Category: جرائم و حادثات

نوری آباد،باغی ٹی وی (نامہ نگاراللہ وسایاپالاری) پولیس کی کارروائی، بین الصوبائی گروہ کے 8 ملزمان گرفتار

نوری آباد پولیس نے ایس ایس پی جامشورو ظفر صدیق چھانگا کی ہدایات پر کامیاب کارروائی کرتے ہوئے کراچی سمیت سندھ کے دیگر علاقوں میں لوٹ مار کرنے والے بین الصوبائی گروہ کے 8 ملزمان کو گرفتار کرلیا۔

ایس ایچ او نوری آباد سب انسپکٹر ندیم سولنگی اور افسر لاشاری کی سربراہی میں پولیس ٹیم نے کارروائی کرتے ہوئے ملزمان سے لاکھوں روپے مالیت کے لوٹے ہوئے زیورات، قیمتی سوٹ اور دیگر سامان برآمد کرلیا۔ گرفتار ملزمان میں اسلم پالاری، اصغر پالاری، نظام پالاری، یعقوب پالاری، رانجھو پالاری، نورو پالاری سمیت مزید دو روپوش ملزمان رزاق عرف پیار علی پالاری اور دلاور پالاری شامل ہیں۔

پولیس نے ملزمان کے قبضے سے چار پستول اور ایک موٹرسائیکل بھی برآمد کی ہے۔ ملزمان کے خلاف مختلف اضلاع میں متعدد مقدمات درج ہیں، جن میں کئی وارداتیں شامل ہیں۔ گرفتار ملزمان کے خلاف نوری آباد تھانے میں مزید مقدمات درج کرکے تحقیقات کا آغاز کردیا گیا ہے۔

ٹھٹھہ،باغی ٹی وی (نامہ نگاربلاول سموں)پولیس مقابلے میں زخمی حالت میں ملزم گرفتار،مسروقہ رقم اور اسلحہ برآمد

تفصیل کے مطابق فقیر گوٹھ لنک روڈ پر تھانہ ٹھٹھہ کی حدود میں پولیس اور ملزمان کے درمیان فائرنگ کے تبادلے کے دوران ایک خطرناک ملزم زخمی حالت میں گرفتار کر لیا گیا۔

گرفتار ملزم کی شناخت شبیر ولد جمن سروان رہائشی مکلی کے طور پر ہوئی ہے۔ ابتدائی تفتیش کے مطابق گرفتار ملزم نے گزشتہ رات گھوڑاباڑی اسٹاپ پر مدعی کیمچند سونار سے کیش رقم چھیننے کی واردات کا اعتراف کیا۔

پولیس کے مطابق شبیر ضلع ٹھٹھہ کے مختلف علاقوں میں چوری، ڈکیتی اور موٹرسائیکل چھیننے جیسے متعدد جرائم میں ملوث رہا ہے۔ ملزم کے قبضے سے ایک پسٹل، موٹرسائیکل اور مدعی کی چھینی گئی رقم برآمد کر لی گئی ہے۔

ٹھٹھہ پولیس کا کہنا ہے کہ ملزم کا مکمل کریمنل ریکارڈ چیک کیا جا رہا ہے اور مزید تفتیش جاری ہے۔ جرائم پیشہ افراد کے خلاف کریک ڈاؤن میں یہ ایک اہم کامیابی ہے۔ پولیس نے جرائم پیشہ افراد اور منشیات فروشوں کے خلاف جاری مہم کو مزید تیز کرنے کا اعلان کیا ہے۔