Category: بلاگ

معاشرتی ساخت، قانونی شکنجوں اور مذہبی روایات میں جب بھی کوئی خاندانی تنازع جنم لیتا ہے، اس کا سب سے سنگین اور تباہ کن بوجھ خواتین اور معصوم بچوں کو اٹھانا پڑتا ہے۔ یہ ایک دردناک حقیقت ہے کہ اگر مرد بدچلنی کا مظاہرہ کرے تو اس کا اخلاقی دھبہ عورت کے دامن پر لگایا جاتا ہے، اور اگر بات طلاق تک پہنچ جائے تو معاشرتی طعنے، بے دخلی اور سگی اولاد کی پرورش کے کٹھن مسائل کی صورت میں سزا پھر بھی عورت ہی بھگتتی ہے۔معاشرہ، ریاست کا قانون اور کلیسیائی (چرچ) اصول مرد اور عورت کی علیحدگی یا طلاق کے مسئلے پر تقسیم کا شکار تو نظر آتے ہیں، مگر اس بات پر اب بھی کوئی واضح اور مشترکہ حکمت عملی موجود نہیں کہ اس ٹوٹتے ہوئے خاندانی نظام کے بچوں پر نفسیاتی، سماجی اور معاشی اثرات کیا مرتب ہوں گے۔چرچ، مسیحی قوانین اور طلاق کے بعد متبادل کا فقدان کیتھولک چرچ کے مطابق شادی ایک مقدس اور ناقابلِ فسخ عہد (Sacrament) ہے، جس میں طلاق کی گنجائش نہیں ہوتی۔

دوسری جانب، دیگر پروٹسٹنٹ اور اینگلیکن فرقے مخصوص حالتوں (مثلاً زنا یا شدید ناانصافی) میں طلاق کو قبول تو کرتے ہیں، لیکن میاں بیوی کے درمیان رشتے کو قائم رکھنے یا ٹوٹے ہوئے رشتے کے بعد ان کی مثبت رہنمائی کے لیے ان کے پاس بھی کوئی ٹھوس عملی یا نفسیاتی متبادل حل موجود نہیں۔یہاں یہ سوال اٹھتا ہے کہ "کیا مسیحی کمیونٹی شادی اور طلاق کے علاوہ بائبل کے تمام قوانین کی مکمل پابند ہے؟”حقیقت یہ ہے کہ دورِ حاضر میں بہت سے معاشرتی، معاشی اور انتظامی معاملات میں دیگر قوانین اور قانونی راستے اختیار کیے جاتے ہیں، لیکن جب خاندانی ٹوٹ پھوٹ کا وقت آتا ہے تو یکایک مذہب کی سخت تشریحات، روایتی بندشیں اور معاشرتی دباؤ آگے آ جاتے ہیں۔ اگر بائبل کے محبت، رحم، معافی، اور عورت و بچے کے حقوق کے بنیادی اصولوں کو عملی زندگی میں اپنایا جائے تو طلاق کی نوبت آنے سے پہلے ہی کونسلنگ اور تصفیے کی راہیں نکل سکتی ہیں۔خاندانی تنازعات کو عدالتوں، تھانوں اور وکیلوں کی بھینٹ چڑھانے کے بجائے اگر ماہرینِ نفسیات ، فیملی کونسلرز اور تھراپسٹ کے پاس لے جایا جائے، تو بہت سے گھر اجڑنے سے بچ سکتے ہیں، بہت سا روپیہ کورٹ کچہری کے منشیوں، بابوؤں اور پولیس کو دینے کی بجائے بچوں کی صحت و تعلیم پر خرچ ہو سکتا ہے۔ کورٹ کچہری کی فضا میں انتقام، الزام تراشی اور ایک دوسرے کو زدوکوب کرنے کی دوڑ ہوتی ہے، جو میاں بیوی کے درمیان بچے ہوئے احترام کو بھی ختم کر دیتی ہے، جو فا صلوں کو کئی سالوں تک دور لے جاتا ہے جہاں سے واپسی کا دروازہ ہمیشہ کے لیے نعفرت، انا پرستی اور بہن بھائیوں کی مشاورت سے ہمیشہ کے لیے بند کر دیا جاتا ہے۔ اس لیے انتہائی قدم اٹھانے سے پہلے کسی ماہر نفسیات رابطہ استوار کرنا چاہیے کیونکہ ماہرِ نفسیات جوڑے کو یہ سمجھنے میں مدد دیتا ہے کہ تنازع کی اصل وجہ کیا ہے۔ اگر رشتے کا قائم رہنا ممکن نہ بھی ہو، تو تھراپی کے ذریعے دونوں فریقین کو اس قابل بنایا جا سکتا ہے کہ وہ باہم احترام کے ساتھ، بچوں کے بہترین مفاد میں "باہمی رضا مندی “ کا راستہ اختیار کریں۔ طلاق کے معاملے میں سب سے زیادہ پسنے والے بچے ہوتے ہیں۔

