Baaghi TV

Blog

  • ‘پاکستان گاٹ ٹیلنٹ’ کے پہلے سیزن میں ججز کے فرائض کون سرانجام دیں گے؟

    ‘پاکستان گاٹ ٹیلنٹ’ کے پہلے سیزن میں ججز کے فرائض کون سرانجام دیں گے؟

    مشہور عالمی ٹیلنٹ شو ‘پاکستان گاٹ ٹیلنٹ’ نے اپنے پہلے سیزن کے ججز کا اعلان کر دیا ہےپینل میں گلوکار علی ظفر، اداکارہ مہوش حیات اور کامیڈین و میزبان تابش ہاشمی شامل ہیں،ججز کے اعلان کے بعد سوشل میڈیا پر مداحوں کی جانب سے مثبت ردعمل سامنے آیا ہے-

    شو کی انتظامیہ نے ججز کے نام اپنے آفیشل انسٹاگرام اکاؤنٹ پر جاری کیے سب سے پہلے تابش ہاشمی کو بطور جج متعارف کرایا گیا، جنہوں نے ملک بھر کے باصلاحیت افراد کو آڈ یشنز میں شرکت کی دعوت دی، اس کے بعد مہوش حیات کو پینل میں شامل کیا گیا،مہوش حیات نے انسٹا گرام پر اپنی پوسٹ میں کہا کہ پاکستان کے ہر شہر و گاؤں میں باصلاحیت افراد موجود ہیں، جنہیں اب اپنی صلاحیتیں دکھانے کا موقع ملے گا،گلوکار و اداکار علی ظفر کو پینل کا حصہ بنایا گیا، انہوں نے امیدواروں کو پیغام دیتے ہوئے کہا کہ اب ان کے لیے اسٹیج پر اپنی صلاحیتوں کا لوہا منوانے کا وقت آ گیا ہے۔

    ‘پاکستان گاٹ ٹیلنٹ’ دنیا بھر میں مقبول Got Talent فارمیٹ پر مبنی شو ہے، جو 70 سے زائد ممالک میں نشر کیا جا چکا ہے شو کی پروڈکشن کمپنی نے ملک بھر سے امیدواروں کے لیے آڈیشنز کا سلسلہ شروع کر دیا ہے، جہاں گلوکاری، رقص، کامیڈی، جادوگری اور دیگر منفرد صلاحیتوں کے حامل افراد شرکت کر سکتے ہیں۔

  • راولپنڈی، اسلام آباد سمیت ملک کے مختلف علاقوں میں زلزلے کے جھٹکے

    راولپنڈی، اسلام آباد سمیت ملک کے مختلف علاقوں میں زلزلے کے جھٹکے

    وفاقی دارالحکومت اسلام آباد سمیت ملک کے مختلف علاقوں میں زلزلے کے جھٹکے محسوس کیے گئے ہیں،زلزلے کے شدید جھٹکوں کے باعث شہریوں میں خوف و ہراس پھیل گیا اور متعدد مقامات پر لوگ کلمہ طیبہ کا ورد کرتے ہوئے گھروں اور دفاتر سے باہر نکل آئے۔

    راولپنڈی، اسلام آباد، لاہور، میانوالی، شیخوپورہ، سرگودھا، سیالکوٹ سمیت پنجاب کے مختلف علاقوں میں بھی زلزلے کے جھٹکے ریکارڈ کیے گئےلاہور، میانوالی اور اس کے نواحی علاقوں کے علاوہ چکوال اور گردونواح میں بھی لوگوں نے زلزلے کی شدت محسوس کی خیبرپختونخوا میں زلزلے سے متاثر ہونے والے علاقوں میں شانگلہ، بونیر، مردان، چارسدہ، سوات، صوابی، کوہاٹ، کرک، ملاکنڈ، باجوڑ، ہنگو، لوئر دیر اور جنوبی وزیرستان لوئر سمیت متعدد علاقے شامل ہیں۔

    آزاد کشمیر میں بھی زلزلے کے جھٹکے محسوس کیے گئے وادی نیلم، مظفرآباد اور اس سے ملحقہ علاقوں میں زمین لرزنے سے لوگ خوفزدہ ہو کر کھلے مقامات پر جمع ہوگئے گلگت بلتستا ن کے ضلع دیامر اور اس کے گردونواح میں بھی زلزلے کے شدید جھٹکے محسوس کیے گئے۔ فوری طور پر کسی جانی یا مالی نقصان کی اطلاع سامنے نہیں آئی، تاہم متعلقہ ادارے صورتحال کا جائزہ لے رہے ہیں۔

