Category: کاروبار

ایکسپورٹرز کی جانچ پڑتال کے معاملے پر پاکستان ریٹیل بزنس کونسل نے وزیراعظم کو خط لکھ دیا۔ کاپی وزیر خزانہ، چیئرمین ایف بی آر اور دیگر اعلیٰ حکام کو ارسال کردی گئی۔

برآمدکنندگان کی جانچ پڑتال پر پاکستان ریٹیل بزنس کونسل نے شدید تحفظات کا اظہار کردیا۔ خط میں کہا گیا ہے کہ ایف بی آر کی نئی ہدایات سے برآمدی شعبے میں بے چینی بڑھ رہی ہے، ٹیکس نظام میں تبدیلی کے بعد ایکسپورٹرز کی اضافی اسکروٹنی کاروباری اعتماد کیلئے خطرہ ہے۔ریٹیل بزنس کونسل نے مزید کہا کہ مہنگی بجلی، بلند شرح سود کے بعد سخت نگرانی برآمدات کیلئے نقصاندہ ہے، موجودہ اقدامات سے برآمدی سرگرمیاں تجارتی طور پر ناقابل عمل ہو رہی ہیں، برآمد کنندگان کو ہراساں کرنے کے بجائے سہولت فراہم کی جائے۔خط میں یہ بھی کہا گیا ہے کہ پالیسیوں کے باعث برآمد کنندگان کاروبار بند کرنے پر مجبور ہوسکتے ہیں۔ ریٹیل بزنس کونسل نے وزیراعظم سے فوری مداخلت اور واضح پالیسی گائیڈ لائنز کا مطالبہ کردیا۔

وفاقی وزیر خزانہ محمد اورنگزیب نے کہا ہے کہ پاکستان کی نوجوان آبادی ملک کی سب سے بڑی معاشی قوت بن سکتی ہے، بشرطیکہ اسے درست سمت، جدید ہنر اور مواقع فراہم کیے جائیں۔حکومت نوجوانوں کو بااختیار بنانے کے لیے ہنرمندی کی تربیت، تعلیم اور روزگار کے مواقع پر خصوصی توجہ دے رہی ہے۔

اسلام آباد میں ایک اہم تقریب سے خطاب کرتے ہوئے وزیر خزانہ نے کہا کہ پاکستان کی مجموعی آبادی کا بڑا حصہ نوجوانوں پر مشتمل ہے، جو اگر معیشت میں مؤثر طور پر شامل ہو جائے تو ملک تیزی سے ترقی کی راہ پر گامزن ہو سکتا ہے۔ ان کا کہنا تھا کہ نوجوانوں کی صلاحیتوں کو بروئے کار لانا حکومت کی معاشی حکمتِ عملی کا بنیادی ستون ہے.ہمارا اصل مسئلہ پالیسی سازی نہیں بلکہ نتائج کے حوالے سے نظم و ضبط اور عملدرآمد کی کمی ہے۔ انہوں نے کہا کہ پاکستان 24 کروڑ آبادی پر مشتمل ایک بڑی قوم ہے، جس کی سالانہ آبادی میں شرح نمو 2.5 فیصد ہے۔ ایسی صورتحال میں غربت کے خاتمے اور معاشی استحکام کے لیے پائیدار اور دیرپا معاشی بہتری کی جانب بڑھنا ناگزیر ہے۔

وفاقی وزیر خزانہ کا کہنا تھا کہ پاکستان اس وقت ایک اہم معاشی موڑ پر کھڑا ہے، جہاں درست فیصلے اور مؤثر اقدامات مستقبل کی سمت کا تعین کریں گے۔ انہوں نے کہا کہ حکومت کی کوشش ہے کہ معیشت کو محض وقتی سہارا دینے کے بجائے مضبوط بنیادوں پر استوار کیا جائے تاکہ ترقی کے ثمرات عام آدمی تک پہنچ سکیں۔ وزیر خزانہ نے سوشل امپیکٹ فنانسنگ فریم ورک پر روشنی ڈالتے ہوئے کہا کہ اس فریم ورک کا مقصد پاکستان میں سماجی شعبے میں سرمایہ کاری کو منظم اور مؤثر بنانا ہے۔ انہوں نے واضح کیا کہ یہ فریم ورک محض ایک پالیسی بیان نہیں بلکہ ایک مکمل مالیاتی ڈھانچہ ہے، جس کے ذریعے نتائج پر مبنی سرمایہ کاری کو فروغ دیا جائے گا۔