اکثر قانونی اور معاشرتی جنگ میں بچوں کو بطور "ہتھیار” یا ایک فریق کو سزا دینے کے لیے استعمال کیا جاتا ہے۔بچوں کی نگران کون؟ باپ کی مالی حیثیت یا ماں پر لگائے گئے بے بنیاد الزام کی بنیاد پر اگر بچوں کو ماں سے جدا کر دیا جائے، تو بچیوں اور بچوں کی شخصیت میں ناقابلِ تلافی خلا پیدا ہو جاتا ہے۔ طلاق یافتہ گھرانوں کے بچوں میں احساسِ جرم (یہ سوچنا کہ شاید والدین ان کی وجہ سے الگ ہوئے)، غصہ، تنہائی، تعلیمی پسماندگی اور مستقبل میں رشتوں سے خوف (Attachment Issues) جیسی پیچیدگیاں جنم لیتی ہیں۔ خصوصاً بچیوں کو معاشرتی نظروں اور غیر محفوظ ماحول کا سامنا کرنا پڑتا ہے۔ طلاق کی صورت میں عورت کی سب سے بڑی جدوجہد مالی خودمختاری اور بچوں کی کفالت ہوتی ہے۔بیشتر حالات میں عورت شادی کے بعد گھر داری میں لگ جاتی ہے اور معاشی طور پر مرد پر منحصر ہوتی ہے۔ طلاق کے بعد اچانک اسے بغیر کسی مالی سہارے کے تن تنہا سزا کے طور پر چھوڑ دیا جاتا ہے، جبکہ بچوں کے سکول، خوراک اور رہائش کے اخراجات کا بوجھ بھی اسی پر آن پڑتا ہے ، جبکہ خرچہ نفقہ حاصل کرنے کے لیے عورت کو سالہا سال عدالتوں کے چکر کاٹنے پڑتے ہیں، اور مقررہ رقم اکثر افراطِ زر اور بنیادی ضروریات کے مقابلے میں نہ ہونے کے برابر ہوتی ہے جسکے اثرات نا صرف عورت کی جسمانی صحت پر پڑتے ہیں بلکہ زہنی طور سے بھی وہ تناؤ کا شکار رہتی ہے جسکی وجہ سے وہ بچوں پر مکمل توجہ نہیں دے پاتی اس لیے زیادہ تر بچے کم عمر ہی میں ماں کا مالی سہارا بننے کی خاطر تعلیم و ہنر سے دور ہو جاتے ہیں۔

عدالت جانے سے قبل قانونی طور پر یہ لازم قرار دیا جائے کہ میاں بیوی سرکاری خرچ پر ماہرِ نفسیات اور کونسلر کے ساتھ کم از کم کچھ سیشنز مکمل کریں تاکہ صلح یا باوقار علیحدگی کی کوئی راہ نکل سکے، چرچ اور مذہبی رہنماؤں کو محض طلاق کی ممانعت تک محدود رہنے کے بجائے شادی سے قبل اور شادی کے بعد کونسلنگ کا باقاعدہ نظام قائم کرنا چاہیے، جہاں زوجین کو معاشی ، معاشرتی اور اخلاقی و نفسیاتی سپورٹ ملے۔بچوں کی حوالگی کا فیصلہ محض والد کی مالی برتری یا والدہ کے سخت معاشرتی حالات کو دیکھ کر نہیں، بلکہ بچے کی ذہنی اور جذباتی وابستگی اور حفاظت کو مدنظر رکھ کر کیا جانا چاہیے۔قانونی و معاشی طلاق کی صورت میں عورت اور بچوں کے لیے فوری مالی امداد اور باوقار نفقہ کا قانونی طریقہ کار آسان اور تیز رفتار بنایا جائے تاکہ ماں کو بچوں کی پرورِش کے لیے دربدر نہ ہونا پڑے۔