    زلزلہ پیما مرکز کے مطابق زلزلے کی شدت 5.8 ریکارڈ کی گئی ہے، جس کا مرکز افغانستان کا کوہ ہندو کش ریجن تھا-

    واضح رہے کہ گزشتہ روز بلوچستان میں بھی زلزلے کے جھٹکے محسوس کیے گئے تھے، جس کے بعد ڈپٹی کمشنر موسیٰ خیل نے بتایا کہ زلزلے سے راڑا شم کے علاقے چاپ میں 90 سے زیادہ مکانات کو نقصان پہنچا، اور دیوار یں گرنے سے 20 سے زیادہ افراد زخمی بھی ہوئے۔

  • ملک پر قرضوں کا بوجھ کم، زرمبادلہ کے ذخائرمیں نمایاں بہتری

    ملک پر قرضوں کا بوجھ کم، زرمبادلہ کے ذخائرمیں نمایاں بہتری

    اسلام آباد: حالیہ معاشی اصلاحات کے نتیجے میں قومی خزانے پر قرضوں کا دباؤ نسبتاً کم ہوا ہے، مالی نظم و ضبط بہتر ہوا ہے اور زرمبادلہ کے ذخائر میں بھی نمایاں اضافہ ریکارڈ کیا گیا ہے۔

    اسٹیٹ بینک کے تازہ ترین اعداد و شمار کے مطابق مرکزی حکومتی قرضوں کی شرح نمو گزشتہ 15 برس کی کم ترین سطح پر آ گئی ہے۔ مشیر وزیر خزانہ خرم شہزاد کے مطابق پاکستان کا مرکزی حکومتی قرض 81.9 کھرب روپے ہے، جبکہ 97 سے 100 کھرب روپے کے جن اعداد و شمار کا حوالہ دیا جاتا ہے، ان میں نجی شعبے کے واجبات بھی شامل ہوتے ہیں۔

    مشیرِ وزیرِ خزانہ خرم شہزاد نے معاشی اعشاریوں کی تفصیلات بتاتے ہوئے مالیاتی نظم و ضبط میں بہتری کی تصدیق کی ہے کہا کہ پاکستان کا قرض اور جی ڈی پی تناسب جو پہلے 76 فیصد تھا، اب نمایاں طور پر کم ہو کر 68 فیصد رہ گیا ہے سال 2023 میں حکومتی قرض بڑھنے کی رفتار 23 فیصد کی تشویشناک سطح پر تھی، جو موجودہ معاشی اقدامات کی بدولت اب محض 5 فیصد پر آ گئی ہے، جو کہ گزشتہ 15 سالوں میں سب سے کم رفتار ہے۔

    وزارتِ خزانہ کے مطابق مقامی قرضوں کی اوسط مدت 2.8 سال سے بڑھا کر 3.8 سال کر دی گئی ہے، جس سے قرضوں کی فوری واپسی کا خطرہ اور دباؤ کم ہوا ہے،اس کے علاوہ پاکستان کی مالیاتی تاریخ میں پہلی بار 4.7 کھرب روپے کے قرضے قبل از وقت ختم یا واپس کر دیے گئے ہیں انہی اقدامات کی بدولت مالی سال 2026 میں سودی اخراجات 8.89 کھرب روپے سے کم ہو کر 6.94 کھرب روپے رہ گئے ہیں، جس سے قومی خزانے کو مجموعی طور پر 2 کھرب روپے کی خطیر بچت ہوئی ہے۔

    مشیر وزیر خزانہ کے مطابق مالی سال 2023 میں وفاقی آمدن کا 64 فیصد حصہ سود کی ادائیگی پر خرچ ہوتا تھا، جو اب کم ہو کر تقریباً 40 فیصد رہ گیا ہے زرمبادلہ کے ذخائر میں بہتری کے باعث درآمدی بل کی ادائیگی کی گنجائش 2 ہفتوں سے بڑھ کر تقریباً 3 ماہ تک پہنچ گئی ہے ، قرضوں کی واپسی میں مثبت پیش رفت اور ذخائر میں اضافہ دیرپا حکومتی پالیسیوں اور مؤثر معاشی اقدامات کا نتیجہ ہے،زرمبادلہ کے ذخائر مستحکم ہونے سے بین الاقوامی سطح پر پاکستان کی ساکھ بہتر ہوئی ہے اور ملکی معیشت صحیح سمت کی طرف گامزن ہے۔

