Category: جرائم و حادثات

میرپور ماتھیلو،باغی ٹی وی( نامہ نگار مشتاق علی لغاری)شوہر کے ہاتھوں بیوی قتل ،پولیس سے ڈیل،قتل کو خود کشی قرار دینے کی کوشش،ورثاء کاالزام
داد لغاری کے نواحی گاؤں گل بہار لغاری میں نوجوان شادی شدہ خاتون مسمات ثمینہ لغاری کو مبینہ طور پراس کے شوہر نے سر میں گولی مارکر قتل کر دیا گیا ہے۔

قتل ہونے والی خاتون کے ورثاء نے الزام لگایا کہ بیوی کے قتل قدیر لغاری کی مبینہ ڈیل پولیس کے ساتھ بااثر وڈیرے کی بیٹھک پر گئی،ورثاء کاکہناہے کہ اس مبینہ ڈیل کے بعد پولیس اس قتل کے واقعہ کوخودکشی کارنگ دینے کی کوشش کررہی ہے

ورثاء نے کہا ہے کہ قدیرلغاری نے رات کے وقت بیوی ثمینہ لغاری کو قتل کر کے فرار ہو گیا تھا ، خاتون کے اہل خانہ نے مقتولہ کی لاش کو پولیس کے آنے تک کمرے میں بند رکھا ،تین گھنٹے کے بعد داد لغاری پولیس جائے وقوعہ پر پہنچی-

پولیس نے مقتولہ کی لاش کو اپنی تحویل میں لے کے سول ہسپتال منتقل کر دیا ، ہسپتال کے ڈیوٹی ڈاکٹرکاکہناہے کہ خاتون کو سر میں گولی ماری گئی ہے –

جبکہ خاتون کے ورثاء کاکہناہے کہ داد لغاری پولیس قاتل کے خلاف کوئی بھی قانونی کارروائی کرنے کو تیار نہیں ہے،مقتولہ کے اہل خانہ نے ایس ایس پی گھوٹکی اور آئی جی سندھ سے اپیل کی ہے کے قاتل کو گرفتار کرکے ہمیں انصاف دیا جائے –

تنگوانی باغی ٹی وی (نامہ نگار منصور بلوچ)ہائرسیکنڈری سکول میں کرسی کے لیے پرنسپل اورہیڈماسٹردست وگریباں ہوگئے، ایک دوسرے کے کپڑے پھاڑ ڈالے،دونون افسران کی حمایتی اساتذہ اور انکے حمایتی لوگوں میں بھی تصادم

تفصیلات کے مطابق تنگوانی ہائرسیکنڈری سکول میں دو افسران کا کرسی پر بیٹھنے کے تنازعہ پر جگھڑا ہوا ہے بتایا گیا ہے کہ سکول میں 21 گریڈ کے پرنسپل رضا محمد باجکانی پہلے سے موجود تھا اوراس دوران 17 گریڈ کے غلام نبی ڈاہانی نے ہیڈماسٹرکے آرڈر لیکر آ یا تھا اس لیے دو نوں افسران میں اختیارات کی کرسی پر بیٹھنے کا جھگڑابڑھ گیا جس پردونوں افسروں میں ہاتھا پائی ہوئی ہے جس کی وجہ سے دونوں افسران کی کپڑے بھی پھٹ گئے ،

جبکہ دونوں افسران کے حمایتی اساتذہ اور دونوں افسروں کی حمایتی لوگ بھی اس جھگڑے میں شامل ہو گئے جس کے بعد پولیس نے فوری طور پر کنٹرول سنبھال کر کے جھگڑا ختم کروایا اسی دوران ہائیر سیکنڈری سکول کے طلبہ نے سکول خالی کر کے بھاگ گئے جبکہ پرنسپل آفس کو بھی تالا لگا دیا گیا ہے

دوسری جانب دونوں افسران نے ایک دوسرے پر جھگڑا کرنے کی تھانے میں درخواست داخل کروادی ہے ۔ جبکہ پہلے سے موجود پرنسپل رضا محمد با جکانی اپنے موقف صحافیوں کوبتایا کہا کہ میں پہلے سے 21 گریڈ میں موجود ہوں جبکہ غلام نبی ڈاہانی اپنے آرڈر انچارج پرنسپل کا لے کر آیا ہے، میں نے اس کو جوائننگ دی ہے اس کے بعد اس نے میری کرسی پر بیٹھ کر قبضہ کر لیا تھا اور میں نے اس کو اپنی کرسی خالی کرنے کی ہدایت کی لیکن اس نے ایک بھی نہیں مانی دوسری طرف غلام نبی ڈاہانی کا کہنا ہے کہ میں ہائی سکول کا انچارج ہوں یہ کرسی میری تھی اور رضا محمد ہائرسیکنڈری سکول میں اپنی کرسی الگ رکھوالیں

