Category: کاروبار

‎ملک بھر میں سونے کی قیمت ایک بار پھر بلند ہو گئی ہے اور آج بھی فی تولہ سونے کی قیمت میں سینکڑوں سے ہزاروں روپے کا اضافہ ریکارڈ کیا گیا ہے۔
‎بین الاقوامی مارکیٹس میں سونے کی قیمتوں میں اضافے کے اثرات پاکستان میں بھی دیکھے گئے ہیں، جہاں فی تولہ سونے کی قیمت میں 3 ہزار 700 روپے کا اضافہ ہوا اور نئی قیمت 4 لاکھ 73 ہزار 262 روپے تک جا پہنچی۔ اسی طرح 10 گرام سونا 3 ہزار 172 روپے مہنگا ہو کر 4 لاکھ 5 ہزار 745 روپے ہو گیا۔
‎عالمی مارکیٹ میں فی اونس سونے کی قیمت 37 ڈالر کے اضافے کے بعد 4 ہزار 509 ڈالر پر پہنچ گئی۔ پاکستان میں چاندی کی قیمت میں بھی اضافہ دیکھا گیا، جہاں فی تولہ چاندی کی قیمت 270 روپے بڑھ کر 8 ہزار 465 روپے تک جا پہنچی۔
‎ماہرین کا کہنا ہے کہ عالمی معاشی صورتحال اور سرمایہ کاروں کی سونے میں بڑھتی دلچسپی کے باعث قیمتوں میں اتار چڑھاؤ کا سلسلہ جاری رہنے کا امکان ہے۔ یاد رہے کہ سونا روایتی طور پر محفوظ سرمایہ کاری سمجھا جاتا ہے اور افراط زر یا سیاسی و معاشی عدم استحکام کے اوقات میں اس کی قیمت میں اضافہ ہو جاتا ہے۔ صدیوں سے سرمایہ کار غیر یقینی صورتحال میں سونا خرید کر اپنے اثاثوں کو محفوظ رکھتے آئے ہیں۔
‎گذشتہ برس پاکستان میں سونے کی قیمت کے تعین کے طریقہ کار میں بھی تبدیلی کی گئی تھی، جس کے تحت سونے کی قیمت انٹرنیشنل مارکیٹ ریٹ سے 20 ڈالر فی اونس زیادہ مقرر کی گئی۔


وفاقی آئینی عدالت نے نجی اداروں کے ملازمین کے حق میں اہم فیصلہ سناتے ہوئے تمام درخواست گزاروں کو ماہانہ اولڈ ایج پنشن دینے کا حکم جاری کیا ہے۔ عدالت نے ای او بی آئی کی جانب سے دائر تمام اپیلیں خارج کرتے ہوئے لاہور ہائیکورٹ کے 2024 اور 2025 کے فیصلے برقرار رکھے۔
فیصلے کے مطابق وہ ملازمین جنہوں نے 15 سال سے کم مگر ساڑھے 14 سال سروس مکمل کی ہے، وہ بھی اولڈ ایج پنشن کے حقدار ہوں گے۔ عدالت نے واضح کیا کہ سروس کے 6 ماہ یا اس سے زائد عرصے کو پورا ایک سال تصور کیا جائے گا اور پنشن کے معاملے میں راؤنڈنگ آف کا اصول لاگو ہوگا۔
‎آئینی عدالت کے چیف جسٹس امین الدین خان کی سربراہی میں تین رکنی بینچ نے یہ فیصلہ جاری کیا۔ عدالت نے کہا کہ 2022 کا ای او بی آئی سرکلر پنشن کے حق کو متاثر نہیں کر سکتا اور ساڑھے 14 سال سے زائد سروس مکمل کرنے والے ملازمین کو 15 سال مکمل سروس کے برابر تصور کیا جائے گا۔

پاکستان اسٹاک ایکسچینج (پی ایس ایکس) میں تیزی کا رجحان برقرار ہے اور کاروبار کے دوران 100 انڈیکس نے ایک اور تاریخی ریکارڈ قائم کر دیا ہے۔

