اسرائیلی فوجی بیرون ملک سفر کرنے سے قبل اپنے سوشل میڈیا اکاؤنٹس ڈیلیٹ کرنے لگے
مڈل ایسٹ آئی کی رپورٹ کے مطابق اسرائیلی فوجیوں کی جانب سے غزہ اور لبنان میں جنگی جرائم اور انسانیت کے خلاف جرائم کے الزامات کے تحت گرفتاری کے خوف سے اپنے سوشل میڈیا اکاؤنٹس کو ڈیلیٹ کرنے کا عمل تیز ہوگیا ہے۔ذرائع کے مطابق درجنوں اسرائیلی فوجی فیس بک، انسٹاگرام اور دیگر سوشل میڈیا پلیٹ فارمز پر اپنے اکاؤنٹس ڈیلیٹ کر رہے ہیں تاکہ وہ ممکنہ قانونی کارروائی اور بین الاقوامی تحقیقات سے بچ سکیں۔ خاص طور پر برازیل کے دارالحکومت ریو ڈی جنیرو میں اگلے ماہ ہونے والے مشہور کارنیول میلے میں شرکت کرنے والے فوجیوں کے سوشل میڈیا اکاؤنٹس ڈیلیٹ کرنے کا انکشاف ہوا ہے۔
یہ تمام اقدامات فلسطینی تنظیم ہند رجب فاؤنڈیشن کی جانب سے کی جانے والی کوششوں کے تناظر میں اٹھائے جا رہے ہیں، جو اسرائیلی فوجیوں کے خلاف غزہ میں فلسطینیوں کے خلاف کی جانے والی کارروائیوں کے شواہد جمع کر رہی ہے۔ فاؤنڈیشن نے اسرائیلی فوجیوں کے خلاف سوئیڈن، برازیل اور اٹلی میں جنگی جرائم اور انسانیت کے خلاف جرائم کے الزامات کے تحت مقدمات بھی درج کرائے ہیں۔فاؤنڈیشن کا دعویٰ ہے کہ اس نے غزہ میں اسرائیلی فوجیوں کی جانب سے کیے گئے مظالم کی تصدیق کے لئے سوشل میڈیا پر موجود مواد کا استعمال کیا ہے۔ ایک فلسطینی فوجی تنظیم کے بیان کے مطابق، اسرائیلی فوجیوں کے سوشل میڈیا اکاؤنٹس کی تفصیلات کے ذریعے ان کے خلاف قانونی کارروائی کی جا رہی ہے۔
ایک اسرائیلی فوجی نے اسرائیلی چینل 12 سے گفتگو کرتے ہوئے کہا کہ انہیں یہ خوف ہے کہ برازیل میں فلسطینی تنظیموں کی جانب سے دائر کیے گئے مقدمات کے باعث انہیں گرفتار نہ کر لیا جائے۔ ان کے مطابق، اس گرفتاری سے ان کی چھٹیاں خراب ہو سکتی ہیں، اور یہ ان کے لئے ایک سنگین مسئلہ بن چکا ہے۔
اس کے علاوہ، اس ماہ برازیل کی عدالت میں ایک اسرائیلی فوجی کے خلاف جنگی جرائم کا مقدمہ درج کیا گیا تھا، جس کے بعد وہ راتوں رات برازیل سے فرار ہو گیا تھا۔ فلسطینی تنظیم ہند رجب فاؤنڈیشن کی جانب سے اس فوجی کے خلاف ایک شکایت درج کی گئی تھی، جس میں الزام تھا کہ وہ غزہ میں عام شہریوں کے گھروں کو مسمار کرنے میں ملوث تھا۔ اس فوجی کو عدالت نے تفتیش کے لئے طلب کیا تھا، لیکن وہ فرار ہونے میں کامیاب ہو گیا۔
ہند رجب فاؤنڈیشن ایک غیر منافع بخش تنظیم ہے جو بیلجیئم میں قائم کی گئی ہے۔ اس کا نام ایک فلسطینی بچی ہند رجب کے نام پر رکھا گیا ہے، جسے 2018 میں اسرائیلی فوج نے قتل کر دیا تھا۔ فاؤنڈیشن کا مقصد اسرائیلی فوجیوں کی طرف سے کیے گئے جنگی جرائم اور انسانی حقوق کی پامالیوں کے خلاف آواز بلند کرنا اور عالمی سطح پر ان کے خلاف کارروائی کرنا ہے۔
سیف علی ٰخان حملہ کیس،پولیس نے "خاتون” کو بھی کیا گرفتار
ہاتھوں میں ہتھکڑی،پاؤں میں بیڑی،پانی بھی نہ ملا،برازیلی شہری امریکہ سے کیسے واپس پہنچے؟
چیمپئنز ٹرافی:گروپ میچز اور پہلے سیمی فائنل کے ٹکٹوں کی فروخت کل سے شروع
