Blog

سمندر سے تیل اور گیس کا ذخیرہ ملنے کی خوشخبریاں ہوا میں اڑ گئی ہیں. ڈرلنگ کمپنیوں نے پچھلے چار ماہ کے دوران اربوں‌ روپے خرچ کئے اور ساڑھے پانچ ہزار میٹر ڈرلنگ کی ، اس پر 14ارب روپے سے زائد خرچ کئے گئے تاہم کوئی فائدہ نہیں‌ہوا.

باغی ٹی وی کی رپورٹ کے مطابق ڈرلنگ کمپنیوں نے زیر سمندر سوراخ‌ بند کرنے کا عمل شروع کر دیا ہے. ٹیسٹنگ رزلٹ کے مطابق تیل اور گیس کا مطلوبہ ذخیرہ نہیں‌مل سکا. سمندر میں تیل اور گیس کی تلاش کیلئے ڈرلنگ کے بعد ٹیسٹنگ کا عمل مکمل کر لیا گیا ہے.

ٹیسٹنگ کے نتائج سے وزیر اعظم عمران خان کو آگاہ کر دیا گیا ہے. یاد رہے کہ وزیر اعظم عمران خان نے بھی سمندر سے تیل اور گیس کے ذخائر ملنے سے قوم کو آگاہ کیا تھا تاہم اب یہ ساری امیدیں‌ دم توڑ‌گئی ہیں.

سمندر سے تیل اور گیس کی تلاش کے سلسلہ میں ڈرلنگ کے لئے کئی ملکی اور غیر ملکی کمپنیاں‌حصہ لے رہی تھیں تاہم اب اس کام کو روک دیا گیا ہے.

وزیر اعظم عمران خان نے کہا ہے کہ نیا بلدیاتی نظام پرانے قبائلی نظام جیسا ہے. اس نظام کے ذریعہ صوبائی حکومت ہر گاؤں‌ کو براہ راست فنڈز فراہم کرے گی.

باغی ٹی وی کی رپورٹ‌ کے مطابق وزیر اعظم نے ضم شدہ قبائلی اضلاع کے عمائدین سے خطاب کیا اور کہاکہ حکومت کی طرف سے قبائلی علاقوں‌ کو خیرپختونخواہ میں ضم کرنا انتہائی مشکل فیصلہ تھا کیونکہ قبائلی علاقوں‌میں جرائم کی شرح نہ ہونے کے برابر تھی اور ان علاقوں‌ میں‌ طویل عرصہ سے جو پرانا نظام چلا آ رہا تھا اس کی وجہ سے امن تھا لہٰذا بہت سوچ سمجھ کر یہ مشکل فیصلہ کیا گیا.

انہوں نے کہاکہ نئے بلدیاتی نظام میں یہ خاصیت ہے کہ اس کے ذریعہ ہر گاؤں‌کے لوگ اپنے فیصلے خود کر سکیں گے. ہم جلد ایک کمیٹی بھی بنائیں گے جو قبائلی علاقوں‌کے مسائل حل کرے گی. حکومت قبائلی علاقوں‌میں خیبر پختونخواہ کی صوبائی اسمبلی میں‌ نمائندگی بھی دے گی اور آپ کی آواز بھی اسمبلیوں‌میں سنائی دے گی.

یاد رہے کہ وزیر اعظم عمران خان نے قبائلی عوام سے وعدہ کیا تھا کہ وہ ان کی روایات کے مطابق نظام لے کر آئیں‌گے.

پاکستان میں‌ ہیپا ٹائٹس کا مرض اس قدر تیزی سے پھیل رہا ہے کہ ہر سال 25 ملین افراد کو ہیپا ٹائٹس کی سکریننگ کروانے کی ضرورت ہے. اس وقت پاکستان میں نو لاکھ سے زائد افراد اس مرض میں مبتلا ہیں. اسی طرح‌ پاکستان میں معدہ اور جگر کا مرض بھی بہت تیزی سے پھیل رہا ہے.

باغی ٹی وی کی رپورٹ‌ کے مطابق امریکہ میں مقیم پاکستان میں طبی ماہرین ڈاکٹر فسیحہ کنول، ڈاکٹر نوید جنجوعہ اور ان کی ٹیم کی جانب سے تیا رکی گئی رپورٹ‌ میں‌ کہا گیا ہے کہ اس صورتحال پر موثر طریقہ سے قابو پانے کی ضرورت ہے وگرنہ 2030 تک صورتحال اس قدر بگڑ سکتی ہے کہ ہیپا ٹائٹس سے 1.44 ملین لوگوں‌ کی ہیپا ٹائٹس سے اموات کا خدشہ ہے. یہ بھی کہا گیا ہے کہ آئندہ برسوں‌ میں ہیپاٹائٹس سے وفات پانے والوں‌کی عمریں پچاس سال سے بھی کم ہونے کا اندیشہ ہے

طبی ماہرین نے یہ بھی کہا ہے کہ ہیپا ٹائٹس کے مریضوں‌کی وسیع پیمانے پر سکریننگ کیلئے 2.6 ملین ڈالر درکار ہوں گے. ماہرین کا یہ بھی کہنا ہے کہ عوامی سطح‌پر شعور بیدار کر کے ہی ہیپا ٹائٹس جیسے موذی امراض سے بچاجاسکتا ہے. یاد رہے کہ حکومت پاکستان اس مرض کے خاتمہ کیلئے مختلف نوعیت کے اقدامات کر رہی ہے تاہم ہیپاٹائٹس پر فی الحال قابو نہیں‌پایا جاسکا ہے.