Category: کاروبار

اوگرا نے پیٹرول اور ہائی سپیڈ ڈیزل کی قیمتوں میں مزید اضافہ کردیا ہے۔

جاری نوٹیفکیشن کے مطابق پیٹرول کی قیمت میں 5 روپے 2 پیسے فی لیٹر اضافہ کیا گیا ہے، جس کے بعد پیٹرول کی نئی قیمت 375 روپے 82 پیسے فی لیٹر مقرر ہوگئی ہے۔

اسی طرح ہائی سپیڈ ڈیزل کی قیمت میں 5 روپے 28 پیسے فی لیٹر اضافہ کیا گیا ہے، جس کے بعد ڈیزل کی نئی قیمت 403 روپے 32 پیسے فی لیٹر ہوگئی۔

حکومت کی جانب سے جاری نوٹیفکیشن کے مطابق پیٹرولیم مصنوعات کی نئی قیمتوں کا اطلاق 12 سے 14 ستمبر تک 3 روز کے لیے ہوگا۔

وفاقی وزیر تجارت جام کمال خان نے ہانگ کانگ کے چیف ایگزیکٹو جان لی کا چیو سے ملاقات کی، جس میں پاکستان اور ہانگ کانگ کے درمیان باہمی تجارت، سرمایہ کاری اور عوامی روابط کے فروغ کے عزم کا اعادہ کیا گیا۔

ملاقات کے دوران دونوں جانب سے خدمات، مالیات، ہوا بازی اور بزنس ٹو بزنس روابط سمیت مختلف شعبوں میں تعاون مزید بڑھانے پر زور دیا گیا۔ہانگ کانگ کے چیف ایگزیکٹو جان لی کا چیو نے علاقائی امن و استحکام کے فروغ میں پاکستان کے کردار کو سراہا۔ اس موقع پر کیتھے پیسیفک کی پاکستان کے لیے پروازیں بحال کرنے کی تجویز بھی پیش کی گئی۔ملاقات میں کہا گیا کہ پاکستان اور ہانگ کانگ کے درمیان بہتر فضائی روابط سے تجارت، سیاحت اور کاروباری سرگرمیوں کو فروغ دینے میں مدد ملے گی۔وفاقی وزیر تجارت جام کمال خان نے ہانگ کانگ کے چیف ایگزیکٹو کو دورۂ پاکستان کی دعوت بھی دی۔

اسلام آباد: وفاقی حکومت نے پٹرولیم مصنوعات کی قیمتوں میں اضافے کا نوٹیفکیشن جاری کردیا، جس کے تحت پٹرول اور ڈیزل کی قیمتوں میں فی لٹر اضافہ کیا گیا ہے۔

پٹرولیم ڈویژن کی جانب سے جاری نوٹیفکیشن کے مطابق پٹرول کی قیمت میں 3 روپے 5 پیسے فی لٹر جبکہ ڈیزل کی قیمت میں 5 روپے 37 پیسے فی لٹر اضافہ کیا گیا ہے۔

قیمتوں میں اضافے کے بعد پٹرول کی نئی قیمت 370 روپے 80 پیسے فی لٹر مقرر کردی گئی ہے، جبکہ ڈیزل کی نئی قیمت 398 روپے 4 پیسے فی لٹر ہوگئی ہے۔

پٹرولیم ڈویژن کے نوٹیفکیشن کے مطابق پٹرول اور ڈیزل کی نئی قیمتوں کا اطلاق 11 ستمبر 2026 سے ہوگا اور یہ قیمتیں ایک دن کے لیے نافذ رہیں گی۔

واضح رہے کہ گزشتہ روز بھی حکومت کی جانب سے پٹرولیم مصنوعات کی قیمتوں میں اضافہ کیا گیا تھا۔ گزشتہ روز پٹرول کی قیمت میں 3 روپے 40 پیسے جبکہ ڈیزل کی قیمت میں 6 روپے 72 پیسے فی لٹر اضافہ کیا گیا تھا۔

کراچی: پاکستان اسٹاک مارکیٹ میں مندی کا رجحان برقرار ہے، کاروباری ہفتے کے چوتھے روز بھی شدید دباؤ کے باعث ہنڈرڈ انڈیکس ایک لاکھ 69 ہزار کی حد بھی کھو بیٹھا۔

