Blog

وفاقی وزیر احسن اقبال نے کہا ہے کہ پاکستان کے لیے یہ اعزاز کی بات ہے کہ وہ اسلام آباد امن مذاکرات کی میزبانی کر رہا ہے اور جنگ میں مصروف فریقین کو میدانِ جنگ سے مذاکرات کی میز تک لانے میں اپنا کردار ادا کر رہا ہے۔ میں پاکستان، ایران اور امریکہ کی قیادت کو خراجِ تحسین پیش کرتا ہوں، اور ان تمام برادر ممالک کا بھی شکریہ ادا کرتا ہوں جن کی تعمیری کاوشوں نے امن کے اس موقع کو ممکن بنایا۔ ہماری کوشش ایک سادہ مگر مضبوط یقین سے رہنمائی حاصل کرتی رہی ہے کہ بداعتمادی کی جگہ مکالمہ لے، کشیدگی پر ضبط و تحمل غالب آئے، اور جنگ کے رجحان پر دانشمندی فتح حاصل کرے۔ مسلسل تنازع نہ صرف خطے بلکہ پوری عالمی برادری کے لیے تباہ کن ثابت ہوگا۔

احسن اقبال کا کہنا تھا کہ یہ بحران اب صرف ایک علاقائی مسئلہ نہیں رہا۔ اس کے معاشی اثرات آسٹریلیا سے امریکہ تک، دنیا کے تمام 193 ممالک میں محسوس کیے جا رہے ہیں، جہاں مہنگائی کے دباؤ، توانائی کی فراہمی میں رکاوٹ، غیر مستحکم منڈیاں، اور بڑھتی ہوئی بے یقینی نے حالات کو متاثر کیا ہے۔ اگر یہ تنازع جاری رہا تو مزید لاکھوں افراد غربت کی طرف دھکیل دیے جائیں گے۔ ناکامی کا بوجھ صرف جنگ کرنے والے فریقین پر نہیں پڑے گا بلکہ دنیا بھر کے عام مرد، خواتین اور بچوں کو عدم تحفظ، مہنگائی اور عدم استحکام کی صورت میں اس کی قیمت چکانی پڑے گی۔لہٰذا ہم خلوصِ دل سے امید کرتے ہیں کہ یہ مذاکرات کامیاب ہوں۔ ان کی کامیابی صرف علاقائی امن کے لیے نہیں بلکہ دنیا بھر میں لاکھوں خاندانوں کے معاشی تحفظ اور بہتر مستقبل کے لیے بھی اہم ہوگی۔ آخرکار تاریخ یہ یاد نہیں رکھے گی کہ سب سے سخت لہجہ کس نے اختیار کیا، بلکہ وہ ان لوگوں کو یاد رکھے گی جنہوں نے وسیع تر جنگ کو روکنے کے لیے دانائی، بصیرت اور اعلیٰ قیادت کا مظاہرہ کیا۔

وفاقی وزیر خزانہ سینیٹر محمد اورنگزیب ورلڈ بینک گروپ اور بین الاقوامی مالیاتی فنڈ (آئی ایم ایف) کے بہار اجلاسوں میں شرکت کے لیے امریکہ روانہ ہو گئے ہیں۔ یہ اجلاس 13 سے 18 اپریل 2026 تک واشنگٹن ڈی سی میں منعقد ہوں گے۔

وزیر خزانہ ان اجلاسوں میں شرکت سے قبل بوسٹن کا دورہ کریں گے جہاں وہ ہارورڈ یونیورسٹی میں منعقدہ پاکستان کانفرنس میں شرکت کریں گے۔ وزیر خزانہ کانفرنس میں شریک ماہرین، پالیسی سازوں اور پاکستانی کمیونٹی سے ملاقاتیں کریں گے اور پاکستان کی معیشت، اصلاحاتی اقدامات اور ترقی کے امکانات پر اظہار خیال کریں گے۔
دورے کے دوران وزیر خزانہ آئی ایم ایف اور ورلڈ بینک کے اہم اجلاسوں میں پاکستان کی نمائندگی کریں گے اور عالمی مالیاتی رہنماؤں، ترقیاتی شراکت داروں اور پالیسی سازوں سے وسیع پیمانے پر ملاقاتیں کریں گے۔اجلاسوں کے موقع پر وزیر خزانہ عالمی مالیاتی اداروں کی اعلیٰ قیادت سے ملاقاتیں کریں گے، جن میں ورلڈ بینک کی منیجنگ ڈائریکٹر (آپریشنز) انا بیردے، آئی ایف سی کے منیجنگ ڈائریکٹر مختار دیوپ اور میگا کے منیجنگ ڈائریکٹر سوتومو یاماموتو شامل ہیں۔

