Blog

عالمی مارکیٹ میں خام تیل کی قیمتوں میں اچانک اضافہ ہو گیا-

برینٹ کروڈ فیوچرز کی قیمت میں 58 سینٹ یعنی 0.8 فیصد اضافہ ہوا جس کے بعد برینٹ کروڈ کی قیممت 72.57 ڈالر فی بیرل ہو گئی اسی طرح امریکی ویسٹ ٹیکساس انٹرمیڈیٹ کروڈ 88 سینٹ یا 1.3 فیصد مہنگا ہونے کے بعد 70.11 ڈالر فی بیرل کی سطح پر ٹریڈ کرتے دیکھا گیا۔

اعداد و شمار کے مطابق گزشتہ ہفتے برینٹ کروڈ میں 10.6 فیصد کمی ریکارڈ کی گئی تھی جو مسلسل تیسری ہفتہ وار کمی تھی ماہرین کا کہنا ہے کہ تیل کی عالمی مارکیٹ اس وقت متعدد خطرات کی زد میں ہے تاہم سرمایہ کار اس پہلو پر نظر رکھے ہوئے ہیں کہ اگر عالمی سطح پر سپلائی میں بہتری آتی ہے تو اس کا مجموعی توازن پر کیا اثر پڑے گا مارکیٹ میں موجود یہ غیر معمولی اطمینان خطرناک ثابت ہو سکتا ہے اگر سپلائی کی بحالی توقع سے سست روی کا شکار ہو جائے موجودہ صورتحال میں تیل کی ترسیل مختلف رکاوٹوں کا سامنا کر رہی ہے جن میں ٹینکرز کی تاخیر، انفراسٹرکچر کو پہنچنے والا نقصان اور بعض پیداواری بندشیں شامل ہیں،۔

امریکا اور ایران نے ایک دوسرے کے خلاف تمام فوجی کارروائیاں روکنے پر اتفاق کر لیا ہے، جبکہ دونوں ممالک کے درمیان آبنائے ہرمز کے تنازع کے حل کے لیے آج قطر کے دارالحکومت دوحہ میں اہم مذاکرات ہوں گے۔

امریکی نیوز ویب سائٹ ایکسیوس کے مطابق دونوں فریقوں نے فی الحال تمام عسکری کارروائیاں معطل کرنے کا فیصلہ کیا ہے تاکہ مذاکرات کے ذریعے اختلافات کو حل کیا جا سکے، دونوں جانب سے ’کائنیٹک ایکٹیویٹی‘ یعنی فضائی حملوں اور دیگر فوجی کارروائیوں کو روکنے پر اتفاق کیا گیا ہے امریکی عہدیدار کے مطابق فی الحال دونوں ممالک کشیدگی میں اضافہ نہیں کریں گے اور تجارتی بحری جہاز آبنائے ہرمز سے آزادانہ گزر سکیں گے-

حالیہ دنوں میں دونوں جانب سے نئے حملوں اور امریکی صدر ڈونلڈ ٹرمپ کے جنگ دوبارہ شروع کرنے اور ’کام مکمل کرنے‘ کے بیان نے کشیدگی میں اضافہ کر دیا تھا،امریکی حکام کے مطابق تازہ کشیدگی کی بنیادی وجہ جنگ بندی سے متعلق مفاہمتی یادداشت کی مختلف تشریحات تھیں، خصوصاً آبنائے ہرمز میں بحری جہازوں کی نقل و حرکت سے متعلق شرائط پر اختلاف سامنے آیا معاہدے کے تحت ایران نے آبنائے ہرمز سے تجارتی جہازوں کی محفوظ آمدورفت یقینی بنانے کی بھرپور کوشش کرنے کا وعدہ کیا تھا، جبکہ اس کے بدلے امریکا نے ایرانی بندرگاہوں پر عائد ناکہ بندی ختم کر دی تھی۔

اتوار کی صبح ایران نے کویت اور بحرین میں قائم امریکی فوجی اڈوں پر میزائلوں اور ڈرونز سے حملہ کیا تھا۔ یہ کارروائی امریکی صدر ڈونلڈ ٹرمپ کے اس بیان کے کچھ ہی دیر بعد کی گئی تھی جس میں انہوں نے سوشل میڈیا پر ایران کو کھلی دھمکی دی تھی۔

ڈونلڈ ٹرمپ نے کہا تھا کہ ”ایک وقت ایسا آ سکتا ہے جب ہم مزید نرمی نہ دکھا سکیں اور ہمیں اس کام کو فوجی طاقت سے مکمل کرنا پڑے گا جو ہم نے کامیابی سے شروع کیا تھا اگر ایسا ہوا تو ایران کا نام و نشان مٹ جائے گا۔

امریکی صدر کا یہ بیان ایران کی جانب سے آبنائے ہرمز کے بجائے دوسرے راستے سے نکلنے کی کوشش کرنے والے دو بحری جہازوں پر ڈرون حملوں کے بعد سامنے آیا تھا۔ ان ڈرون حملوں کے جواب میں امریکا نے ایران کے کئی شہروں پر بمباری کی تھی۔

