Author: صدف ابرار

پاکستان سپر لیگ کی فرنچائز پشاور زلمی کے چیئرمین جاوید آفریدی نے پاکستان فٹبال ٹیم کی سپورٹ کا اعلان کردیا۔جاوید آفریدی نے پاکستان فٹبال ٹیم کی سپورٹ کا اعلان کیا اور خواہش کا اظہار کرتے ہوئے کہا کہ پاکستان کمبوڈیا کے خلاف ورلڈ کپ کوالیفائر میچ پاکستان میں کھیلے۔جاوید آفریدی نے کہا کہ پاکستان میں فیفا ورلڈ کپ کوالیفائر میچ کیلئے ہر ممکن تعاون کیلئے تیار ہوں۔خیال رہے پاکستان اور کمبوڈیا کے درمیان ورلڈ کپ کوالیفائر میچ 17 اکتوبر کو پاکستان میں شیڈول ہے، پاکستان اس سے قبل اوے میچ کمبوڈیا میں 12 اکتوبر کو کھیلے گا۔

پاکستان والی بال فیڈریشن نے ایران میں 19 سے 26 اگست تک ہونے والی ایشین مینز والی بال چیمپئن شپ کے لیے اپنے سکواڈ کا اعلان کر دیا۔پی وی ایف کے ایک عہدیدار کے مطابق 14 کھلاڑی 7 آفیشلز کے ساتھ ہوں گے اور وہ 11 اگست کو تہران روانہ ہوں گے۔ایشین چیمپئن شپ 19 اگست سے 26 اگست تک شروع ہوگی۔ پاکستان والی بال فیڈریشن کے چیئرمین چوہدری محمد یعقوب نے کہا کہ ہم ٹیم کو ایک ہفتہ قبل چند پریکٹس میچ کھیلنے اور آب و ہوا کے ساتھ ایڈجسٹمنٹ کے لیے بھیج رہے ہیں۔انہوں نے مزید کہا کہ غیر ملکی کوچ اور فزیکل ٹرینر کا تعلق برازیل سے ہے اور ایک ویڈیو تجزیہ کار ایران سے ہے اور وہ ایران میں ٹیم کے ساتھ ہوں گے۔کانٹی نینٹل ایونٹ کے لیے منتخب ہونے والے کھلاڑیوں میں مبشر رضا، عثمان فریاد علی، آفاق خان، مراد جہاں، ناصر علی، بلال خان، حامد یزمان، محمد کاشف نوید، عبدالظہیر، محمد حماد، مصور خان، مراد خان، فاروق حیدر اور دیانت شامل ہیں۔ عرفان نواز بٹ ٹیم کے مینیجر ہوں گے جبکہ برازیل کے اسانے رامیرس فیراز ٹیم کے ہیڈ کوچ ہوں گے۔ احسان اقبال اور محمد اسماعیل خان کو ٹورنگ پارٹی کا اسسٹنٹ کوچ نامزد کیا گیا ہے۔ایک اور برازیلین لوکاس فریرا روڈریگس فزیکل ٹرینر کے طور پر ٹیم کے ساتھ ہوں گے جبکہ ایرانی ارمین گولکاری تہران میں پاکستانی والی بال ٹیم میں بطور ویڈیو اینالسٹ شامل ہوں گے۔2023 ایشین مینز والی بال چیمپئن شپ کے ڈراز کے مطابق پاکستان کو گروپ ایف میں جنوبی کوریا اور بنگلہ دیش کے ساتھ رکھا گیا ہے۔ کوالیفائی ہونے کی صورت میں پاکستان اگلے راؤنڈ کے میچوں سے قبل 20 اگست کو بنگلہ دیش اور 21 اگست کو کوریا کے خلاف کھیلے گا۔

