فلپائن میں کشتی ڈوبنے سے 15 افراد ہلاک ہو گئے جبکہ 28 افراد لاپتہ ہیں۔
عالمی میڈیا کے مطابق جنوبی فلپائنی صوبے باسیلان کے قریب حادثہ اس وقت پیش آیا جب ایک مسافر بردار کشتی بندرگاہی شہر زمبوانگا سے جنوبی سولو کے جزیرے جولو جا رہی تھی،فلپائنی کوسٹ گارڈ کے مطابق بحری جہاز 349 افراد سوار تھے جن میں 332 مسافر اور عملے کے 27 ارکان تھے ، کشتی کو حادثہ رات گئے پیش آیا،فلپائنی کوسٹ گارڈ کا کہنا ہے کہ 316 افراد کو بچا لیا گیا ہے جبکہ 28 لاپتہ افراد کی تلاش جاری ہے۔
ڈیرہ غازی خان (باغی ٹی وی/نیوز رپورٹر شاہد خان)ڈیرہ غازی خان شہر کے اندر موٹر سائیکل سواروں پر عائد ہیلمٹ پابندی ختم کرنے کا مطالبہ زور پکڑنے لگا ہے۔ شہریوں کا مؤقف ہے کہ ڈیرہ غازی خان ایک چھوٹا اور محدود رقبے پر مشتمل شہر ہے، جہاں اندرونِ شہر سفر نہایت کم وقت میں مکمل ہو جاتا ہے، اس لیے بڑے شہروں کی طرز پر سخت ہیلمٹ پابندی شہریوں کے لیے غیر ضروری مشکلات کا سبب بن رہی ہے۔
شہریوں کے مطابق ڈیرہ غازی خان شہر کا مجموعی رقبہ تقریباً دو سے اڑھائی کلومیٹر پر محیط ہے، جہاں قادریہ چوک سے گھنٹہ گھر، گھنٹہ گھر سے کلمہ چوک، کلمہ چوک سے گولائی کمیٹی، گولائی کمیٹی سے ٹریفک چوک اور ٹریفک چوک سے لاری اڈا جیسے مصروف روٹس پر سفر عموماً دو سے چار منٹ جبکہ زیادہ سے زیادہ پانچ منٹ میں طے ہو جاتا ہے۔ ایسے مختصر فاصلے اور کم دورانیے کے سفر میں ہیلمٹ پابندی کو شہری غیر عملی قرار دے رہے ہیں۔
عوامی حلقوں کا کہنا ہے کہ ڈیرہ غازی خان کو ملتان یا لاہور جیسے بڑے شہروں کے ساتھ موازنہ کرنا درست نہیں، کیونکہ یہاں کی جغرافیائی ساخت، ٹریفک کا دباؤ اور شہری ضروریات یکسر مختلف ہیں۔ بڑے شہروں میں طویل فاصلے، شدید ٹریفک رش اور حادثات کی شرح زیادہ ہوتی ہے، جبکہ ڈیرہ غازی خان میں اندرونِ شہر ٹریفک کی نوعیت اور فاصلوں کی صورتحال اس کے برعکس ہے۔
شہریوں نے متعلقہ حکام سے مطالبہ کیا ہے کہ ڈیرہ غازی خان شہر کی حدود میں ہیلمٹ پابندی پر نظرثانی کی جائے اور مقامی حالات کو مدنظر رکھتے ہوئے مناسب فیصلہ کیا جائے، تاکہ عوام کو روزمرہ کے مختصر سفروں میں سہولت میسر آ سکے اور غیر ضروری جرمانوں اور مشکلات سے نجات حاصل ہو۔
رینالہ خورد (باغی ٹی وی/نامہ نگار)رینالہ خورد میں جاری ڈرینوں کی تعمیر کے دوران ناقص میٹریل کے استعمال اور بنیادوں (بیڈز) کی غیر معیاری کمپیکشن کے سنگین الزامات سامنے آئے ہیں، جس کے باعث نہ صرف قومی خزانے کو بھاری نقصان پہنچنے کا اندیشہ ہے بلکہ مستقبل میں کروڑوں روپے مالیت کی تجارتی عمارتوں کو بھی شدید خطرات لاحق ہو سکتے ہیں۔
