Category: اہم خبریں

لبنان کے وزیر داخلہ احمد الحجار نے پاکستان کے دو روزہ دورے کے دوران جی ایچ کیو راولپنڈی میں چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر، نشانِ امتیاز (ملٹری)، ہلالِ جرأت سے ملاقات کی۔

ملاقات کے دوران باہمی دلچسپی کے امور، خطے میں بدلتی ہوئی سیکیورٹی صورتحال اور سیکیورٹی کے شعبے میں پاکستان اور لبنان کے درمیان دوطرفہ تعلقات کو مزید فروغ دینے کے امکانات پر تبادلہ خیال کیا گیا۔

دونوں شخصیات نے دونوں ممالک کے سیکیورٹی اداروں کے درمیان ادارہ جاتی روابط مضبوط بنانے اور باہمی تعاون کو مزید فروغ دینے کی اہمیت پر بھی زور دیا۔ ملاقات میں سیکیورٹی کے شعبے میں تعاون بڑھانے اور مشترکہ مفادات سے متعلق امور پر روابط مزید مستحکم کرنے پر بھی بات چیت ہوئی۔

اس موقع پر چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر نے لبنان کے ساتھ دوطرفہ تعلقات کو مزید مضبوط بنانے کے لیے پاکستان کے عزم کا اعادہ کیا۔ انہوں نے باہمی دلچسپی کے شعبوں میں دونوں ممالک کے درمیان باہمی مفاد پر مبنی تعاون کو مزید وسعت دینے کی خواہش کا بھی اظہار کیا۔

لبنان کے وزیر داخلہ و بلدیات احمد الحجار نے علاقائی امن و استحکام کے لیے پاکستان کی خدمات کو سراہا۔ انہوں نے دہشت گردی کے خلاف جنگ میں پاکستان کی مسلح افواج کی پیشہ ورانہ صلاحیتوں اور دی جانے والی قربانیوں کا بھی اعتراف کیا۔

آئی ایس پی آر کے مطابق ملاقات کے دوران دونوں ممالک کے درمیان سیکیورٹی کے شعبے میں ادارہ جاتی روابط اور تعاون کو مزید مضبوط بنانے کی اہمیت پر زور دیا گیا، جبکہ پاکستان اور لبنان کے درمیان باہمی مفاد پر مبنی دوطرفہ تعلقات کو مزید فروغ دینے کے عزم کا بھی اظہار کیا گیا۔

انڈونیشیا کی بحریہ کے سربراہ ایڈمرل ڈاکٹر محمد علی نے جی ایچ کیو کا دورہ کیا، جہاں انہوں نے فیلڈ مارشل جنرل سید عاصم منیر سے ملاقات کی۔ انڈونیشین بحریہ کے سربراہ نے پاکستانی مسلح افواج کی پیشہ ورانہ مہارت کو سراہتے ہوئے علاقائی امن و استحکام کے لیے پاکستان کی خدمات کا بھی اعتراف کیا۔

جی ایچ کیو میں ہونے والی ملاقات کے دوران باہمی دلچسپی کے امور، علاقائی سلامتی کی صورتحال اور پاکستان و انڈونیشیا کے درمیان دفاعی تعاون سے متعلق معاملات پر تفصیلی تبادلہ خیال کیا گیا۔

اس موقع پر فیلڈ مارشل جنرل سید عاصم منیر نے دفاع اور سلامتی کے شعبوں میں دونوں ممالک کے درمیان تعاون کو مزید مضبوط بنانے کے عزم کا اعادہ کیا۔ ملاقات میں دونوں عسکری قائدین نے پاکستان اور انڈونیشیا کی مسلح افواج کے درمیان موجودہ دوستانہ اور باہمی تعاون پر مبنی تعلقات پر اطمینان کا اظہار کیا۔

