Category: اہم خبریں

پی ٹی آئی حکومت نے بلوچستان نیشل پارٹی کی بلوچستان میں توانائی، ڈیم اور سڑکیں تعمیر کرنے کی شرائط مان لی ہیں‌ اور وفاقی حکومت بی این پی مینگل کو میگا پراجیکٹس کے لئے فنڈز دینے کیلئے بھی رضامند ہو گئی ہے. بی این پی کی شرائط تسلیم کئے جانے پر بی این پی مینگل وفاقی حکومت کی بجٹ منظوری میں حمایت کرے گی۔

باغی ٹی وی کی رپورٹ‌ کے مطابق وفاقی حکومت اور بلوچستان نیشنل پارٹی مینگل کے مابین معاملات وزیر اعظم آفس میں‌ ہونے والی ملاقات میں طے پاگئے ہیں. حکومت کی جانب سے وفد میں پرویز خٹک، قاسم سوری، خسرو بختیار اور ارباب شہزاد شریک ہوئے جبکہ بی این پی کے اختر مینگل، جہانزیب جمالدینی، ہاشم نوتیرئی اور عاصم بلوچ نے شرکت کی. اس دوران بی این پی اور حکومتی عہدیداران سے ہونےو الے مذاکرات سے وزیر اعظم عمران خان کو مکمل طور پر آگاہ رکھا گیا.

مذاکرات کے دوران اتفاق رائے سے طے پایا ہے کہ قاسم سوری، پرویز خٹک اور ارباب شہزاد پر مشتمل کمیٹی طے پانے والی شرائظ پر عملدرآمد کرائے گی۔ اس موقع پر گفتگو کرتے ہوئے ڈپٹی سپیکر قاسم سوری کا کہنا تھا کہ وزیراعظم عمران خان بلوچستان سمیت تمام پسماندہ علاقوں کو ترقی دیں گے. حکومتی ذمہ داران اور بی این پی وفد کے مابین اس سلسلہ میں‌ پہلی ملاقات آج دوپہر پارلیمنٹ لاجز میں‌ ہوئی جبکہ دوسری ملاقات رات آٹھ بجے وزیراعظم آفس میں ہوئی۔ حکومت اور بی این پی مینگل کے درمیان مذاکرات پر وزیراعظم کو آگاہ رکھا گیا۔ واضح رہے کہ بی این پی مینگل گروپ کچھ عرصہ سے ناراض تھا جسے آج منا لیا گیا ہے. اب وہ بجٹ کی منظوری کے حوالہ سے حکومت کی حمایت کریں‌ گے.

وزارت خزانہ نے 12 جون 2019ء کو ایکسپریس ٹریبیون میں چھپنے والی خبر کو گمراہ کن قرار دیا ہے جس میں کہا گیا ہے کہ وزیراعظم آفس کا بجٹ برائے مالی سال 2019-20ءکو ایک ارب 17 کروڑ ہے جو کہ گزشتہ بجٹ کے مقابلے میں 19 فیصد زیادہ ہے، وزارت خزانہ نے اس خبر کی سختی سے تردید کرتے ہوئے کہا کہ وزیراعظم آفس کے بجٹ میں دیگر اداروں کے بجٹ کو ظاہر کرتے ہوئے معاملے کو غلط رنگ دینے کی کوشش کی ہے جو کہ موجودہ حکومت کی کفایت شعاری مہم کا مذاق اڑانے کے مترادف ہے۔

باغی ٹی وی کی رپورٹ کے مطابق وزارت خزانہ نے کہا ہے کہ حقیقت میں وزیراعظم آفس کا بجٹ برائے مالی سال 2019-20ءچھیاسی کروڑ 28 لاکھ روپے ہے۔ وزارت خزانہ کے مطابق نیشنل ڈیزاسٹر مینجمنٹ اتھارٹی (این ڈی ایم اے) کا بجٹ 30 کروڑ 90 لاکھ روپے ہے اور ان دونوں رقوم کا مجموعہ ایک ارب 17 کروڑ روپے ہی بنتا ہے۔ وزارت خزانہ کے مطابق وفاقی بجٹ 2019ءجلد اول (جاری اخراجات) صفحہ نمبر 302 سے صفحہ نمبر 310 تک رجوع کیا جا سکتا ہے۔ صفحہ نمبر 303 سے صفحہ نمبر 308 تک وزیراعظم آفس کے بجٹ کی تفصیلات موجود ہیں جبکہ صفحہ نمبر 308 اور 309 پر این ڈی ایم اے کا بجٹ درج ہے لہذا محکمہ خزانہ نے اس بات کی وضاحت کرتا ہے کہ وزیراعظم آفس کے بجٹ میں این ڈی ایم اے کے بجٹ کو ملا کر عوام کو گمراہ نہ کیا جائے۔

