Category: اہم خبریں

قومی ائیرلائن پی آئی اے کی نجکاری کے معاملے پر فوجی فرٹیلائزرکمپنی عارف حبیب کنسورشیم میں شامل ہوگئی۔

کنسورشیم کی جانب سے جاری اعلامیے میں قومی ائیرلائن کی نجکاری کے معاملے پر فوجی فرٹیلائزیشن کمپنی کے عارف حبیب کنسورشیم میں شامل ہونے کی تصدیق کی گئی ہے،اعلامیے میں کہا گیا ہےکہ یہ پارٹنرشپ ائیرلائن کی مالی مدد اورکارپوریٹ مہارت کا حصہ ہوگی،کنسورشیم نے 135 ارب روپے کی سب سے زیادہ بولی سے75 فیصد حصص حاصل کیے، فوجی فرٹیلائزر، عارف حبیب کنسورشیم کے ساتھ انتظامی ڈھانچے کاحصہ ہوگی، زمینی آپریشنز اپ گریڈیشن پر پہلے سال 125 ارب روپےکی سرمایہ کاری ہوگی۔

واضح رہے کہ پی آئی اے کی نجکاری میں عارف حبیب کنسورشیم نے سب سے زیادہ 135 ارب کی بولی لگاکر قومی ائیرلائن کے 75 فیصد حصص خریدے جب کہ دوسرے نمبر پر لکی کنسورشیم نے 134 ارب کی بولی لگائی۔

بابائے قوم قائداعظم محمد علی جناح کا 149واں یومِ پیدائش آج عقیدت و احترام سے منایا جا رہا ہے

پاکستان کے بانی، عظیم رہنما اور بابائے قوم قائداعظم محمد علی جناح کا 149واں یومِ پیدائش آج پورے ملک میں انتہائی عقیدت، احترام اور ملی جوش و خروش کے ساتھ منایا جا رہا ہے۔ اس قومی دن کے موقع پر ملک بھر میں عام تعطیل ہے جبکہ سرکاری و غیر سرکاری سطح پر مختلف تقریبات کا انعقاد کیا جا رہا ہے۔

یومِ پیدائش کے موقع پر کراچی میں مزارِ قائد پر گارڈز کی تبدیلی کی پروقار تقریب منعقد ہوئی، جس کے مہمانِ خصوصی میجر جنرل افتخار حسین چوہدری (ہلالِ امتیاز) تھے۔ اس موقع پر پاک فوج کے چاق و چوبند دستے نے مزارِ قائد پر سلامی پیش کی، جبکہ پاک فوج کے کیڈٹس نے باضابطہ طور پر گارڈز کے فرائض سنبھال لیے۔ تقریب میں عسکری حکام اور دیگر معزز شخصیات نے شرکت کی۔بابائے قوم کے یومِ پیدائش پر آج دن بھر ملک کے مختلف حصوں میں سیمینارز، کانفرنسز، تقریری مقابلے اور دعائیہ تقریبات منعقد کی جائیں گی، جن میں مسلمانوں کے لیے علیحدہ وطن کے حصول اور قیامِ پاکستان کے لیے قائداعظم کی انتھک، بے مثال اور ناقابلِ فراموش خدمات کو خراجِ عقیدت پیش کیا جائے گا۔

قائداعظم محمد علی جناح 25 دسمبر 1876 کو کراچی میں پیدا ہوئے۔ وہ پیشے کے اعتبار سے ایک نامور وکیل اور عظیم سیاستدان تھے۔ اپنی غیر معمولی قائدانہ صلاحیتوں، اصول پسندی اور عزمِ صمیم کے ذریعے انہوں نے برصغیر کے مسلمانوں کے ایک آزاد وطن کے خواب کو حقیقت میں بدل دیا۔ایمان، اتحاد اور تنظیم قائداعظم کے وہ سنہری اصول ہیں جو ان کی پوری زندگی کا نچوڑ ہیں۔ بابائے قوم نے اپنے کردار، گفتار اور عمل سے دنیا کو یہ پیغام دیا کہ سچی، دیانت دار اور اصولی قیادت قوموں کی تقدیر بدل سکتی ہے۔ نہرو، پٹیل اور گاندھی جیسے قد آور سیاسی رہنماؤں کی موجودگی میں قائداعظم نے مسلمانوں کو پاکستان کی منزل سے ہمکنار کیا۔قائداعظم کا خواب ایک ایسے پاکستان کا قیام تھا جہاں ہر فرد کو بلا امتیاز مذہب، رنگ و نسل مساوی حقوق، آزادی اور انصاف حاصل ہو۔ وہ دنیا کی ان چند عظیم شخصیات میں شامل ہیں جنہوں نے تاریخ کا دھارا موڑ دیا اور دو قومی نظریے کی بنیاد پر مسلمانوں کو ایک علیحدہ اور خودمختار وطن دلایا۔ مسلمانوں پر ان کا یہ عظیم احسان کبھی فراموش نہیں کیا جا سکتا۔