کاروبار کے دوران پاکستان اسٹاک ایکسچینج میں مندی شدت اختیار کرگئی اور ہنڈرڈ انڈیکس میں ایک ہزار سے زائد پوائنٹس کی کمی ریکارڈ کی گئی، جس کے بعد انڈیکس ایک لاکھ 70 ہزار 762 پوائنٹس کی سطح پر آگیا۔

ٹریڈنگ کے دوران مندی کا سلسلہ جاری رہا اور کاروباری روز کے اختتام پر ہنڈرڈ انڈیکس 3 ہزار 78 پوائنٹس کی نمایاں کمی کے بعد ایک لاکھ 68 ہزار 865 پوائنٹس کی سطح پر بند ہوا۔

واضح رہے کہ گزشتہ کاروباری روز کے اختتام پر بھی پاکستان اسٹاک مارکیٹ میں مندی رہی تھی اور ہنڈرڈ انڈیکس 698 پوائنٹس کی کمی کے بعد ایک لاکھ 71 ہزار 943 پوائنٹس کی سطح پر بند ہوا تھا۔

سیکیورٹیز اینڈ ایکس چینج کمیشن آف پاکستان (ایس ای سی پی) نے ملک میں ریئل اسٹیٹ انویسٹمنٹ ٹرسٹس (REITs) کے فروغ اور شعبے میں سرمایہ کاری کو بڑھانے کے لیے اہم اصلاحات پر مبنی ڈرافٹ تیار کرلیا ہے۔ ایس ای سی پی نے مجوزہ ترامیم پر اسٹیک ہولڈرز سے تجاویز بھی طلب کرلی ہیں تاکہ ریگولیٹری فریم ورک کو مزید مؤثر اور سرمایہ کار دوست بنایا جاسکے۔

مجوزہ اصلاحات کے تحت ریئل اسٹیٹ سے حاصل ہونے والی آمدن اور متعلقہ اثاثوں کی کم از کم حد 75 فیصد سے کم کرکے 65 فیصد کرنے کی تجویز دی گئی ہے۔ اس اقدام کا مقصد REITs کے لیے ریئل اسٹیٹ سے متعلق سرمایہ کاری اور کاروباری سرگرمیوں میں مزید گنجائش پیدا کرنا ہے۔

ڈرافٹ میں اسپانسرز، ڈائریکٹرز اور متعلقہ اداروں سے حاصل کیے جانے والے قرض کی مدت بھی 24 ماہ سے بڑھا کر 36 ماہ کرنے کی تجویز دی گئی ہے۔ اس کے علاوہ ریئل اسٹیٹ اسکیموں کی لسٹنگ کے لیے ایک سال کی اضافی مہلت دینے پر بھی غور کیا جا رہا ہے۔

مجوزہ اصلاحات میں ریئل اسٹیٹ اسکیموں کو ایک سال تک خالی زمین اور پلاٹ رکھنے کی اجازت دینے کی تجویز بھی شامل ہے۔ اسی طرح مخصوص گروپ ٹرسٹس اور ملازمین کے فنڈز کو غیر فہرست شدہ ریئل اسٹیٹ اسکیموں میں سرمایہ کاری کی اجازت دینے کی تجویز زیر غور ہے۔

چیئرمین ایس ای سی پی کے مطابق سرکاری اور ترقیاتی اداروں سے جائیداد کے حصول کے عمل کو مزید آسان بنایا جائے گا۔ ان کا کہنا ہے کہ مجوزہ اصلاحات کے ذریعے ریئل اسٹیٹ کے شعبے میں طویل مدتی سرمایہ کاری کو فروغ دینے کے ساتھ ساتھ مارکیٹ میں شفافیت اور سرمایہ کاروں کا اعتماد بہتر بنانے میں مدد ملے گی۔

واضح رہے کہ ملک میں سست روی کا شکار ریئل اسٹیٹ سیکٹر اور محدود گہرائی رکھنے والی کیپٹل مارکیٹ کو متحرک کرنے کے لیے حکومت نے ریئل اسٹیٹ انویسٹمنٹ ٹرسٹس (REITs) کو ایک اہم ذریعہ بنانے کا فیصلہ کیا ہے۔ مجوزہ ریگولیٹری اصلاحات کو اسی پالیسی کا حصہ قرار دیا جا رہا ہے، جن کا مقصد سرمایہ کاری کے نئے مواقع پیدا کرنا اور ریئل اسٹیٹ مارکیٹ کو زیادہ منظم اور شفاف بنانا ہے۔