Category: بلاگ

اسرائیل، مکڑی کے جالے سے زیادہ کمزور تحریر:صابر ابو مریم سیکرٹری جنرل فلسطین فاؤنڈیشن پاکستان
پی ایچ ڈی اسکالر، شعبہ سیاسیات جامعہ کراچی
یہ سنہ2000ء کی بات ہے کہ جب اٹھارہ سال کی مسلسل جدوجہد اور مزاحمت کے نتیجہ میں اسرائیل لبنان کی سرزمین سے اپنا قبضہ ختم کر کے فرار اختیار کر رہا تھا۔یہ فرار کسی معاہدے یا عالمی طاقتوں کی ضمانت کے نتیجہ میں ہر گز نہیں تھا بلکہ یہ فلسطین ولبنان مشترکہ جد وجہد آزادی کی جنگ لڑنے والے گوریلا مجاہدین کی مزاحمت کا ثمر تھا جو نہ صرف لبنان میں اسرائیلی قابض افواج کے خلاف جدوجہد کرتے تھے بلکہ موقع ملتے ہی سرحد کے دوسری طرف مقبوضہ فلسطین میں جا کر بھی مزاحمت کے جوہر دکھاتے تھے۔اس مزاحمت کی بہترین بات یہ تھی کہ اس میں جہاں مسلمانوں کے شیعہ و سنہ فرقہ کے نوجوان موجود تھے وہاں لبنان و فلسطین کے عیسائی اور دروز سمیت دیگر مذاہب و مسالک بھی شریک تھے جن میں لیلیٰ خالد، جارج حبش،سمیر قنطار اور بہت سے دیگر افراد تھے جنہوں نے تحریک آزادی فلسطین او رلبنان پر صہیونی افواج کے تسلط کے خلاف جدوجہد میں قربانیاں دیں، اسیر ہوئے بعد ازاں رہا ہوئے او ر پھر شہادت کے درجہ پر فائز ہوئے۔سنہ2000ء میں جب اسرائیل لبنان سے اپنا تسلط ختم کر کے اس حال میں فرار ہوا کہ اپنا سارا فوجی ساز و سامان تک جنوبی لبنان کے علاقوں میں چھوڑ گیا۔اس عظیم الشا ن فتح کا جشن مناتے ہوئے اس وقت لبنان میں اسلامی مزاحمت کی تحریک حزب اللہ کے سربراہ سید حسن نصر اللہ نے کہا تھا کہ’’خدا کی قسم! اسرائیل کا وجود مکڑی کے جالے سے بھی زیادہ کمزور ہے“۔یہ خود اسرائیل سمیت دنیا میں اسرائیل کی حامی حکومتوں کے لئے پہلا موقع تھاکہ جب دنیا کے سامنے غاصب اسرائیل کے ناقابل تسخیر ہونے کا بھرم مٹھی بھر جوانوں کی مزاحمت نے خاک میں ملا کر رکھ دیا تھا اور دنیا کو بتا رہے تھے کہ اسرائیل کا وجود مکڑی کے جالے سے زیادہ کمزور ہے۔
اسی طرح کا ایک موقع تاریخ میں سنہ2006ء میں دہرایا گیا جب اسرائیل نے اپنے دو قید کئے گئے فوجیوں کی بازیابی کے نام پر لبنان پر جنگ مسلط کر دی اور یہ جنگ امریکہ و اسرائیل کے اعلانات کے مطابق فقط ایک سے دو روز میں امریکہ اور اسرائیل کے طے کردہ مقاصد کے حصول پر ختم ہونا تھی، ان مقاصد میں سرفہرست حزب اللہ کی قید سے دو صہیونی فوجیوں کی بازیابی کے ساتھ ساتھ لبنان میں حزب اللہ کو مکمل طور پر نیست ونابود کرنا تھا تا کہ آئندہ حزب اللہ کا کوئی وجود باقی نہ رہے۔یہ جنگ امریکی واسرائیلی طے کردہ اہداف اور وقت سے کہیں آگے نکل گئی اور 33روز تک جاری رہنے کے بعد بالآخر اسرائیل خود گھٹنے ٹیکنے پر مجبور ہو گیا اور پسپائی کا فیصلہ کیا گیا یقینا اس فیصلہ میں اسرائیل کی ہزیمت کے ساتھ ساتھ امریکہ اور ان تمامشیطانی مغربی قوتو ں کی شکست تھی جو اسرائیل کی پشت پناہی میں مصروف تھیں۔ یہ وہ دوسرا موقع تھا کہ جب سید حسن نصر اللہ کی اس بات کو کہ اسرائیل کا وجود مکڑی کے جالے سے زیادہ کمزور ہے کو خود صہیونی غاصب ریاست کے ماہرین اور فوجی جرنیلوں نے ادراک کیا اور دنیا نے بھی اس صداقت کو جانچ لیا۔
اسرائیل مکڑی کے جالے سے زیادہ کمزور کی متعدد مثالیں ان واقعا ت کے بعد غزہ اور مقبوضہ فلسطین میں بھی دیکھنے کو ملتی رہی ہیں کہ مختلف اوقات میں فلسطین پر مسلط کی جانے والی یک طرف صہیونی جنگوں میں حماس کے مجاہدین کی پائیدار استقامت و مزاحمت نے نہ صرف حسن نصر اللہ کے اس قول کو صادق کر دکھایابلکہ اسرائیل کابھرم خاک میں ملا کر رکھ دیا۔
گذشتہ دنوں جنوبی لبنان کے علاقوں میں اسرائیل کے خلاف حاصل ہونے والی حزب اللہ کی فتح کے عنوان سے سالانہ تقریب کا انعقاد ہوا اور یہ وہ علاقہ تھا کہ جہاں سنہ2006ء میں گھمسان کی لڑائی ہوئی تھی اور یہاں پرمنعقدہ عالی شان تقریب سے اسلامی مزاحمت کی تحریک حزب اللہ کے سربراہ سید حسن نصر اللہ نے خطاب کیا اور آغاز میں ہی دنیا کو باور کروادیا کہ آج اس علاقہ میں کہ جہاں اسرائیل قابض ہوا کرتا تھا لوگوں کے جم غفیر کا ہونا اس بات کی واضح دلیل ہے کہ لبنان سمیت فلسطین کے لوگ اب غاصب صہیونی ریاست اسرائیل سے ڈرتے نہیں ہیں اور اب اسرائیل کا ناقابل تسخیر ہونے کا بھرم کبھی سر اٹھا نہیں پائے گا کیونکہ فلسطین ولبنان سے شام و عراق تک اسلامی مزاحمت اس قدر مضبوط اور مستحکم ہو چکی ہے کہ اسرائیل کے ساتھ کسی بھی قسم کی جنگ کو اپنی مرضی کے نتائج پر موڑ سکتی ہے۔یہ ایک نعمت الہی ہے اور ا س میں نہ تو علاقے کے کسی عرب ممالک کا کوئی کردار ہے اور نہ ہی سلامتی کونسل کی کسی قرار داد کی وجہ سے ایسا ہوا ہے۔یہ سب اسلامی مزاحمت کے فرزندوں کی قربانیوں کا نتیجہ ہے اس پرہمیں شکر ادا کرنا چاہئیے۔
سید حسن نصر اللہ نے اپنی تقریر میں بہت سے پہلوؤں پر روشنی ڈالی لیکن دو پہلو بہت اہم ہیں،پہلا یہ کہ سنہ2006ء میں ہونے والی جنگ میں اسرائیل فقط ایک دن کا حملہ کرنا چاہتا تھا اور اپنے طے کردہ اہداف کو حاصل کرنا چاہتا تھالیکن امریکہ نے اس کو اکسایا کہ جنگ کو جاری رکھا جائے۔اس کے بعد 33روز تک جنگ جاری رہنے کے بعد امریکہ اور اسرائیل کو جب اپنی شکست کا مکمل یقین ہوگیا تو یہ بات جنگ بندی کا سبب بنی،اگر وہ مزید جنگ جاری رکھتے تو ان کو تباہ کن نتائج کا سامنا کرنا پڑتا اس لئے انہوں نے جنگ روک دی۔سید حسن نصر اللہ نے کسی عرب شخصیت کا نام لئے بغیر ایک واقعہ بیان کیا اور کہا کہ ایک عرب معروف شخصیت جنگ کے زمانے میں امریکہ گئی او ر جان بولٹن سے ملاقات کی، بولٹن نے کہا کیا کرنے آئے ہو؟