محمد اورنگزیب نے بتایا کہ پی ایس آئی بی میں خاص طور پر نوجوان خواتین کو مرکزِ توجہ بنایا گیا ہے، تاکہ انہیں معاشی طور پر خودمختار بنایا جا سکے۔ انہوں نے نیوٹیک (NAVTTC) اور ابتدائی اسٹیئر کوڈیل ٹیم کو اس تاریخی اجراء پر مبارکباد دیتے ہوئے کہا کہ یہ اقدام سماجی اور معاشی ترقی کی سمت ایک اہم قدم ہے، آئندہ مراحل میں حکومت مزید نتائج پر مبنی فنڈنگ کی جانب بڑھے گی اور پبلک پرائیویٹ پارٹنرشپ ماڈل کو فروغ دیا جائے گا۔ ان کا کہنا تھا کہ نجی شعبے کے تعاون سے نہ صرف وسائل میں اضافہ ہوگا بلکہ کارکردگی اور شفافیت بھی بہتر ہو گی۔ حکومت نوجوانوں کو قومی ترقی کا حقیقی شراکت دار بنانے کے لیے ہر ممکن اقدامات کرے گی، تاکہ پاکستان کو ایک مضبوط، مستحکم اور خوشحال معیشت کی طرف لے جایا جا سکے۔

اسلام آباد: پاکستان کے زرمبادلہ کے ذخائر تاریخ کی بلند ترین سطح پر پہنچ گئے ہیں جبکہ بین الاقوامی ریٹنگ اور تحقیقی اداروں نے بھی پاکستانی معیشت میں نمایاں بہتری کی تصدیق کر دی ہے۔

عالمی سطح پر معتبر سمجھی جانے والی ریٹنگ ایجنسیوں گیلپ اور ڈی اینڈ بی نے اپنی تازہ رپورٹس میں پاکستان کی معاشی سمت کو مثبت قرار دیتے ہوئے صارفین کے اعتماد میں واضح اضافے کا اعتراف کیا ہے۔بین الاقوامی ریٹنگ ایجنسیوں کے مطابق پاکستان میں صارفین کے اعتماد میں 19 فیصد اضافہ ریکارڈ کیا گیا ہے، جو معیشت میں استحکام اور اصلاحاتی اقدامات پر عوام اور کاروباری طبقے کے بڑھتے ہوئے اعتماد کا مظہر ہے۔ ماہرین کے مطابق صارفین کے اعتماد میں یہ اضافہ معاشی سرگرمیوں میں بہتری اور سرمایہ کاری کے لیے سازگار ماحول کی نشاندہی کرتا ہے۔

رپورٹ کے مطابق مارچ 2022 کے بعد پاکستان کے زرمبادلہ کے ذخائر بڑھ کر 21.1 ارب ڈالر تک پہنچ گئے ہیں، جو گزشتہ چند برسوں کے مقابلے میں ایک نمایاں پیش رفت سمجھی جا رہی ہے۔ معاشی ماہرین کا کہنا ہے کہ زرمبادلہ کے ذخائر میں یہ اضافہ بیرونی ادائیگیوں کے دباؤ میں کمی، کرنٹ اکاؤنٹ کی بہتری اور مالی نظم و ضبط کا نتیجہ ہے۔ذرائع کے مطابق اس مثبت تبدیلی میں ایس آئی ایف سی کی مؤثر سہولت کاری، معاونت اور مربوط کاوشوں نے کلیدی کردار ادا کیا ہے۔ ایس آئی ایف سی کی جانب سے سرمایہ کاری کے فروغ، پالیسی ہم آہنگی اور تیز رفتار فیصلوں کے باعث مالی عدم تحفظ میں نمایاں کمی آئی ہے، جس سے ملکی اور غیر ملکی سرمایہ کاروں کا اعتماد بحال ہوا ہے۔معاشی اصلاحات کے نتیجے میں معیشت پر سرمایہ کاروں کا اعتماد پہلے کے مقابلے میں کہیں زیادہ مضبوط ہوا ہے۔ صنعتی شعبے، خدمات اور برآمدات میں بہتری کے آثار نمایاں ہو رہے ہیں جبکہ مالی نظم و ضبط اور اصلاحاتی اقدامات کے باعث معیشت بتدریج استحکام کی جانب گامزن ہے۔