معاشرے اور قانون کو یہ تسلیم کرنا ہوگا کہ شادی کا مقصد انسانی زندگی میں سکون اور ترقی لانا ہے نہ کہ عذاب۔ اگر دو افراد کا ساتھ رہنا ناممکن ہو جائے، تو اس کا ازالہ بچوں اور عورت کی تذلیل سے نہیں، بلکہ بصیرت، نفسیاتی رہنمائی اور انصاف پر مبنی رویوں سے ہونا چاہیے۔ تاکہ طلاق سے پہلے خاندان طلاق کے خسارہ سے بچ جائے۔

کبھی کبھی میں سوچتی ہوں کہ اگر جھوٹ کے واقعی رنگ ہوتے تو شاید لوگ اس سے اتنی آسانی سے محبت نہ کرتے مگر جھوٹ نے خود کو بہت چالاکی سے ”سفید“ کا نام دے دیا ہے، جیسے وہ کوئی بے ضرر چیز ہو۔ یہی وجہ ہے کہ ہم میں سے اکثر لوگ روزانہ نہ چاہتے ہوئے بھی سفید جھوٹ بول جاتے ہیں اور پھر خود کو یہ کہہ کر مطمئن کر لیتے ہیں کہ ”اس سے کسی کا کیا نقصان ہوا؟“ لیکن میں جتنا زندگی کو دیکھتی اور لوگوں کو سمجھنے کی کوشش کرتی ہوں، اتنا ہی اس بات پر یقین بڑھتا جاتا ہے کہ ہر جھوٹ، چاہے کتنا ہی معمولی کیوں نہ ہو، اپنے پیچھے کسی نہ کسی سیاہ حقیقت کو ضرور چھوڑ جاتا ہے۔

میں نے محسوس کیا ہے کہ سفید جھوٹ ہماری روزمرہ زندگی کا اتنا معمول بن چکا ہے کہ اب ہمیں اس کا احساس بھی نہیں ہوتا۔ ایک دوست فون کرے تو ہم کہہ دیتے ہیں: ”میں راستے میں ہوں“، حالانکہ ہم ابھی گھر سے بھی نہیں نکلے ہوتے۔ کوئی پوچھ لے۔ ”کیسے ہو؟“ تو جواب آتا ہے، ”بالکل ٹھیک ہوں“، جب کہ اندر ہی اندر انسان ٹوٹ رہا ہوتا ہے۔ کبھی ہم کسی دعوت میں نہ جانے کے لیے بہانہ بنا لیتے ہیں، کبھی کسی کا دل رکھنے کے لیے ایسی تعریف کر دیتے ہیں جس پر خود بھی یقین نہیں ہوتا۔ یہ سب ہمیں معمولی لگتا ہے مگر یہی معمولی جھوٹ آہستہ آہستہ ہماری شخصیت کا حصہ بننے لگتے ہیں۔

دوستی کا رشتہ اعتماد پر قائم ہوتا ہے لیکن افسوس کہ سب سے زیادہ سفید جھوٹ بھی اکثر دوستوں کے درمیان ہی بولے جاتے ہیں۔ کبھی ملاقات سے بچنے کے لیے، کبھی ناراضی چھپانے کے لیے، کبھی کسی اور کو ترجیح دینے کے باوجود مصروفیت کا بہانہ بنا دیا جاتا ہے۔ شاید! اس وقت ہمیں لگتا ہے کہ ہم نے معاملہ سنبھال لیا مگر حقیقت یہ ہے کہ سامنے والا اکثر الفاظ سے زیادہ رویّے کو سمجھ لیتا ہے۔ اعتماد جب کمزور ہونے لگتا ہے تو دوستی کی مضبوط دیوار بھی آہستہ آہستہ گرنے لگتی ہے۔