تفصیلات کے مطابق پنجاب کی ضلعی و تحصیل انتظامیہ کی جانب سے شہروں میں بیوٹیفیکیشن منصوبے کے پہلے مرحلے کے تحت بازاروں میں ڈرینوں کی تعمیر کا سلسلہ جاری ہے۔ رینالہ خورد کے مصروف ترین علاقوں صدر بازار، پھاٹک بازار اور گوشت مارکیٹ میں بھی ڈرینوں کی تعمیر جاری ہے۔ تاہم شہریوں اور تاجروں کا کہنا ہے کہ متعلقہ اداروں اور ٹھیکیداروں کی مبینہ ملی بھگت سے ڈرینوں کے بیڈز کی کمپیکشن مناسب طریقے سے نہیں کی جا رہی اور تعمیر میں مبینہ طور پر ناقص میٹریل استعمال کیا جا رہا ہے۔
شہری حلقوں کے مطابق غیر معیاری تعمیر کے باعث ڈرینوں میں بہنے والا سیوریج اور بارشی پانی مستقبل میں ڈرینوں کے کناروں پر واقع دکانوں اور عمارتوں کی بنیادوں کو کمزور کر سکتا ہے، جس سے بڑے مالی نقصانات اور حادثات کا خدشہ بڑھ جائے گا۔ تاجروں کا کہنا ہے کہ اگر بروقت اصلاح نہ کی گئی تو یہ مسئلہ آنے والے وقت میں ایک بڑے بحران کی شکل اختیار کر سکتا ہے۔
تاجروں اور شہریوں نے وزیر اعلیٰ پنجاب مریم نواز شریف، کمشنر ساہیوال، اینٹی کرپشن، ڈپٹی کمشنر اوکاڑہ اور اسسٹنٹ کمشنر رینالہ خورد سے مطالبہ کیا ہے کہ معاملے کی فوری تحقیقات کر کے ذمہ دار عناصر کے خلاف سخت کارروائی کی جائے اور ڈرینوں کی تعمیر کو معیاری اصولوں کے مطابق یقینی بنایا جائے تاکہ شہر اور شہریوں کو ممکنہ نقصانات سے بچایا جا سکے۔
ننکانہ صاحب (باغی ٹی وی/نامہ نگار احسان اللہ ایاز)عوام کے جان و مال کے تحفظ اور فائر سیفٹی اقدامات کو عملی شکل دینے کے لیے ریسکیو 1122 کی جانب سے ننکانہ صاحب لاری اڈا کے قریب واقع رحمت سنٹر میں فائر سیفٹی موک ایکسرسائز کا انعقاد کیا گیا۔ اس موک ایکسرسائز کی قیادت ڈسٹرکٹ ایمرجنسی آفیسر ریسکیو 1122 محمد اکرم پنوار نے کی، جس میں ریسکیو 1122 کے فائر فائٹرز اور ایمرجنسی ٹیموں نے فرضی آتشزدگی کی صورتحال میں بروقت رسپانس، ریسکیو اور فائر فائٹنگ کا بھرپور عملی مظاہرہ کیا۔
ڈپٹی کمشنر ننکانہ صاحب محمد تسلیم اختر راؤ نے موک ایکسرسائز کا معائنہ کیا، ریسکیو 1122 کی کارکردگی کو سراہا اور پیشہ ورانہ ذمہ داریوں کو مزید بہتر انداز میں ادا کرنے پر زور دیا۔ اس موقع پر انہوں نے ہدایات جاری کرتے ہوئے کہا کہ تمام کمرشل عمارتوں، مارکیٹوں اور ہائی رائز بلڈنگز میں فائر سیفٹی آلات کی دستیابی، کلیئر ایگزٹ و انٹری پوائنٹس اور حفاظتی سائن ایج کو ہر صورت یقینی بنایا جائے۔ انہوں نے واضح کیا کہ آگ لگنے کے واقعات کی روک تھام کے لیے مؤثر لائحہ عمل اور حفاظتی انتظامات نا مکمل ہونے کی صورت میں متعلقہ عمارت کو سیل کیا جائے گا۔
