Blog


ایران کی وزارتِ انٹیلی جنس نے اسرائیل کے لیے مبینہ طور پر کام کرنے کے الزام میں 97 افراد کو گرفتار کرنے کا اعلان کیا ہے۔
رپورٹس کے مطابق یہ گرفتاریاں ایک وسیع سکیورٹی کریک ڈاؤن کا حصہ ہیں، جس کے تحت جنگ کے آغاز سے اب تک اسرائیل اور امریکا سے مبینہ روابط کے شبے میں سیکڑوں افراد کو حراست میں لیا جا چکا ہے۔
‎ایرانی حکام کا کہنا ہے کہ ان اقدامات کا مقصد اندرونی سکیورٹی کو مضبوط بنانا اور بیرونی اثر و رسوخ کو روکنا ہے، خاص طور پر ایسے وقت میں جب خطے میں کشیدگی عروج پر ہے۔
‎اس سے قبل بھی صوبہ البرز میں درجنوں افراد کو غیر ملکی اپوزیشن میڈیا کو ویڈیوز فراہم کرنے کے الزام میں گرفتار کیا گیا تھا، جسے حکام نے قومی سلامتی کے خلاف اقدام قرار دیا۔


ایران کے خاتم الانبیاء مرکزی ہیڈکوارٹر کے ترجمان نے کہا ہے کہ ایرانی مسلح افواج کی جارحانہ اور دفاعی کارروائیاں پوری شدت کے ساتھ جاری ہیں۔
ترجمان کے مطابق ایران کے توانائی کے بنیادی ڈھانچے کو نشانہ بنانا دشمن کی سنگین غلطی ہے، جس کا بھرپور جواب دیا جا رہا ہے اور یہ سلسلہ ابھی ختم نہیں ہوا۔
‎انہوں نے خبردار کیا کہ اگر ایسے حملے دوبارہ کیے گئے تو ایران نہ صرف جواب دے گا بلکہ دشمن اور اس کے اتحادیوں کی توانائی تنصیبات کو بھی نشانہ بنایا جا سکتا ہے۔
‎ترجمان کا کہنا تھا کہ موجودہ صورتحال میں ایران اپنی دفاعی حکمت عملی پر مکمل عمل کر رہا ہے اور کسی بھی ممکنہ خطرے کا سختی سے مقابلہ کرے گا۔


امریکی صدر ڈونلڈ ٹرمپ نے عندیہ دیا ہے کہ وہ پینٹاگون کے لیے 200 ارب ڈالر تک اضافی فنڈنگ طلب کر سکتے ہیں، جسے انہوں نے فوجی تیاری کو مضبوط بنانے کے لیے ایک ضروری قدم قرار دیا۔
اوول آفس میں گفتگو کرتے ہوئے ٹرمپ نے کہا کہ امریکہ اپنی فوج کو بہترین حالت میں رکھنا چاہتا ہے اور اس مقصد کے لیے بڑے وسائل مختص کرنا ایک معمولی قیمت ہے۔ انہوں نے واضح کیا کہ یہ فنڈنگ صرف ایران سے متعلق صورتحال تک محدود نہیں ہوگی بلکہ دیگر دفاعی ضروریات بھی اس میں شامل ہوں گی۔
‎صدر ٹرمپ نے کہا کہ وہ اس بات کو یقینی بنانا چاہتے ہیں کہ امریکی فوج کے پاس وافر مقدار میں اسلحہ اور گولہ بارود موجود ہو، تاہم انہوں نے اس تاثر کو مسترد کیا کہ امریکہ کو ہتھیاروں کی کمی کا سامنا ہے۔
‎ان کا کہنا تھا کہ حکومت دفاعی اخراجات میں احتیاط برت رہی ہے اور موجودہ وسائل کو محفوظ رکھتے ہوئے مستقبل کی ضروریات کو بھی مدنظر رکھا جا رہا ہے۔


