔ کام کی کوالٹی اور میٹیریل پر کوئی سمجھوتا نہیں کیا جائے گا۔یہ باتیں انہوں نے ڈویلپمنٹ کے جائزہ اجلاس کی صدارت کرتے ہوئے کہیں۔ اس موقع پر بتایا گیا کہ67 سکیموں پر کام جاری ہے جن میں ہائی وے کی 21 سکیمیں، پبلک ہیلتھ کی 20، بلڈنگ کی15،ضلع کونسل کی 4، سپورٹس کی 4 جبکہ لوکل گورنمنٹ کی سکیمیں بھی شامل ہیں۔ ان کی لاگت 9635ملین روپے ہے۔ اجلاس میں مزید بتایا گیا کہ 14 نئی اسکیمیں آئی ہیں جن کی منظوری کے بعد کام شروع کر دیا جائے گا۔ اس موقع پر ڈپٹی کمشنر کا کہنا تھا کہ کام کی رفتار کو مزید تیز کیا جائے۔ اس سلسلے میں کسی قسم کی سستی کو برداشت نہیں کیا جائے گا۔ جاری ترقیاتی سکیموں کو خود چیک کروں گا۔اجلاس میں ڈپٹی ڈائریکٹر ڈویلپمنٹ سمیت محکمہ پبلک ہیلتھ، بلڈنگ، انہار،ضلع کونسل اور لوکل گورنمنٹ کے سربراہان نے شرکت کی۔
تھرپارکر میں بچوں کی اموات رک نہ سکیں، بلاول ہاؤس بے خبر
تھرپارکر۔مٹھی۔ (اے پی پی)تھرپارکر میں بچے وبائی امراض کی وجہ سے فوت ہو رہے ہیں، گزشتہ دو روز کہ دوران پانچ بچے فوت ہوئے ہیں۔ان خیالات کا اظہار ڈپٹی کمشنر تھرپارکر ڈاکٹر شہزاد طاہر تھیم نے تھرپارکر ضلع میں روزانہ کی بنیاد پر جاری صحت،علاج معالجے کی سہولیات کی فراہمی کے متعلق آگاہ کرتے ہوئے کہا ہے کہ 206بچے ضلع بھی کی سرکاری اسپتالوں علاج کے لئے لائے گئے، جس میں سے77بچوں کو صحت کی بہترین سہولیات فراہم کرتے ہوئے صحتیاب کرکے ڈسچارج کردیا گیا،جبکہ130بچے اس وقت ضلع بھر کی مختلف اسپتالوں میں زیر علاج ہیں جن کو صحت کی بہترین سہولیات فراہم کی جارہی ہیں اس کے علاوہ ضلع کی تمام سرکاری اسپتالوں میں 206بچوں کا او پی ڈی میں علاج کیا گیااسی طرح پی پی ایچ آئی کے زیر نگرانی صحت کراکز میں 342بچوں کا علاج کیا گیا۔ میڈیکل سپریٹینڈنٹ سول ہسپتال مٹھی کی رپورٹ کے مطابق تعلقہ ڈیپلو کے گاؤں جھرمریو کے رہائشی پہلاج کھراج کی نو مولود بچہ جس کا وزن2.7کلوگرام برتھ ایفگزیابیمارع کے باعث اور گاؤن گرڑی تعلقہ ڈیپلو کے رہائشی عبدالرزاق نہڑی کا نومولود بچہ جس کا وزن 2.2 کلوگرام تھا وقت سے پہلے پیدائش اور کم وزن کے باعث، گاؤں مٹھڑیوہالیپوٹا یوسی تگوسر نگرپارکر کے رہائشی خان محمد کا 24دن کا بچہ جس کا وزن 2.2 کلوگرام تھا نیونیٹل سیپسز، نمونیا اور دیگر وبائی امراض کے باعث، گاؤں تھاریوہالیپوٹا، تعلقہ اسلام کوٹ کے رہائشی ارباب ہالیپوٹاکا 24دن کا بچہ مختلف وبائی امراض کے باعث، گاؤں رمضان گرگیز یوسی مہرانو، تعلقہ مٹھی کے رہائشی غلام حسین کا نومولود بچہ جس کا وزن 1.7کلوگرام تھا برتھ ایسفگزیا وقت سے پہلے پیدائش اور انتہائی کم وزن کے باعث فوت ہوگئے۔میڈیکل سپرنٹنڈنٹ سول ہسپتال مٹھی نے اپنے رپورٹ میں کہا ہے کہ دو مریضوں کو مزید بہتر علاج کے لئے حیدرآباداور کراچی ریفر کیا گیاہے۔