ڈپٹی کمشنر نے مزید کہا کہ فائر سیفٹی ضوابط پر کسی قسم کی غفلت برداشت نہیں کی جائے گی اور متعلقہ ادارے باقاعدگی سے فائر ڈرلز اور موک ایکسرسائزز کا انعقاد یقینی بنائیں۔ ان کا کہنا تھا کہ عوامی مقامات پر فائر سیفٹی کے حوالے سے آگاہی انتہائی ضروری ہے، جس کے لیے انتظامیہ اور ریسکیو 1122 کے درمیان مؤثر کوآرڈینیشن کو مزید مضبوط کیا جا رہا ہے۔
اس موقع پر ایڈیشنل ڈپٹی کمشنر، اسسٹنٹ کمشنر اور دیگر محکموں کے ضلعی افسران بھی موجود تھے۔ ڈسٹرکٹ ایمرجنسی آفیسر محمد اکرم پنوار نے بریفنگ دیتے ہوئے بتایا کہ موک ایکسرسائز کا مقصد کسی بھی ممکنہ آتشزدگی کی صورت میں فوری رسپانس، ریسکیو آپریشن اور فائر فائٹنگ کے طریقہ کار کو جانچنا تھا۔ انہوں نے کہا کہ ریسکیو 1122 جدید آلات اور تربیت یافتہ عملے کے ساتھ ہر قسم کی ہنگامی صورتحال سے نمٹنے کے لیے ہمہ وقت تیار ہے۔
انہوں نے مزید بتایا کہ موجودہ فائر ایمرجنسی کے تناظر میں ضلع بھر میں فائر سیفٹی اقدامات، فائر آڈٹ اور موک ایکسرسائزز کا سلسلہ جاری ہے تاکہ عوام کے جان و مال کا تحفظ یقینی بنایا جا سکے۔
ننکانہ صاحب (باغی ٹی وی/نامہ نگار احسان اللہ ایاز)ڈی پی او ننکانہ فراز احمد کی ہدایات پر تھانہ سٹی ننکانہ پولیس نے بڑی اور کامیاب کارروائی کرتے ہوئے دو روز قبل 40 لاکھ روپے مالیت کی گاڑی چوری کرنے والے ملزم کو گرفتار کر کے چوری شدہ گاڑی برآمد کر لی ہے۔ اس کارروائی کو ننکانہ پولیس کی پیشہ ورانہ صلاحیتوں کا عملی مظاہرہ قرار دیا جا رہا ہے۔
تفصیلات کے مطابق گرفتار ملزم عدیل اسلم نے تھانہ سٹی کے علاقہ کرمانوالا کوٹ شورہ کوٹھی روڈ سے رینٹ اے کار کے ذریعے حاصل کی گئی گاڑی چوری کی اور موقع سے فرار ہو گیا تھا۔ واقعے کی اطلاع ملتے ہی تھانہ سٹی پولیس نے فوری طور پر مقدمہ درج کر کے تفتیش کا آغاز کیا اور جدید تکنیکی ذرائع اور پیشہ ورانہ مہارت کی مدد سے قلیل وقت میں ملزم کو گرفتار کر لیا۔
پولیس کے مطابق گرفتار ملزم عدیل اسلم ایک ریکارڈ یافتہ ملزم ہے جس کے خلاف اغواء سمیت 5 مقدمات درج ہیں۔ ملزم سے مزید تفتیش جاری ہے جبکہ اس کے دیگر جرائم میں ملوث ہونے کے پہلوؤں کا بھی جائزہ لیا جا رہا ہے۔
اس موقع پر ڈی پی او ننکانہ فراز احمد نے کہا کہ ضلع بھر میں جرائم پیشہ عناصر کے گرد گھیرا تنگ کیا جا چکا ہے اور ننکانہ پولیس شہریوں کے جان و مال اور عزت کے تحفظ کو اپنی اولین ترجیح سمجھتی ہے۔ انہوں نے واضح کیا کہ قانون شکن عناصر کے خلاف بلاامتیاز کارروائیاں جاری رہیں گی اور کسی کو بھی قانون سے بالاتر نہیں سمجھا جائے گا۔