معروف ماہرِ معیشت خاقان نجیب کے مطابق پاکستان نے 28 سے 30 ماہ کے عرصے میں میکرواکنامک استحکام کا اہم سفر طے کیا ہے۔ ان کا کہنا ہے کہ پاکستان نے بیرونی اکاؤنٹ میں غیر ضروری دباؤ کو کم کرتے ہوئے درآمدات کے بے قابو اضافے کو روکا اور کرنٹ اکاؤنٹ میں سرپلس حاصل کرنے میں کامیابی حاصل کی، جو معیشت کے لیے ایک حوصلہ افزا پیش رفت ہے۔ماہرِ معیشت اشفاق تولہ کا کہنا ہے کہ صارفین کے اعتماد میں اضافہ حکومت اور ایس آئی ایف سی کے ٹھوس اور بروقت اقدامات کا نتیجہ ہے۔ ان کے مطابق پالیسی تسلسل، مالیاتی نظم و ضبط اور اصلاحات نے عوام اور کاروباری طبقے کو یہ یقین دلایا ہے کہ معیشت درست سمت میں آگے بڑھ رہی ہے۔

ملکی معیشت میں ایک اور سنگ میل،پاکستان کے زرمبادلہ کے ذخائر مارچ 2022 کے بعد بلند ترین سطح پر پہنچ گئے

تاریخی بلندی پر موجود ملکی زرمبادلہ کے ذخائر پائیدار ترقی اور ملکی قیادت پر سرمایہ کاروں کے بھر پور اعتماد کا مظہر ہیں، تازہ اعداد و شمار کے مطابق مارچ 2022کے بعد پاکستان کے مجموعی زرمبادلہ ذخائر 21.1 ارب ڈالر تک پہنچ چکے ہیں،اسٹیٹ بینک آف پاکستان کے پاس موجود زرمبادلہ کے ذخائر 15.9 ارب ڈالر ریکارڈ کیے گئے ہیں، ملک کی درآمدی صلاحیت 2.6 ماہ سے تجاوز کر گئی ہے جو فروری 2023 میں صرف 2 ہفتوں سے بھی کم رہ گئی تھی

معاشی ماہرین کے مطابق؛ ذخائر میں اضافہ قرضوں کی بجائے مقامی ترقی و اعتماد کی وجہ سے ہے، اعداد و شمار کے مطابق بیرونی قرضہ بمقابلہ جی ڈی پی تناسب 31 فیصد سے کم ہو کر 26 فیصد تک آ گیا ہے،بیرونی قرضوں کے حصول میں بتدریج کمی مالی نظم و ضبط اور اصلاحاتی اقدامات کی عکاسی کرتا ہے،ملکی زرمبادلہ کے ذخائر محض وقتی انتظامات کے تحت نہیں بڑھے بلکہ یہ ایک واضح بحالی کا نتیجہ ہیں،مرکزی بینک کے 2023 میں جہاں ذخائر صرف 2.9 ارب ڈالر کی سطح پر آ گئے تھے، وہیں اب یہ بڑھ کر تقریباً 15.9 ارب ڈالر تک پہنچ چکے ہیں،2023 کے مقابلے میں ملکی زخائر میں تقریباً ساڑھے 5 گنا اضافہ ریکارڈ کیا گیا ہے، فارورڈ فارن ایکسچینج واجبات میں بھی تقریباً 65 فیصد کمی کی گئی ہے، جس سے مستقبل کے دباؤ میں نمایاں کمی آئی ہے، 2015 سے 2022 کے دوران پاکستان میں قرضوں میں مسلسل اضافہ جبکہ زرمبادلہ کے ذخائر میں کمی دیکھنے میں آئی، تاہم 2022 کے بعد صورتحال تبدیل ہوئی ہے، قرضہ بمقابلہ جی ڈی پی کے تناسب میں کمی اور ذخائر میں تیزی سے اضافہ ریکارڈ کیا گیا ہے

ماہرین کے مطابق یہ پیش رفت کئی اہم اشارے دیتی ہے، ان اشاریوں میں بیرونی معاشی کمزوری میں کمی، مضبوط ذخائر، کاروباری طبقے کے اعتماد میں اضافہ اور معاشی استحکام شامل ہیں،معاشی ماہرین کا کہنا ہے کہ پاکستان کے زرمبادلہ ذخائر میں حالیہ اضافہ محض عددی بہتری نہیں بلکہ ایک معیاری تبدیلی کی علامت ہے، پاکستان ملکی استحکام سے قرضوں پر مبنی وقتی بقا کی پالیسی سے نکل کر پائیدار بیرونی معاشی استحکام کی جانب بڑھ رہا ہے،