اوچ شریف باغی ٹی وی (نامہ نگار حبیب خان)بجلی کے بھاری بلوں نے صارفین کی چیخیں نکلوا کر رکھ دیں اکثرلوگوں نے ادھارلیکر یاپھر بالیاں یادیگرقیمتی اشیا فروخت کرکے بجلی کے بل ادا کرنے پر مجبور ہو گئے،چیف جسٹس سپریم کورٹ آف پاکستان سے مطالبہ کیاکہ ازخود نوٹس لیتے ہوئے حکومت کی جانب سے بجلی کے بلوں میں اضافی ٹیکسوں کوواپس لیاجائے

تفصیل کے مطابق شہریوں مخدوم زادہ سید حسنات مزمل بخاری، حافظ جمیل احمد لنگاہ ،حسن جمیل لنگاہ، صدر انجمن تاجران رشید احمد لنگاہ ملک ظہورِ احمد، ملک شان نے بجلی کے بلوں میں غریب عوام پر لگنے والے ظالمانہ ٹیکس کو مسترد کرتے ہوئےباغی ٹی وی کو اپنے بیان میں کہا ہے کہ آئی ایم ایف کو خوش کرنے کے لئے حکومت ملکی معیشت اور تاجر برادری سمیت عام آدمی کو تباہ و برباد کرنے میں کوئی کسر نہیں چھوڑ رہی ہے ،ہزاروں روپے سیلز ٹیکس ماہوار لگانا گھریلو صارفین و دوکانداران پر ظلم ہے،

سیاست دانوں نے اپنی حکومت کو بچانے کے چکر میں عوام کے پیٹ چاک کرنے شروع کر دیئے ہیں روزگار نہ ہونے کی وجہ سے تاجر برادری سمیت غریب عوام پہلے ہی بے حال ہے اوپر سے حکومت بجلی کے بلوں میں سیلز ٹیکس عائد کر کے معاشی قتل کرنا چاہتی ہے

شہریوں کا کہنا تھا کہ غریب عوام پریشان ہے۔شہریوں کا مذید کہنا تھا کہ آئی ایم ایف بھی وڈیروں اور جاگیرداروں پر ٹیکس لگانے کو نہیں کہتا صرف عوام کا خون نچوڑنے کے احکامات دیتا ہے اور حکمران بھی عوام پر مختلف قسم کے ٹیکس لگاتے ہیں،فیول پرائس ایڈجسمنٹ کا جو ٹیکس بجلی کے بل میں آتا ہے وہ اس قدر زیادہ ہے کہ بجلی کی رقم اصل بل سے بھی زیادہ فیول ایڈجسٹمنٹ پرائس کی رقم ہوتی ہے انہوں نے کہا کہ ان ٹیکسز کی وجہ سے انتہائی مشکلات کا شکار ہے پہلے ہی انتہائی مہنگائی نے عوام کی کمر توڑی ہوئی ہے اوپر سے بجلی بلوں نے عوام پر بجلی گرا دی ہے،

گھریلو صارفین کے ساتھ ساتھ کمرشل صارفین کو بھی اس ماہ واپڈا نے بھاری ٹیکسز لگا کر بلز بھجوا دئیے ہیں ، جس کے باعث عوام میں حکومت کی جانب سے ٹیکسز لگائے جانے پر شدید غم و غصہ پایا جا رہا ہے شہریوں نےباغی ٹی وی سےبات کرتے ہوئے بتایا کہ پہلے ہی پیٹرول ڈیزل کی قیمتوں اورمہنگائی نے ہماری کمرتوڑ رکھی ہے اب ان بجلی بلوں نے ہماری رگوں سے خون بھی نچوڑ لیاہے