  • اٹلی: دو معصوم بچوں کی جان بچانے والے پاکستانی نوجوان کے لیے سرکاری اعزاز

    اٹلی: دو معصوم بچوں کی جان بچانے والے پاکستانی نوجوان کے لیے سرکاری اعزاز

    اٹلی کے شہر بریشیا میں گجرات سے تعلق رکھنے والے ایک 29 سالہ پاکستانی نوجوان نوید اسلم نے بہادری سے نہ صرف اٹلی بلکہ پوری دنیا میں پاکستان کا سر فخر سے بلند کر دیا ہے۔

    چند روز قبل بریشیا کے ایک پارک میں معصوم بچے کھیل رہے تھے کہ اچانک ایک نائجیرین شہری نے ان پر حملہ کر دیا اور بچوں کی گردن دبانے کی کوشش کی اس خطرناک صورتحال کو دیکھتے ہی وہاں موجود نوید اسلم نے اپنی جان کی پرواہ کیے بغیر حملہ آور پر جھپٹ پڑے اور اسے دبوچ لیا انہوں نے پولیس کے آنے تک اس وحشی حملہ آور کو پوری طرح قابو میں رکھا، بچوں کو بچانے کی اس جدوجہد کے دوران نوید اسلم خود بھی زخمی ہوئے لیکن انہوں نے معصوم بچوں پر آنچ نہیں آنے دی۔

    پاکستانی نوجوان کی اس غیر معمولی بہادری اور انسانی خدمت کے اعتراف میں بریشیا شہر کی میئر لورا کاسٹیلیٹی نے نوید اسلم کو اپنے دفتر بلایا اور انہیں خصوصی اعزازی شیلڈ سے نوازا تقریب کے دوران میئر لورا کاسٹیلیٹی نے نوید اسلم کی جرات کو دل کھول کر سراہا اور کہا کہ نوید اسلم نے اپنی جان خطرے میں ڈال کر معصوم بچوں کو بچایا، ان کی یہ غیر معمولی بہادر ی اور بروقت انسانی خدمت واقعی تعریف کے قابل ہے جس پر پورا شہر ان کا شکر گزار ہے۔

    اس موقع پر اعزاز حاصل کرنے کے بعد گجرات کے شیر دل نوجوان نوید اسلم نے انتہائی سادگی اور عاجزی سے بات کرتے ہوئے کہا کہ اس وقت ان بچوں کی جان بچانا ان کی انسانی ذمہ داری تھی، انہوں نے کچھ الگ نہیں کیا بلکہ جو ایک انسان کو دوسرے انسان کے لیے کرنا چاہیے، وہی کیا۔

  • مون سون : ملک کے مختلف علاقوں میں یکم جولائی سے بارشوں کی پیشگوئی

    مون سون : ملک کے مختلف علاقوں میں یکم جولائی سے بارشوں کی پیشگوئی

    محکمہ موسمیات نے ملک میں مون سون بارشوں کے نئے سلسلے کے آغاز کا امکان ظاہر کرتے ہوئے کہا ہے کہ یکم جولائی سے شمال مشرقی پنجاب اور کشمیر سمیت ملک کے شمالی علاقوں میں بارشیں شروع ہو سکتی ہیں۔

    میڈیا رپورٹ کے مطابق محکمہ موسمیات نے پیشگوئی کی ہے کہ پاکستان میں مون سون کا باقاعدہ آغاز یکم جولائی سے متوقع ہے، جس کے تحت ملک کے شمال مشرقی علاقوں، پنجاب اور کشمیر میں بارشوں کا امکان ہے، مون سون ہوائیں ابتدائی طور پر شمال مشرقی پنجاب اور کشمیر کے علاقوں کو متاثر کریں گی، جبکہ یکم جولائی سے پنجاب کے شمالی اور شمال مشرقی حصوں میں بارشیں شروع ہو سکتی ہیں۔

    ترجمان نے بتایا کہ سندھ میں فی الحال مون سون کے آغاز کے امکانات کم ہیں اور 5 جولائی تک صوبے میں نمایاں بارشوں کی توقع نہیں ہے، خلیج بنگال میں بننے والا کم دباؤ کا نظام آئندہ دنوں میں سندھ تک پہنچ سکتا ہے، جس کے نتیجے میں بارشیں ہو سکتی ہیں،رواں مون سون سیزن کے دوران کراچی سمیت سندھ میں معمول سے کم بارشیں ہونے کا امکان ہے ، بھارت میں بھی جون کے دوران معمول سے 43 فیصد کم بارشیں ریکارڈ کی گئی ہیں، جس کا اثر خطے کے موسمی نظام پر پڑ سکتا ہے۔