وزیر خزانہ آئی ایم ایف کے اعلیٰ حکام سے بھی ملاقات کریں گے، جن میں فرسٹ ڈپٹی منیجنگ ڈائریکٹر ڈین کاٹز، ڈپٹی منیجنگ ڈائریکٹر نائجل کلارک اور مشرق وسطیٰ و وسطی ایشیا کے ڈائریکٹر جہاد اظہور شامل ہیں۔ ان ملاقاتوں میں پاکستان کی معاشی صورتحال، اصلاحات اور مستقبل کے تعاون پر تبادلہ خیال کیا جائے گا۔امریکہ کے دورے کے دوران وزیر خزانہ امریکی حکومت کے اعلیٰ حکام سے بھی ملاقات کریں گے، جن میں اسٹیٹ ڈیپارٹمنٹ اور محکمہ خزانہ کے سینئر حکام کے علاوہ امریکہ کے تجارتی نمائندے جیمیسن گریئر شامل ہیں۔
وزیر خزانہ عالمی مالیاتی اداروں اور عالمی کمپنیوں کے نمائندوں سے بھی ملاقات کریں گے، جن میں فرینکلن ٹیمپلٹن، روتھس چائلڈ اینڈ کمپنی، سٹی بینک اور جے پی مورگن جیسے بین الاقوامی ادارے شامل ہیں، جبکہ ٹیکنالوجی اور پالیسی کے شعبوں کے نمائندوں سے بھی ملاقاتیں ہوں گی۔

ان مصروفیات کے ساتھ ساتھ وزیر خزانہ مختلف ممالک کے ہم منصب رہنماؤں اور اعلیٰ قیادت سے باہمی ملاقات کریں گے، جن میں چین، سعودی عرب، متحدہ عرب امارات، ترکیہ اور برطانیہ کے قائدین شامل ہیں۔
وزیر خزانہ دیگر عالمی اور ترقیاتی مالیاتی اداروں کے نمائندوں سے بھی ملاقات کریں گے، جن میں آئی ایف اے ڈی، گیٹس فاؤنڈیشن، ایشیائی ترقیاتی بینک، جائیکا اور ایشین انفراسٹرکچر انویسٹمنٹ بینک شامل ہیں۔