انہوں نے کہاکہ اکثرلوگوں نے ادھارلیکر یاپھراپنی بچیوں کی سونے کی بالیاں یادیگرقیمتی اشیا فروخت کرکے بجلی کے بل اداکئے ہیں انہوں نے چیف جسٹس سپریم کورٹ آف پاکستان سے مطالبہ کیاکہ ازخود نوٹس لیتے ہوئے حکومت کی جانب سے بجلی کے بلوں میں اضافی ٹیکسوں کوواپس لیاجائے

اوچ شریف باغی ٹی وی (نامہ نگار حبیب خان) ورلڈ بینک ٹف ٹائل منصوبہ،ٹھیکیدار کرپشن اور نااہلی چھپانے کیلئے سرگرم، ٹف ٹائل اکھاڑ کر گڑھوں میں ریت بھر دی، پورے منصوبے میں ٹف ٹائل کے نیچے مٹی کچرا بھرنے کے باعث منصوبہ ناکام، کئی جگہوں پر کام بھی ادھورا چھوڑ دیا گیا، ٹھیکیدار اور محکمے کے ذمہ داران کے خلاف محکمہ اینٹی کرپشن کارروائی کرے، اہلیان علاقہ کا مطالبہ،

تفصیل کے مطابق اوچ شریف میں عالمی شہرت یافتہ مقبرہ بی بی جیوندی و دیگر تاریخی مزارات تک رسائی کیلئے کروڑوں روپے کی لاگت سے بی بی جیوندی کمپلیکس شاہراہ بنانے کیلئے ورلڈ بینک نے میگا پراجیکٹ منظور کرتے ہوئے ٹھیکہ جاری کر دیا اس منصوبے میں شفافیت کیلئے پلاننگ اینڈ ڈویلپمنٹ ڈیپارٹمنٹ پنجاب سمیت دیگر اداروں کو ذمہ داری سونپی گئی منصوبے میں ٹھیکیدار نے بھاری کرپشن کرنے کیلئے بدنیتی کرتے ہوئے ردو بدل کر دیا اور سابقہ میٹل روڈ کو اکھاڑ کر کنکریٹ روڈ بنانے کیلئے نشانات لگانے کے کچھ ہی عرصہ بعد پرانی سڑک کا ملبہ اٹھا کر لے گئے اور گلیوں کا کچرا اور پرانی اینٹوں ملا ملبہ سڑک پر ڈال کر ناقص سب بیس تیار کر دی جسے آٹھ ماہ تک شہریوں کو اذیت میں مبتلا کرنے کیلئے یونہی چھوڑ دیا گیا

گزشتہ ماہ اسی سڑک پر ایک فٹ سے زیادہ ریت بچھا کر ٹف ٹائل بچھا دی گئی جو ایک ہفتے میں ہی ٹریفک گزرنے سے کئی جگہوں سے بیٹھ گئی اور بارش ٹف ٹائلوں کو بہا کر لے گئی، جس پر شہریوں کے احتجاج کے نتیجے میں ٹف ٹائل اکھاڑ کر دوبارہ ریت ڈال کر ناقص سڑک بنا دی گئی، جو کچھ دنوں بعد جگہ جگہ سے بیٹھ گئی اور گڑھے پڑ گئے جس کے خلاف شہریوں نے سیٹیزن پورٹل سمیت دیگر اداروں کو تحریری درخواستیں ارسال کیں

گزشتہ روز ٹھیکیدار کی طرف سے کرپشن اور نااہلی چھپانے کیلئے تیسری مرتبہ گڑھوں کو ریت ڈال کر بھرنے کا کام جاری ہے شہریوں کا کہنا ہے کہ انہوں نے سیٹیزن پورٹل سمیت چیئرمین پلاننگ اینڈ ڈویلپمنٹ ڈیپارٹمنٹ پنجاب کو تحریری درخواستیں ارسال کرنے کے باوجود تاحال کوئی کارروائی نہیں کی گئی جبکہ ٹھیکیدار نہایت ڈھٹائی سے غیر معیاری کام کرنے میں مصروف ہے

شہریوں نے چیف سیکرٹری پنجاب اور ڈائریکٹر جنرل اینٹی کرپشن پنجاب سے فوری نوٹس لیتے ہوئے کارروائی کرنے کا مطالبہ کیا ہے