  • ثانیہ اشفاق کے سابق شوہر عماد وسیم پر نئے الزامات، کرکٹر کا سخت ردِعمل

    ثانیہ اشفاق کے سابق شوہر عماد وسیم پر نئے الزامات، کرکٹر کا سخت ردِعمل

    پاکستانی کرکٹر عماد وسیم اور ان کی سابقہ اہلیہ، ڈیجیٹل میڈیا انفلوئنسر ثانیہ اشفاق کے درمیان تنازع ایک بار پھر شدت اختیار کرگیا ہے۔

    انسٹاگرام پر جاری اپنے بیان میں ثانیہ اشفاق نے کہا کہ شادی کے دوران انہیں شدید ذہنی دباؤ، کنٹرول کرنے والے رویے اور نامناسب سلوک کا سامنا کرنا پڑا انہوں نے دعویٰ کیا کہ اب عماد وسیم نہ صرف بچوں کے اخراجات اٹھانے سے گریز کر رہے ہیں بلکہ ان سے ملاقات یا رابطے میں بھی دلچسپی نہیں رکھتے، تاہم اس کے باوجود بچوں کی تحویل حا صل کرنے کی کوشش کر رہے ہیں،دنیا جانتی ہے کہ عماد وسیم کے موجودہ اہلیہ نائلہ راجہ کے ساتھ تعلقات کب شروع ہوئے۔

    انہوں نے اپنی پوسٹ میں کہا کہ حمل کے دوران انہیں دھوکا دیا گیا اور اسی عرصے میں سابق شوہر کے حد سے زیادہ کنٹرول کرنے والے رویے نے ان کی زندگی کو انتہائی مشکل بنا دیا تھا جولائی 2025 میں برطانیہ میں گھریلو تشدد اور رویے سے متعلق الزامات کے باعث عماد وسیم کو گرفتار کیا گیا تھا،انہیں خدشہ تھا کہ ان سے بچوں کو الگ کرنے کی کوشش کی جا رہی ہے، جبکہ ان پر اپنا مؤقف واپس لینے کے لیے بھی دباؤ ڈالا گیا، جس کے بعد سوشل سروسز کو معاملے میں مداخلت کرنا پڑی۔

    ثانیہ اشفاق کا کہنا تھا کہ حال ہی میں سوشل ورکرز نے عماد وسیم سے بچوں سے رابطے کے حوالے سے پوچھا، لیکن انہوں نے کوئی جواب نہیں دیا وہ نہ بچوں سے ملنا چاہتے ہیں اور نہ ہی بات کرنا چاہتے ہیں، تاہم ان کی زندگی مسلسل مشکل بنانے کی کوشش کر رہے ہیں تاکہ وہ بچوں کی تحویل چھوڑ دیں ایک ماں کے طور پر وہ ہر حال میں اپنے بچوں کی حفاظت کریں گی اور امید کرتی ہیں کہ حقیقت ایک دن سب کے سامنے آ جائے گی۔

    دوسری جانب عماد وسیم نے بھی انسٹاگرام اسٹوری کے ذریعے الزامات کا جواب دیتے ہوئے کہا کہ انہوں نے طلاق اپنی ذاتی وجوہات کی بنیاد پر دی تھی اور ان کی زندگی کا یہ باب ختم ہو چکا ہے ان کی موجودہ زندگی، اہلیہ اور اہلِ خانہ کو اس تنازع سے دور رکھا جائے،عماد وسیم نے واضح کیا کہ ان کی موجودہ اہلیہ نائلہ راجہ کا اس معاملے سے کوئی تعلق نہیں، کیونکہ وہ ان کی زندگی میں طلاق کے بعد آئیں۔ انہوں نے سابقہ اہلیہ سے کہا کہ ماضی کو پیچھے چھوڑ کر حقیقت کو قبول کریں اور روزانہ عوامی سطح پر اس معاملے کو اچھالنے کا سلسلہ بند کریں، یہ آخری مرتبہ ہے جب وہ اس تنازع پر عوامی طور پر اپنا مؤقف پیش کر رہے ہیں۔