ملاقات کے دوران پیشہ ورانہ تربیت، دفاعی اشتراک اور مشترکہ فوجی مشقوں کے شعبوں میں تعاون کو مزید مستحکم کرنے پر بھی اتفاق کیا گیا۔ دونوں جانب سے دفاعی تعاون کے موجودہ دائرہ کار کو مزید وسعت دینے اور مسلح افواج کے درمیان پیشہ ورانہ روابط کو مضبوط بنانے کی اہمیت پر زور دیا گیا۔

انڈونیشین بحریہ کے سربراہ کا جی ایچ کیو کا دورہ پاکستان اور انڈونیشیا کی مسلح افواج کے درمیان دفاعی تعلقات اور باہمی تعاون کو مزید آگے بڑھانے کے عزم کی عکاسی کرتا ہے، جبکہ ایڈمرل ڈاکٹر محمد علی کی جانب سے پاکستانی مسلح افواج کی پیشہ ورانہ صلاحیتوں کو سراہنا اور علاقائی امن و استحکام کے لیے پاکستان کی خدمات کا اعتراف بھی ملاقات کا اہم پہلو رہا۔

کسی سیاسی جماعت، پبلک آفس ہولڈر کے پاس اسلام آباد کی سڑکیں بند کرنے کا اختیار نہیں، عدالت نے پی ٹی آئی کے 27 ستمبر احتجاج سے متعلق درخواست نمٹادی

اسلام آباد ہائیکورٹ نے پی ٹی آئی کے 27 ستمبر احتجاج سے متعلق درخواست ہدایات کے ساتھ نمٹادی،چیف جسٹس سرفرازڈوگر کی سربراہی میں لارجر بینچ نے پی ٹی آئی کے 27 ستمبر کو اسلام آباد احتجاج سے متعلق درخواست فیصلہ سنایا۔

عدالت نے کہا کہ کسی سیاسی جماعت یا پبلک آفس ہولڈر کے پاس اسلام آباد کی سڑکیں بند کرنے کا اختیار نہیں، صوبوں کے وزرائے اعلیٰ یقینی بنائیں سرکاری مشینری سیاسی جماعت کے احتجاج میں استعمال نہ ہو، کسی بھی سرکاری ملازم کو احتجاج میں شرکت کیلیے مجبور نہ کیا جائے۔

اسلام آباد ہائیکورٹ کا کہنا ہے کہ کسی سیاسی جماعت یا رہنما کو سڑکوں، شاہراہوں یا دیگر عوامی مقامات پر قبضے کا قانونی حق نہیں، کسی سیاسی جماعت یا رہنما کو شہریوں کی آزادانہ نقل وحرکت میں رکاوٹ ڈالنے کا حق بھی نہیں ہے۔

عدالت نے ہدایت کی کہ صوبائی حکومتیں مارچ، جلوس یا ریلی کے لیے سرکاری وسائل استعمال نہ ہونے دیں، وزرائے اعلیٰ یقینی بنائیں کہ سرکاری فنڈز یا سرکاری افسران احتجاج میں استعمال نہ ہوں، مارچ، جلوس یا ریلی کے لیے سرکاری گاڑیاں، مشینری یا دیگرسامان استعمال نہ کیا جائے۔

عدالت نے حکم دیا کہ اسلام آباد انتظامیہ اور وزارت داخلہ شہریوں کے آئینی حقوق کا تحفظ یقینی بنائیں، چیف سیکرٹریز اور آئی جیز عدالتی ہدایات پر عملدرآمد یقینی بنائیں، عدالت نے وفاقی سیکرٹری داخلہ، چیف کمشنر اور آئی جی اسلام آباد کو بھی ہدایات جاری کر دیں۔

