پاکستان اور اردن کے دوطرفہ تعلقات مزید مضبوط ہو گئے ہیں۔ اسلام آباد میں مشترکہ وزارتی کمیشن کے دسویں اجلاس کے دوران 16 مختلف شعبوں میں تجارتی اور اقتصادی تعاون بڑھانے کے لیے معاہدہ طے پا گیا۔
وفاقی وزیر تجارت جام کمال نے اس موقع پر کہا کہ پاکستان اور اردن کے درمیان شراکت داری انتہائی اہم ہے، اور حکومت کی کوشش ہوگی کہ پہلے سے طے شدہ معاہدوں کو عملی شکل دی جائے۔ انہوں نے کہا کہ دونوں ممالک کے عوام کو کاروباری مواقع فراہم کرنا ترجیح ہے۔
اردن کے وزیر صنعت و تجارت نے اجلاس کو کامیاب قرار دیتے ہوئے کہا کہ دورے کے دوران مختلف شعبوں میں کاروبار اور سرمایہ کاری بڑھانے پر تفصیلی بات چیت ہوئی، جس سے دوطرفہ تجارتی تعلقات کو فروغ ملے گا۔
Blog
-
پاکستان اور اردن کے تعلقات نئی بلندیوں پر، 16 شعبوں میں تجارتی تعاون کا معاہدہ طے
-
اوچ شریف: یومِ یکجہتی کشمیر پر شرمناک خاموشی، انتظامیہ کی بے حسی پر سوالات
اوچ شریف (نامہ نگار حبیب خان)مدینہ الاولیاء اوچ شریف میں 5 فروری یومِ یکجہتی کشمیر جیسے اہم قومی دن پر افسوسناک اور شرمناک خاموشی دیکھنے میں آئی، جہاں پورا شہر مکمل طور پر لاتعلق اور بے حس نظر آیا۔ نہ کوئی ریلی نکالی گئی، نہ دعائیہ تقریب منعقد ہوئی، نہ ہی کوئی تعلیمی، سماجی یا آگاہی پروگرام منعقد کیا گیا، گویا یومِ کشمیر سرے سے موجود ہی نہ تھا۔
ذرائع کے مطابق مقامی انتظامیہ، میونسپل کمیٹی، پولیس، ہسپتال انتظامیہ، سول سوسائٹی اور تاجر برادری نے مجرمانہ غفلت کا مظاہرہ کرتے ہوئے اپنی قومی ذمہ داریوں سے چشم پوشی اختیار کی۔ ملک کے دیگر شہروں میں جہاں کشمیری عوام سے اظہارِ یکجہتی کے لیے ریلیاں، سیمینارز، دعائیہ اجتماعات اور آگاہی مہمات جاری رہیں، وہیں اوچ شریف میں سرکاری مشینری کی نااہلی اور بے حسی نے اس قومی دن کو ایک عام دن بنا کر رکھ دیا۔
انتظامیہ کی جانب سے نہ کوئی باضابطہ نوٹیفکیشن جاری کیا گیا، نہ تعلیمی اداروں کو متحرک کیا گیا، نہ مساجد میں خصوصی دعاؤں کا اہتمام کیا گیا اور نہ ہی شہر بھر میں کسی مقام پر بینر یا پلے کارڈ نظر آیا۔ اس صورتحال نے ضلعی اور تحصیل انتظامیہ کی کارکردگی پر ایک بڑا سوالیہ نشان کھڑا کر دیا ہے۔
شہری اور سماجی حلقوں نے اس رویے کو ’’قومی غیرت کا جنازہ‘‘ قرار دیتے ہوئے شدید غم و غصے کا اظہار کیا ہے۔ نوجوانوں کا کہنا ہے کہ اگر ایسے اہم قومی دن بھی سرکاری بے حسی کی نذر ہوتے رہے تو نئی نسل میں حب الوطنی، قومی شعور اور کشمیری کاز سے وابستگی کیسے پیدا ہو سکے گی۔