اس نے کہا جنگ کو روکنا ہے تو بولٹن نے جواب دیا کہ یہ جنگ جاری رہے گی حزب اللہ کو ختم کرنا ہے۔لیکن آخری دنوں میں ایک اسرائیلی نمائندے نے عرب شخصیت کو آدھی رات کو کہا کہ جنگ روکنا ہے او پھر جان بولٹن نے بھی یہی کہا۔اس عرب شخصیت نے بولٹن سے پوچھا کہ کیا حزب اللہ کوختم کر دیا گیا ہے؟جان بولٹن نے کہا نہیں! اسرائیل میں دم نہیں ہے۔
حسن نصر اللہ نے ایک مرتبہ پھر اپنی اسی بات کی طرف اشارہ کیا اور کہا جیسا کہ میں نے ماضی میں کہا تھا کہ اسرائیل کا وجود مکڑی کے جالے سے زیادہ کمزور ہے تو یہ عقیدہ مزید پختہ ہو گیا ہے۔آج تیرہ سال گزرنے کے بعدبھی اسرائیل مکڑی کے جالے سے زیادہ کمزور ہے اور یہ بات اسرائیل کے دل ودماغ میں بیٹھ چکی ہے۔آج پھر اسرائیل سے کہتا ہوں اگر کسی بھی طرح کی جنگ کرنے کی کوشش کی تو دنیا کے ٹی وی چینلز پر تمھاری تباہی کا تماشہ دکھایا جائے گا۔سید حسن نصر اللہ نے بتایا کہ غزہ ہمیشہ عزیز رہے گا اور ہم فلسطین کی حمایت اور اس کی آزادی کی جدوجہد سے ایک انچ بھی پیچھے نہیں ہٹیں گے انہوں نے حالیہ دنوں غزہ میں ایک صہیونی فوجی کو گرفتار کرنے کی کوشش کو سراہا۔
خلاصہ یہ ہے کہ حزب اللہ کے سربراہ نے سنہ2000ء میں اور پھر گذشتہ دنوں ایک ٹی وی چینل کو دئیے گئے خصوصی انٹر ویو میں اور پھر اب فتح کے جشن کی تقریب میں مسلسل اسرائیل کے وجود کو مکڑی کے جالے سے زیادہ کمزور کہاہے اور اس بات پر خود اسرائیلی فوج کے جرنل اور ماہرین اور محقق تحقیق میں ہیں اور پریشان کن حالت میں ہیں اور صہیونی فوجی جرنیلوں کا اعتراف جس میں وہ کہتے ہیں کہ حزب اللہ کی قوت اور گائیڈڈ میزائلوں کے سامنے اسرائیلی فوج انتہائی کمزور ہے۔اسی طرح ایک اور اسرائیلی جنرل نے کہا تھا کہ سارا اسرائیل حزب اللہ کے میزائلوں کے نشانے پر ہے۔پس خود صہیونی ذرائع اس تحقیق میں مصروف ہیں کہ اسرائیل کا وجود مکڑی کے جالے سے زیادہ کمزور ہے اور حقیقت یہی ہے کہ اسرائیل کا وجود مکڑی کے جالے سے زیادہ کمزور ہے ضرور ت صرف اس امر کی ہے کہ عرب دنیا کے وہ مسلمان حکمران جو امریکی وصہیونی کاسہ لیسی میں مصروف ہیں اپنی حمیت و عز ت کے دفاع او ر مظلو م ملت فلسطین کے دفاع و قبلہ اول بیت المقدس کی بازیابی کے لئے متحد ہو جائیں اور دنیا کے نقشہ سے صہیونی جرثومہ کو اکھاڑ پھینکیں جو نہ صرف فلسطین و مغربی ایشیاء کے لئے مصیبت و خطرہ ہے بلکہ پاکستان سمیت دنیا کے امن و سلامتی کے لئے سنگین خطرہ ہے۔

حج کی کار گزاری
از حافظ احمد سعید جعفر

"الحمدللہ حج 1440 ھ بمطابق 2019 ء کا حج ادا کرنے کی سعادت حاصل کرلی ہے.
