Author: صدف ابرار

کابینہ نجکاری کمیٹی کےاجلاس میں2 نکاتی ایجنڈے پرغورکیاجائے گا۔ اجلاس میں نجکاری پالیسی کی تشکیل کی سمری پیش کی جائے گی۔ نجکاری پروگرام کی موجودہ صورتحال کاجائزہ ایجنڈے میں شامل ہے۔ اجلاس میں نجکاری کےجاری پروگرام کی پیش رفت کا جائزہ لیا جائے گا۔ ذرائع کا کہنا ہے کہ حکومت نےآئی ایم ایف کونجکاری پروگرام پرکام تیز کرنے کی یقین دہانی کرائی ہے۔ذرائع کے مطابق اس وقت 25ادارے نجکاری کی فعال فہرست میں شامل ہیں۔ ہوا بازی شعبےکا ایک پی آئی اے نجکاری فہرست میں شامل ہے، فناننشل اورریئل اسٹیٹ سےمتعلق 4,4 ادارے نجکاری کےجاری پروگرام میں شامل ہیں، انڈسٹریل سیکٹرکے2 ادارے جاری نجکاری پروگرام کا حصہ ہیں، توانائی شعبےکے14 ادارے نجکاری کی فعال فہرست میں شامل ہیں، نجکاری کےجاری پروگرام میں اسٹیٹ لائف انشورنس کارپوریشن شامل ہے۔ بلوکی،حویلی بہادر،گدو اورنندی پورپاورپلانٹس جاری نجکاری پروگرام کاحصہ ہیں ۔ تمام10سرکاری بجلی تقسیم کار کمپنیاں فعال نجکاری فہرست میں شامل ہیں۔ ہاؤس بلڈنگ فنانس کارپوریشن،فرسٹ ویمن بینک بھی نجکاری فہرست میں شامل ہیں۔ پاکستان انجینئرنگ کمپنی اور سندھ انجنئیرنگ لمیٹڈ فہرست میں شامل ہیں۔

سینٹر فار ریسرچ اینڈ ڈائیلاگ (سی آر ڈی) نے ملک کے ٹیکس قوانین کی خلاف ورزی کرنے پر ملٹی نیشنل سگریٹ کمپنیوں کے خلاف کارروائی کا مطالبہ کیا ہے۔
وزیر خزانہ کو لکھے گئے خط میں سی آر ڈی نے سگریٹ کمپنیوں کے ذریعہ ٹیکس کی خلاف ورزیوں کو اجاگر کیا۔یہ خط ایک ایسے وقت میں آیا ہے جب وزارت خزانہ ٹیکس نیٹ کو وسیع کرنے اور ٹیکس مشینری میں موجود خامیوں کو دور کرنے کی کوشش کر رہی ہے۔وزیر خزانہ کو لکھے گئے خط میں فیڈرل ایکسائز ایکٹ 2005 کی خلاف ورزیوں کی نشاندہی کی گئی ہے اور اس میں ملوث کمپنیوں کے خلاف فوری کارروائی کا مطالبہ کیا گیا ہے۔ملٹی نیشنل سگریٹ کمپنیوں نے اسی برانڈ کے نئے ورژن متعارف کروائے ہیں۔قوانین کے مطابق، سگریٹ کا کوئی بھی مینوفیکچرر یا درآمد کنندہ سگریٹ برانڈ کا کوئی بھی ایسا نیا ورژن متعارف یا فروخت نہیں کر سکتا ہے جس کی قیمت اسی برانڈ فیملی میں موجود سگریٹ برانڈ سے کم رکھی گئی ہو۔اس کے باوجود، پاکستان ٹوبیکو کمپنی نے ایک نیا برانڈ کیپسٹن انٹرنیشنل لانچ کیا ہے، جس کی قیمت 164 روپے ہے، جو اس کے موجودہ فیملی برانڈ کیپسٹن بائی پال مال سے کم ہے، جس کی قیمت 212 روپے ہے۔
سینٹر فار ریسرچ اینڈ ڈائیلاگ کے ڈائریکٹر امجد قمر نے اس خلاف ورزی کے مضمرات پر روشنی ڈالتے ہوئے کہا ہے کہ یہ اقدام نہ صرف ٹیکس قوانین کی خلاف ورزی ہے بلکہ سگریٹ کو مزید سستا بنانے میں بھی کردار ادا کرتا ہے جو کہ صحت عامہ کے لیے نقصان دہ ہے اور مبینہ طور پر پاکستان میں سالانہ 337500 افراد تمباکو سے متعلقہ بیماریوں کی وجہ سے جان کی بازی ہار جاتے ہیں۔وزیر خزانہ کو لکھے گئے اپنے خط میں انہوں نے اس مسئلے کو حل کرنے اور ٹیکس قوانین کی افادیت کو برقرار رکھنے کے لیے فوری اور فیصلہ کن کارروائی پر زور دیا ہے جس کا مقصد صحت عامہ کا تحفظ یقینی بنانا ہے۔