عوامی حلقوں نے اعلیٰ حکام سے مطالبہ کیا ہے کہ ذمہ دار افسران کا فوری تعین کر کے ان کے خلاف کارروائی کی جائے اور آئندہ ایسے قومی مواقع پر باضابطہ تقریبات، ریلیوں اور آگاہی مہمات کو یقینی بنایا جائے، تاکہ اوچ شریف کو قومی سطح پر مزید شرمندگی کا سامنا نہ کرنا پڑے۔
-
ننکانہ صاحب: مشیر وزیراعلیٰ پنجاب برائے پولیو عظمیٰ کاردار کا دورہ، پولیو مہم کا جائزہ
ننکانہ صاحب (نامہ نگار احسان اللہ ایاز)مشیر وزیراعلیٰ پنجاب برائے پولیو عظمیٰ کاردار نے ننکانہ صاحب کا دورہ کیا، جہاں ان کی زیرِ صدارت ڈپٹی کمشنر آفس کے کمیٹی روم میں جاری پولیو مہم کے حوالے سے جائزہ اجلاس منعقد ہوا۔
اجلاس میں ایڈیشنل ڈپٹی کمشنرز، اسسٹنٹ کمشنرز، سی ای او ہیلتھ، محکمہ صحت کے افسران اور میڈیا نمائندگان نے شرکت کی۔ ڈپٹی کمشنر ننکانہ صاحب محمد تسلیم اختر راؤ نے مشیر وزیراعلیٰ کو ضلع میں جاری پولیو مہم سے متعلق تفصیلی بریفنگ دی۔
بریفنگ میں بتایا گیا کہ ضلع ننکانہ صاحب میں پانچ سال تک کی عمر کے 2 لاکھ 88 ہزار سے زائد بچوں کو پولیو کے قطرے پلانے کا ہدف مقرر کیا گیا ہے، جس کے حصول کے لیے مجموعی طور پر 1198 پولیو ٹیمیں فیلڈ میں قومی فریضہ سرانجام دے رہی ہیں۔ بتایا گیا کہ ضلع میں پولیو مہم کا آج آخری روز ہے اور ہدف کو ہر صورت مکمل کیا جائے گا۔
اس موقع پر مشیر وزیراعلیٰ پنجاب عظمیٰ کاردار نے کہا کہ وزیراعلیٰ پنجاب مریم نواز شریف خود بچوں کو معذوری سے بچانے کے لیے انسدادِ پولیو مہم پر کڑی نظر رکھے ہوئے ہیں، اور پنجاب بھر میں تمام اداروں کے لیے پولیو مہم کے سو فیصد اہداف کا حصول اولین ترجیح ہونی چاہیے۔ انہوں نے ہدایت کی کہ پانچ سال تک کی عمر کا کوئی بھی بچہ پولیو سے بچاؤ کے قطرے پینے سے محروم نہ رہے۔
عظمیٰ کاردار نے انسدادِ پولیو ٹیموں پر زور دیا کہ وہ فیلڈ میں مزید متحرک ہو کر قومی جذبے کے تحت فرائض انجام دیں۔ انہوں نے ہدایت کی کہ جھگیوں، بس اسٹینڈز، شہر کے داخلی و خارجی راستوں اور گھروں تک جا کر بچوں کو پولیو کے قطرے پلائے جائیں تاکہ سو فیصد اہداف کا حصول یقینی بنایا جا سکے۔
بعد ازاں مشیر وزیراعلیٰ پنجاب نے ڈپٹی کمشنر ننکانہ صاحب کے ہمراہ گوردوارہ جنم استھان میں قائم پولیو کیمپ کا بھی دورہ کیا، جہاں انہوں نے بچوں کو پولیو کے قطرے پلائے اور کیمپ میں فراہم کی جانے والی سہولیات کا جائزہ لیا۔
-
ننکانہ صاحب: ضلعی انتظامیہ کے زیرِ اہتمام یومِ یکجہتی کشمیر ریلی
ننکانہ صاحب (نامہ نگار احسان اللہ ایاز)یومِ یکجہتی کشمیر کے موقع پر ضلعی انتظامیہ ننکانہ صاحب کے زیرِ اہتمام ایک پُرامن اور باوقار ریلی کا انعقاد کیا گیا، جس کا مقصد مظلوم کشمیری عوام کے ساتھ یکجہتی کے عہد کی تجدید کرنا تھا۔
