Category: کرونا اپڈیٹس

واشنگٹن :کرونا وائرس امریکیوں کےلیے ایک طرف زحمت تو دوسری طرف جرائم میں کمی ہوگئی ،اطلاعات کےمطابق دنیا بھر میں پھیلی ہوئی کورونا وائرس کی وبا کے باعث جہاں دنیا کے کئی ممالک میں ماحولیاتی آلودگی میں واضح کمی دیکھی گئی ہے۔

وہیں کورونا وائرس کے باعث دنیا کی نصف آبادی کے گھروں تک محدود رہنے کی وجہ سے دنیا بھر میں جرائم اور مسائل میں بھی نمایاں کمی دیکھی جا رہی ہے۔تاہم ساتھ ہی کورونا وائرس کے باعث لاک ڈاؤن نافذ کیے جانے کی وجہ سے گھریلو تشدد کی شکایات میں اضافہ دیکھا جا رہا ہے، وہیں دنیا بھر میں بےروزگاری میں بھی اضافے ہوا ہے۔

اسی طرح دنیا کے کئی ممالک میں قتل، تشدد اور جنسی جرائم میں بھی نمایاں کمی ہوئی ہے اور ایسے ممالک میں امریکا جیسے ممالک بھی شامل ہیں۔حیران کن طور پر امریکا کی متعدد ریاستوں اور جرائم کے حوالے سے خطرناک شہروں میں شمار ہونے والے شہروں میں بھی جرائم میں نمایاں دیکھی جا رہی ہے۔ایسے شہروں میں امریکی ریاست فلوریڈا کا شہر میامی بھی شامل ہے، جہاں 63 سال میں پہلی بار 7 ہفتوں تک کوئی قتل نہیں ہوا۔

جی ہاں، فلوریڈا میں 63 سال بعد پہلی بار تقریبا 2 ماہ میں کسی قتل کی رپورٹ نہیں درج نہیں ہوئی۔امریکی نشریاتی ادارے سی بی ایس کے مطابق میامی پولیس نے تصدیق کی ہے کہ 1957 کے بعد پہلی بار شہر میں کوئی بھی قتل نہیں ہوا۔

میامی پولیس کے مطابق کورونا وائرس کی وجہ سے لوگوں کے گھروں میں محدود رہنے کے باعث شہر میں قتل سمیت دیگر جرائم میں نمایاں دیکھی گئی ہے اور حیران کن طور پر میامی شہر کی 63 سالہ تاریخ میں پہلی بار 7 ہفتوں اور 6 دن تک کسی بھی قتل کی رپورٹ درج نہیں ہوئی۔

پولیس کے مطابق اس سے قبل 1960 میں بھی میامی شہر میں 6 ہفتوں اور 5 دن تک کسی بھی قتل کا واقعہ پیش نہیں آیا تھا اور اس سے قبل 1957 میں شہر میں 9 ہفتوں اور 3 دن تک قتل کا کوئی واقعہ پیش نہیں آیا تھا۔

میامی میں 1957 کے بعد کوئی بھی ایسا دور نہیں گزرا جو 7 ہفتوں میں کسی شخص کو قتل نہ کیا گیا ہو، البتہ 1960 میں ایک ایسا وقت بھی آیا تھا جو شہر میں 6 ہفتوں اور 5 دن تک کسی کو قتل نہیں کیا گیا تھا لیکن ساتویں ہفتے کے آغاز سے قبل ہی وہاں قتل کی واردات پیش آئی تھی۔

میامی پولیس کے مطابق اگرچہ شہر میں دیگر جرائم میں بھی کمی واقع ہوئی ہے، تاہم پولیس کو شک ہے کہ شہر میں گھریلو تشدد اور بچوں کے استحصال میں کوئی کمی نہیں آئی ہوگی بلکہ عین ممکن ہے کہ اس میں اضافہ ہوا ہو لیکن ڈر کی وجہ سے ایسے جرائم کو رپورٹ نہ کیا جا رہا ہو۔سی بی ایس کی رپورٹ کے مطابق کورونا وائرس کے باعث لاک ڈاؤن نافذ کیے جانے سے نہ صرف میامی بلکہ ریاست میری لینڈ کے شہر بالٹی مور سمیت دیگر شہروں میں بھی جرائم میں نمایاں کمی دیکھی گئی ہے۔

بالٹی مور پولیس کے مطابق شہر میں لاک ڈاؤن کے باعث ڈکیتیوں، راہ چلتے ہوئے افراد پر تشدد سمیت چھینا جھپٹی اور دوسروں کو تشدد کا نشانہ بنائے جانے کے واقعات میں کمی ہوئی ہے۔بالٹی مور پولیس کا کہنا ہے کہ مجموعی طور پر لوگوں کو تشدد کا نشانہ بنائے جانے کے واقعات میں 34 فیصد کمی ہوئی ہے۔