وزارت خزانہ کی پریس ریلیز میں‌ کہا گیا ہے کہ این ڈی ایم اے وزیراعظم آفس کا ماتحت ادارہ ہے لہذا ان دونوں کے بجٹ کو آپس میں ملایا نہ جائے۔ مزید برآں وزارت خزانہ نے اس بات کی وضاحت کی کہ مالی سال 2018-19ءکے لئے مختص شدہ بجٹ برائے وزیراعطم آفس تقریباً ایک ارب 11 کروڑ روپے تھا۔ وزیراعظم کی کفایت شعاری مہم کی وجہ سے وزیراعطم آفس نے صرف 75 کروڑ روپے کے اخراجات کر کے موجودہ مالی سال میں 32 فیصد اخراجات کی بچت کی ہے۔ وزیراعظم آفس کا نئے مالی سال برائے 2019-20ءکا بجٹ 86 کروڑ 28 لاکھ روپے ہے جو کہ پچھلے مالی سال کے بجٹ کے مقابلے میں 13 فیصد کم ہے۔

وزارت خزانہ کا کہنا ہے کہ اگر ماضی میں وزیراعظم آفس کے اخراجات کا جائزہ لیا جائے تو مالی سال 2019-20ءکا بجٹ سابقہ مالی سال 2014-15ءکے بجٹ سے بھی کم ہے۔ پاکستان کی تاریخ میں پہلی دفعہ وزیراعظم عمران خان نے اپنے اور کابینہ کی تمام صوابدیدی اختیارات کا خاتمہ کرتے ہوئے وزیراعظم آفس سے سب سے پہلے 6 کروڑ روپے کے صوابدیدی فنڈزختم کئے۔ اگلے مالی سال کے لئے وفاقی حکومت کے جاری اخراجات کو 480 ارب روپے سے کم کر کے 431 ارب روپے پر مختص کیا گیا ہے۔ ایک اور غیر معمولی مثال فوجی بجٹ کو گزشتہ سال کے بجٹ پر منجمند کرنا ہے جس کی ماضی میں کوئی مثال نہیں ملتی۔ اس بات کی وضاحت ضروری ہے کہ وزیراعظم ہاﺅس کے اخراجات کا براہ راست وزیراعظم کی ذات سے کوئی تعلق نہیں ہے کیونکہ اپنی ذات سے متعلقہ اخراجات وزیراعظم خود برداشت کر رہے ہیں۔

یاد رہے کہ ایکسپریس ٹریبیون نے خبر دی تھی جس میں‌ کہا گیا تھا کہ وزیراعظم آفس کا بجٹ برائے مالی سال 2019-20ءکو ایک ارب 17 کروڑ ہے جو کہ گزشتہ بجٹ کے مقابلے میں 19 فیصد زیادہ ہے. اس خبر پر وزارت خزانہ کی طرف سے یہ وضاحت جاری کی گئی ہے.

وزیراعظم پاکستان کی طرف سے انکوائری کمیشن بنائے جانے کی خبروں کے بعد اس بات کا امکان ظاہر کیا جارہا ہے کہ اس کمیشن کے سربراہ شعیب سڈل ہو سکتے ہیں.

باغی ٹی وی کی رپورٹ کے مطابق وزیر اعظم عمران خان نے گزشتہ روز قوم سے خطاب میں انکوائری کمیشن بنانے کا اعلان کیا تھا جبکہ آج اس سلسلہ میں‌ اعلیٰ سطحی اجلاس بھی ہوا ہے جس میں انکوائری کمیشن سے متعلق امور پر غوروفکر کیا گیا اور یہ بات کی گئی ہے کہ یہ کمیشن 2008 سے لیکر 2018 تک قرضوں میں‌ 24 ہزار ارب کا اضافہ کیسے ہوا اور یہ رقم کہاں‌ خرچ کی گئی، اس کا جائزہ لے گا.