دورے کے دوران وزیر خزانہ جی-24 اجلاس، موسمیاتی اقدام کے لیے وزرائے خزانہ کے اتحاد سمیت اہم عالمی فورمز میں شرکت کریں گے۔ وہ مختلف اعلیٰ سطحی مکالموں اور راؤنڈ ٹیبل اجلاسوں میں بھی حصہ لیں گے، جہاں عالمی معیشت، مالیاتی اصلاحات، موسمیاتی فنانس اور ترقیاتی امور پر گفتگو ہو گی۔دورے کا ایک اہم حصہ ان کی ورلڈ بینک کے زیر اہتمام ایک خصوصی اجلاس میں شرکت ہے جہاں بینظیر انکم سپورٹ پروگرام (بی آئی ایس پی) کے ذریعے پاکستان میں سماجی تحفظ کے ڈیجیٹل نظام کے تجربات اور کامیابیاں پیش کی جائیں گی۔
اس کے علاوہ وزیر خزانہ سرمایہ کاری فورمز اور گول میز اجلاسوں میں شرکت کریں گے، جن میں جیفریز، جے پی مورگن اور سٹی بینک کے زیر اہتمام نشستیں شامل ہیں، جہاں وہ پاکستان کے معاشی اشاریوں، اصلاحات اور سرمایہ کاری کے مواقع کو اجاگر کریں گے۔وزیر خزانہ روشن ڈیجیٹل اکاؤنٹس اور ترسیلات زر سے متعلق ایک خصوصی تقریب میں بھی شرکت کریں گے، جو اسٹیٹ بینک آف پاکستان کے تعاون سے واشنگٹن میں پاکستانی سفارتخانے میں منعقد کی جائے گی۔وزیر خزانہ محمد اورنگزیب عالمی کریڈٹ ریٹنگ ایجنسیوں جیسے فچ، موڈیز اور ایس اینڈ پی کے نمائندوں سے بھی ملاقات کریں گے اور بین الاقوامی میڈیا سے بھی گفتگو کریں گے۔
وزیر خزانہ اٹلانٹک کونسل سمیت معروف تھنک ٹینکس سے خطاب کریں گے اور پاکستان کی معیشت اور اصلاحاتی ایجنڈے پر روشنی ڈالیں گے۔اس کے علاوہ وہ یو ایس پاکستان بزنس کونسل کے ارکان اور امریکہ میں مقیم پاکستانی کمیونٹی سے ملاقات کریں گے تاکہ سرمایہ کاری کے مواقع کو فروغ دیا جا سکے اور اقتصادی تعلقات کو مزید مضبوط بنایا جا سکے۔اپنے دورے کے دوران وزیر خزانہ 50 سے زائد اہم ملاقاتوں، اجلاسوں اور مکالموں میں شرکت کریں گے، جو عالمی اقتصادی برادری کے ساتھ پاکستان کے فعال کردار کی عکاسی کرتا ہے۔
یہ دورہ پاکستان کے معاشی استحکام، اصلاحات اور عالمی مالیاتی اداروں کے ساتھ شراکت داری کو مزید مضبوط بنانے کے عزم کا مظہر ہے.

اسلام آباد: ایک سینئر پاکستانی ذریعے نے امریکی نائب صدر جے ڈی وینس کے کردار کو سراہتے ہوئے کہا ہے کہ امریکا اور ایران کو جنگ کے بجائے سفارتی حل کی جانب لانے میں ان کا کردار نہایت اہم رہا ہے۔

بین الاقوامی میڈیا رپورٹ کے مطابق جے ڈی وینس ان مذاکراتی کوششوں میں کلیدی شخصیت کے طور پر سامنے آئے ہیں، جن کے تحت اسلام آباد میں آئندہ چند گھنٹوں میں اہم مذاکرات شروع ہونے جا رہے ہیں۔امریکی نائب صدر وفد کے ہمراہ اسلام آباد پہنچ چکے ہیں،ذرائع کے مطابق مذاکراتی عمل سے واقف حکام کا اندازہ ہے کہ مستقل جنگ بندی کے معاہدے تک پہنچنے کے لیے چند روز درکار ہوں گے۔ اس مقصد کے لیے پاکستانی حکام پُرامید ہیں کہ وہ امریکی نائب صدر کو مزید کچھ عرصہ پاکستان میں قیام پر آمادہ کر سکیں گے تاکہ مذاکراتی عمل کو نتیجہ خیز بنایا جا سکے۔

پاکستانی حکام کا کہنا ہے کہ موجودہ صورتحال میں اسلام آباد خطے اور عالمی امن کے لیے ایک اہم سفارتی مرکز بن چکا ہے، جہاں دونوں فریقوں کو ایک میز پر لانے کی کوششیں جاری ہیں۔ حکام کے مطابق پاکستان اس حساس مرحلے پر ایک ذمہ دار اور غیر جانبدار ثالث کے طور پر اپنا کردار ادا کر رہا ہے۔ تجزیہ کاروں کا کہنا ہے کہ اگر اسلام آباد مذاکرات کامیاب ہو جاتے ہیں تو یہ نہ صرف مشرق وسطیٰ بلکہ جنوبی ایشیا اور عالمی سیاست کے لیے بھی ایک بڑی پیش رفت ثابت ہوگی۔ تمام نظریں اب پاکستان کے دارالحکومت پر مرکوز ہیں، جہاں آنے والے دنوں میں اہم فیصلے متوقع ہیں۔