تفصیلات کے مطابق کاروباری ہفتے کے آغاز سے ہی مارکیٹ میں زبردست تیزی دیکھنے میں آئی، جس کے نتیجے میں پی ایس ایکس 100 انڈیکس پہلی بار ایک لاکھ 87 ہزار پوائنٹس کی نفسیاتی حد عبور کر گیا۔ سرمایہ کاروں کے بھرپور اعتماد اور خریداری کے دباؤ کے باعث مارکیٹ میں مثبت ماحول غالب رہا،کاروبار کے دوران کچھ دیر پہلے 100 انڈیکس میں 1 ہزار 700 پوائنٹس سے زائد کا اضافہ ریکارڈ کیا گیا، جس کے بعد انڈیکس 1 لاکھ 86 ہزار 765 پوائنٹس کی سطح پر دیکھا گیا۔ مارکیٹ میں تیزی کے باعث مختلف شعبوں بالخصوص بینکنگ، توانائی، سیمنٹ اور آٹو سیکٹر کے حصص میں نمایاں اضافہ ہوا،ماہرین کے مطابق حالیہ تیزی کی اہم وجوہات میں معاشی اشاریوں میں بہتری، شرح سود سے متعلق مثبت توقعات، زرمبادلہ کے ذخائر میں استحکام اور غیر ملکی سرمایہ کاروں کی دلچسپی شامل ہیں۔ ان عوامل نے سرمایہ کاروں کے اعتماد کو مزید مضبوط کیا ہے۔

واضح رہے کہ گزشتہ روز بھی پاکستان اسٹاک ایکسچینج میں شاندار تیزی دیکھنے میں آئی تھی اور 100 انڈیکس 2 ہزار 653 پوائنٹس اضافے کے ساتھ ایک لاکھ 85 ہزار 62 پوائنٹس پر بند ہوا تھا۔ مسلسل دوسرے روز بھی ریکارڈ سطحیں قائم ہونے سے مارکیٹ میں تیزی کا تسلسل ظاہر ہو رہا ہے،تجزیہ کاروں کا کہنا ہے کہ اگر موجودہ معاشی اور مالیاتی حالات میں مثبت پیش رفت جاری رہی تو آنے والے دنوں میں بھی اسٹاک مارکیٹ میں تیزی کا رجحان برقرار رہنے کا امکان ہے، تاہم سرمایہ کاروں کو محتاط حکمت عملی اپنانے کا مشورہ دیا جا رہا ہے

سال 2026 کے پہلے ہی کاروباری روز پاکستان اسٹاک ایکسچینج (پی ایس ایکس) میں غیر معمولی تیزی دیکھنے میں آ رہی ہے، جس سے سرمایہ کاروں میں بھرپور اعتماد اور جوش و خروش پایا جاتا ہے۔

کاروبار کے آغاز سے ہی پی ایس ایکس 100 انڈیکس میں مثبت رجحان غالب رہا اور ابتدائی گھنٹوں میں ہی انڈیکس تیزی سے اوپر کی جانب بڑھتا دکھائی دیا۔ ایک موقع پر 100 انڈیکس میں 1954 پوائنٹس کا نمایاں اضافہ ریکارڈ کیا گیا، جس کے بعد انڈیکس ایک لاکھ 76 ہزار کی اہم نفسیاتی حد عبور کر گیا۔تازہ ترین اعداد و شمار کے مطابق پاکستان اسٹاک ایکسچینج کا 100 انڈیکس 1954 پوائنٹس اضافے کے ساتھ 176,008 پوائنٹس پر ٹریڈ کر رہا ہے۔ مارکیٹ میں اس نمایاں تیزی کو معاشی استحکام کی امیدوں، سرمایہ کاروں کے بڑھتے ہوئے اعتماد اور نئے سال میں بہتر کاروباری توقعات سے جوڑا جا رہا ہے۔

واضح رہے کہ گزشتہ روز بھی پی ایس ایکس 100 انڈیکس نے شاندار کارکردگی کا مظاہرہ کرتے ہوئے ایک لاکھ 75 ہزار کی نفسیاتی حد عبور کی تھی، جس کے بعد آج مزید تیزی نے مارکیٹ کو نئی بلندیوں تک پہنچا دیا ہے۔ماہرین کا کہنا ہے کہ اگر یہی مثبت رجحان برقرار رہا تو آنے والے دنوں میں اسٹاک مارکیٹ مزید ریکارڈ سطحیں قائم کر سکتی ہے، جب کہ سرمایہ کار محتاط مگر پُرامید نظر آ رہے ہیں۔