Blog

عمران خان اور بشریٰ بی بی نے 190 ملین پاؤنڈ کیس کا فیصلہ سپریم کورٹ میں چیلنج کردیا۔

بانی پی ٹی آئی عمران خان اور بشریٰ بی بی نے اسلام آباد ہائیکورٹ کا فیصلہ چیلنج کرتے ہوئے سزا معطلی کے لیے سپریم کورٹ سے رجوع کیا ہے،عمران خان اور بشریٰ بی بی کی جانب سے دائر درخواستوں میں کہا گیا ہے کہ سزا معطلی کی درخواست مسترد کرنا انصاف کے تقاضوں کے خلاف تھا، درخواست قابلِ سماعت مان کر بھی کیس کے نکات نظرانداز کیے گئے، دورانِ قید بینائی کا عارضہ لاحق ہوا، علاج کے لیے جیل سے باہر منتقل کیا گیا۔درخواست میں کہا گیا ہے کہ بانی پی ٹی آئی اور ان کی اہلیہ کو شدید صحت مسائل کے باوجود رہائی نہ دینا ناانصافی ہے، تنہائی میں قید سے دونوں کو غیرمعمولی ذہنی اذیت کا سامنا کرنا پڑا، سزا معطلی کی درخواست جان بوجھ کر مؤخر کی جاتی رہی، ٹرائل کے دوران ضمانت مل چکی تھی، الزام بے بنیاد قرار دیے گئے تھے۔

سپریم کورٹ میں دائر درخواست میں کہا گیا ہے کہ سزا معطلی پر فیصلہ کرتے ہوئے مقدمے کے نکات دیکھنا قانونی طور پرممکن ہے، شواہد کا ابتدائی جائزہ لیے بغیر درخواست مسترد کرنا غلط تھا، نیب نے بار بار التواء لےکر اپیل کو طول دیا اور انصاف میں تاخیر پیدا کی۔پی ٹی آئی کی جانب سے دائر درخواست میں مؤقف اختیار کیا گیا ہے کہ عمران خان اور بشریٰ بی بی کی گرفتاری کا طریقۂ کار غیر قانونی اور غیر ذمہ دارانہ تھا، غیرقانونی گرفتاری پر اعلیٰ عدالت نے رہائی کا حکم دیا تھا، احتساب کے نام پر سیاسی بنیادوں پر کارروائی کی گئی، نیب قوانین میں ترمیم سے حتمی اپیل آئینی عدالت کو سننے کا اختیار دیا گیا۔درخواست میں کہا گیا ہے کہ اپیل میں آئینی عدالت جانے کا ذکر موجود نہیں، سزا معطلی کی اپیل سپریم کورٹ میں ہی قابل سماعت ہے، ہائیکورٹ کا حکم کالعدم قرار دے کر سزا معطل کی جائے، رہائی کا حکم دیاجائے۔

واضح رہے کہ اسلام آباد ہائیکورٹ نے عمران خان اور بشریٰ بی بی کی سزا معطلی کی اپیلیں خارج کی تھیں۔

آزادجموں وکشمیر میں جنرل انتخابات کی تیاریاں عروج پر،امیدواروں کی ریکارڈ رجسٹریشن ہوئی ہے.

