Category: جرائم و حادثات

اوچ شریف (نامہ نگار حبیب خان) اوچ شریف میں سرکاری جنگلات کی لوٹ مار کا انکشاف ہوا ہے۔ ہیڈ پنجند سے نکلنے والی عباسیہ کینال پر قیمتی درختوں کی غیر قانونی کٹائی جاری ہے، جس میں بلاک آفیسر کی مبینہ ملی بھگت کا الزام لگایا جا رہا ہے۔ پولیس نے کارروائی کرتے ہوئے تین لکڑی چوروں کو گرفتار کر لیا ہے، جبکہ چھ ٹریکٹر ٹرالیوں پر لکڑی لوڈ کر کے چور فرار ہونے میں کامیاب ہو گئے۔

تھانہ صدر علی پور کے ایس ایچ او حسنین اسلم نے پولیس نفری کے ہمراہ رات گئے نہر کنارے چھاپہ مارا، جہاں بڑی تعداد میں شیشم اور دیگر قیمتی درخت کٹے ہوئے تھے۔ پولیس کو دیکھ کر ملزمان فرار ہو گئے، تاہم تین ملزمان کو گرفتار کر لیا گیا۔ گرفتار ملزمان سے ڈھائی لاکھ روپے سے زائد مالیت کی چوری شدہ لکڑی، ایک لوڈر رکشہ اور آرا مشین برآمد ہوئی۔

ملزمان نے دوران تفتیش اپنے دیگر ساتھیوں کے نام بھی اگل دیے۔ پولیس کے مطابق، بلاک آفیسر روزانہ کی بنیاد پر رات کے وقت لکڑی چوروں سے سرکاری درختوں کی غیر قانونی کٹائی کرواتا ہے۔ پولیس نے محکمہ نہر کو اطلاع دی، لیکن بلاک آفیسر سمیت دیگر افسران نے کارروائی سے انکار کر دیا۔

پولیس تھانہ صدر علی پور نے چوری شدہ لکڑی، آرا مشینیں، کلہاڑے اور رکشہ قبضے میں لے کر مقدمہ درج کر لیا ہے۔ شہریوں نے مطالبہ کیا ہے کہ سرکاری درختوں کی کٹائی میں ملوث افراد اور ان کے سرپرستوں کے خلاف سخت قانونی کارروائی کی جائے۔

اوچ شریف (نامہ نگار حبیب خان) اوچ شریف اور اس کے گردونواح میں کھوجی کتوں کے ڈاگ سینٹرز کا غیر قانونی کاروبار عروج پر پہنچ گیا ہے۔ ڈاگ سینٹرز کے ایجنٹ شہریوں سے بھاری رقوم بٹور رہے ہیں، جبکہ پولیس بھی اپنی ذمہ داریوں سے جان چھڑانے کے لیے ان غیر مستند کھوجی کتوں پر انحصار کر رہی ہے۔ اس غیر قانونی طریقہ کار کے باعث کئی بے گناہ شہری جیلوں میں بند ہیں اور درجنوں خاندان جھوٹے الزامات کی بھینٹ چڑھ چکے ہیں۔

تفصیلات کے مطابق اوچ شریف کے مختلف علاقوں موضع مانجھی والا، بن والا، بیٹ بختیاری، دھوڑکوٹ، حلیم پور، خیر پور ڈاہا اور دیگر مقامات پر موجود ڈاگ سینٹرز کے مالکان اور ایجنٹ انسانی تذلیل کا بازار گرم کیے ہوئے ہیں۔ کھوجی کتوں کے ذریعے لوگوں کو چوری، ڈکیتی اور دیگر مقدمات میں ملوث کر کے بلیک میل کیا جا رہا ہے۔

چوری کی واردات کے بعد متاثرہ شخص سے ڈاگ سینٹر کے ایجنٹ رابطہ کرتے ہیں اور انہیں اپنی چرب زبانی سے قائل کر لیتے ہیں کہ چوری کا سراغ لگانے کے لیے کھوجی کتے کا استعمال ضروری ہے۔ ایجنٹ بھاری فیس وصول کر کے کھوجی کتے کو مخصوص انداز میں کسی بھی گھر میں داخل کرواتے ہیں اور پھر اسی گھر کے افراد پر چوری کا الزام لگا دیا جاتا ہے۔

یہ بھی انکشاف ہوا ہے کہ کھوجی کتوں کی نشاندہی پر گاؤں کی پنچایتوں میں لوگوں کو قرآن پاک پر حلف اٹھانے پر مجبور کیا جاتا ہے جو کہ ایک غیر شرعی اور غیر قانونی عمل ہے۔ مقامی کھوجی اور ڈاگ سینٹر کے مالکان پہلے سے مخصوص ٹارگٹ طے کر کے کھوجی کتوں کو متعلقہ گھر کی طرف بھیجتے ہیں، جہاں کتے کے بیٹھ جانے پر پولیس کارروائی عمل میں لے آتی ہے اور بے گناہ افراد کو جیل بھیج دیا جاتا ہے۔

ذرائع کے مطابق یہ ڈاگ سینٹرز زیادہ تر اوکاڑہ، بہاولپور، ملتان اور دیگر شہروں میں ریٹائرڈ آرمی افسران یا کسی میجر کے نام پر چلائے جا رہے ہیں۔ ان مراکز کے مالکان اپنے ایجنٹوں کے ذریعے وزیٹنگ کارڈ تقسیم کرتے ہیں اور ایک چوری کا سراغ لگانے کے لیے 15,000 سے 20,000 روپے تک وصول کیے جاتے ہیں۔ اگر دوبارہ کھوجی کتے کو چھوڑنے کی ضرورت پیش آئے تو فیس دُگنی کر دی جاتی ہے۔

ایجنٹوں کے ہاتھوں لٹنے والے کئی متاثرہ شہریوں کا کہنا ہے کہ یہ مافیا پہلے سے ہی ٹارگٹ طے کر کے لوگوں کو بلیک میل کرتا ہے۔ مخصوص الفاظ جیسے "اپنا کام کرو”، "تلاش کرو”، "فائنل کرو” کا استعمال کر کے کتے کو مخصوص گھر میں داخل کرایا جاتا ہے اور الزام اس گھر کے افراد پر ڈال دیا جاتا ہے۔

یہ بھی معلوم ہوا ہے کہ پنجاب کی مختلف جیلوں میں ہزاروں افراد صرف کھوجی کتوں کی غلط نشاندہی کی بنیاد پر قید ہیں۔ اگر کسی چوری یا ڈکیتی کے دوران کوئی ہلاکت ہو جائے تو پولیس تفتیش کرنے کے بجائے فوراً کھوجی کتوں کو طلب کر لیتی ہے اور ان کی غلط نشاندہی پر بے گناہ لوگوں کو قتل جیسے سنگین الزامات میں پھنسا دیا جاتا ہے۔

شہریوں نے حکومت سے مطالبہ کیا ہے کہ وہ ان ڈاگ سینٹرز کے خلاف فوری کارروائی کرے اور پولیس کو واضح ہدایات جاری کرے کہ کھوجی کتوں کی نشاندہی پر کسی بھی قسم کی ایف آئی آر درج نہ کی جائے۔ بصورت دیگر، معصوم لوگ اسی طرح ناکردہ جرم کی سزا بھگتتے رہیں گے اور کئی بے گناہ خاندان دشمنیوں کا شکار ہوتے رہیں گے۔