انکوائری کمیشن سے متعلق کہا جارہا ہے کہ ماضی میں آئی جی سمیت مختلف عہدوں پر تعینات رہنے والے شعیب سڈل کو انکوائری کمیشن کا سربراہ بنایا جاسکتا ہے. اگر شعیب سڈل اس انکوائری کمیشن کے سربراہ بنتے ہیں‌تو یہ کمیشن پچھلے دس سال میں لئے گئے قرضوں کی تحقیقات کرے گا۔ یاد رہے کہ شعیب سڈل اچھی شہرت کے حامل آفیسر رہے ہیں.

وزیر اعظم پاکستان عمران خان کی زیر صدارت اعلیٰ سطحی اجلاس ہوا ہے جس میں‌ انکوائری کمیشن سے متعلق امور پر غور کیا گیا ہے۔ اجلاس میں وفاقی وزیر قانون فروغ نسیم، معاون خصوصی برائے احتساب شہزاد اکبر اور آڈیٹر جنرل نے شرکت کی.

باغی ٹی وی کی رپورٹ کے مطابق عمران خان کی زیر صدارت اجلاس کے بعد جاری کردہ اعلامیہ میں‌ کہا گیا ہے کہ یہ کمیشن اس امر کی انکوائری کرے گا کہ 2008ء سے 2018ء تک قرضوں میں 24 ہزار ارب روپے اضافہ کیوں اور کیسے ہوا ہے۔ اعلامیہ میں‌ کہا گیا ہے کہ انکوائری کمیشن قومی خزانہ خرچ کرنے والی تمام وزارتوں، ڈویژنوں اور متعلقہ وزیروں کی جانچ پڑتال بھی کرے گا۔ اس موقع پر کمیشن کے ٹی او آرز کے مسودے پر بھی غور کیا گیا۔ پی ٹی آئی حکومت نے انکوائری کمیشن، پاکستان کمیشن آف انکوائری ایکٹ 2017ء کے تحت قائم کرنے کا فیصلہ کیا ہے جس میں‌ میں آئی ایس آئی، ایم آئی، آئی بی اور ایس ای سی پی کے سینئر افسر بھی شامل ہوں گے۔ کمیشن یہ بھی دیکھے گا کہ فنڈز کا کہاں‌ غلط استعمال کیا گیا جبکہ اسی طرح رقم کی واپسی کے لیے بھی یہ کمیشن کام کرے گا۔

انکوائری کمیشن سے متعلق بتایا گیا ہے کہ یہ اس بات کا بھی جائزہ لے گا کہ اس مدت میں کوئی میگا منصوبہ شروع نہ ہونے کے باوجود اتنے قرضے کس بنیاد پر لیے گئے؟. یہ بھی بتایا گیا ہےکہ کمیشن میں آڈیٹر جنرل آفس،ایف ائی اے اور دیگر حکام بھی شامل ہوں گے۔

ان کا کہنا تھا کہ میں اپنے گھر میں رہتا ہوں، کسی کا ڈر نہیں، میرا جو مرضی کرنا ہے کر لیں، میں آپ کو نہیں چھوڑوں گا۔ سرکاری ٹی وی پر قوم سے خطاب میں وزیراعظم عمران خان کا کہنا تھا انکوائری کمیشن کے ذریعے دس سال میں لئے گئے قرضے کی تحقیقات کی جائے گی جس میں انٹیلی جنس بیورو (آئی بی)، وفاقی تحقیقاتی ادارے (ایف آئی اے)، فیڈرل بورڈ آف ریونیو (ایف بی آر)، سکیورٹیز اینڈ ایکسچینج کمیشن آف پاکستان (ایس ای سی پی) اور انٹیلی جنس ادارے آئی ایس آئی کے نمائندے شامل ہوں گے۔

یاد رہے کہ وزیر اعظم پاکستان عمران خان نے گزشتہ روز قوم سے کئے گئے اپنے خطاب میں کہا تھا کہ میں ملکی خزانہ لوٹنے والے چوروں‌ کو کسی طور نہیں‌ چھوڑوں‌ گا. انکا کہنا تھاکہ چاہے میری جان چلی جائے میں‌ کسی کی پرواہ نہیں‌ کروں‌ گا اور نہ ہی کسی بلیک میلنگ کا شکار ہوں گا. ان کا کہنا تھا کہ انکوائری کمیشن اس لئے بنایا جارہا ہے تاکہ قوم کو پتہ چلے کہ ملکی خزانہ کس نے لوٹا ہے اور کون قرض لیکر اپنی جیبیں‌ بھرتا رہا ہے.

