Author: صدف ابرار

وزارت مذہبی امور کے ترجمان نے بتایا کہ حج پروازیں 9 مئی سے 9 جون چلائی جائیں گی تمام عازمینِ حج کیلئے سمارٹ فون لے جانا لازم ہوگا تاکہ عازمین سفرِ حج کے دوران مفید موبائل ایپس کا استعمال کر سکیں۔وفاقی وزیر مذہبی امور کے مطابق عازمینِ حج کی تربیت کا دوسرا مرحلہ 15 اپریل سے شروع ہو گا، چیف ماسٹر ٹرینر احمد ندیم خان نئے اقدامات اور مناسک حج سے متعلق 122 مقامات پر 40 حج ٹرینرز تربیت فراہم کریں گے، عازمینِ حج کی لازمی ویکسین کا عمل حج پروازوں سے دس دن قبل شروع کیا جائے گا ۔تمام عازمینِ حج کو سوٹ کیس ہیڈ کیری بیگ فراہم کیا جائے گا جوتوں کیلئے تھیلا ، احرام بیلٹ اور خواتین کے لئے سبز رنگ کے پاکستانی پرچم والے سکارف مہیا کیے جائیں گے۔

ججز کو خطوط ملنے کے معاملے پر پاکستان پوسٹ نے فوری اقدامات کے لیے مراسلہ جاری کردیا۔مراسلے میں اسٹاف کی سیفٹی اور سیکیورٹی کیلئے ماسک، دستانے مہیا کرنے کی ہدایت کی گئی ہے۔ ، پاکستان پوسٹ نے عملے کو پوسٹ آفس میں آنے والے لیٹرز اور دیگر میلز کو احتیاط کے ساتھ چیک کرنے کی ہدایت کی ہے۔ مراسلے میں ججز، ڈپلو میٹس اور دیگر ہائی پروفائل کی میلز کو خصوصی طور پر چیک کرنے کی ہدایت کی گئی ہے جبکہ پوسٹل اسٹاف کو میلز کی بکنگ اور ترسیل کے دوران چوکس رہنے کی ہدایت کی گئی ہے۔دوسری جانب ججز کو مشکوک خطوط ملنے کا سلسلہ رکا نہیں ہے، لاہور ہائیکورٹ کے جسٹس علی باقر نجفی کو بھی مشکوک خط مل گیا۔لاہور ہائیکورٹ کے اب تک 6 ججز کو مشکوک خطوط مل چکے ہیں، سپریم کورٹ کے جسٹس محمد علی مظہر کے نام بھی خط موصول ہونے کی تصدیق ہوئی ہے۔سپریم کورٹ ذرائع کے مطابق چیف جسٹس پاکستان سمیت 6 ججز کے نام پاؤڈر بھرے مشکوک خطوط آئے ہیں۔

پاکستان سمیت دنیا کے مختلف ممالک میں میسجنگ اور کالنگ کی معروف ایپ واٹس ایپ کی سروس بحال ہونا شروع ہو گیا بدھ کے روز پاکستان میں صارفین کو تقریباً 11 بجے کے قریب واٹس ایپ کے استعمال میں مسائل کا سامنا کرنا پڑا۔مائیکروبلاگنگ ویب سائٹ ایکس پر صارفین کی جانب سے اس مسئلے کی نشاندہی کی گئی اور پاکستان سمیت دنیا بھر سے لوگوں نے بتایا کہ واٹس ایپ گروپس میں میسجز نہیں جارہے جب کہ انفرادی طور پر صارفیں کو چیٹنگ کرنے میں مسئلہ ہو رہا ہے۔ واٹس ایپ صارفین نے سروس متاثر ہونے کے بارے میں ایکس پر اپنے تجربات سے آگاہ کیا اور ایکس پر واٹس ایپ ڈاؤن ٹاپ ٹرینڈ بھی بن گیا۔واٹس ایپ کی سرگرمیوں پر نظر رکھنے والی ویب سائٹ ویب بیٹا انفو نے بھی ایکس پر بتایا کہ صارفین کو واٹس ایپ تک رسائی میں مشکلات کا سامنا ہے۔