حقیقی رائٹر کا قلم اپنے ملک کے پسے ہوئے طبقے کا ترجمان ہوتا ہے،مبشر لقمان
لاہور(ظفر اقبال ظفرسے)باغی رائیٹرز فورم کے زیر اہتمام اراکین کی پہلی تعارفی نشست سینئر صحافی و اینکر پرسن ،سی ای او باغی ٹی وی ، سرپرست اعلیٰ باغی رائیٹرز فورم مبشر لقمان کی زیر صدارت جمخانہ کلب مال روڈ منعقدہوئی،تعارفی نشست میں باغی رائیٹر ز فورم لاہور کے اراکین نے شرکت کی،اس موقع پر ظفر اقبال ظفر کو ماہ اگست کا باغی ایوارڈ، جبکہ طارق نوید سندھوکو بھی باغی ایوارڈ دیا گیا،ماہ ستمبرکے باغی ایوارڈ کے لئے اعجاز راہی کا نام مبشر لقمان نے نامزد کیا،جبکہ ماہ ستمبر کے دوسرے ایوارڈ کا اعلان ماہ ستمبر کے آخر میں کیا جائے گا،تقریب کے دوران سابق ڈی جی ایف آئی اے،پاکستان برج فیڈریشن کے مرکزی رہنما غالب بندیشہ نے برج پر تفصیلی بریفنگ دی.

باغی رائیٹرز فورم کی تعارفی نشست میں اراکین کا تعارف سرپرست اعلیٰ باغی رائیٹرز فورم مبشر لقمان کو کروایا گیا،اراکین نے اپنا تعارف خود کروایا،اس دوران گفتگو کرتے ہوئے مبشر لقمان نے اپنے تربیتی انداز میں قلمی ہنر بتاتے ہوئے کہا کہ کسی کالم کا عنوان ہی پڑھنے والوں کو اپنی جانب کھینچتا ہے ایک حقیقی رائٹر کا قلم اپنے ملک کے پسے ہوئے طبقے کا ترجمان ہوتا ہے جو صاحب اختیار کو انسانی قدروں پر توجہ دلاتے ہوئے غریب عوام کے کم آمدن کے تناظر میں ضرورت زندگی کے نرخ مقرر کرنے پر زور دیتا ہے جب ایک عام انسان کی زندگی آسان بنانے کے حالات پیدا ہوتے ہیں تو اس میں ہر طرح کے لوگ مستفید ہوتے ہیں ہم کمزور بندے کے حالات زندگی بہتر بنانے کے لیے قلم کی پراثر آواز اٹھائیں ،باغی ٹی وی ہو یا باغی رائیٹرز فورم اس کا بنیادی مقصد یہی ہے کہ عام عوام کی آواز بنا جائے اور اس آواز کو باغی ٹی وی چینل سے وابستہ قارئین تک پہنچانے کے لیے میں آپ سب افراد کے لیے باغی ٹی وی چینل کے دروازے کھولتا ہوں، آپ کی چند سو تک پہنچنے والی آواز کو لاکھوں افراد تک پہنچانے کے لیے ایڈیٹر باغی ٹی وی ممتاز اعوان کی کاوشیں قابل تحسین ہیں، باغی رائیٹرز فورم کے اراکین نہ صرف باغی ٹی وی پر لکھیں بلکہ اپنی ویڈیوز، وی لاگ بھی ہمیں بھیجیں جو باغی ٹی وی کےیوٹیوب اور فیس بک پر نشر کیا جائےگا، ہم باغی رائیٹرز فورم کے تمام ممبران کو خود تک پہنچنے والی مالی آسانی میں شراکت دار بنانے کا عزم رکھتے ہیں اور کوشش کر رہے ہیں کہ ایسے وسائل پیدا کیے جائیں جو باغی رائیٹرز فورم سے وابستہ رائٹرز کی معاشی مدد پر مبنی ہوں جب ہم سب پاکستانی عوام کی خیرخواہی چاہتے ہیں تو خود سے وابستہ رائٹرز کی کیوں نہیں چاہیں گے جب بھی ہم تک آپ لوگوں کے لیے آسانیاں پہنچی تو ہم آپ کو نوازیں گے .