ریلی ڈی سی آفس سے شروع ہو کر گوردوارہ جنم استھان پر اختتام پذیر ہوئی۔ ریلی کی قیادت ڈپٹی کمشنر ننکانہ صاحب محمد تسلیم اختر راؤ اور ڈسٹرکٹ پولیس آفیسر فراز احمد نے کی۔ ریلی میں ضلعی افسران، علماء اکرام، سکھ کمیونٹی، تاجر، وکلاء، میڈیا تنظیموں کے نمائندگان اور سول سوسائٹی کے افراد کی بڑی تعداد نے شرکت کی۔
ریلی کے شرکاء نے کشمیری اور پاکستانی پرچموں کے ساتھ بینرز اور پلے کارڈز اٹھا رکھے تھے، جبکہ فضا ’’کشمیر بنے گا پاکستان‘‘ اور ’’افواجِ پاکستان زندہ باد‘‘ کے نعروں سے گونجتی رہی۔
اس موقع پر مقررین نے کہا کہ یومِ یکجہتی کشمیر کشمیری عوام کے ساتھ یکجہتی کے عہد کی تجدید کا دن ہے۔ کشمیری عوام کی قربانیاں، جدوجہد اور استقامت پوری امتِ مسلمہ کے لیے باعثِ فخر ہیں، اور ہر پاکستانی دل کی گہرائیوں سے اپنے کشمیری بھائیوں اور بہنوں کے ساتھ کھڑا ہے۔
مقررین نے کہا کہ مقبوضہ کشمیر میں بھارتی مظالم اور انسانی حقوق کی سنگین خلاف ورزیاں عالمی اداروں کے لیے ایک بڑا سوالیہ نشان ہیں۔ کشمیری عوام کئی دہائیوں سے اپنے حقِ خودارادیت کے لیے جدوجہد کر رہے ہیں، جبکہ اقوامِ متحدہ کی قراردادوں پر عملدرآمد ہی خطے کے امن اور سلامتی کا واحد حل ہے۔
انہوں نے واضح کیا کہ حکومتِ پاکستان کشمیری عوام کی سیاسی، اخلاقی اور سفارتی حمایت جاری رکھے گی۔ کشمیر پاکستان کی شہ رگ ہے اور کشمیری عوام کی آزادی تک ان کی حمایت جاری رہے گی۔ مقررین نے اس امید کا اظہار کیا کہ انشاءاللہ بہت جلد مقبوضہ کشمیر میں بھارتی مظالم کا خاتمہ ہو گا اور کشمیری عوام اقوامِ متحدہ کی قراردادوں کے مطابق اپنے مستقبل کا فیصلہ خود کریں گے۔
-
گھوٹکی:جماعتِ اسلامی کے زیرِ اہتمام یومِ یکجہتی کشمیر ریلی، کشمیریوں کو حقِ خودارادیت دلانے کا مطالبہ
میرپورماتھیلو (نامہ نگار مشتاق علی لغاری)جماعتِ اسلامی ضلع گھوٹکی کے زیرِ اہتمام اوباڑو شہر میں یومِ یکجہتی کشمیر کے موقع پر مظلوم کشمیری عوام سے اظہارِ یکجہتی کے لیے ایک پُرامن اور منظم ریلی نکالی گئی۔ ریلی کا مقصد کشمیری عوام کے ساتھ اخلاقی و انسانی ہمدردی کا اظہار اور مقبوضہ کشمیر میں جاری بھارتی مظالم کی جانب عوامی توجہ مبذول کرانا تھا۔
ریلی میں جماعتِ اسلامی کے ضلعی و مقامی رہنماؤں، کارکنان، سماجی شخصیات، تاجر برادری، طلبہ اور شہریوں کی بڑی تعداد نے شرکت کی۔ شرکاء نے ہاتھوں میں بینرز اور پلے کارڈز اٹھا رکھے تھے جن پر کشمیری عوام کے حق میں نعرے اور مطالبات درج تھے، جبکہ فضا ’’نعرۂ تکبیر‘‘، ’’کشمیر بنے گا پاکستان‘‘ اور ’’یکجہتیٔ کشمیر‘‘ کے نعروں سے گونجتی رہی۔