حج کے موقع پر انتظامات کے بارے میں ہر سال بہت سی خبریں گردش کرتی ہیں. اس سال چونکہ میں عینی شاہد ہوں تو سوچا دنیا کو حج کے انتظامات کے بارے میں تفصیل سے بتاؤں.
ہماری فلائیٹ نےمدینہ شریف لینڈ کیا اور ہم نے 8 دن مدینہ منورہ گزارے. ایئرپورٹ سے ہوٹل لے جانے کا انتظام تسلی بخش تھا. آرام دہ بسوں میں حاجیوں کو انکے ہوٹلز تک پہنچایا گیا. لیکن ہوٹل پہنچتے ہو ئے2 عدد پریشانیوں کا سامنا کرنا پڑا. ایک کمرے کی دستیابی تھا. چونکہ ہوٹل میں 4 اور 5 افراد کے لئے کمرے موجود تھے اس لئے 4 سے کم یا 5 سے زیادہ افراد پر مشتمل فیملیز کو دوسرے لوگوں کے ساتھ adjust کرنا پڑتا تھا اور لوگوں کی طرف سے اس سلسلے میں تعاون نہیں کیا گیا. جس سے حجاج کرام اور ہوٹل انتظامیہ کے درمیان بحث کا ماحول پیدا ہوا. دوسراہم پاکستانیوں کی روایتی بد نظمی تھی. قطار توڑ کر آگے بڑھنے کی کوششوں کی وجہ سے کمرے ملنے کا مرحلہ تاخیر کا شکار ہوا اور شور شرابہ اور بد مذگی بھی دیکھنے کو ملی. دوسری مشکل یہ پیش آئی کہ تمام حجاج کا سامان ہوٹل کی لابی میں لا کر رکھ دیا گیا. تمام حجاج نے اپنا سامان چن چن کر اکٹھا کیا اور لفٹس میں منتقل کر کے اپنے اپنے فلور تک پہنچایا. ہوٹل میں 3 عدد لفٹس موجود تھیں اور لفٹس کے دروازوں والی جگہ کافی تنگ تھی ایسے میں سینکڑوں حجاجِ کرام کا سامان سمیت آنا جانا کس قدر تکلیف دہ ہوگا آپ اندازہ لگا سکتے ہیں. ایسے وقت میں تگڑے اور ہوشیار لوگ داؤ لگا جاتے ہیں اور سیدھے سادھے, اور کمزور لوگ پیچھے رہ جاتے ہیں. خیر چند گھنٹوں میں ان دونوں مراحل سے فراغت حاصل ہوئی اور ہوٹل کے معاملات معمول پر آئے.
اب آپکو ہوٹل کے معاملات کے بارے میں تفصیل سے بتاتا ہوں. ہمارے ہوٹل کا نام مختارہ غربی ہوٹل تھا. یہ فندق مسجدِ نبوی شریف سے تقریباً 7 منٹ کی واک پر واقع تھا اس لئے مسجد آنے جانے میں سہولت رہتی تھی. ہوٹل خوبصورت اور ہائی فائی تھا. کمرے بہت اچھے تھے. واش روم, نکاسیِ آب وغیرہ کا نظام بھی پرفیکٹ تھا. کھانے کی فراہمی کسی کیٹرنگ سروس کے پاس تھی اور کھانے کا معیار عموماً اچھا ہی ہوتا تھا. تین ٹائم روٹی سالن کے علاوہ مندرجہ ذیل آئٹمز بھی مہیاء کیے جاتے تھے.
صبح کے ناشتے میں چائے
دوپہر کو ایک پھل (سیب یا مالٹا) اور لسی (جسے عربی میں لبن کہا جاتا ہے) کی بوتل.
رات کے کھانے میں قبطان نام کا ایک جوس اور سویٹ ڈش.
الحمدللہ مدینہ میں رہائش کے دوران کوئی تنگی کوئی پریشانی محسوس نہیں کی.