سعودی عرب میں امریکی سفارت خانے نے ملک میں موجود امریکی شہریوں کو فوری طور پر سعودی عرب چھوڑنے کی ہدایت جاری کر دی ہے۔
سفارت خانے کے بیان میں کہا گیا ہے کہ امریکی شہری کمرشل پروازوں کے ذریعے جلد از جلد ملک سے روانہ ہو جائیں، کیونکہ سعودی فضائی حدود میں میزائل اور ڈرون حملوں کے خطرات میں اضافہ ہو رہا ہے۔
‎بیان کے مطابق ریاض، جدہ اور دمام کے ائیرپورٹس بدستور فعال ہیں اور شہریوں کو ہدایت کی گئی ہے کہ وہ مقامی وارننگ سسٹم اور حکومتی ہدایات پر مکمل عمل کریں۔
‎امریکی حکام نے مزید کہا کہ موجودہ صورتحال کے پیش نظر احتیاطی تدابیر اختیار کرنا ضروری ہے تاکہ کسی بھی ممکنہ خطرے سے محفوظ رہا جا سکے۔


امریکی صدر ڈونلڈ ٹرمپ نے واضح کیا ہے کہ وہ مشرق وسطیٰ میں امریکی فوجی دستے تعینات نہیں کر رہے۔
اوول آفس میں گفتگو کرتے ہوئے انہوں نے کہا کہ وہ کہیں بھی فوج نہیں بھیج رہے، اور اگر ایسا کوئی فیصلہ ہوتا بھی تو وہ اس کا اعلان نہ کرتے، تاہم فی الحال ایسی کوئی تعیناتی زیر غور نہیں۔
‎وائٹ ہاؤس کے ایک اہلکار نے بھی کہا کہ اس وقت زمینی افواج بھیجنے کا کوئی حتمی فیصلہ نہیں کیا گیا، تاہم تمام آپشنز کھلے رکھے گئے ہیں۔
‎دوسری جانب اطلاعات ہیں کہ ایک میرین ایکسپڈیشنری یونٹ کو مشرق وسطیٰ میں تعینات کیا گیا ہے، تاہم یہ واضح نہیں کہ آیا امریکہ مستقبل میں زمینی فوج بھیجے گا یا نہیں۔

ایرانی حملے کی زد میں آ کر امریکی فضائیہ کا جدید اسٹیلتھ لڑاکا طیارہ ایف-35 ہنگامی لینڈنگ پر مجبور ہو گیا۔طیارے کوقریبی امریکی فضائی اڈے پر اتارا گیا۔

امریکی سینٹرل کمانڈ کے ترجمان کیپٹن ٹم ہاکنز نے تصدیق کرتے ہوئے بتایا کہ پانچویں نسل کا یہ جدید طیارہ ایران کے اوپر جنگی مشن پر تھا جب اسے تکنیکی اور ممکنہ حملے کے باعث ہنگامی لینڈنگ کرنا پڑی۔ انہوں نے کہا کہ طیارہ بحفاظت لینڈ کر گیا اور پائلٹ کی حالت مستحکم ہے۔کیپٹن ہاکنز کے مطابق "طیارہ محفوظ طریقے سے اتر گیا ہے اور پائلٹ مکمل طور پر ہوش میں ہے، تاہم واقعے کی مکمل تحقیقات جاری ہیں۔”

ابتدائی اطلاعات کے مطابق یہ پہلا موقع ہو سکتا ہے کہ ایران نے براہِ راست کسی امریکی طیارے کو نشانہ بنایا ہو، جس سے خطے میں جاری جنگ ایک نئے مرحلے میں داخل ہو سکتی ہے۔

واضح رہے کہ امریکہ اور اسرائیل دونوں اس تنازع میں ایف-35 جیسے جدید ترین لڑاکا طیارے استعمال کر رہے ہیں، جن کی قیمت 100 ملین ڈالر سے زائد ہوتی ہے۔دوسری جانب امریکی حکام بدستور اپنی فوجی مہم کو کامیاب قرار دے رہے ہیں۔ امریکی وزیر دفاع پیٹ ہیگستھ نے حالیہ بیان میں دعویٰ کیا کہ امریکہ "فیصلہ کن برتری” حاصل کر چکا ہے اور ایران کے فضائی دفاعی نظام کو "بڑی حد تک تباہ” کر دیا گیا ہے۔