عدالت نے ایگزٹ کنٹرول لسٹ (ای سی ایل) اور نو فلائی لسٹ سے نام نکالنے کی درخواست پر وزارت داخلہ کو نوٹس جاری کردیا۔ اسلام آباد ہائیکورٹ نے ڈائریکٹر جنرل (ڈی جی) امیگریشن کو زین قریشی کا پاسپورٹ جاری کرنےکی ہدایت کردی۔چیف جسٹس اسلام آباد ہائیکورٹ عامر فاروق نے زین قریشی کی درخواست پر سماعت کرتے ہوئے درخواست گزار کے وکیل سے استفسار کیا کہ مسئلہ کیا ہے؟وکیل علی بخاری نے کہا کہ بیرون ملک جانا ہے لیکن کہتے ہیں پاسپورٹ ایکسپائر ہو گیا ہے، ڈی جی امیگریشن کو ہدایات دی جائیں کہ نیا پاسپورٹ جاری کیا جائے، زین قریشی کا نام نو فلائی لسٹ اور ای سی ایل سے نکالنے کی ہدایت بھی کی جائے۔عدالت نے نئی ہدایات جاری کرتے ہوئے فریقین کو نوٹس کرکے 29 اپریل تک جواب طلب کرلیا۔

وزیراعظم شہباز شریف کی زیر صدارت سیکیورٹی اور امن سے متعلق اعلیٰ سطح کا اجلاس ہوا، جس میں وزارت داخلہ نے سیکیورٹی صورتحال اور وزارت کی کارکردگی پر بریفنگ دی۔اجلاس میں وفاقی وزیر داخلہ محسن نقوی، سیکیورٹی اداروں کے سربراہان اور متعلقہ اعلیٰ حکام نے شرکت کی۔ وزیراعظم نے سیکیورٹی ایجنسیوں کو ہدایت کی کہ وہ چینی شہریوں کی جامع سیکیورٹی پروفائلز بنائیں اور ایس او پیز کے مطابق آڈٹ کے لیے چیک لسٹ تیار کریں۔یہ فیصلہ پاکستان بھر میں مختلف پراجیکٹس پر کام کرنے والے چینی شہریوں کی سکیورٹی کی صورتحال پر تشویش کے درمیان سامنے آیا ہے، خاص طور پر حالیہ واقعات کی روشنی میں۔ حکومت کا مقصد ملک میں ترقیاتی منصوبوں میں حصہ ڈالنے والے تمام غیر ملکی شہریوں کی حفاظت اور حفاظت کو یقینی بنانا ہے۔وزیر اعظم نے وزارت داخلہ کو صوبائی انسداد دہشت گردی ڈپارٹمنٹس کی بہتری کے لیے صوبوں سے تعاون بڑھانے کی ہدایت بھی کی۔اجلاس کے دوران شہباز شریف نے مختلف منصوبوں پر کام کرنے والے چینی باشندوں کی سکیورٹی کے اجلاسوں کا ہر ماہ خود جائزہ لینے کا فیصلہ بھی کیا۔اس موقع پر خطاب کرتے ہوئے وزیر اعظم نے کہا کہ دہشت گردی کی عفریت کے ملک سے خاتمے تک اس کے خلاف جنگ جاری رکھیں گے۔
واضح رہے کہ وزیر اعظم کی جانب سے مختلف منصوبوں پر کام کرنے والے چینی باشندوں کی سیکیورٹی کے اجلاسوں کا ہر ماہ خود جائزہ لینے کا فیصلہ خیبر پختونخوا کے ضلع شانگلہ کے علاقے بشام میں اسلام آباد سے داسو میں موجود ہائیڈرو الیکٹرک ڈیم کی تعمیراتی سائٹ پر جاتے ہوئے بس پر ہونے والے خودکش بم دھماکے میں 5 چینی انجینئرز اور ان کے پاکستانی ڈرائیور کی ہلاکتوں کے ایک ہفتے کے بعد سامنے آیا ہے۔اس حملے کے بعد چین نے دھماکے کی مکمل تحقیقات اور اپنے شہریوں کی حفاظت کا مطالبہ کیا تھا جب کہ اس کے جواب میں پاکستان نے ’مجرموں اور سہولت کاروں‘ کی گرفتاری کے لیے فوری تحقیقات کا اعلان کیا تھا، چینی تفتیش کار بھی تحقیقات میں شامل ہونے پہنچ چکے ہیں۔

وزارت مذہبی امور کے ترجمان نے بتایا کہ حج پروازیں 9 مئی سے 9 جون چلائی جائیں گی تمام عازمینِ حج کیلئے سمارٹ فون لے جانا لازم ہوگا تاکہ عازمین سفرِ حج کے دوران مفید موبائل ایپس کا استعمال کر سکیں۔وفاقی وزیر مذہبی امور کے مطابق عازمینِ حج کی تربیت کا دوسرا مرحلہ 15 اپریل سے شروع ہو گا، چیف ماسٹر ٹرینر احمد ندیم خان نئے اقدامات اور مناسک حج سے متعلق 122 مقامات پر 40 حج ٹرینرز تربیت فراہم کریں گے، عازمینِ حج کی لازمی ویکسین کا عمل حج پروازوں سے دس دن قبل شروع کیا جائے گا ۔تمام عازمینِ حج کو سوٹ کیس ہیڈ کیری بیگ فراہم کیا جائے گا جوتوں کیلئے تھیلا ، احرام بیلٹ اور خواتین کے لئے سبز رنگ کے پاکستانی پرچم والے سکارف مہیا کیے جائیں گے۔