گھروں میں بھی یہی صورت حال دکھائی دیتی ہے۔ والدین بچوں سے بعض حقیقتیں چھپا لیتے ہیں اور بچے اپنی غلطیوں پر پردہ ڈالنے کے لیے سفید جھوٹ بول دیتے ہیں۔ بہن بھائی ایک دوسرے سے، میاں بیوی آپس میں، حتیٰ کہ کبھی انسان اپنے آپ سے بھی سچ نہیں بولتا۔ وہ اپنی کمزوریوں کو حالات کا نام دیتا ہے، اپنی غلطیوں کو مجبوری کہہ دیتا ہے اور اپنی کوتاہیوں کے لیے دوسروں کو ذمہ دار ٹھہرا دیتا ہے۔ میرے نزدیک خود سے بولا جانے والا جھوٹ سب سے خطرناک جھوٹ ہے کیونکہ جب انسان اپنے ضمیر کو خاموش کر دیتا ہے تو پھر اسے سچ سنائی دینا بھی بند ہو جاتا ہے۔

آج سوشل میڈیا نے بھی سفید جھوٹ کو ایک نیا لباس پہنا دیا ہے۔ ہر شخص اپنی زندگی کا خوبصورت ترین رخ دنیا کو دکھانا چاہتا ہے۔ کامیابیاں نمایاں ہوتی ہیں، ناکامیاں چھپ جاتی ہیں۔ مسکراہٹیں نظر آتی ہیں، آنسو نہیں۔ دیکھنے والے سمجھتے ہیں کہ سب خوش ہیں جبکہ حقیقت یہ ہے کہ ہر انسان اپنی اپنی آزمائشوں سے گزر رہا ہوتا ہے۔ اس بناوٹی دنیا نے ہمیں حقیقت سے زیادہ تصویر کا اسیر بنا دیا ہے۔

بطور لکھاری میں نے ہمیشہ یہی محسوس کیا ہے کہ قلم صرف کہانیاں نہیں لکھتا بلکہ معاشرے کا آئینہ بھی بنتا ہے۔ جب میں لوگوں کے رویّوں پر غور کرتی ہوں تو محسوس ہوتا ہے کہ ہم سچ سے اس لیے نہیں بھاگتے کہ وہ غلط ہے بلکہ اس لیے کہ کبھی کبھی وہ ہمیں ہماری اصل شکل دکھا دیتا ہے۔ جھوٹ آسان راستہ دکھاتا ہے جبکہ سچ انسان سے حوصلہ مانگتا ہے۔

یہ بھی حقیقت ہے کہ ہر سچ سخت لہجے میں نہیں بولا جاتا اگر نیت صاف ہو اور الفاظ میں نرمی ہو تو سچ بھی دلوں میں جگہ بنا لیتا ہے۔ اس کے برعکس جھوٹ چاہے کتنی ہی خوبصورتی سے بولا جائے، اس کی بنیاد کمزور ہوتی ہے۔ وقت گزرنے کے ساتھ وہ ڈھ جاتی ہے اور اس کے نیچے چھپی حقیقت سب کے سامنے آ جاتی ہے۔
میں نے اپنی زندگی میں یہ سیکھا ہے کہ عزت، اعتماد اور محبت خریدے نہیں جا سکتے، یہ صرف سچائی سے کمائے جاتے ہیں۔ جو انسان سچ بولنے کی ہمت رکھتا ہے، وہ وقتی مشکل میں ضرور آ سکتا ہے مگر آخرکار وہی سرخرو ہوتا ہے۔ اس کے برعکس سفید جھوٹ وقتی سکون تو دے دیتا ہے لیکن بعد میں وہی سکون بے چینی میں بدل جاتا ہے۔ ایک جھوٹ کو چھپانے کے لیے دوسرا جھوٹ، پھر تیسرا،ل اور پھر ایک ایسا سلسلہ شروع ہو جاتا ہے جس کا اختتام اکثر پچھتاوے پر ہوتا ہے۔