ریلی سے خطاب کرتے ہوئے مہمانِ خصوصی مولانا حزب اللہ جکھرو، ڈپٹی جنرل سیکریٹری جماعتِ اسلامی صوبہ سندھ، نے کہا کہ وادیٔ کشمیر پاکستان کی شہ رگ ہے، جس کی مکمل آزادی اور خودمختاری کے بغیر کوئی حل قابلِ قبول نہیں۔ انہوں نے کہا کہ کشمیری عوام کئی دہائیوں سے بھارتی جبر، تشدد اور انسانی حقوق کی سنگین خلاف ورزیوں کا سامنا کر رہے ہیں، لیکن افسوس کہ اقوامِ متحدہ اور عالمی طاقتیں مسلسل خاموشی اختیار کیے ہوئے ہیں۔
اس موقع پر امیر جماعتِ اسلامی ضلع گھوٹکی تشکیل احمد صدیقی، نائب امیر مولانا مفتی محمد یوسف مزاری اور صدر جماعتِ اسلامی یوتھ ضلع گھوٹکی علی حسن منصوری نے بھی خطاب کیا۔ مقررین نے کہا کہ بھارتی افواج کی جانب سے مقبوضہ کشمیر میں کھلم کھلا نسل کشی کی جا رہی ہے، جبکہ 57 اسلامی ممالک اور عالمی برادری کی مجرمانہ خاموشی لمحۂ فکریہ ہے۔
مقررین نے پاکستانی حکمرانوں پر زور دیا کہ وہ اپنا قبلہ درست کریں اور کشمیری عوام کو ان کا حقِ خودارادیت دلانے کے لیے فوری، سنجیدہ اور عملی اقدامات کریں۔ انہوں نے کہا کہ پاکستان کی غیور عوام اب اپنے مظلوم کشمیری بھائیوں پر ڈھائے جانے والے مظالم مزید برداشت نہیں کریں گی۔
ریلی میں جماعتِ اسلامی کے علاوہ پرلس پبلک سیکنڈری اسکول اوباڑو اور مختلف سیاسی و سماجی تنظیموں کی جانب سے بھی مظاہرے کیے گئے۔ ریلی کے اختتام پر ملک و قوم اور کشمیری عوام کی آزادی، سلامتی اور کامیابی کے لیے خصوصی دعائیں کی گئیں، جبکہ شرکاء نے اس عزم کا اظہار کیا کہ کشمیری عوام کے حق میں آواز بلند کرنے کا سلسلہ آئندہ بھی جاری رکھا جائے گا۔
-
اوکاڑہ: پتنگ بازی کے خلاف بھرپور کریک ڈاؤن، درجنوں مقدمات، سینکڑوں پتنگیں برآمد
اوکاڑہ (نامہ نگار ملک ظفر)اوکاڑہ میں پتنگ بازی، پتنگ سازی اور پتنگ فروشی کے خلاف پولیس کی جانب سے بھرپور کریک ڈاؤن جاری ہے۔ ضلع بھر میں زیرو ٹالرنس پالیسی کے تحت مؤثر اور بلا امتیاز کارروائیاں عمل میں لائی جا رہی ہیں۔
ترجمان اوکاڑہ پولیس کے مطابق ماہِ جنوری کے دوران پتنگ بازی اور پتنگ فروشی میں ملوث 25 افراد کے خلاف مقدمات درج کیے گئے، جبکہ مختلف کارروائیوں کے دوران 622 پتنگیں اور 62 کیمیکل ڈور برآمد کی گئی۔
پتنگ بازی کی روک تھام کو یقینی بنانے کے لیے ضلع بھر میں خصوصی پولیس ٹیمیں تشکیل دی گئی ہیں، جو مسلسل گشت اور مؤثر نگرانی کر رہی ہیں۔ اس سلسلے میں حساس علاقوں کی کڑی مانیٹرنگ کے لیے ڈرون کیمروں اور سیف سٹی کیمروں کی مدد بھی حاصل کی جا رہی ہے۔