چیئرمین پاکستان پیپلز پارٹی بلاول بھٹو زر داری نے اپوزیشن رہنماؤں کی گرفتاریوں‌ پر شدید ردعمل ظاہر کرتے ہوئے کہا ہے کہ فرضی اور جعلی مقدمات میں اپوزیشن لیڈروں‌ کو جیلوں میں ڈالنا احتساب نہیں انتقام ہے۔

باغی ٹی وی کی رپور‌ٹ کے مطابق بلاول بھٹو کا کہنا تھاکہ انہوں نے اور ان کی جماعت نے ہمیشہ عدلیہ اور قانون کی بالادستی کی بات کی ہے. پی ٹی آئی حکومت کی طرف سے قانون کی دھجیاں بکھیرنے پر عدلیہ کو نوٹس لینا چاہیے. پاکستان پیپلزپارٹی کے جیالے کسی دباؤ کا شکار نہیں‌ ہوں گے کسی کو اس حوالہ سے غلط فہمی میں‌نہیں‌ رہنا چاہیے.

بلاول بھٹو زرداری کا کہنا تھا کہ میرے ترجمان اور سینیٹ انسانی حقوق کمیٹی کے چیئرمین پر اسلام آباد پولیس کی جانب سے خفیہ ایف آئی آر کا اندراج اور اسے چھپانا قابل مذمت ہے. میں‌ پوچھتا ہو‌ں کہ کس قانون کے تحت سینیٹر مصطفی نواز کھوکھر کے خلاف درج ایف آئی آر سیل کی گئی اور سامنے نہیں لائی جارہی. حقیقت ہے کہ اس قسم کے ہتھکنڈے صرف آمرانہ دور میں استعمال کئے گئے۔ انصاف کا تقاضا تو یہ ہے کہ ہر شخص کو اس پر لگائے گئے الزامات سے فوری آگاہ کیا جائے. موجودہ حکومت جو کچھ کر رہی کسی طور درست نہیں‌ ہے.

بلاول بھٹو زرداری نے ایک دن قبل سندھ حکومت گرانے سے متعلق سازش کئے جانے کا بھی دعویٰ کیا تھا.

سابق وزیرقانون پنجاب ضیا حیدر رضوی نے جسٹس قاضی فائز عیسیٰ کے ریفرنس کے معاملہ پر وکلا کی ہڑتال کی مخالفت کردی ہے.

باغی ٹی وی کی رپورٹ کے مطابق ضیاء حیدر رضوی نے کہا ہے کہ وکلا کو سپریم جوڈیشل کونسل کے فیصلہ کا انتظار کرنا چاہیے. ان کا کہنا تھا کہ ریفرنس کے معاملہ پر چیف جسٹس پاکستان نے کیمبرج یونیورسٹی میں جو کہا وہ درست ہے. ادھروکلاء ایکشن کمیٹی نے بھی صدر سپریم کورٹ بار کے موقف سے لاتعلقی کا اعلان کرتے ہوئے کہا ہے کہ وہ 14جون کو ہڑتال نہیں کریں‌گے ۔ وکلا ایکشن کمیٹی کا کہنا ہے کہ قانون کے سامنے سب برابر ہے اور یہ کہ ہر ایک کا بلاامتیاز احتساب ہونا چاہئے۔

رپورٹ کے مطابق سپریم کورٹ لاہور رجسٹری میں میڈیا سے گفتگو کرتے ہوئے سابق سیکرٹری سپریم کورٹ بار ذوالفقار بخاری نے چودہ جون کو معمول کے مطابق عدالتوں میں پیش ہونے کا اعلان کیا اور کہا ہے کہ وکلاء کو کوئی ہڑتالی ٹاؤٹ نہ سمجھے. ہم ہڑتال کی کال مسترد کرتے ہیں اور وکلاء عدالتوں میں پیش ہونگے. ججز جرنیلوں اور سیاستدانوں سمیت سب کا احتساب ہونا چاہیے۔ وکلاء ایکشن کمیٹی کا کہنا تھاکہ صدر مملکت ڈاکٹر عارف علوی نے ریفرنس بھیج کر اپنا آئینی اختیار استعمال کیا ہے. اگر کسی جج کے خلاف کوئی الزامات ہیں تو انہیں ان کا سامنا کرنا چاہئے۔

یاد رہے کہ وکلاء کے ایک دھڑے نے چودہ جون کو ہڑتال کی کال دی تھی.