اگر ہم چاہتے ہیں کہ ہمارے بچے دیانت دار ہوں، ہمارے دوست ہم پر اعتماد کریں، ہمارے رشتے مضبوط رہیں اور ہمارا معاشرہ اخلاقی بنیادوں پر کھڑا ہو، تو ہمیں اپنی روزمرہ زندگی کے ان چھوٹے چھوٹے سفید جھوٹوں کا محاسبہ کرنا ہوگا جنہیں ہم معمول سمجھ کر نظر انداز کر دیتے ہیں۔ اصلاح ہمیشہ اپنے آپ سے شروع ہوتی ہے۔ جب ہم اپنی زبان کو سچ کا عادی بنا لیں گے تو ہمارا کردار بھی مضبوط ہوگا اور ہمارے تعلقات بھی۔

آخر میں میں صرف اتنا کہنا چاہوں گی کہ سفید جھوٹ کبھی حقیقت کو شکست نہیں دے سکتا۔ وہ چند لمحوں کے لیے سچ پر پردہ ضرور ڈال دیتا ہے مگر وقت وہ ہوا ہے جو ہر پردہ ہٹا دیتا ہے۔ تب انسان کے سامنے صرف دو چیزیں رہ جاتی ہیں: ایک اس کا کردار اور دوسرا اس کے اعمال کی سچائی۔ میری نظر میں یہی وہ لمحہ ہے جہاں سفید جھوٹ اپنا رنگ کھو دیتا ہے اور اس کے پیچھے چھپے سیاہ حقائق پوری شدت کے ساتھ سامنے آ جاتے ہیں۔ اس لیے بہتر یہی ہے کہ ہم وقتی آسانی کے بجائے دائمی سچائی کا انتخاب کریں کیونکہ سچ شاید آزماتا ہے مگر آخرکار انسان کو سربلند بھی وہی کرتا ہے۔

کچھ منظر بس دیکھے نہیں جاتے، وہ دل میں اتر جاتے ہیں۔ چند دن پہلے سوشل میڈیا پر ایک ویڈیو دیکھی۔ بتایا جا رہا تھا کہ راولپنڈی مال روڈ پر ایک وکیل نے ایک موٹر سائیکل سوار کو تھپڑ مارا، جبکہ قریب موجود ایک ٹریفک پولیس اہلکار یہ سب دیکھتا رہا۔ ویڈیو چند لمحوں کی تھی، مگر جانے کیوں وہ منظر میرے ذہن میں وہیں رک گیا۔ شاید اس لیے کہ اس میں صرف ایک شخص کو تھپڑ نہیں مارا جا رہا تھا، وہاں کسی کی عزت، کسی کا اعتماد اور شاید کسی کا قانون پر یقین بھی تھپڑ کھا رہا تھا۔

اور اس پورے منظر میں جو چیز میرے دل میں سب سے زیادہ ٹھہر گئی، وہ اُس موٹر سائیکل والے کی آنکھیں تھیں۔ جس انداز سے وہ ٹریفک پولیس والے کی طرف دیکھ رہا تھا، میں اُس نظر کو شاید کبھی بھول نہ سکوں۔ اُس کی آنکھوں میں جیسے ایک سوال تھا۔۔۔ ایسا سوال جو زبان پر نہیں آیا، مگر صاف سنائی دے رہا تھا۔ جیسے وہ پوچھ رہا ہو، "آپ تو یہاں موجود ہیں، پھر میرے ساتھ یہ کیوں ہو رہا ہے؟” اُس کی نظروں میں غصہ بھی تھا، حیرت بھی، مگر ان سب سے زیادہ ایک ایسی مایوسی تھی جسے شاید بہت سے لوگوں نے دیکھا ہی نہ ہو۔ لیکن میں نے دیکھی۔ وہ بار بار پولیس والے کی طرف دیکھ رہا تھا، جیسے آخری امید بھی وہیں کھڑی ہو۔ جیسے اسے یقین ہو کہ شاید ابھی کوئی آگے بڑھے گا، شاید کوئی اسے اس بے عزتی سے نکال لے گا۔۔۔ مگر جب سامنے صرف خاموشی ہو تو انسان کی آنکھوں میں امید بھی آہستہ آہستہ بجھنے لگتی ہے۔