آزاد جموں وکشمیر میں جنرل الیکشنز 2026کی تیاریاں زور و شور سے جاری ہیں، عوام اور سیاسی جماعتوں کی جانب سے انتخابی عمل میں بھرپور شرکت دیکھنے کو مل رہی ہے،سال 2021 کے مقابلے میں اس بار کاغذاتِ نامزدگی جمع کرانے کے رجحان میں غیرمعمولی اضافہ ریکارڈبنا ہے،چیف الیکشن کمشنر آزاد جموں وکشمیر کا کہنا ہے کہ جن پولنگ اسٹیشنز پر 500 سے زائد ووٹرز ہیں وہاں2 پولنگ بوتھ قائم کرینگے،سیکرٹری الیکشن کمیشن آزاد جموں وکشمیر کا کہنا ہے کہ تمام حلقوں میں 23 جون تک کاغذاتِ نامزدگی جمع کرانے کا سلسلہ جاری رہا، بشمول مہاجرین و راولاکوٹ ڈویژن کے حلقوں میں بھی کاغذات نامزدگی جمع کرائے گئے، راولاکوٹ سمیت پورے آزاد جموں و کشمیر سے 518 کاغذاتِ نامزدگی موصول ہو چکے ہیں،مہاجرین کی مخصوص نشستوں کیلئیے ابتک 114 کاغذاتِ نامزدگی جمع ہو چکے ہیں،پونچھ ڈویژن کے 7 حلقوں سے مجموعی طور پر 130 کاغذاتِ نامزدگی جمع ہو چکے ہیں،امیدواروں کی ریکارڈ رجسٹریشن سیاسی و جمہوری عمل پر کشمیری عوام کے پختہ اعتماد کا منہ بولتا ثبوت ہے

سابق وزیر حکومت چوہدری اظہر صادق نے مسلم لیگ (ن) آزاد کشمیر میں باضابطہ شمولیت اختیار کر لی۔

چوہدری اظہر صادق کی شمولیت کی مرکزی تقریب کشمیر کونسل اسلام آباد میں منعقد ہوئی،وفاقی وزیر امور کشمیر انجینئر امیر مقام تقریب کے مہمان خصوصی تھے،چوہدری اظہر صادق کے ہمراہ کارکنوں کی بڑی تعداد نے بھی مسلم لیگ (ن) میں شمولیت اختیار کی۔وفاقی وزیر انجینئر امیر مقام نے چوہدری اظہر صادق کو پارٹی مفلر پہنا کر مسلم لیگ (ن) میں باضابطہ شامل کیا،امیر مقام کا کہنا تھا کہ چوہدری اظہر صادق کی مسلم لیگ (ن) میں شمولیت کا خیرمقدم کرتے ہیں، ان کی آمد سے جماعت مزید مضبوط ہوگی،مسلم لیگ (ن) آزاد کشمیر کی قیادت اور کارکن مل کر انتخابات میں بھرپور کامیابی حاصل کریں گے، چوہدری اظہر صادق کا کہنا تھا کہ نواز شریف، شہباز شریف، مریم نواز، امیر مقام اور پارٹی قیادت کا اعتماد کرنے پر تہہ دل سے شکر گزار ہوں۔ آج اپنے تمام ساتھیوں اور پوری ٹیم کے ہمراہ مسلم لیگ (ن) میں شمولیت کا اعلان کرتا ہوں۔ آزاد کشمیر میں موجود پارٹی کی سینئر قیادت کے احترام اور عزت میں کوئی کمی نہیں آنے دی جائے گی۔ہماری پوری ٹیم مسلم لیگ (ن) کے پلیٹ فارم سے ریاست اور حلقہ ڈڈیال کی خدمت کے لیے بھرپور کردار ادا کرے گی۔

سینٹ کی قائمہ کمیٹی برائے داخلہ کی ذیلی کمیٹی کا سینیٹر سیف اللہ ابڑو کی صدارت میں اجلاس ہوا

ٹیکس چوری کے حوالے سے غلط معلومات دینے پر چیرمین کمیٹی چیف آپریشنز ایف بی آر پر برس پڑے،چیرمین کمیٹی سیف اللہ ابڑو نے کہا کہ گیٹ آوٹ فرام کمیٹی، غلط معلومات دینے پر چیف آپریشنز ایف بی آر کو اجلاس سے نکال دیا گیا،چیرمین کمیٹی سیف اللہ ابڑو نے کہا کہ ایسے گندے افسران کو عہدوں پر بٹھایا گیا جو غلط معلومات دے رہے ہیں، اس کے وزیر کو لکھیں کے اس کو فوری طور پر عہدے سے ہٹایا جائے، 3 سے 4 افسران ہیں جنہوں نے پورے ملک کا بیڑا غرق کیا ہوا ہے،