پاکستان کرکٹ بورڈ کے زیراہتمام خواتین کرکٹرز کے لیے کمیونیکیشن ورکشاپ اختتام کو پہنچا۔پی سی بی ترجمان کے مطابق قذافی اسٹیڈیم لاہور میں منعقدہ اس ورکشاپ میں بائیس خواتین کرکٹرز نے شرکت کی۔پاکستان کرکٹ بورڈ کی جانب سے اس ورکشاپ کے انعقاد کا بنیادی مقصد یہ تھا کہ خواتین کرکٹرز کی کمیونیکیشن کی مہارت میں اضافہ کیا جائے تاکہ وہ ایک بہترین شخصیت کے طور پر خود کو دنیا کے سامنے پیش کرسکیں۔ ورکشاپ کے انعقاد کا ایک مقصد یہ بھی تھا کہ پاکستان کرکٹ بورڈ چاہتا ہے کہ یہ کھلاڑی دنیا بھر کے لوگوں کو کرکٹ کی سفیر کی حیثیت سے متاثر کرسکیں۔اس ورکشاپ میں کمیونیکیشن ماہرین اور پروفیشنل حضرات نے ان کھلاڑیوں کی رہنمائی کی اور رابطوں کے مختلف شعبوں سے متعلق اپنے تجربات شیئر کیے جن میں میڈیا انٹرویوز، سوشل میڈیا سے تعلق، عام لوگوں سے بات چیت اور کرائسس منیجمنٹ جیسے امور شامل تھے۔ورکشاپ کے شرکا کے لیے مختلف طرح کے سیشنز رکھے گئے تھے جن میں پریکٹیکل مشقیں بھی شامل تھیں جن کا مقصد ان کھلاڑیوں کے اعتماد میں اضافہ کرنا اور رابطوں کی مختلف صورتحال میں نمٹنے کی صلاحیت پیدا کرنا تھا۔

آسٹریلیا کے سابق لیجنڈ فاسٹ بالر گلین میک گرا نے اس سال اکتوبر میں بھارت میں ہونے والے آئی سی سی کرکٹ ورلڈ کپ کے لیے ٹاپ چار ٹیموں کا انکشاف کیا ہے۔ٹائمز آف انڈیا کے ساتھ ایک انٹرویو میں، میک گرا نے ایلیٹ کوارٹیٹ میں آسٹریلیا کو شامل کرنے پر ایک حیرت انگیز بات کا اظہار کیا۔
انہوں نے نشاندہی کی کہ ہوم ٹرف پر کھیلنے والے ہندوستان سے ایک مضبوط قوت ہونے کی امید ہے۔ میک گرا نے انگلینڈ کی شاندار کرکٹ فارم کی بھی تعریف کی اور پاکستان کی مضبوط کارکردگی کا اعتراف کرتے ہوئے انہیں بہترین چار ٹیموں میں جگہ دی۔ میک گرا کا کہنا تھا آپ کو حیرت نہیں ہوگی کہ میں آسٹریلیا کو ان چار ٹیمز میں ڈال رہا ہوں۔ ظاہر ہے، ہندوستان اپنی حالت میں کھیل رہا ہے۔ انگلینڈ بہت اچھی کرکٹ کھیل رہا ہے اور پاکستان بھی اچھا کھیل رہا ہے۔ لہذا، وہ بہترین چار ہیں،” آئی سی سی ورلڈ کپ 2023 اکتوبر اور نومبر کے دوران بھارت میں ہونے والا ہے، جس میں کل 10 حصہ لینے والی ٹیمیں شامل ہیں۔ ٹورنامنٹ کا آغاز 5 اکتوبر سے ہوگا، فائنل میچ 19 نومبر کو شیڈول ہے۔