اوچ شریف باغی ٹی وی (نامہ نگار حبیب خان) دریائے ستلج کنارے بیٹ کے علاقوں میں مقیم افراد کیلئے فلڈ وارننگ جاری، محفوظ مقامات پر مال مویشی سمیت منتقل ہونے کی ہدایات، چیف انجینئر انہار بہاول پور ریجن خالد بشیر نے کہا ہے کہ دریائے ستلج میں گنڈا سنگھ والا کے مقام پر اونچے درجہ کا سیلاب ہے اور پانی کی سطح بلند ہورہی ہے۔

18 اگست کو پانی کا ڈسچارج 2لاکھ 16ہزار کیوسک سے زائد رپورٹ ہوا ہے جبکہ ہیڈ سلیمانکی 63ہزار سے زائد پانی کی آمد اور 49ہزار کیوسک سے زائد اخراج ہے۔اسی طرح ہیڈ اسلام میں 31ہزار کیوسک سے زائد پانی کی آمد اور 30ہزار کیوسک سے زائد پانی کا اخراج رپورٹ ہوا ہے۔

انہوں نے کہا کہ دریائے ستلج میں پانی کی سطح بلند ہورہی ہے۔دریائے ستلج سے ملحقہ بیٹ میں رہنے والے افراد اپنے مال مویشیوں کے ہمراہ محفوظ مقامات پر منتقل ہوجائیں

اوچ شریف باغی ٹی وی (نامہ نگارحبیب خان) بدنام زمانہ کوئلہ چور اور آئل مافیا کا مبینہ گٹھ جوڑ، دو نمبر دھندے کا وسیع نیٹ ورک قائم، قومی شاہراہ پر ہوٹلوں کی آڑ میں منشیات کی فروخت جاری، پولیس کو چکمہ دینے کیلئے چھوٹے ملازمین سے رابطے، اکثر کارروائیوں میں بڑے ڈیلر بچ نکلنے میں کامیاب، قومی شاہراہ پر موجود نیٹ ورک توڑنے کیلئے گرینڈ آپریشن ناگزیر ہو گیا

تفصیلات کے مطابق اوچ شریف کے نواحی علاقوں بستی حافظاں تا پل بھلکہ تک قومی شاہراہ کے دونوں اطراف قائم متعدد ہوٹلوں کی آڑ میں منشیات فروشی کی سپلائی اور فروخت کا انکشاف ہوا ہے، جبکہ ایرانی اور دو نمبر پیٹرول بھی سرعام فروخت کرکے "مال ” کمایا جارہا ہے، کریانہ شاپس پر پلاسٹک بوتلوں میں دو نمبر پٹرول کی وافر مقدار میں سپلائی بھی عروج پر پہنچ چکی ہے، محکمہ سول ڈیفنس والے اپنا ” حصہ ” وصول کرکے منہ موڑ جاتے ہیں، جبکہ منی پیٹرول پمپس اور ایجنسیاں آئے روز حادثات کا سبب بھی بن رہی ہیں،

باوثوق زرائع نے انکشاف کیا ہے کہ اعلیٰ حکام کی جانب سے مزکورہ پیٹرول سپلائر، منشیات فروشوں اور آئل مافیا کے خلاف ڈی سی بہاولپور اور ڈی پی او بہاولپور کو متعدد بار مراسلے بھی جاری کئے جا چکے ہیں جس میں غیر قانونی طور پر پٹرول بیچنے والوں کیخلاف کارروائی کرنے کے احکامات دیئے گئے ہیں لیکن انتظامیہ کی جانب سے چھوٹی موٹی کاروائیاں کی گئی ہیں جن میں منشیات فروش کارندے گرفتار ہونے کے باوجود بڑے ڈیلر اپنے مضبوط نیٹ ورک کی وجہ سے بچ نکلنے میں کامیاب رہتے ہیں ،

انتظامیہ‘ پولیس اہلکاروں‘ عوامی نمائندوں اور سیاسی شخصیات کا ہوٹلوں سمیت منی پٹرول پمپس اور غیر قانونی پٹرول ایجنسیوں کے مالکان کیساتھ مبینہ گٹھ جوڑ بارے بھی اطلاعات ہیں، جبکہ دوسری جانب شہر کے گلی کوچوں میں با اثر دکاندار پلاسٹک کی بوتلوں میں مہنگے داموں دو نمبر پٹرول فروخت کررہے ہیں، اِن غیر قانونی تیل ایجنسیوں اور منی پٹرول پمپس پر کسی قسم کے حفاظتی انتظامات نہ ہونے کی وجہ سے قیمتی جانوں کا ضیاع ہو چکا ہے۔