پاکستان برج فیڈریشن کے رہنما غالب بندیشہ نےباغی رائیٹرز فورم کے اراکین کو برج کھیل پر بریفنگ دی،اس موقع پر انہوں نے بتایا کہ پاکستان برج فیڈریشن کے صدر مبشر لقمان کی ہی کاوشوں سے پاکستان میں برج کا ایشیا کا ٹورنامنٹ لاہور میں منعقد کیا گیا تھا، میں اب تک پاکستان کی انٹرنیشنل سطح پر برج میں متعدد مرتبہ نمائندگی کر چکا ہوں .

تعارفی نشست میں تمام شرکاء نے باغی رائیٹرز فورم کی اس فکر کو سراہا اور قلمی نکھار میں مفید تجاویز کو اپنے دامن شعور میں محفوظ کیا .

نشست کے اختتام پر باغی رائیٹرز فورم کا ماہ اگست 2026 کا پہلا ایوارڈ سرپرست اعلیٰ باغی رائیٹرز فورم مبشر لقمان ،غالب بندیشہ نے رائٹر مصنف ظفر اقبال ظفر کو دیا ،جبکہ ظفر اقبال ظفر نے اپنی کتاب مبشر لقمان کو پیش کی،باغی ٹی وی قصور کے بیورو چیف طارق نوید سندھو کو بھی باغی ایوارڈ سے نوازا گیا،

باغی رائیٹرز فورم کی تعارفی نشست میں ریاض احمد احسان، چوہدری رضوان کاہلوں،نعیم خان،اعجاز راہی، ظفر اقبال ظفر،طارق نوید سندھو،علی رضا،جاوید ڈینی ایل،حافظ محمد زبیر، جان محمد رمضان،عارفین عائشہ،فیصل رمضان، یوحنا جان،دانش رحمان،سید ضیغم حسن عابدی،نادر فہمی،رانا محمد اشرف ایڈوکیٹ،رانا شہزاد الطاف،محمد احمد،چوہدری حمزہ سندھو و دیگر نے شرکت کی.

باغی رائیٹرز فورم کا اجلاس سی ای او باغی ٹی وی ،سرپرست اعلیٰ باغی رائیٹرز فورم مبشر لقمان کی زیر صدارت ہوا،

اجلاس میں ایڈیٹر باغی ٹی وی ممتاز اعوان ،نوید شیخ و دیگر نے شرکت کی، اجلاس میں متفقہ طور پر فیصلہ کیا گیاکہ نوید شیخ باغی رائیٹرز فورم کے صدر ہوں گے جبکہ اعجاز الحق عثمانی باغی رائیٹرز فورم کے مرکزی کوآرڈینیٹر ہوں گے، اجلاس میں فیصلہ کیا گیا کہ باغی رائیٹرز فورم کی رکنیت سازی ابھی جاری رکھی جائے گی اور دیگر عہدوں کا اعلان بھی جلد کیا جائےگا،اجلاس میں فیصلہ کیا گیا کہ باغی رائیٹرز فورم کے زیر اہتمام اراکین کے اعزاز میں جلد باغی ایوارڈ کی تقریب لاہور میں منعقد کی جائے گی، اجلاس کے اختتام پر باغی رائیٹرز فورم کے اراکین کی تعداد 100 ہونے پر کیک کاٹا گیا.