  • سونے کی قیمت میں کمی

    سونے کی قیمت میں کمی

    کراچی: سونے کی عالمی اور بین الاقوامی مارکیٹوں میں قیمت کم ہو گئی۔

    آل پاکستان صرافہ جیمز اینڈ جیولرز ایسوسی ایشن کے مطابق مقامی صرافہ بازاروں میں 24 قیراط کے حامل فی تولہ سونے کی قیمت 1000روپے کی کمی سے 4لاکھ 31ہزار 236روپے کی سطح پر آگئی جب کہ فی 10 گرام سونے کی قیمت 730روپے گھٹ کر 3لاکھ 68ہزار 230روپے کی سطح پر آگئی جبکہ بین الاقوامی بلین مارکیٹ میں آج ہفتے کے روز فی اونس سونے کی قیمت 10 ڈالر کی کمی سے 4ہزار 88ڈالر فی اونس کی سطح پر آگئی –اسی طرح مقامی سطح پر فی تولہ چاندی کی قیمت 271 روپے کی کمی سے 6ہزار 393 روپے اور فی 10 گرام چاندی کی قیمت بھی 161روپے کی کمی سے 5ہزار 480روپے کی سطح پر آگئی۔

    ماہرین کے مطابق عالمی مارکیٹ میں قیمتی دھات کی قیمت بڑھنے کے اثرات مقامی مارکیٹ پر بھی مرتب ہوئے ہیں، جس کے باعث پاکستان میں سونے کے نرخوں میں نمایاں اضافہ سامنے آیا ہے۔

  • سرگودھا زیادتی کیس، 7 سالہ بچی واقعے کے روز دو مرتبہ دکان پر آئی تھی،ڈی پی او

    سرگودھا زیادتی کیس، 7 سالہ بچی واقعے کے روز دو مرتبہ دکان پر آئی تھی،ڈی پی او

    سرگودھا: ڈسٹرکٹ پولیس آفیسر (ڈی پی او) سرگودھا محمد صہیب نے کہا ہے کہ کریانہ اسٹور میں زیادتی کے بعد قتل ہونے والی 7 سالہ بچی واقعے کے روز دو مرتبہ دکان پر آئی تھی۔ پہلی بار وہ صبح سویرے دکان پر آئی اور واپس چلی گئی، جبکہ بعد ازاں دوبارہ آنے پر افسوسناک واقعہ پیش آیا۔

    متاثرہ خاندان کے ہمراہ پریس کانفرنس کرتے ہوئے ڈی پی او نے بتایا کہ والدین کی اطلاع پر پولیس موقع پر پہنچی تو دکان کی تیسری منزل پر واقع ایک بند کمرے کے باہر خون کے دھبے موجود تھے۔ پولیس نے دکان پر موجود دیگر افراد کو طلب کیا اور مرکزی ملزم سے پوچھ گچھ کی، جس کے بعد اس نے بچی کی لاش کی نشاندہی کی۔انہوں نے بتایا کہ جس کمرے سے لاش برآمد ہوئی، اس کی چابی بھی مرکزی ملزم کے قبضے میں تھی۔ مزید یہ کہ قتل کے بعد ملزم کھانا لینے کا بہانہ بنا کر دکان سے نکل گیا تھا۔

    ڈی پی او کے مطابق کیس کی سائنسی بنیادوں پر تفتیش جاری ہے اور اب تک تقریباً 80 مشکوک افراد کے ڈی این اے نمونے فرانزک تجزیے کے لیے لاہور کی لیبارٹری بھجوائے جا چکے ہیں۔ حتمی فرانزک رپورٹ آئندہ دو ہفتوں میں موصول ہونے کی توقع ہے۔انہوں نے بتایا کہ مقدمے میں مرکزی ملزم کے علاوہ مزید چار افراد کو بھی گرفتار کیا گیا ہے، جبکہ کریانہ اسٹور دو پارٹنرز کی شراکت سے چلایا جا رہا تھا، جس کے مختلف پہلوؤں کا بھی جائزہ لیا جا رہا ہے۔اس موقع پر مقتولہ کے والد نے کہا کہ پولیس نے میرٹ پر تحقیقات کی یقین دہانی کرائی ہے اور وہ اب تک کی تفتیش سے مطمئن ہیں۔

    واضح رہے کہ سرگودھا میں 7 سالہ بچی کو مبینہ طور پر زیادتی کے بعد قتل کر دیا گیا تھا، جبکہ مرکزی ملزم بعد ازاں مبینہ پولیس مقابلے میں ہلاک ہوگیا تھا۔ پولیس کا کہنا ہے کہ واقعے کی ہر پہلو سے تحقیقات جاری ہیں اور فرانزک رپورٹ کی روشنی میں مزید قانونی کارروائی عمل میں لائی جائے گی۔