اسی طرح ریاست کیلی فورنیا کے شہر لاس اینجلس میں بھی جرائم میں نمایاں کمی دیکھی جا رہی ہے، لاس اینجلس کا شمار امریکا کے بہت زیادہ جرائم والے شہروں میں ہوتا، تاہم وہاں بھی لاک ڈاؤن کے دوران قتل کی وارداتوں میں 21 فیصد تک کمی دیکھی جا رہی ہے۔

لاس اینجلس میں بھی راہ چلتے افراد کو تشدد کا نشانہ بنائے جانے سمیت جنسی نوعیت کے جرائم میں بھی کمی دیکھی جا رہی ہے۔ریاست الینوائے کے شہر شکاگو میں بھی یہی صورتحال ہے اور وہاں بھی لاک ڈاؤن کے دوران جرائم میں نمایاں کمی دیکھی جا رہی ہے۔

شکاگو پولیس کے مطابق گزشتہ چند ہفتوں کے دوران شہر بھر میں فائرنگ کے محض 19 کیسز رپورٹ ہوئے جب کہ اتنے ہی عرصے میں گزشتہ سال 45 تک فائرنگ کے واقعات رپورٹ ہوئے تھے اور اس بار رپورٹ ہونے والے واقعات میں کسی بڑے نقصان کی اطلاعات بھی نہیں ملیں۔اسی طرح شکاگو میں بھی نہ صرف فائرنگ بلکہ تشدد اور ڈکیتیوں میں بھی نمایاں کمی دیکھی جا رہی ہے۔

خیال رہے کہ امریکا کی تمام 50 ہی ریاستوں میں کورونا وائرس کی وبا کے باعث مارچ کے آغاز سے جزوی لاک ڈاؤن نافذ ہے، تاہم وہاں کئی ریاستوں میں اب لوگ لاک ڈاؤن کو ختم کرنے کے لیے مظاہرے بھی کر رہے ہیں۔

امریکا کورونا وائرس کے حوالے سے اس وقت دنیا کا سب بڑا متاثرہ ملک ہے جہاں 26 اپریل کی شام تک کورونا کے مریضوں کی تعداد بڑھ کر ساڑھے 9 لاکھ تک جا پہنچی تھی جب کہ وہاں ہلاکتوں کی تعداد بھی بڑھ کر 54 ہزار کے قریب ہو چکی تھی۔

دسمبر 2019 میں چین کے شہر ووہان سے شروع ہونے والی کورونا وائرس با سے 26 اپریل کی شام تک دنیا بھر میں متاثرہ افراد کی تعداد بڑھ کر 29 لاکھ سے زائد ہو چکی تھی جب کہ اس سے ہلاکتوں کی تعداد بڑھ کر 2 لاکھ 3 ہزار سے زائد ہو چکی تھی۔

بیجنگ : ووہان کے ہسپتالوں میں کورونا کے تمام مریض صحتیاب ، وہی طریقہ علاج پاکستان میں اپنایا جانے لگا،اطلاعات کے مطابق چین کے شہر ووہان سے نئے نووول کورونا وائرس کی وبا دسمبر میں پھیلنا شروع ہوئی جو اب دنیا کے لگ بھگ ہر ملک تک پہنچ چکی ہے۔

دنیا بھر میں اب تک 29 لاکھ کے قریب کیسز کی تصدیق ہوچکی ہے جبکہ 2 لاکھ 3 ہزار سے زائد ہلاکتیں ہوچکی ہیں۔مگر اس وبا کا ابتدائی مرکز یعنی ووہان اب کورونا وائرس سے ہونے والی بیماری کووڈ 19 کو مکمل طور پر شکست دینے میں کامیاب ہوگیا ہے۔چین کے نیشنل ہیلتھ کمیشن کے ترجمان نے اتوار کو بتایا کہ ووہان کے ہسپتالوں میں اب کووڈ 19 کا کوئی مریض زیرعلاج نہیں۔

ترجمان می فینگ کا کہنا تھا ‘ 26 اپریل کی تازہ خبر یہ ہے کہ ووہان میں کورونا وائرس کے مریضوں کی تعداد صفر ہوگئی ہے، جس کے لیے ہم ووہان اور چین بھر کے طبی عملے کی مشترکہ کوششوں کے شکرگزار ہیں’۔ووہان میں مجموعی طور پر 46 ہزار 452 کیسز اور 3869 اموات رپورٹ ہوئی تھیں۔

ووہان دنیا کا وہ پہلا شہر تھا جہاں کورونا وائرس کی وجہ سے سب سے پہلے یعنی 23 جنوری 2002 کو انتظامیہ نے لاک ڈاؤن نافذ کیا تھا۔ابتدائی طور پر چینی حکام نے شہر کو جزوی طور پر بند کیا تھا تاہم بعد ازاں وائرس کے تیزی سے پھیلنے کی وجہ سے شہر کو مکمل طور پر لاک ڈاؤن کیا گیا تھا۔