اجلاس کے بعد گفتگو کرتے ہوئے سینئر صحافی و اینکر پرسن ،سی ای او باغی ٹی وی،سرپرست اعلی باغی رائیٹرز فورم مبشر لقمان نے گفتگو کرتے ہوئے کہا کہ آپ مجھے کئی حوالوں سے جانتے ہیں، لیکن ایک حوالہ میرا یہ بھی ہے کہ میرا تعلق باغی ٹی وی ڈاٹ کام سے ہے، باغی ٹی وی ڈاٹ کام الحمد للہ پاکستان کی بہت پرانی ویب سائٹس اور ویب پورٹلز کے اندر شمار ہوتی ہے اور یہ دوزبانی (اردو اور انگریزی) ہے، بیچ میں ہم پشتو ،چائنیز، دری اور دیگر زبانوں میں بھی کام کرتے رہے، لیکن افغانستان سے جنگ کے بعد رپورٹنگ کے سلسلے میں وقفے آ رہے تھے، تو وہاں سے ہم فی الحال جاری نہیں رکھ سکے، جسے آگے انشاء اللہ جاری کرنا چاہیں گے،مبشر لقمان کا کہنا تھا کہ باغی ٹی وی کی ٹیم ایک انتہائی ڈیڈیکیٹڈ ٹیم ہے، جو نہ صرف پاکستان میں بلکہ پاکستان کے باہر سے بھی کام کر رہی ہے۔ الحمد للہ باغی ٹی وی کی خبریں ہر جگہ ڈنکا بجا کر بولتی ہیں اور کوٹ کی جاتی ہیں ، بہت دفعہ میں نے دیکھا ہے کہ مین اسٹریم میڈیا باغی کی خبریں خود اٹھا کر لگا رہا ہوتا ہے، جو کہ باغی کی ایک بہت بڑی جیت ہے؛ بھلے وہ اس کا نام نہ دیں یا ایکنالج نہ کریں، کیونکہ وہ ہمارے ملک میں رواج نہیں ہے ،باغی ٹی وی بہت سی چیزوں پر آگے بڑھ کر لیڈ لے رہا ہے اس وقت کم از کم 150 کے قریب ایسے لوگ ہیں جو باغی کے رائٹرز اور کنٹریبیوٹرز ہیں اور پورے پاکستان اور بیرونِ ملک پھیلے ہوئے ہیں، میں جب بھی مختلف ممالک میں جاتا ہوں، جیسے پچھلی بار ہالینڈ گیا تو ہمارے کالم نگار اور نامہ نگار شہزاد قریشی سےملاقات ہوئی، شہزاد قریشی کی ہالینڈ کے حوالے سے ایک کتاب بھی آئی ہے جس کا تفصیلی جائزہ باغی پر دیا گیا ہے باغی ٹی وی پر لکھنے والے باقاعدہ سمجھدار اور پڑھنے لکھنے والے لوگ ہیں؛ وہ محض وقت گزاری یا کسی کو برا بھلا کہنے کے لیے نہیں لکھتے، بلکہ ان کی تحریر کے پیچھے سوچ، تحقیق اور پس منظر ہوتا ہے

مبشر لقمان کا مزید کہنا تھا کہ باغی ٹی وی کے ایڈیٹر ممتاز اعوان نے ‘باغی رائٹرز ایوارڈ’ کا اہتمام کیا ہے، جو کہ باغی رائٹرز فورم کے تحت دیا جائے گا،نوید شیخ اس فورم کے مہتمم اور صدر ہیں، جبکہ اعجاز الحق عثمانی صاحب اس کے کوآرڈینیٹر ہوں گے اس فورم میں پورے پاکستان سے رائٹرز اور کنٹریبیوٹرز کو دعوت دی جائے گی تاکہ ایک باہمی سیشن ہو سکے، جہاں ان کے تجربات کا تبادلہ کیا جائے گا اور بہترین رائٹرز کو ایوارڈز دیے جائیں گے

مبشر لقمان کا مزید کہنا تھا کہ پاکستان ایک لحاظ سے بدنصیب ملک ہے کہ یہاں کتاب انارکلی کے فٹ پاتھ پر ملتی ہے، جبکہ جوتے ایم ایم عالم روڈ پر شوکیس میں اسپاٹ لائٹ کے نیچے رکھے جاتے ہیں؛ جس سے یوں لگتا ہے جیسے قوم میں اکثریت ایسے لوگوں کی ہے جو کتاب پڑھنے کے بجائے جوتے کھانا پسند کرتے ہیں لیکن باغی ٹی وی پر ہم ان تمام لوگوں کا احترام اور قدر کرتے ہیں جن کا تعلق درس و تدریس، لکھنے اور پڑھنے سے ہے، کیونکہ وہی ہمارا اصل اثاثہ ہیں ،جب تک باغی ایوارڈز کی تقریب منعقد نہیں ہوتی، تب تک صفِ اول کے نامزد رائٹرز کی تفصیلات اور ان کا منتخب کالم یا تحریر باغی ٹی وی کے فیس بک پیج اور ویب سائٹ پر شیئر کی جاتی رہے گی ، آپ سب سے بھی گزارش ہے کہ ان تحریروں کو دیکھیں اور اپنی رائے دیں، کیونکہ پڑھنے والوں کی رائے کے بغیر بولنے اور لکھنے والوں کی کوئی اہمیت نہیں ہوتی