8 دن قیام کے بعد ہم مکہ مکرمہ روانہ ہوئے. اس مقصد کے لئے بھی بسوں کا انتظام اطمینان بخش تھا. لہٰذہ اس معاملے میں بھی راوی ok کی رپورٹ دیتا ہے.
مکہ مکرمہ میں عزیزیہ نامی علاقے میں بلڈنگز کے اندر حجاجِ کرام کو ٹھرایا گیا. ہم نے عزیزیہ کے بارے میں کافی منفی باتیں سن رکھی تھیں لیکن یقین کیجئے وہاں کا ماحول مدینہ کے ہوٹلز سے بھی زیادہ اچھا تھا اور بلڈنگ کا عملہ یعنی معاون حجاج الباکستان کا رویہ بہت خوش اخلاقی پر مبنی تھا. یہاں تک کہ مدینہ کے ہوٹل کے برعکس ہمارا سامان بسوں سے اتارنے سے لے کر, کمروں تک پہنچانے میں معاونین نےخوب تعاون کیا. اور بڑی خوش اسلوبی کے ساتھ سارا سامان حجاجِ کرام کے مطلوبہ فلورز تک پہنچ گیا.
عزیزیہ کی ہماری بلڈنگ نمبر 702 سے مسجدالحرام کا سفر تقریباً 20 منٹ کی ڈرائیو کا ہے. ٹرانسپورٹ کا انتظام یوں ہے کہ 24 گھنٹے, چند منٹ کے وقفے سے بسیں چلتی ہیں ایک بس سات بلڈنگز کو cover کرتی ہے یعنی 7 بلڈنگز کے حجاج کی اپنی ایک بس ہوتی ہے جس میں وہ بلڈنگ کے باہر سے سوار ہوتے ہیں اور وہ بس حجاجِ کرام کو ایک بس اڈے تک چھوڑتی ہے. وہاں بہت سی بسیں حرم شریف جانے کے لئے تیار کھڑی ہوتی ہیں. حجاج کرام بلڈنگ کی بس سے نکل کر حرم جانے والی بسوں میں بیٹھتے ہیں اور وہ بسیں حرم سے کچھ فاصلے پر اتارتی ہیں. جہاں سے پیدل سفر 4 سے 5 منٹ کا ہوتا ہے. حرم شریف جانے کا عمل عموماً خوب اسلوبی سے طے ہوجاتا ہے لیکن واپسی پر بسوں میں سوار ہوتے ہوئے بھگ دڑ اور دھکم پیل کا سامنا کرنا پڑتا ہے.
کھانے کا نظام عزیزیہ میں بھی مدینہ سے زیادہ مختلف نہیں تھا Menu دونوں جگہ ایک سا تھا. مدینہ میںcatering service دینے والی کمپنی کا نام میں نہیں دیکھ سکا. مکہ میں یہ خدمت مطبخ عرفات نامی کمپنی مہیا کرتی ہے. مکہ اور مدینہ میں کھانے کے ذائقے میں مجھے 19 ,20 کا فرق محسوس ہوا مدینہ میں کھانے کا ذائقہ نسبتاً بہتر تھا.
اب کچھ مسجدِ نبوی شریف اور مسجد الحرام شریف کے انتظامات کی بات کر لی جائے. مسجدِ نبوی میں انتظامات اور سہولیات ہر لحاظ سے مسجد الحرام کی نسبت بہت بہتر لگے. صفائی, بیٹھنے جگہ کی فراہمی, واش رومز سب مسجد نبوی میں زیادہ بہتر ہیں. مسجد الحرام شریف میں بہت سے تعمیراتی کام جاری ہیں جنکی وجہ سے کچھ تنگی کا سامنا کرنا پڑتا ہے. دوسرا یہ کہ یہاں شرطے بار بار بہت سے راستے بلاک کردیتے ہیں, کبھی کہیں سے لوگوں کو اٹھا دیتے ہیں کبھی یہاں سے وہاں منتقل کر دیتے ہیں. اس لئے مسجد الحرام میں دیر تک سکون سے ایک جگہ بیٹھ کر عبادت کرنا بہت مشکل کام ہے. راستے بند کرنے میں یقیناً کوئی انتظامی حکمت عملی ہوگی لیکن سچی بات یہ ہے کہ اسکی وجہ سے حجاج کو بہت تکلیف کا سامنا کرنا پڑتا ہے. مجھے خود اس وجہ سے بہت مشکل ہوئی تھی.