  • کالعدم ایکشن کمیٹی کے شرپسندوں کا اسلام آباد پولیس کے اہلکار پر وحشیانہ تشدد

    کالعدم ایکشن کمیٹی کے شرپسندوں کا اسلام آباد پولیس کے اہلکار پر وحشیانہ تشدد

    کالعدم ایکشن کمیٹی کے شرپسندوں نےحساس معلومات لینے کی آڑ میں اسلام آباد پولیس کے اہلکار پر وحشیانہ تشدد کیا ہے

    راولاکوٹ کی جنڈالہ چیک پوسٹ کے قریب اسلام آباد پولیس کے کانسٹیبل ہمایوں خورشید پر کالعدم کمیٹی کے مسلح شرپسندوں نے قاتلانہ حملہ کردیا۔زخمی کانسٹیبل ہمایوں خورشید کا کہنا ہے کہ؛ چھٹی سے واپس آ رہا تھا کہ کالعدم کمیٹی کےناکہ لگاۓ 50 سے زائد شرپسندوں نے روک کرشدید تشدد کا نشانہ بناڈالا،شرپسندوں نے وردی پہنا کرریاستی اداروں اور افسران کے خلاف تقریر کرانے کی کوشش کی، کانسٹیبل ہمایوں خورشید اس وقت سی ایم ایچ راولا کوٹ میں شدید زخمی حالات میں زیرعلاج ہے۔

  • پاکستان نیول اکیڈمی کی پاسنگ آؤٹ پریڈ، وزیراعظم نے نمایاں کیڈٹس میں اعزازات تقسیم کیے

    پاکستان نیول اکیڈمی کی پاسنگ آؤٹ پریڈ، وزیراعظم نے نمایاں کیڈٹس میں اعزازات تقسیم کیے

    پاکستان نیول اکیڈمی کراچی میں 125ویں مڈشپ مین اور 33ویں شارٹ سروس کمیشن کورس کی پروقار پاسنگ آؤٹ پریڈ منعقد ہوئی، جس میں وزیراعظم شہباز شریف نے بطور مہمانِ خصوصی شرکت کی اور نمایاں کارکردگی کا مظاہرہ کرنے والے مڈشپ مین اور آفیسر کیڈٹس میں اعزازات تقسیم کیے۔

    وزیراعظم شہباز شریف کی اکیڈمی آمد پر چیف آف دی نیول اسٹاف ایڈمرل نوید اشرف نے ان کا استقبال کیا، جس کے بعد وزیراعظم نے پاسنگ آؤٹ پریڈ کا معائنہ کیا اور سلامی لی،تقریب میں وزیر دفاع خواجہ آصف، وزیر اطلاعات عطا اللہ تارڑ، وزیراعلیٰ سندھ سید مراد علی شاہ، گورنر سندھ اور دیگر اعلیٰ سول و عسکری حکام نے بھی شرکت کی،اس سال پاس آؤٹ ہونے والے افسران میں پاکستان کے علاوہ برادر اور دوست ممالک بحرین، عراق اور جبوتی کے مڈشپ مین بھی شامل تھے، جو پاکستان نیوی کی پیشہ ورانہ تربیت پر عالمی اعتماد کا مظہر ہیں،تقریب کے دوران وزیراعظم شہباز شریف نے کورسز میں شاندار کارکردگی کا مظاہرہ کرنے والے کیڈٹس اور مڈشپ مین میں مختلف اعزازات تقسیم کیے۔

    مڈشپ مین عمر مختار کو بہترین مجموعی کارکردگی پر اعزازی شمشیر (Sword of Honour) سے نوازا گیا، جبکہ مڈشپ مین ہادی عباس خان نے اکیڈمی ڈرک کا اعزاز اپنے نام کیا،اسی طرح آفیسر کیڈٹ الویرہ حمزہ کو کمانڈنٹ گولڈ میڈل جبکہ آفیسر کیڈٹ حافظ محمد احمد منور کو چیف آف ڈیفنس فورسز گولڈ میڈل سے نوازا گیا،تقریب کے اختتام پر وزیراعظم نے نو منتخب افسران کو مبارکباد دیتے ہوئے ان کے روشن مستقبل کے لیے نیک تمناؤں کا اظہار کیا اور ملکی بحری دفاع میں ان کے کردار کو اہم قرار دیا