اسی طرح اوچ شریف شہر کے مختلف علاقوں بستی حافظاں‘ بستی مقبول آرائیں‘ بیٹ احمد ‘ کچی شکرانی، بیٹ بختیاری‘ بنگلہ مستوئی‘ حلیم پور‘جھانگڑہ غربی سمیت شہر سے ملحقہ علاقہ جات میں درجنوں غیر قانونی ایجنسیاں اور منی پٹرول پمپس قائم ہیں جن کیخلاف باقاعدہ قانونی کارروائی نہ ہونے سے اِن میں مسلسل اضافہ ہو رہا ہے، ناقص اور ملاوٹ شدہ پٹرول اور ڈیزل کے استعمال سے موٹر سائیکلوں‘ کاروں اور ٹریکٹروں کے انجن تباہ ہو رہے ہیں،

اوچ شریف کے شہریوں نے ڈپٹی کمشنر بہاول پور اور ڈی پی او بہاولپور سے منی پیٹرول پمپس سمیت ہوٹلز میں منشیات فروشی کرنے والے افراد کے خلاف مؤثر گرینڈ آپریشن کرنے کا مطالبہ کیا ہے

میرپورخاص باغی ٹی وی (نامہ نگار سید شازیب شاہ کی رپورٹ) نیشنل پریس کلب اور پاکستان فیڈرل یونین آف جرنلسٹ اور سندھ صحافی سنگت میرپورخاص کے زیر اہتمام ایک مشترکہ شہید صحافی جان محمد مہر کی شہادت کے حوالے سے نیشنل پریس کلب میرپورخاص سے پوسٹ آفس چوک تک ریلی نکالی گئی اور احتجاجی مظاہرہ کیا گیا ۔

بڑی تعداد میں صحافیوں نے بینر ہاتھوں میں اٹھا رکھے تھے جبکہ احتجاجا بازؤوں پر کالی پٹیاں باندھی ہوئی تھیں نعرے لگاتے ہوئے اور مارچ کرتے ہوئے پوسٹ آفس چوک پر پہنچے جہاں رہنماؤں نے شہید صحافی جان محمد مہر کی شہادت پر گہرے دکھ اور افسوس کا اظہار کیا اور اس واقعے کی شدید مذمت کی

سندھ حکومت سے مطالبہ کیا کہ فوری طور پر جوابداروں کو گرفتار کر کے سخت سزائیں دی جائے اور سوگوار فیملی کو بھاری معاوضہ ادا کیا جائے تاکہ وہ معاشرے میں اپنا کردار ادا کر سکیں انہوں نے افسوس کا اظہار کرتے ہوئے کہا کہ اج پورے ملک میں صحافی خوف و ہراس میں اپنی صحافتی ذمہ داریاں ادا کر رہے ہیں جبکہ دہشت گرد جدید اسلحے کے ساتھ دندناتے پھر رہے ہیں اور اس حوالے سے امن و امان کی صورت انتہائی خراب ہے

مظاہرین نے الزام لگایا کہ مخصوص کریمنلز کا ٹولہ صحافیوں کو ٹارگٹ بنا رہا ہے انہوں نے حکومت سے مطالبہ کیا کہ شہید صحافی زبیر احمد مجاہد ، محمود سلطان چانڈیو اور دیگر کے کیس اوپن کر کے دوبارہ انکوائری کرائی جائے اور جوابداروں کو سخت سزا دی جائے ۔ خطاب کرنے والوں میں سلیم شیخ ، قمرالدین شیخ ، نظیر احمد چانڈیو ، خلیل احمد غوری ، خلیل اللہ ، سید لیاقت علی شاہ ، عبدالرشید ، ملازم حسین ، سہیل احمد ، شاہزیب خاصخیلی ، حیات قریشی ، خالد فوجی ، شاہ زیب شاہ ، امید علی لغاری ، محمد اسلم بلوچ ، محمد عارف ، بابر پٹھان اور دیگر نے خطاب کیا ۔