پاکستان کے دارالحکومت میں ہفتے کے روز امریکی نائب صدر کی آمد پر اعلیٰ سطحی استقبال دیکھنے میں آیا، جہاں پاکستان کی مسلح افواج کے سربراہ،فیلڈ مارشل سید عاصم منیر نے خود ایئرپورٹ پر ان کا استقبال کیا۔ آمد کے موقع پر جاری مناظر میں دیکھا گیا کہ دونوں رہنماؤں نے گرمجوشی سے مصافحہ کیا اور مختصر گفتگو بھی کی۔

جنرل عاصم منیر اس وقت پاکستان اور امریکا کے درمیان تعلقات میں اہم کردار ادا کرتے دکھائی دے رہے ہیں۔ مبصرین کے مطابق حالیہ مہینوں میں دونوں ممالک کے روابط میں اضافہ ہوا ہے اور دفاعی، سفارتی و علاقائی معاملات پر مشاورت کا سلسلہ بھی تیز ہوا ہے۔ذرائع کے مطابق جنرل عاصم منیر نے امریکی قیادت کے ساتھ اپنے روابط اور ایران کے ساتھ پاکستان کے دیرینہ تعلقات کو استعمال کرتے ہوئے حالیہ جنگ بندی کوششوں میں بھی اہم کردار ادا کیا۔ اسی سفارتی سرگرمی کے تسلسل میں اسلام آباد میں ہونے والے مذاکرات کو غیر معمولی اہمیت دی جا رہی ہے۔اطلاعات ہیں کہ وہ آئندہ بات چیت میں بھی مرکزی کردار ادا کریں گے، جہاں خطے میں کشیدگی کے خاتمے اور امن کے قیام پر غور کیا جائے گا۔امریکی صدر ڈونلڈ ٹرمپ فیلڈ مارشل سید عاصم منیر کو پسندیدہ فیلڈ مارشل کہہ چکے ہیں،

ایئرپورٹ پر استقبال کے دوران جنرل عاصم منیر سیاہ سوٹ اور سبز ٹائی میں ملبوس تھے، جبکہ اس سے چند گھنٹے قبل ایرانی وفد کے استقبال کے وقت وہ فوجی وردی میں نظر آئے تھے۔ اس تبدیلی کو سفارتی آداب اور مختلف مواقع کی مناسبت سے دیکھا جا رہا ہے۔سیاسی و سفارتی حلقوں کا کہنا ہے کہ پاکستان اس وقت خطے میں ثالثی اور امن کوششوں کے مرکز کے طور پر ابھر رہا ہے، اور عالمی طاقتوں کے اعلیٰ وفود کی آمد اس بڑھتی ہوئی اہمیت کی عکاس ہے۔

ممتاز عالمی دن مفتی تقی عثمانی نے کہا ہےکہ ایران امریکا جنگ رکوانے میں پاکستانی قیادت کو اللہ تعالی نے انتہائی نازک اور متوازن کردار ادا کرنے کی توفیق عطا فرمائی ہے۔

سوشل میڈیا پلیٹ فارم ایکس پر جاری بیان میں مفتی تقی عثمانی نے کہا کہ ایران امریکا جنگ رکوانے میں پاکستانی قیادت کو اللہ تعالی نے انتہائی نازک اور متوازن کردار ادا کرنے کی توفیق عطا فرمائی، اس کی وجہ سےدنیا بھر میں پاکستان کا وقار غیرمعمولی طورپر بلند ہوا،انہوں نے کہا کہ آج جو مذاکرات ہونے والے ہیں ان کی کامیابی پر عالم اسلام بلکہ پوری دنیا کا مفاد وابستہ ہے، وزیراعظم نے اس موقع پر عوام سے دعا کی اپیل کی ہے، اس لیے ہم سب کو دعا میں مصروف رہناچاہیے۔