اسلام آباد: پاکستان نے سعودی عرب کے ایسٹ ویسٹ پائپ لائن پر ڈرون حملوں کی شدید الفاظ میں مذمت کی ہے۔

ترجمان دفتر خارجہ نے کہا ہے کہ ریاض اور مدینہ کے علاقوں میں پائپ لائن کو ڈرون حملوں سے نقصان پہنچا جبکہ حملوں کے نتیجے میں شہری بھی زخمی ہوئے۔ سعودی عرب میں شہری تنصیبات کو نشانہ بنانا بین الاقوامی قانون کی خلاف ورزی ہے۔دفتر خارجہ کے ترجمان کے مطابق ڈرون حملے سعودی عرب کی خودمختاری اور علاقائی سالمیت کی بھی کھلی خلاف ورزی ہیں، جبکہ ایسے حملے خطے کے امن، سلامتی اور استحکام کے لیے سنگین خطرہ ہیں۔ترجمان نے کہا کہ پاکستان سعودی عرب کی خودمختاری، علاقائی سالمیت، سلامتی اور خوشحالی کی بھرپور حمایت کرتا ہے اور سعودی قیادت، حکومت اور برادر عوام کے ساتھ مکمل یکجہتی کا اعادہ کرتا ہے۔دفتر خارجہ کے مطابق پاکستان خطے میں پائیدار امن اور استحکام کے لیے اپنی مخلصانہ کوششیں جاری رکھے گا۔

چیف جسٹس آف سپریم کورٹ جسٹس یحیٰی آفریدی کا کہنا ہے عوام کے اعتماد کے لیے ماتحت عدلیہ کے ججز کو بااختیار بنانا عدلیہ کا مقصد ہے۔

اسلام آباد میں تقریب سے خطاب کرتے ہوئے چیف جسٹس یحییٰ آفریدی کا کہنا تھا انصاف کی بروقت فراہمی ضروری ہے اور ضلعی عدالتیں نظام انصاف میں ریڑھ کی ہڈی کی حیثیت رکھتی ہیں، تمام ادارے اپنی ذمہ داریاں احسن انداز میں ادا کریں، نوجوان ججز بہترین انداز میں انصاف کی فراہمی یقینی بنائیں، ضلعی عدالتوں اور ہائیکورٹ کے درمیان رابطہ کاری کو مزید مضبوط کرنا ہوگا، ہم نے عدالتی کوڈ آف کنڈکٹ میں اصلاحات متعارف کرائی ہیں، ججز ایماندارانہ انداز میں اپنے فرائض انجام دیں،عدالتوں کو سولر نظام پر منتقل کیا جا رہا ہے، عدلیہ کو انٹرنیٹ کی بہترین سہولت اور ای لائبریریز کی سہولت فراہم کی جائےگی، بلوچستان کی تمام تحصیلوں اور اضلاع میں سولر سمیت بنیادی ضروریات پر کام جاری ہے، بلوچستان کے 18 اضلاع میں بھی سولر، پانی اور انٹرنیٹ کی سہولیات فراہم کی جا چکی ہیں، جو اضلاع رہ گئے ہیں، وہاں ایک ماہ میں سہولیات فراہم کر دی جائیں گی۔