راولپنڈی:نیشنل سائبر کرائم انوسٹی گیشن ایجنسی (این سی سی آئی اے) نے کارروائی کرتے ہوئے بچوں کی نازیبا ویڈیوز وائرل کرنے والا ملزم گرفتار کرلیا ۔
این سی سی آئی اے کے مطابق راولپنڈی میں بڑی کارروائی کی گئی ہے اور معصوم بچوں کا استحصال کرنے والا ملزم گرفتار کرلیا ہے پی ڈبلیو ڈی میں چھاپہ مارا گیا اور کم سن بچے کی نازیبا ویڈیوز وائرل کرنے والا شعیب برت کو دھر لیا گیا اور ان کے قبضے سے دو موبائل فونز برآمد کرلیے گئے ہیں، کارروائی کے دوران ملزم کا معصوم بچوں کی ویڈیوز رکھنے کا انکشاف ہوا ہے تاہم این سی سی آئی اے نے مقدمہ درج کرلیا ہے اور ملزم کے خلاف پیکا ایکٹ کی سخت دفعات شامل کی گئی ہیں، انسپکٹر محمد توصیف کی سربراہی میں کارروائی کے دوران ملزم سے برآمد ہونے والے موبائل فونز فرانزک لیبارٹری روانہ کردیے گئے ہیں جہاں مزید انکشافات متوقع ہیں۔
لاہور میں فلموں سے متاثر ہو کر وارداتیں کرنے والا 2 رکنی نقب زن گروہ کو گرفتار کر لیا گیا۔
ایس ایچ او فیصل ٹاؤن نے ٹیم کے ہمراہ گروہ کو پھول نگر سے ٹریس کیا ڈی آئی جی آپریشنز نے اے ایس پی ماڈل ٹاؤن کو اسپیشل ٹاسک دیا تھاسی سی ٹی وی فوٹیج میں ایک ملزم کو فلمی انداز میں گھر میں داخل ہوتے دیکھا جا سکتا ہے، ملزمان نے اعتراف کیا کہ فلموں میں متاثرہ ہوکر وارداتیں کرنا شروع کی تھیں۔
گروہ نے چند روز قبل تھانہ فیصل ٹاؤن کے علاقے میں گھر میں نقب زنی کی تھی، ملزمان سے چوری شدہ 7 موبائل فون، نقدی اور پستول برآمد کر لی گئی، ملزمان وقاص اور عظیم چوری، ڈکیتی سمیت متعدد مقدمات میں پولیس کو مطلوب تھے،ایس پی ماڈل ٹاؤن شہربانو نقوی نے ایس ایچ او فیصل ٹاؤن افضال روف اور ٹیم کو شاباش دی۔
بنوں میں تھانہ ڈومیل کی حدود میں عیدگاہ روڈ پر پولیس نے بروقت کارروائی کرتے ہوئے ایک بڑے ممکنہ سانحے کو ناکام بنا دیا۔
تفصیلات کے مطابق بنوں میں پولیس کو اطلاع ملی کہ عیدگاہ کی دیوار کے ساتھ ایک مشکوک شے پڑی ہوئی ہے جس پر فوری طور پر بم ڈسپوزل اسکواڈ کو طلب کیا گیا تلاشی کے دوران تقریباً تین کلو گرام وزنی ریموٹ کنٹرول دیسی ساختہ بم برآمد ہوا۔
بم ڈسپوزل اسکواڈ نے پیشہ ورانہ مہارت کا مظاہرہ کرتے ہوئے مذکورہ آئی ای ڈی کو کامیابی سے ناکارہ بنا دیا جس کے باعث کسی بھی جانی یا مالی نقصان سے بچاؤ ممکن ہواپولیس نے علاقے کو گھیرے میں لے کر سرچ آپریشن بھی کیا جبکہ مزید تفتیش کا آغاز کر دیا گیا ہےڈی پی او بنوں یاسر آفریدی نے کہا کہ شہریوں کی جان و مال کا تحفظ اولین ترجیح ہے اور شرپسند عناصر کے خلاف کارروائیاں بلا تعطل جاری رہیں گی۔