اس دھمکی کے فوراً بعد کویت اور بحرین میں امریکی اڈوں پر حملے شروع ہو گئے۔ ان حملوں کا جواز پیش کرتے ہوئے ایرانی فوج نے کہا کہ امریکا نے پہلے حملے کرکے جنگ بندی کی خلاف ورزی کی تھی اور ان کے اس اقدام سے تمام سفارتی بات چیت مکمل طور پر رک سکتی ہےایرانی فوج نے یہ بھی وارننگ دی تھی کہ خطے میں موجود امریکی اڈوں کو آنے والے دنوں میں جہنم بنا دیا جائے گا۔

ان حملوں کے بعد کویت کی فوج نے بتایا کہ انہوں نے دو بیلسٹک میزائلوں کو ہوا میں ہی تباہ کر دیا جس سے کوئی نقصان نہیں ہوا، جبکہ بحرین میں ایک ایرانی میزائل گرنے سے رہائشی عمارت کو نقصان پہنچا مگر کوئی جانی نقصان نہیں ہوا تاہم اس دوران قطر کی حکومت نے بتایا کہ علاقے میں ہونے والی فوجی کارروائیوں کے دوران ایک بحری جہاز پر میزائل کا ٹکڑا لگنے سے ان کا ایک شہری جان سے ہاتھ دھو بیٹھا ہے۔

بنگلا دیش کی معزول اور مفرور وزیراعظم شیخ حسینہ واجد نے رواں سال اپنے وطن واپس آنے کا اعلان کر دیا۔

شیخ حسینہ جو اپنی حکومت کے خلاف طلبہ تحریک کے شدید احتجاج اور پابندیوں کے بعد مستعفی ہو کر اگست 2024 کو ملک سے فرار ہو کر بھارت پہنچ گئی تھیں اور اب تک وہیں پناہ گزین ہیں اب کم و بیش دو سال بعد شیخ حسینہ واجد نے بنگلا دیش واپس آنے کا اعلان کیا ہے شیخ حسینہ واجد نے اپنی خود ساختہ جلا وطنی کے دوران ایک انٹرویو میں یہ اعلان کیا ہے کہ وہ رواں سال ہر رکاوٹ عبور کرتے ہوئے وطن واپس آئیں گی۔

سیاسی مبصرین کے مطابق شیخ حسینہ کی ممکنہ واپسی بنگلا دیش کی سیاست میں ایک اہم پیش رفت ثابت ہو سکتی ہے، کیونکہ ملک میں ان کی جماعت عوامی لیگ اور موجودہ سیاسی قیادت کے درمیان اختلافات بدستور موجود ہیں۔

واضح رہے کہ شیخ حسینہ واجد اگست 2024 میں حکومت مخالف طلبہ تحریک، ملک گیر احتجاج اور سیاسی دباؤ کے بعد وزارتِ عظمیٰ سے مستعٰفی ہو کر بھارت چلی گئی تھیں اس کے بعد سے وہ بھارت میں مقیم ہیں اور تقریباً دو برس سے بنگلا دیش واپس نہیں آئیں۔

اسرائیل اور لبنان کے درمیان 14 نکاتی فریم ورک معاہدہ طے پانے کے باوجود بھی اسرائیلی فوج نے جنوبی لبنان میں ایک نئی فوجی کارروائی کی ہے۔

اسرائیلی وزیرِ اعظم بنیامین نیتن یاہو کے دفتر سے جاری بیان کے مطابق اسرائیلی فوج نے جنوبی لبنان کے ایک گاؤں میں حزب اللہ کے زیرِ زمین عسکری انفراسٹرکچر کو نشانہ بنا کر تباہ کر دیا،کارروائی کے دوران تقریباً 200 میٹر لمبی زیرِ زمین سرنگ کو تباہ کیا گیا، جس کے بارے میں اسرائیل کا دعویٰ ہے کہ اسے عسکری مقاصد کے لیے استعمال کیا جا رہا تھا۔

اسرائیلی وزیرِ اعظم کے دفتر کے مطابق اس حملے سے قبل امریکا کو بھی کارروائی سے آگاہ کر دیا گیا تھا یہ کارروائی سیکیورٹی خدشات کے پیشِ نظر کی گئی، تاہم لبنان یا حزب اللہ کی جانب سے اس کارروائی پر فوری طور پر کوئی باضابطہ ردِعمل سامنے نہیں آیا۔

واضح رہے کہ حال ہی میں اسرائیل اور لبنان کے درمیان 14 نکاتی فریم ورک معاہدہ طے پایا تھا، جس کا مقصد سرحدی کشیدگی میں کمی اور جنگ بندی کے لیے راہ ہموار کرنا بتایا گیا تھا،گزشتہ ہفتے اسرائیل اور لبنانی حکام کے درمیان امریکا کی ثالثی میں امن معاہدے کے فریم ورک پر دستخط ہوئے تھے، اس موقع پر امریکی وزیرخارجہ مارکو روبیو بھی موجود تھے جنہوں نے کہا تھا کہ امید ہے فریم ورک سے لبنان میں امن کے لیے پیش رفت ہوگی، ہم چاہتے ہیں لبنان اور اسرائیل کے لوگ محفوظ مستقبل کی زندگی گزارسکیں جب کہ لبنانی سفیر نے کہا کہ معاہدہ لبنان کی خود مختاری کی بحالی کی جانب پہلا قدم ہے۔