ڈی پی او اوکاڑہ نے کہا ہے کہ پتنگ بازی، پتنگ سازی اور پتنگ فروشی پر مکمل پابندی عائد ہے، اور قانون کی خلاف ورزی کرنے والوں کے خلاف بلا تفریق سخت قانونی کارروائی کی جا رہی ہے۔ انہوں نے واضح کیا کہ غیر محفوظ پتنگ بازی انسانی جانوں کے لیے سنگین خطرہ ہے، اس لیے کسی قسم کی رعایت نہیں دی جائے گی۔
اوکاڑہ پولیس نے والدین سے اپیل کی ہے کہ وہ اپنے بچوں پر کڑی نظر رکھیں اور انہیں پتنگ بازی جیسے خطرناک اور جان لیوا مشغلے سے دور رکھیں۔ شہریوں سے بھی کہا گیا ہے کہ وہ پتنگ بازی کی روک تھام میں پولیس کے ساتھ مکمل تعاون کریں۔
ترجمان اوکاڑہ پولیس کا مزید کہنا تھا کہ عوامی تعاون کے بغیر اس ناسور کا مکمل خاتمہ ممکن نہیں، اور پولیس عوام کے جان و مال کے تحفظ کے لیے ہر ممکن اقدامات جاری رکھے گی۔
-
اوکاڑہ: یومِ یکجہتی کشمیر پر ضلعی انتظامیہ اور گورنمنٹ گریجویٹ کالج کی پُرامن ریلی
اوکاڑہ (باغی ٹی وی/نامہ نگار ملک ظفر)یومِ یکجہتی کشمیر کے موقع پر اوکاڑہ میں ضلعی انتظامیہ کے زیرِ اہتمام ایک پُرامن اور باوقار یکجہتی ریلی کا انعقاد کیا گیا، جس میں کشمیری عوام کے ساتھ بھرپور اظہارِ یکجہتی کیا گیا۔
تفصیلات کے مطابق ریلی کی قیادت ایڈیشنل ڈپٹی کمشنر ریونیو محمد شعجین وسطرو نے کی۔ اس موقع پر ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر، ایڈیشنل ڈپٹی کمشنر جنرل احمد سلیم چشتی، دیگر سرکاری افسران، سول سوسائٹی کے نمائندے، اساتذہ، طلبہ اور شہریوں کی بڑی تعداد نے شرکت کی۔
ریلی کے شرکاء نے کشمیر کی آزادی اور مقبوضہ وادی میں جاری انسانی حقوق کی سنگین خلاف ورزیوں کے خلاف بینرز اور پلے کارڈز اٹھا رکھے تھے، جبکہ فضا ’’کشمیر بنے گا پاکستان‘‘ اور ’’ہم کشمیریوں کے ساتھ ہیں‘‘ جیسے فلک شگاف نعروں سے گونجتی رہی۔
اس موقع پر خطاب کرتے ہوئے ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر نے کہا کہ کشمیری عوام سے اظہارِ یکجہتی کا مقصد دنیا کو یہ باور کروانا ہے کہ پاکستانی قوم مظلوم کشمیریوں کے ساتھ کھڑی ہے۔ انہوں نے کہا کہ مقبوضہ کشمیر کے غاصبانہ قبضے کے خاتمے تک پاکستان ہر فورم پر اپنی آواز بلند کرتا رہے گا، کیونکہ پاکستان کی آزادی کشمیر کی آزادی کے بغیر نامکمل ہے۔
ایڈیشنل ڈپٹی کمشنر جنرل احمد سلیم چشتی نے اپنے خطاب میں کہا کہ کشمیری عوام اپنی جدوجہدِ آزادی میں تنہا نہیں ہیں، پاکستان کی پوری قوم ان کے شانہ بشانہ کھڑی ہے۔ انہوں نے عالمی برادری اور عالمِ اسلام پر زور دیا کہ وہ اقوامِ متحدہ کی قراردادوں کے مطابق کشمیری عوام کو ان کا حقِ خودارادیت دلوانے کے لیے مؤثر کردار ادا کریں۔
