وزیر تعلیم پنجاب رانا سکندر حیات کے مطابق صوبے میں 20 فیصد یا اس سے کم نتائج دینے والے 2200 سرکاری سکولوں کی نشاندہی کی گئی ہے۔ نویں جماعت میں 20 فیصد سے کم نتائج والے سکولوں کے پرنسپلز اور سربراہان کو تین روز کے اندر وضاحت پیش کرنے کا حکم دیا گیا ہے۔
رانا سکندر حیات کے مطابق متعلقہ سکول سربراہان کو تعلیمی معیار اور طلبہ کے نتائج میں بہتری لانے کی ہدایت کی گئی ہے، جبکہ 20 فیصد سے کم رزلٹ دینے والے اساتذہ کو ملازمت سے ہٹایا جائے گا۔
وزیر تعلیم پنجاب کا کہنا ہے کہ ناقص نتائج دینے والے اساتذہ کے خلاف طویل انکوائریاں نہیں ہوں گی بلکہ کم رزلٹ پر براہِ راست کارروائی کی جائے گی۔ ان کا کہنا تھا کہ جو استاد مسلسل 3 سے 5 سال تک خراب نتائج دے رہا ہے، اسے عہدے پر رہنے کا کوئی حق نہیں۔
رانا سکندر حیات نے مزید کہا کہ جہاں کم نتائج دینے والے اساتذہ کے خلاف کارروائی کی جائے گی، وہیں اعلیٰ کارکردگی کا مظاہرہ کرنے والے اساتذہ کی حوصلہ افزائی بھی کی جائے گی اور انہیں انعامات دیے جائیں گے۔