نجی افراد کو سرکاری ملازم ظاہر کر کے فرانس کے ویزے حاصل کرنے کا انکشاف سامنے آیا ہے، جہاں ایف آئی اے نے اسلام آباد ایئرپورٹ پر جعلی سرکاری وفد بن کر یورپ جانے کی کوشش ناکام بنا دی۔
رپورٹ کے مطابق ایف آئی اے نے کارروائی کے دوران ڈرائیور محمد کامران اور پراپرٹی ڈیلر عامر شہزاد کو گرفتار کر لیا۔ ملزمان نے ویزے لگوانے کے لیے مبینہ طور پر ایف بی آر کے ایک افسر کو 53 لاکھ روپے ادا کیے۔
ایف آئی اے کا کہنا ہے کہ عتیق الرحمان نے سرکاری ای میل کا غلط استعمال کرتے ہوئے ویزے حاصل کروائے۔ تحقیقات میں یہ بات بھی سامنے آئی ہے کہ ملزمان کا منصوبہ فرانس کے بجائے اسپین منتقل ہو کر یورپ میں پناہ لینا تھا۔
حکام کے مطابق ملزمان کے موبائل فونز سے جعلی ویزا اسکینڈل سے متعلق شواہد برآمد کر لیے گئے ہیں۔ ملزمان کے خلاف امیگریشن قوانین، جعلسازی اور بدعنوانی کی دفعات کے تحت مقدمہ درج کر کے مزید تحقیقات شروع کر دی گئی ہیں۔
گوجرانوالہ (باغی ٹی وی/نامہ نگار محمد رمضان نوشاہی) گوجرانوالہ ڈویژن میں غیر محفوظ کمرشل عمارتوں اور پلازوں کے خلاف ضلعی انتظامیہ نے سخت کریک ڈاؤن شروع کر دیا ہے۔ کمشنر گوجرانوالہ ڈویژن سید نوید حیدر شیرازی کی ہدایات پر فائر سیفٹی اور حفاظتی انتظامات کی عدم موجودگی پر مختلف علاقوں میں متعدد پلازوں کو سیل کر دیا گیا۔
انتظامیہ کے مطابق ڈنگہ اور لالہ موسیٰ میں فاضل فارمیسی اینڈ مارٹ سمیت کئی پلازوں میں فائر سیفٹی کے ناقص انتظامات، ایمرجنسی ایگزٹ کی عدم دستیابی اور دیگر سنگین خلاف ورزیاں سامنے آئیں، جس پر فوری کارروائی عمل میں لاتے ہوئے ان عمارتوں کو سیل کر دیا گیا۔ کمشنر گوجرانوالہ ڈویژن کا کہنا ہے کہ ایسے پلازے جو انسانی جانوں کے لیے خطرہ بن سکتے ہیں، ان کے خلاف کسی قسم کی نرمی نہیں برتی جائے گی۔
کمشنر سید نوید حیدر شیرازی نے واضح کیا کہ انسانی جانوں سے کھیلنے والوں کے خلاف زیرو ٹالرنس پالیسی اپنائی گئی ہے۔ انہوں نے کہا کہ فائر سیفٹی قوانین اور ایمرجنسی اخراج کے انتظامات پر کوئی سمجھوتہ نہیں کیا جائے گا اور تمام کمرشل عمارتوں کو مقررہ معیار پر پورا اترنا ہوگا۔
کمشنر گوجرانوالہ ڈویژن کے مطابق سیل کیے گئے پلازے اس وقت تک بند رہیں گے جب تک متعلقہ مالکان فائر سیفٹی، ایمرجنسی ایگزٹ اور دیگر حفاظتی تقاضوں کو مکمل طور پر پورا نہیں کرتے۔ انہوں نے انتظامیہ کو ہدایت کی کہ ڈویژن بھر میں ایسے تمام پلازوں اور کمرشل عمارتوں کی جامع جانچ پڑتال جاری رکھی جائے تاکہ کسی بھی ممکنہ حادثے سے قبل حفاظتی اقدامات کو یقینی بنایا جا سکے۔