بس، موٹر سائیکل میں تصادم،ایک شخص جاں بحق
خانیوال۔ (اے پی پی) بس اور موٹر سائیکل میں تصادم، موٹر سائیکل سوار جاں بحق۔تفصیل کے مطابق پیرووال کے قریب اکمل چیمہ کمپنی کی بس نے موٹرسائیکل کو ٹکر مار دی،جس سے موٹر سائیکل سوار محمد سلیم شدید زخموں کی تاب نہ لاتے ہوئے موقع ہی پر جاں بحق ہوگیا۔ ریسکیو1122 ٹیم اطلاع ملتے ہی جائے وقوعہ پر پہنچ گئیاور نعش کو قریبی ہسپتال منتقل کر دیا۔
پولیس نے سات قتلوں کے اشتہاری ملزم کو گرفتار کر لیا
نوشہرہ ورکاں۔ (اے پی پی)ایس ایچ او صدر سیالکوٹ طارق محمود ڈھڈی نے ریڈ کر کے سترہ اور بیس سال پرانے سات قتلوں کے اشتہاری ملزم عزیز احمدکو ڈرامائی انداز میں گرفتار کر لیا۔ تفصیل کے مطابق ملزم نے 1999 میں تین، جبکہ 2002 میں چارافراد کو قتل کیا اور ایمن آباد کے قریب گاؤں گنہ اوور میں نام بدل کر بیس سال سے رہائش پذیرتھا۔ اورورثاء نے اسکے کویت ہونے کی بات عام کر رکھی تھی۔ علاقہ مکینوں نے قاتل کی گرفتاری پر پولیس کی کارکردگی کو سراہا۔
جنوبی پنجاب میں خواتین کے لیے خوشخبری انسداد تشدد مراکز برائے خواتین قائم، دائرہ کار کیا ہوگا جانیے
لودہراں۔(اے پی پی)ریجنل پولیس آفیسر ملتان وسیم احمد خاں نے ڈی پی او ملک جمیل ظفر کے ہمراہ خواتین کے خلاف تشدد کے بڑھتے ہوئے واقعات کی روک تھام کے لئے ضلع لودہراں میں انسداد تشدد مرکز برائے خواتین کا افتتاح کیا۔اس موقع پر انہوں نے اسٹاف سے ملاقات کی اور انکو بریف کیا۔آر پی او ملتان نے کہا کہ پورے ملتان ریجن میں اس طرح کے سنٹر قائم کئے جائیں گے ملتان میں ابھی یہ سنٹر زیر تعمیر ہے اور لودہراں میں اس کا باقاعدہ افتتاح ہو گیا ہے۔وی اے ڈبلیو سی میں خاتون اسٹاف کو تعینات کیا گیا ہے۔انہوں نے کہا کہ اس کا مقصد خواتین کو زیادہ بہتر سہولیات مہیا کرنا ہے تاکہ خواتین اپنے درپیش مسائل بہتر ماحول میں خاتون اسٹاف کو بتا سکیں۔ خواتین پر کسی بھی قسم کا کوئی تشدد برداشت نہیں کیا جائے اور خواتین کو درپیش مسائل کو ترجیحی بنیادوں پر حل کیا جائے گا۔وی اے ڈبلیو سی کا مقصدخواتین کو قانونی معاونت و رہنمائی کے علاوہ،گھریلو،ذہنی و جسمانی تشدد، وراثتی حقوق، چھوٹی عمر میں شادیوں، ونی، کاروکاری، تیزاب گردی،عفت میں خلل، زنا اور معاشرے میں کام کرنے والی خواتین کو در پیش مسائل کی رپورٹ کی صورت میں بلاتاخیر کاروائی کرنا ہے۔ انسداد تشدد مرکز برائے خواتین تھانہ صدر لودرہراں میں قائم کیا گیا ہے۔ آخر میں ریجنل پولیس آفیسر ملتا ن نے کہا کہ ان سب چھوٹی چھوٹی سہولیات دینے کا مقصد پولیس اور عوام کے درمیان حائل فاصلوں کو کم کرنا ہے جہاں ہم یہ سب کوششیں کر رہے ہیں وہاں شہریوں سے بھی اس بات کی امید رکھتے ہیں کہ وہ ہمارے ان تمام کاموں کو سراہیں گے اور ہمارے ساتھ تعاو ن کریں گے اور عوام الناس کے تعاون کے بغیر ہم اپنی منزل کو حاصل نہیں کر سکتے۔
لیویز فورس نے مختلف کارروائیوں میں چار ڈاکوؤں کو گرفتار کر لیا
چاغی۔ 9 اکتوبر (اے پی پی)چاغی لیویز فورس نے دو مختلف کارروائیوں میں چار ڈاکوؤں کو گرفتار کرلیا۔ لیویز ذرائع کے مطابق پہلی کارروائی پاک افغان سرحدی علاقے ڈاک اور دوسری کارروائی دالبندین میں کی گئی۔دونوں کارروائیاں لیویز فورس کی کوئیک رسپانس فورس نے سرانجام دیے، جس کے دوران حراست میں لیے گئے چاروں ڈاکوؤں سے اسلحہ اور مسروقہ موٹر سائیکل برآمد کرلی گئی۔
پاک ایران ٹرین سروس تین روز بعد بحال کردی گئی
چاغی۔ (اے پی پی)چاغی میں سیلابی ریلے سے متاثرہ ریلوے ٹریک کی مرمت کے بعد پاک ایران کارگو ٹرین سروس تین روز بعد بحال کردی گئی۔ ریلوے ذرائع کے مطابق بحالی کا کام مکمل ہوتے ہی دالبندین کے قریب روکے گئے دو مال بردار ٹرینوں کو ایرانی سرحدی علاقے میرجاوا جانے کی اجازت دے دی گئی۔ حکام کے مطابق تین روز پہلے چاغی کے مختلف علاقوں میں بارشوں کے باعث ندی نالوں میں طغیانی آگئی تھی،جس کے باعث دالبندین کے قریب متعدد مقامات پر پاک ایران ریلوے سیکشن کی ٹریک بہہ گئی،جس کی وجہ سے دو طرفہ ٹرین سروس معطل رہی،تاہم ریلوے مزدوروں کی مسلسل کوششوں کے بعد بدھ کو ٹریک کی بحالی کا کام مکمل کرلیا گیا۔
لاہورہائی کورٹ میں الوداعی تقریب ….
لاہور۔ (اے پی پی) لاہورہائی کورٹ کے جسٹس امین الدین خان کی سپریم کورٹ میں تعیناتی پر ان کے اعزاز میں گزشتہ روز لاہور ہائیکورٹ کے ججز الاؤنج میں الوداعی تقریب کا اہتمام کیا گیا۔ تقریب میں چیف جسٹس لاہور ہائی کورٹ سردار محمد شمیم خان سمیت دیگر فاضل ججز نے خصوصی شرکت کی۔ اس موقع پر فاضل چیف جسٹس اور دیگر فاضل ججز جسٹس امین الدین خان کی بطور جج لاہور ہائی کورٹ خدمات کو سراہا۔ تقریب کے اختتام پر فاضل چیف جسٹس نے جسٹس امین الدین خان کو پھولوں کا گلدستہ پیش کیا۔ جسٹس امین الدین خان 2001ء میں لاہور ہائی کورٹ میں تعینات ہوئے تھے، چیف جسٹس آف پاکستان کی سربراہی میں جوڈیشل کمیشن نے جسٹس امین الدین خان کی سپریم کورٹ میں تعیناتی کی سفارش کی تھی، جسٹس امین الدین خان کی سپریم کورٹ میں تعیناتی کے بعد لاہور ہائی کورٹ میں موجود ججز کی تعداد 45 رہ گئی ہے۔