شاید اُس وقت وہ صرف ایک تھپڑ سے نہیں ٹوٹا ہوگا۔ شاید اسے اس بات نے زیادہ توڑا ہوگا کہ جس شخص سے اسے تحفظ کی امید تھی، وہ بھی خاموش کھڑا تھا۔ مجھے اُس کی آنکھوں میں یہی سوال نظر آیا۔۔۔ "اگر آپ بھی میرے لیے نہیں کھڑے ہوں گے، تو پھر میں کس کے پاس جاؤں؟” شاید یہ سوال اُس نے کبھی زبان سے نہ کہا ہو، مگر بعض سوال کہنے کے لیے لفظوں کے محتاج نہیں ہوتے۔ کچھ سوال آنکھوں میں آتے ہیں اور سیدھے دوسرے انسان کے ضمیر تک پہنچتے ہیں۔

ہم اکثر ظلم کو صرف اُس ہاتھ میں دیکھتے ہیں جو کسی پر اٹھتا ہے، مگر کبھی کبھی ظلم اُس خاموشی میں بھی چھپا ہوتا ہے جو اُس ہاتھ کو اٹھتے ہوئے دیکھتی ہے اور پھر بھی کچھ نہیں کہتی۔ شاید خاموش رہنے والا خود کسی کو نہیں مارتا، لیکن جب ایک کمزور شخص اپنے سامنے ہونے والی زیادتی کے خلاف اکیلا کھڑا ہو اور اردگرد موجود لوگ خاموش رہیں، تو اُس کی بے بسی اور بھی گہری ہو جاتی ہے۔ کیونکہ پھر اسے صرف ایک شخص سے نہیں، پورے ماحول سے شکست محسوس ہونے لگتی ہے۔

ہم نے شاید طاقت کا مطلب ہی غلط سمجھ لیا ہے۔ طاقت اس بات کا نام نہیں کہ آپ کسی کمزور کو دبا سکیں۔ اصل طاقت تو اُس وقت سامنے آتی ہے جب آپ کے پاس اختیار ہو، مگر آپ اُس اختیار کو کسی کی عزت پامال کرنے کے لیے استعمال نہ کریں۔ وکیل ہونا قابلِ احترام پیشہ ہے، مگر قانون جاننے کا مطلب قانون سے اوپر ہونا نہیں۔ اسی طرح پولیس کی وردی صرف اختیار نہیں، ایک ذمہ داری بھی ہے۔ اُس وردی کی اصل عزت شاید اسی میں ہے کہ جب ایک بے اختیار انسان مشکل میں ہو تو اسے یہ محسوس نہ ہونے دیا جائے کہ وہ اکیلا ہے۔

اور یہاں سے بات صرف اُس وکیل یا اُس پولیس اہلکار تک محدود نہیں رہتی۔ یہ سوال ہم سب کے سامنے آ کھڑا ہوتا ہے۔ اگر ہم کسی کے ساتھ زیادتی ہوتے دیکھیں اور خاموشی سے گزر جائیں، اگر ہم یہ سوچ کر نظریں پھیر لیں کہ "یہ میرا مسئلہ نہیں” تو کیا واقعی ہم اس سب سے بالکل الگ ہیں؟ شاید نہیں۔ کیونکہ معاشرے صرف ظالم لوگوں سے خراب نہیں ہوتے، کبھی کبھی اچھے لوگوں کی خاموشی بھی ظلم کو جگہ دیتی ہے۔

مجھے لگتا ہے ہم آہستہ آہستہ ظلم کے عادی ہوتے جا رہے ہیں۔ کوئی واقعہ ہوتا ہے، ویڈیو بنتی ہے، لوگ غصہ کرتے ہیں، چند دن بات ہوتی ہے اور پھر ہم اگلی خبر کی طرف بڑھ جاتے ہیں۔ شاید ہمیں اب ظلم سے زیادہ اُس بے حسی سے