چیف جسٹس یحییٰ آفریدی ماتحت عدلیہ پر فخر کا اظہار کرتے ہوئے کہا کہ جوڈیشل افسران کو ہیلتھ انشورنس کی سہولت دینےکا فیصلہ کیا گیا ہے، ججز کو بیرونی دباؤ سے آزاد کرنے کے لیےکوڈ آف کنڈکٹ میں تبدیلی کی گئی، جج کو بیرونی دباؤ سے آزاد کرنے کے لیے پوری عدلیہ ساتھ ہے،عوام کے اعتماد کے لیے ماتحت عدلیہ کے ججز کو بااختیار بنانا عدلیہ کا مقصد ہے، ماتحت عدلیہ کے ججز مشکلات کے باوجود اپنی ذمہ داریاں سرانجام دے رہے ہیں، ماتحت عدلیہ میں سولر، انٹرنیٹ اور صاف پانی کی سہولیات کی فراہمی میں صوبائی حکومت کے تعاون پر مشکور ہیں،چیف جسٹس یحییٰ آفریدی نے دوران خطاب شرکاء کو تالیاں بجانے سے روک دیا اور کہا کہ اس چھت کے نیچے ہم سب یہاں ججز ہیں، ہمیں ججز کی طرح پیش آنا چاہیے

خیبر: سیکیورٹی فورسز نے ضلع خیبر کے علاقے باڑہ میں انٹیلی جنس بیسڈ آپریشن کے دوران حیات آباد ٹول پلازہ کی ناکہ بندی میں ملوث کمانڈر سمیت 4 دہشت گردوں کو ہلاک کر دیا۔

ذرائع کے مطابق سیکیورٹی فورسز نے باڑہ کے علاقے اکاخیل، حاجیانون کلے میں انٹیلی جنس بیسڈ آپریشن کیا، جہاں دہشت گردوں سے فائرنگ کا تبادلہ ہوا۔ کارروائی کے دوران کمانڈر سمیت 4 دہشت گرد ہلاک ہوئے۔ہلاک ہونے والے دہشت گردوں کی شناخت کمانڈر خالد عمر غازی، ملک عرب گل، اریانہ اور حنظلہ کے نام سے ہوئی ہے۔

ذرائع کا کہنا ہے کہ کمانڈر خالد عمر نے چند ماہ قبل پشاور میں حیات آباد ٹول پلازہ کی ناکہ بندی کی تھی اور اس واقعے کی ویڈیو بھی جاری کی تھی۔ذرائع کے مطابق خالد عمر پشاور، باڑہ اور تیراہ میدان میں سیکیورٹی فورسز پر ہونے والے مختلف حملوں میں بھی ملوث تھا۔

لاہور: میجر راجہ عزیز بھٹی شہید (نشانِ حیدر) نے 1965ء کی جنگ میں بے مثال جرات و شجاعت کا مظاہرہ کرتے ہوئے وطنِ عزیز کے دفاع میں اپنی جان قربان کردی۔

دفاعِ وطن کی تاریخ پاکستان کے ان بہادر سپوتوں کی لازوال قربانیوں سے عبارت ہے جنہوں نے اپنی جانوں کا نذرانہ پیش کرکے آنے والی نسلوں کے لیے آزادی اور وطن کی سلامتی کی راہ محفوظ بنائی۔ستمبر 1965ء کی جنگ کے دوران جب دشمن نے پاکستان پر اچانک حملے کے ذریعے سرپرائز دینے کی ناکام کوشش کی تو پاکستانی فوج کے بہادر جوانوں نے دشمن کے عزائم خاک میں ملا دیے۔1965ء کی جنگ کے دوران میجر راجہ عزیز بھٹی واہگہ سیکٹر کے علاقے برکی میں بطور کمپنی کمانڈر تعینات تھے۔ انہوں نے بی آر بی نہر پر دشمن کے حملے کو روکنے کے لیے اپنے دفاع کو منظم کیا اور خود کو دفاع کی اولین صف میں شامل رکھا۔