پاکستان کرکٹ بورڈ اپنے کھلاڑیوں کی صلاحیتوں اور کھیل کے لیے لگن کو تسلیم کرتے ہوئے ان کے معاوضے میں نمایاں اضافہ فراہم کرنے کے لیے پوری طرح تیار ہے۔کرکٹ پاکستان کے ساتھ ایک حالیہ انٹرویو میں، پاکستان کرکٹ بورڈ (پی سی بی) کی انتظامی کمیٹی کے چیئرمین ذکاء اشرف نے کرکٹرز کے لیے بورڈ کے خزانے کھولنے کے ارادے کا انکشاف کیا، کیونکہ ان کا خیال ہے کہ بورڈ کرکٹرز کی وجہ سے چلتا ہے۔کپتان بابر اعظم، محمد رضوان اور شاہین شاہ آفریدی سمیت تینوں فارمیٹس کے ٹاپ کرکٹرز کو 4.5 ملین روپے ماہانہ ریٹینر شپ فیس کی پیشکش کی گئی ہے۔ یہ پچھلے معاہدے سے کافی اضافہ کی نشاندہی کرتا ہے، جہاں سرخ گیند کے کھلاڑیوں کو ماہانہ 1.1 ملین روپے مل رہے تھے، اور سفید گیند کے کھلاڑیوں کو 0.95 ملین روپے مل رہے تھے۔
پی سی بی نے کھلاڑیوں کے مطالبات کو مدنظر رکھا ہے اور وہ دیگر کیٹیگریز میں بھی معاوضہ بڑھانے کے لیے تیار ہے۔ بورڈ کا مقصد اس بات کو یقینی بنانا ہے کہ کرکٹرز کو ان کی مہارتوں اور کوششوں کا بھرپور صلہ ملے، جس سے قومی ٹیم کے لیے کارکردگی اور لگن میں اضافہ ہو۔
اس کے علاوہ پی سی بی کھلاڑیوں کو انٹرنیشنل لیگز میں شرکت کے لیے مزید لچک بھی دے رہا ہے۔ اے کیٹیگری کے کرکٹرز کو سال میں ایک ٹی ٹوئنٹی لیگ میں شامل ہونے کی اجازت ہوگی جب کہ بی کیٹیگری کے کرکٹرز سالانہ دو لیگز میں حصہ لے سکتے ہیں۔ کیٹیگری سی کے کرکٹرز کو سال میں تین لیگز میں حصہ لینے کا موقع ملے گا۔
اگرچہ آئی سی سی یا پی سی بی کے معاہدوں سے ریونیو شیئرنگ کا مطالبہ قبول نہیں کیا گیا لیکن بورڈ کھلاڑیوں کو تین سال کے معاہدوں کی پیشکش کر کے استحکام قائم کرنے کی کوشش کر رہا ہے۔

قومی کرکٹ ٹیم ورلڈ کپ میں شرکت کے لیے انڈیا جائے گی یا نہیں اس حوالےسے اہم فیصلہ حکومت کی ہائی پروفائل کمیٹی نے کرلیا ہے ۔
قومی کرکٹ ٹیم کی اہم ایونٹ میں شرکت کے حوالے سے حکومت نے اجلاس میں فول پروف سکیورٹی کی شرط رکھ دی ہے۔ وزیر خارجہ بلاول بھٹو کی زیر صدارت وزیر اعظم شہباز شریف کی تشکیل کردہ خصوصی کمیٹی کا اجلاس منعقد ہوا، اجلاس میں قومی کرکٹ ٹیم کی بھارت میں شیڈول ورلڈ کپ میں شرکت کے حوالے سے تفصیلی غور کیا گیا۔
زرائع کے مطابق اجلاس میں وزیر مملکت حناء ربانی کھر، وزیر اطلاعات مریم اورنگزیب اور وزیر قانون اعظم نذیر تارڑ نے ٹیم بھارت بھیجنے کی حمایت جبکہ وفاقی وزیر احسان مزاری نے اجلاس کے دوران ٹیم بھارت بھیجنے کی مخالفت کی۔ذرائع کے مطابق قمر زمان کائرہ نے بھی ٹیم بھارت نہ بھیجنے کا مشورہ دیا جبکہ وزارت خارجہ حکام نے ٹیم بھارت بھیجنے کی بھرپور حمایت کی،ذرائع کے مطابق اجلاس میں وزارت خارجہ کے حکام نے ٹیم بھارت بھیجے کی حمایت کر دی، تاہم آئی سی سی سے فول پروف سکیورٹی مہیا کرنے کی یقین دہانی لی جائے گی۔