چیف جسٹس پشاور ہائیکورٹ جسٹس محمد ابراہیم خان نے چیف جسٹس آف پاکستان جسٹس قاضی فائز عیسیٰ کو لکھے خط میں کہا کہ اصولی طور پر میرا نام سپریم کورٹ کے ججز کی فہرست میں شامل ہونا چاہیے تھا، میں جوڈیشل کمیشن آف پاکستان اور سپریم جوڈیشل کونسل کا ممبر ہوں۔جسٹس ابراہیم خان نے چیف جسٹس آف پاکستان کو لکھے گئے خط میں کہا کہ آپ کی توجہ اصول، میرٹ اور شفافیت کی طرف مبذول کروانا چاہتا ہوں، سپریم کورٹ آف پاکستان میں ججز کی 4 آسامیاں خالی ہیں، بلوچستان کے چیف جسٹس نعیم اختر افغان کو سپریم کورٹ کا جج تعینات کیا گیا۔
خط میں کہا گیا کہ جسٹس نعیم اختر افغان کی تعیناتی پر خوش ہوں لیکن میں سینیارٹی میں دوسرے نمبر پر ہوں، مجھے جان کر مایوسی ہوئی آپ نے اپنے صوبے بلوچستان سے سپریم کورٹ میں تقرری کی، مجھے سپریم کورٹ کا جج بنانے کے لیے کیوں مناسب نہیں سمجھا گیا۔چیف جسٹس پشاور ہائیکورٹ نے کہا کہ سپریم کورٹ میں تقرری کےلیے میری سینیارٹی اور کوائف کو نظر انداز کیا گیا، پاکستان میں ہائیکورٹس میں سینیارٹی میں دوسرے نمبر پر ہوں، میں جوڈیشل کمیشن اور سپریم جوڈیشل کونسل کا بھی رکن ہوں، توقع تھی سپریم کورٹ میں خالی آسامیاں جلد پوری کی جاتیں تاکہ زیر التواء مقدمات میں کمی لائی جا سکے، بالخصوص ایسے وقت جب ملک میں لوگ انصاف کے لیے ترس رہے ہیں۔
خط کے متن میں کہا گیا کہ پاکستان کے ٹیکس دہندگان سے ہمیں تنخواہ ملتی ہے، عوام توقع رکھتے ہیں خالی آسامیوں پر فوری تقرری ہو تاکہ انصاف کی فراہمی کو یقینی بنایا جائے، سپریم کورٹ میں ہونے والی واحد تقرری نے مجھے پریشان کر دیا ہے، میں نے بہت سوچا لیکن مجھے کوئی ٹھوس وجہ نہیں ملی۔ چیف جسٹس پشاور ہائیکورٹ نے اپنے خط میں کہا کہ عدلیہ میں 31 سال سے خدمات انجام دے رہا ہوں، عدلیہ کے وقار کو بلند کرنے کے لیے میری غیر متزلزل خدمات ہیں۔

اسلام آباد ہائی کورٹ میں بلیو ایریا میں ریسٹورنٹ کو 25 دن تک سیل کرنےکی درخواست پر سماعت ہوئی سماعت کے دوران جسٹس اعجاز الاسحاق نے ڈی ایم اے کے ایڈمنسٹریٹر اور ڈپٹی کمشنر اسلام آباد کی عدم پیشی پر برہمی کا اظہار کیا۔جسٹس اعجاز الاسحاق نے ریمارکس دیئے کہ کیوں نہ ڈی سی اسلام آباد کی گرفتاری کا حکم جاری کیا جائے؟ ایڈوکیٹ جنرل اسلام آباد کو ڈی سی اسلام آباد سے رابطہ کر کے جواب فائل کریں اور آئندہ سماعت پر ڈپٹی کمشنر اسلام آباد اپنی حاضری کو یقینی بنائیں۔
جسٹس اعجاز اسحاق نے کہا کہ اگر ڈی سی اسلام آباد پیش نہ ہوئے تو ان کے وارنٹ گرفتاری جاری کرنے پر مجبور ہوں گے۔عدالت نے بلیو ایریا میں قائم شاہ جی ریسٹورنٹ کو فوری طور پر ڈی سیل کرنے کا حکم جاری کر دیا، عدالت نے اضافی سرکاری جگہ لیز کرنے پر سرکاری پالیسی بھی طلب کر لی۔واضح رہے کہ ڈی ایم اے کے عملے نے بلیو ایریا میں ریسٹورنٹ پر تجاوزات کے خاتمے کے نام پر اسے سیل کر دیا تھا، ڈی ایم اے کے عملے نے ریسٹورنٹ کی دوسری برانچ پر بھی آپریشن کر کے توڑ پھوڑ کی تھی۔

کاؤنٹر ٹیرارزم ڈپارٹمنٹ (سی ٹی ڈی) میں سپریم کورٹ کے ججوں کو دھمکی آمیز خطوط کی وصولی کے حوالے سے مقدمہ درج کرلیا۔سپریم کورٹ کی آر این اینڈ آئی برانچ نے اے ٹی اے کی دفعہ 7 اور پی پی سی کی 507 کے تحت نامعلوم افراد کے خلاف مقدمہ درج کیا۔کیس کے مندرجات کے مطابق، متعلقہ ججز کے سیکرٹریز کو مشکوک خطوط موصول ہوئی تھی، جس کے لفافوں میں سفید پاؤڈر نما کیمیکل کی موجودگی پائی گئی ۔ ایڈمن انچارج نے 3 اپریل کو فون کال کے ذریعے اطلاع دی کہ ان خطوط کے ذریعے خوف پھیلانے کی کوشش کی گئی۔ایف آئی آر میں انکشاف کیا گیا کہ تین خطوط بھیجے گئے، ایک نامعلوم مرسل کی طرف سے گلشاد خاتون کو اور دوسرا سجاد حسین کو نامعلوم پتے سے، ان خطوط کے ذریعے خوف وحراس پھیلانے کی کوشش کی جا رہی ہے ،حکام مجرموں کی شناخت اور عدلیہ کے تحفظ کو یقینی بنانے کے لیے اس معاملے کی سرگرمی سے تحقیقات کر رہے ہیں۔