میجر راجہ عزیز بھٹی نے 6 سے 10 ستمبر تک مسلسل پانچ روز تک عزم، ہمت اور ولولے کے ساتھ دشمن کے متعدد حملوں کو پسپا کیا۔ دشمن کو ان حملوں میں بکتر بند دستوں اور بھاری توپ خانے کی مدد حاصل تھی، تاہم میجر راجہ عزیز بھٹی اور ان کے جوانوں نے دشمن کی پیش قدمی روک دی۔معرکے کے دوران میجر راجہ عزیز بھٹی نے دفاع کے ساتھ ساتھ دشمن پر جوابی حملے بھی کیے اور بی آر بی نہر عبور کرنے والے واحد پل پر قابض دشمن کو پیچھے دھکیل دیا۔12 ستمبر کو میجر راجہ عزیز بھٹی نے دشمن کے بڑھتے ہوئے بکتر بند اور پیدل دستوں پر حملہ کیا، جس کے نتیجے میں دشمن کے دو ٹینک تباہ ہوگئے۔ انہوں نے اپنی جان کی پروا کیے بغیر مسلسل دشمن کی نقل و حرکت پر نظر رکھی اور اسے بھاری جانی و مالی نقصان پہنچایا۔اسی دوران دشمن کے ایک ٹینک کا گولہ میجر راجہ عزیز بھٹی کو لگا، جس کے نتیجے میں انہوں نے جامِ شہادت نوش کیا۔میجر راجہ عزیز بھٹی شہید کی بے مثال بہادری اور لازوال قربانی کے نتیجے میں دشمن لاہور کی جانب پیش قدمی نہ کرسکا۔ ان کی جرات و شجاعت کے اعتراف میں انہیں پاکستان کے اعلیٰ ترین فوجی اعزاز نشانِ حیدر سے نوازا گیا۔

تاریخ گواہ ہے کہ جب بھی دفاعِ وطن کا مرحلہ آیا، پاک فوج کے بہادر سپوتوں نے اپنی جانوں کا نذرانہ پیش کرکے سبز ہلالی پرچم کو سربلند رکھا۔ میجر راجہ عزیز بھٹی شہید کی قربانی بھی اسی قومی جذبے، حب الوطنی اور شجاعت کی روشن مثال ہے۔

بحریہ ٹاؤن کے بانی ملک ریاض حسین نے اربوں روپے کی عوامی سرمایہ کاری بچانے کے لیے وزیراعظم شہباز شریف اور دیگر حکام سے فوری حکومتی مداخلت کی اپیل کردی۔

ملک ریاض حسین کا کہنا ہے کہ بحریہ ٹاؤن کی املاک کی ضبطی، نیلامی اور ترقیاتی سرگرمیوں میں رکاوٹ کے باعث ہزاروں پاکستانیوں کی جمع پونجی اور روزگار خطرے میں پڑ گیا ہے۔انہوں نے کہا کہ اگست 2025 کے بعد بحریہ ٹاؤن کے تنازع کے حل کے لیے مذاکرات یا حکومتی مداخلت کی یہ چوتھی اپیل ہے۔ تنازعات کو قانونی بنیادوں اور انسانی ہمدردی کے تحت حل کیا جانا چاہیے۔ملک ریاض نے مطالبہ کیا کہ تنازعات کے حتمی فیصلے تک کم قیمت پر ہونے والی نیلامی، املاک کی منتقلی اور قبضے کے عمل کو روکا جائے تاکہ عوام کی سرمایہ کاری کو مزید نقصان سے بچایا جا سکے۔بحریہ ٹاؤن کی جانب سے تجویز دی گئی ہے کہ شفاف نگرانی کے تحت ترقیاتی سرگرمیاں دوبارہ شروع کی جائیں، جبکہ وصول ہونے والی رقم کا ایک متفقہ حصہ واجبات کی ادائیگی کے لیے مختص کیا جا سکتا ہے۔

ملک ریاض نے وزیراعظم شہباز شریف اور دیگر متعلقہ حکام سے اپیل کی کہ عوام کی اربوں روپے کی سرمایہ کاری، روزگار اور بحریہ ٹاؤن سے وابستہ افراد کے مفادات کے تحفظ کے لیے فوری اقدامات کیے جائیں۔