خیر, مجموعی طور پر مکہ اور مدینہ دونوں میں رہائش, کھانے اور ٹرانسپورٹ کے انتظامات بہت اچھے تھے.
اب بات کرتے ہیں حج کے ایام کی.
پہلے آپ یہ سمجھ لیجئے کہ حج کا ایام میں حاجیوں کے انتظامات بہت سی چھوٹی چھوٹی کمپنوں کو دیے ہوتےہیں جنہیں مکتب کہا جاتا ہے. حجاجِ کرام کو تقریباً 125 مکاتب میں تقسیم کیا گیا ہے. ہر مکتب کا ایک معلم ہوتا ہے جس کے زمے ایامِ حج کے دوران منیٰ, عرفات, مزدلفہ میں اپنے اپنے حاجیوں کا انتظام کرنا ہوتا ہے. ہمارا مکتب نمبر 100 تھا. جس کا انتظام عبدالرحمٰن…… عبداللہ وھبی نامی معلم کے ذمے تھا. اور ان موصوف نے اپنی ذمے داریاں بڑے کمال برے طریقے سے سرانجام دیں. منیٰ میں ہمیں گندے پانی میںchlorine ڈال کر پلایا جاتا رہا. کھانا بہت دیر سے ملتا تھا اور 2 دفعہ کے علاوہ ہمیشہ چنے کی پتلی دال کھلائی گئی جوکہ بہت سخت تھی. یعنی ہمارے مکتب میں کھانا نہایت ناقص تھا. ٹرانسپورٹ کو دیکھا جائے تو شائد سب سے کم بسیں مکتب نمبر 100 کے پاس تھیں جسکی وجہ سے بسوں میں چڑھتے ہوئے دھکم پیل اور بد نظمی انتہا کو ہوتی تھی. 4130 حجاج کے لئے 11 بسوں کا انتظام تھا جبکہ سننے میں آیا ہے کہ حکومتِ پاکستان نے موصوف سے 40 بسوں کا معاہدہ کر رکھا تھا. یوم, عرفہ کے دن ہمارے مکتب والے بہت تنگ ہوئے. غروبِ آفتاب کے بعد جب بسیں نکلیں تو سینکڑوں حجاج بسوں میں سوار نہ ہو سکے جن میں میں اور میرے گھر والے بھی شامل تھے. تقریباً ڈھائی 3 گھنٹے بعد بسیں واپس آئیں پھر بقیہ حجاجِ کرام بسوں میں سوار ہو پائے. معذور اور بیمار افراد کے لئے ایسی صورت میں بسوں میں چڑھنا ناممکن تھا اس وجہ سے میرا ایک روم میٹ جسکی والدہ ضعیف ہیں, انہیں ویل چیئر پر پیدل مزدلفہ جانا پڑا. یاد رہے عرفات سے مذدلفہ تک کا سفر 7 کلومیٹر سے زیادہ ہے. یہاں قصور ہماری عوام کا بھی ہے. پاکستانوں کی طرف سے بدنظمی اور خود غرضی کی انتہا دیکھنے کو ملی. ہر شخص دوسرے کی ٹانگ کھینچ کر خود آگے بڑھنے کو کوشش میں رہتا ہے. ہمیں کئی دفعہ دوسرے ممالک کے عہدیداروں سے طعنے سننے کو ملے کہ پاکستانیوں کا کوئی نظام نہیں, پاکستانیوں میں عقل سمجھ نہیں.
قصہ مختصر, مکہ اور مدینہ دونوں مقدس شہروں میں حجاج کے لئے انتظامات کافی اچھے تھے جس پر میں پاکستان اور سعودی حکومت کو خراج تحسین پیش کرتا ہوں. البتہ حکومت پاکستان سے گزارش ہے کہ عبدالرحمٰن عبداللہ وھبی نامی معلم کو بلیک لسٹ کیا جائے اور مکتب 100 کی زمہ داری کسی آئندہ کسی ایماندار اور قابل معلم کے سپرد کی جائے.