ریلی کے اختتام پر مقبوضہ کشمیر کے شہداء کے درجات کی بلندی اور وادیٔ کشمیر کی جلد آزادی کے لیے خصوصی دعا بھی کی گئی۔
دوسری طرف گورنمنٹ گریجویٹ کالج اوکاڑہ میں یومِ یکجہتی کشمیر کے حوالے سے ایک پروقار سیمینار اور ریلی کا انعقاد کیا گیا جس میں کشمیری عوام کی جدوجہدِ آزادی اور ان پر ہونے والے مظالم کو بھرپور طریقے سے اجاگر کیا گیا۔ سیمینار کی نظامت ڈاکٹر حسن رضا اقبالی نے نہایت خوش اسلوبی سے انجام دی جبکہ پروفیسر عثمان غنی اور پروفیسر حسیب افتخار نے اپنے خطاب میں کشمیریوں کی لازوال قربانیوں پر روشنی ڈالی۔ پرنسپل کالج پروفیسر علی حیدر ڈوگر نے اپنے صدارتی خطاب میں کشمیری مسلمانوں کے ساتھ مکمل یکجہتی کا اظہار کرتے ہوئے اس عزم کا اعادہ کیا کہ پاکستان ان کی جائز جدوجہد کی حمایت جاری رکھے گا
-
ڈاکو ایک لاکھ ڈالر اور 200 تولے سونا لوٹ کر فرار
کراچی کے علاقے بہادر آباد میں ایک شہری سے بڑی ڈکیتی کی واردات سامنے آئی ہے، جس میں ڈاکوؤں نے 200 تولے سونا اور ایک لاکھ امریکی ڈالر اپنے قبضے میں لے لیے۔ واقعہ ایسے وقت پیش آیا جب شہری بینک سے رقم نکلوا کر واپس اپنے گھر کی جانب جا رہا تھا۔
پولیس کے مطابق ڈاکو بائیک پر سوار تھے اور شہری کی جانب سے بینک سے رقم لینے کے فوراً بعدڈاکوؤں نے شہری کو گھیر لیا، چوری کرنے کے بعد کچھ دور جا کر ان کا توازن بگڑا۔ جس کے نتیجے میں ڈاکوؤں کے ہاتھ سے بیگ گر گیا اور کچھ سونا سڑک پر بکھر گیا، جسے مقامی شہریوں نے فوراً اٹھا لیا۔
ملزمان فرار ہونے میں کامیاب ہوئے تاہم پولیس نے علاقے میں سرچ آپریشن اور شواہد جمع کرنے کا کام شروع کر دیا ہے۔ پولیس کا کہنا ہے کہ واقعے کے تمام پہلوؤں کی تحقیقات کی جا رہی ہیں اور شہریوں سے اپیل کی گئی ہے کہ اگر کسی نے ڈکیتی کے دوران رقم یا سونا دیکھا یا پکڑا ہو تو فوری اطلاع فراہم کریں تاکہ ملزمان کی گرفتاری ممکن بنائی جا سکے۔
واقعہ کے بعد علاقے میں سکیورٹی کے انتظامات سخت کر دیے گئے ہیں اور پولیس نے مقامی دکانداروں اور رہائشیوں کو ہوشیار رہنے کی ہدایت بھی کی ہے۔ -
میئر مرتضیٰ وہاب کا جلد کراچی میں بھی بسنت منانے کا اعلان
میئر کراچی مرتضیٰ وہاب نے شہر میں بسنت منانے کا اعلان کرتے ہوئے کہا ہے کہ جلد کراچی میں پتنگ بازی کا باقاعدہ فیسٹیول منعقد کیا جائے گا۔ ان کا کہنا تھا کہ بچپن میں انہیں خود بھی پتنگ بازی کا بے حد شوق رہا ہے اور وہ چاہتے ہیں کہ کراچی کے شہری ایک مثبت اور ثقافتی سرگرمی سے لطف اندوز ہوں۔