یہ سخت ترین لاک ڈائون تھا جس کے ذریعے چینی حکام 2 ماہ کے عرصے میں اس وبا پر قابو پانے میں کامیاب ہوگئے تھے اور 19 مارچ وہ دن تھا جب پہلی بار وہاں کوئی نیا کیس رپورٹ نہیں ہوا۔اس کے بعد لگاتار کئی دن کوئی کیس رپورٹ نہ ہونے پر 22 مارچ کو لاک ڈائون کو نرم کیا گیا۔چین میں مجموعی طور پر 83 ہزار 909 کیسز اب تک سامنے آچکے ہیں، 4634 ہلاکتیں اور 78 یزار 185 صحتیاب ہوچکے ہیں، یعنی اس وقت وہاں صرف 1088 کیس ایکٹیو ہیں، جن میں سے کوئی بھی ووہان سے تعلق نہیں رکھتا۔

مارچ کے آخری ہفتے میں چین میں معمولات زندگی بحال ہونا شروع ہوئی تھیں اور اب وہاں جزوی طور پر تفریحی و عوامی مقامات کو کھولا جا چکا ہے جب کہ فضائی آپریشن بحال کرنے سمیت ٹرانسپورٹ کو بھی چلانے کی اجازت دی جا چکی ہے۔7 اپریل کو چین میں اس وبا کے دوران پہلی بار کورونا وائرس سے کوئی ہلاکت نہیں ہوئی اور اگلے دن یعنی 8 اپریل کو ووہان میں لاک ڈائون کو مکمل طور پر ختم کردیا گیا۔

اسی طرح چین میں مسلسل 11 دن سے اب تک اس بیماری کے نتیجے میں کوئی ہلاکت نہیں ہوئی جبکہ اتوار کو صرف 11 دن کیسز سامنے آئے ہیں، جن میں سے 5 بیرون ملک سے آنے والے افراد ہیں، جبکہ دیگر 6 کیسز مقامی ٹرانسمیشن کا نتیجہ ہیں جو شمال مغربی اور جنوبی چین میں رپورٹ ہوئے۔

مقبوضہ بیت المقدس :ویرانی اوردکھ کےسائے میں مسجد اقصیٰ اورالقدس میں ماہ صیام کا پہلا جمعہ،اطلاعات کے مطابق فلسطین میں اس بار ماہ صیام ایک ایسے وقت میں سایہ فگن ہوا ہے جب دوسری طرف عالمی وبا کرنا نے فلسطین کو بھی لپیٹ میں لے رکھا ہے۔

کل 23 اپریل کا جمعۃ المبارک فلسطین میں ماہ صیام کا پہلا جمعہ تھا۔ اس جمعہ کے موقعے پر نہ صرف فلسطین کی دیگر مساجد نمازیوں سے محروم رہیں وہیں مسجد اقصیٰ میں بھی نماز نہ ہوسکی۔ مسجد اقصیٰ میں جہاں ماہ صیام کے جمعہ کے موقعے پر ہزاروں فلسطینی نماز کی ادائی کے لیے آتے تھے چند ایک افراد کے سوا کوئی نہیں تھا۔

گذشتہ روز ماہ صیام کے پہلے جمعہ کے موقعے پر مسجد اقصیٰ میں نماز جمعہ سے محروم رہنے والے فلسطینیوں کے پاس قبلہ اول سے عشق عقیدت کے اظہار کا اور کوئی ذریعہ نہیں تھا۔ القدس اور دوسرے علاقوں کے فلسطینیوں کی طرف سے واٹس اپ، فیس بک اور سماجی رابطوں کی دوسری سائٹوں کے ذریعے یہ سوال گردش کرتے رہے کہ مسجد اقصیٰ کا حال کیا ہے۔ وہاں پرنماز جمعہ ہوسکی یا نہیں۔

خیال رہے کہ ماہ صیام آتے ہی فلسطینیوں میں نماز جمعہ کی ادائی، شب بیداری اور مسجد میں قیام اللیل جیسے نیک کام میں فسلطینیوں میں مقابلے کی کیفیت دیکھی جاتی ہے۔ مگر اس بار مسجد اقصیٰ نمازی تو نہیں البتہ غم اور صدمے کی کیفیت ضرور ہے۔

اسرائیلی ریاست بھی ہرسال فلسطینیوں کو مسجد اقصیٰ تک رسائی سے روکنے اورانہیں وہاں پرعبادت سے محروم کرنے کے لیے کوئی کسر باقی نہیں چھوڑتی مگر فلسطینی روزہ دار تمام تر مشکلات، رکاوٹوں اور پابندیوں کو توڑ کر قبلہ اول میں پہنچنے اور نمازیں ادا کرنے کی کوشش کرتے ہیں۔ اس بار فلسطینیوں اور قابض اسرائیلی فوج کے درمیان یہ رسا کشی اس لیے نہیں کہ کرونا کی وجہ سے مسجد اقصیٰ میں نماز جمعہ کی ادائی مشکل ہوگئی ہے۔ فلسطینی محکمہ اوقاف کی طرف سے شہریوں سے کہا گیا ہے کہ وہ کرونا کی وبا پھیلنے سے روکنے کے لیے اپنے گھروں میں رہیں اور نمازیں گھروں میں ادا کریں۔