چونیاں،باغی ی وی(نامہ نگارعدیل اشرف) محکمہ ہائی وے اورلیسکو سب ڈویژن چونیاں کی مبینہ غفلت اور نااہلی، مین چھانگا مانگا جمبر روڈ پر دو الیکٹرک پول روڈ کے بالکل درمیان میں کھڑے ہیں ٹھیکیدار نے روڈ کی تعمیر مکمل کردی لیکن پول نہ ہٹائے جا سکے جو کسی بھی وقت بڑے حادثے کا سبب بن سکتے ہیں اعلیٰ حکام فوری نوٹس لیں اور پول کو روڈ کنارں پرمنتقل کروائیں، علاقہ مکینوں اور مسافروں کا مطالبہ

تفصیلات کے مطابق لیسکو سب ڈویژن چونیاں میں ایک ماہ میں تین سے چار ایکسیئن تبدیل ہوئے مگر پالیسیاں جوں کی توں ہیں سب ڈویژن لیسکو چونیاں اور محکمہ ہائی وے افسران کی مبینہ غفلت اور لاپرواہی کے باعث بڑا حادثہ رونما ہونے کا خدشہ ہے چونیاں تا جبمر روڈ کی تعمیر آخری مراحل میں ہے اور روڈ تعمیر کرنے والے ٹھیکیدار نے لیسکو ڈویژن چونیاں کو روڈ کے درمیان میں آنے والے الیکٹرک پول دوسری جگہ منتقل کرنے کے لاکھوں روپے بھی ادا کر دیئے ہیں مگر اس کے باوجود لیسکو واپڈا نے پول کو عرصہ دراز سے منتقل نہیں کیا۔

باوثوق ذرائع سے معلوم ہوا ہے مقامی تحصیل انتظامیہ بھی متعدد بار لیسکو کو تحریری طور پر بھی لکھ چکی ہے کہ پول کو سڑک کے درمیان سے کناروں پر منتقل کیا جائے۔علاقہ مکینوں ظفر جٹ، محمد اسماعیل، شفیق چوہدری، محمد خوشی و مسافروں کا کہنا ہے کہ دونوں الیکٹرک پول روڈ کےدرمیان میں ہیں دن رات سینکڑوں گزرنے والے ڈرائیوروں کو شدید مشکلات کا سامنا ہے کسی بھی وقت بڑا حادثہ ہو سکتا ہے

انہوں نے مزید کہا کہ لیسکو واپڈا اے سی قصور، ایکسیئن چونیاں اور محکمہ ہائی وے حکام نوٹس لیں اور الیکٹرک پول کو دوسری متعین جگہ پر منتقل کروائیں

میرپور ماتھیلو،باغی ٹی وی( نامہ نگار مشتاق علی لغاری)دو سال قبل اغواء ہونے والی "پریاکماری” کی بازیابی کیلئے جسقم کا احتجاجی مظاہرہ
ڈھرکی میں جسقم کی مرکزی قیادت کی کال پر جسقم تعلقہ ڈھرکی کی جانب سے پریا کماری کی بازیابی کے لیے احتجاجی مظاہرہ کیا گیا۔ کارکنوں نے جی ایم سید چوک سے ریلی نکالی اور شہر کے مختلف مقامات سےہوتے ہوئے ڈھرکی مین چوک کے سامنے احتجاجی مظاہرہ کیا،

اس موقع پر کارکنوں نے پریا کماری کی بازیابی کے لیے نعرے لگائے۔ ایس یو پی کے رہنما اکرم متلو، جاوید مہر، جاوید دیشی ،پرویز سمیجو نے کہا کہ پریا کماری دو سال سے زائد عرصے سے لاپتہ ہے لیکن پولیس اور دیگر اداروں کی نااہلی کے باعث وہ بازیاب نہیں ہوسکی جس کی ذمہ داری سندھ حکومت پرعائد ہوتی ہے۔

ان کا کہنا تھا کہ سندھ میں بڑھتی ہوئی بدامنی اغوا، بلیک میلنگ، لاقانونیت حکمرانوں نے پیدا کی ہے، سندھ کے اصل وارث ہونے کے ناطے سندھیوں کو غیر ملکی افغان دہشت گردوں اور دیگرآبادکاروں کے رحم وکرم پر نہیں چھوڑا جاسکتا۔احتجاج کرنے والوں نے پریا کماری کو جلد از جلد بازیاب کرانے کامطالبہ کیا۔ ورنہ سخت احتجاج کیا جائے گا۔