مرتضیٰ وہاب نے اپنے حالیہ بیان میں کہا کہ بسنت کے فیسٹیول کے لیے باغِ جناح اور بے نظیر بھٹو پارک کو منتخب کیا گیا ہے، جہاں شہریوں کے لیے محفوظ اور منظم ماحول فراہم کیا جائے گا۔ ان کا کہنا تھا کہ فیسٹیول کے انعقاد کا مقصد شہر میں خوشیوں کو فروغ دینا اور عوام کو تفریح کے مواقع فراہم کرنا ہے۔
میئر کراچی نے مزید کہا کہ بسنت کے انعقاد کے دوران سکیورٹی اور حفاظتی اقدامات کو ترجیح دی جائے گی تاکہ کسی قسم کے ناخوشگوار واقعے سے بچا جا سکے۔ انتظامیہ اس بات کو یقینی بنائے گی کہ پتنگ بازی مقررہ ضابطوں کے تحت ہو اور شہریوں کی جان و مال کو کوئی خطرہ لاحق نہ ہو۔
ان کے مطابق کراچی ایک زندہ دل شہر ہے اور ایسے ثقافتی میلوں سے نہ صرف شہریوں کا مورال بلند ہوتا ہے بلکہ شہر کی مثبت شناخت بھی اجاگر ہوتی ہے۔ -
ڈیرہ غازی خان: ڈائیوو ویسٹ مینجمنٹ کمپنی کی یومِ کشمیر پر یکجہتی ریلی
ڈیرہ غازی خان (باغی ٹی وی/سٹی رپورٹر)ڈیرہ غازی خان میں ڈائیوو ویسٹ مینجمنٹ کمپنی کی جانب سے یومِ کشمیر کے موقع پر کشمیری عوام سے اظہارِ یکجہتی کے لیے ایک بھرپور ریلی کا انعقاد کیا گیا۔ ریلی کی قیادت ریجنل منیجر شاہزیب خان اور کوآرڈینیٹر عبداللہ عباسی نے کی، جبکہ ڈسٹرکٹ منیجر توفیق عادل اور تحصیل منیجر عمر مجتبیٰ لغاری نے خصوصی شرکت کی۔
ریلی کا مقصد مظلوم کشمیری عوام کے ساتھ بھرپور یکجہتی کا اظہار اور بھارتی مظالم کے خلاف آواز بلند کرنا تھا۔ ریلی ڈی سی آفس سے شروع ہو کر کچہری چوک پر اختتام پذیر ہوئی، جہاں شرکاء نے کشمیر کی آزادی کے حق میں نعرے لگائے اور بھارت کے مظالم کی شدید مذمت کی۔
اس موقع پر خطاب کرتے ہوئے ریجنل منیجر ڈائیوو ویسٹ مینجمنٹ شاہزیب خان نے کہا کہ کشمیر پاکستان کی شہ رگ ہے اور کوئی بھی دشمن اگر اس کی طرف میلی آنکھ سے دیکھے گا تو پوری قوم اسے ہرگز برداشت نہیں کرے گی۔ انہوں نے کہا کہ کشمیری عوام کی جدوجہدِ آزادی میں پوری پاکستانی قوم ان کے شانہ بشانہ کھڑی ہے۔
کوآرڈینیٹر عبداللہ عباسی نے اپنے خطاب میں کہا کہ ہم قربانیاں تو دے سکتے ہیں مگر کشمیر پر کوئی سمجھوتہ ممکن نہیں۔ انہوں نے بھارت کو خبردار کرتے ہوئے مطالبہ کیا کہ وہ اپنے ناپاک عزائم ترک کرے اور کشمیری عوام کو ان کا بنیادی حقِ خودارادیت فراہم کرے۔
ریلی کے اختتام پر شرکاء نے اس عزم کا اعادہ کیا کہ کشمیر کی مکمل آزادی تک جدوجہد جاری رکھی جائے گی اور کشمیری عوام کو کبھی تنہا نہیں چھوڑا جائے گا۔