افواجِ پاکستان، آرمی چیف و چیف آف ڈیفنس فورسز فیلڈ مارشل عاصم منیر نے بابائے قوم کو خراجِ عقیدت پیش کیا۔ افواجِ پاکستان نے قائداعظم کے مضبوط، خودمختار، جمہوری اور خوشحال پاکستان کے وژن سے اپنی غیر متزلزل وابستگی کا اعادہ کرتے ہوئے قومی استحکام، امن اور ترقی کے لیے بھرپور کردار ادا کرنے کے عزم کا اظہار کیا۔

وزیراعظم شہباز شریف نے قائداعظم محمد علی جناح کو شاندار خراج عقیدت پیش کیا ہے۔وزیراعظم نے بابائے قوم کے یوم پیدائش پر اپنے پیغام میں کہا کہ قائداعظم نے بلاتفریق رنگ ونسل، مذہبی ہم آہنگی، معاشرتی رواداری اور انصاف جیسےرہنما اصولوں کا درس دیا۔وزیراعظم شہباز شریف نے کہا کہ قائداعظم کے سنہری اصول ایمان، اتحاد، تنظیم درخشاں قومی مستقبل کی ضمانت ہیں۔ ہر سال قائد اعظم کا یوم پیدائش پوری قوم کیلئے تجدید عہد کا موقع بھی فراہم کرتا ہے۔وزیراعظم کا کہنا تھا کہ قائد اعظم کی سیاسی بصیرت نے قیام پاکستان اور مسلمانان برصغیر کے سیاسی مستقبل میں فیصلہ کن کردار ادا کیا، قائد اعظم محمد علی جناح نے تاریخ کا دھارا موڑ کر مملکت خداداد کے قیام کو ممکن بنایا، قائد اعظم نے مسلمانوں کیلئے ایک آزاد، خودمختار فلاحی ریاست کے عزم کیلئے بھرپور جدوجہد کی۔

وزیراعظم کا مزید کہنا تھا کہ قائد اعظم محمد علی جناح نے نہ صرف سیاسی مخالفین کا مقابلہ کیا بلکہ سامراجی قوتوں کو شکست دی۔

چیف آف ڈیفنس فورسز،فیلڈ مارشل سید عاصم منیر، نے جنرل ہیڈکوارٹرز (جی ایچ کیو)، راولپنڈی میں منعقدہ 273ویں کور کمانڈرز کانفرنس (سی سی سی) کی صدارت کی۔

ڈی جی آئی ایس پی آر کے مطابق فورم نے حالیہ دہشت گردی کے واقعات میں جامِ شہادت نوش کرنے والے پاک افواج، قانون نافذ کرنے والے اداروں اور معصوم شہریوں کے شہداء کے ایصالِ ثواب کے لیے فاتحہ خوانی کی، جنہوں نے غیر ملکی سرپرستی میں ہونے والی دہشت گردی کے خلاف مادرِ وطن کا دفاع کرتے ہوئے اپنی جانوں کا نذرانہ پیش کیا۔

چیف آف آرمی اسٹاف اور چیف آف ڈیفنس فورسز نے پاکستان کی مسلح افواج کی غیر متزلزل جرات، پیشہ ورانہ مہارت اور قربانیوں کو زبردست خراجِ تحسین پیش کیا اور حالیہ مہینوں میں ملک بھر میں جاری انٹیلی جنس بنیادوں پر کی جانے والی مسلسل انسدادِ دہشت گردی کارروائیوں میں ان کے پُرعزم کردار کو سراہا۔ انہوں نے اس بات پر زور دیا کہ حکومت، فوج اور عوامِ پاکستان کی ثابت قدم حمایت کی بدولت ملک بتدریج مگر یقینی طور پر استحکام، بہتر مواقع اور عالمی احترام کی جانب بڑھ رہا ہے۔فورم نے اندرونی اور بیرونی سلامتی کی موجودہ صورتحال کا جامع جائزہ لیا، جس میں ابھرتے ہوئے خطرات اور عملی تیاری پر خصوصی توجہ دی گئی۔ شرکاء نے اس عزم کا اعادہ کیا کہ بھارتی سرپرستی میں پلنے والے تمام دہشت گردوں، ان کے سہولت کاروں اور معاونین کے ساتھ بلا امتیاز اور فیصلہ کن انداز میں نمٹا جائے گا۔

فورم نے دہشت گردی، جرائم اور مخصوص سیاسی مفادات کے گٹھ جوڑ کو دوٹوک الفاظ میں مسترد کر دیا۔ اس بات پر اتفاق کیا گیا کہ قومی اتحاد، سلامتی اور استحکام کو نقصان پہنچانے والی کسی بھی بدنیتی پر مبنی کوشش، خواہ وہ سیاسی ہو یا کسی اور نوعیت کی، کو برداشت نہیں کیا جائے گا، اور نہ ہی کسی کو مسلح افواج اور عوامِ پاکستان کے درمیان خلیج پیدا کرنے کی اجازت دی جائے گی۔

فورم نے بلوچستان میں خصوصی ترقیاتی اقدامات کو سراہا جو مقامی بااختیاری اور سماجی روابط کے فروغ کے ذریعے طرزِ حکمرانی سے متعلق دہشت گردی کے چیلنجز سے نمٹنے کے لیے کیے جا رہے ہیں۔ شرکاء نے پائیدار امن و استحکام کے لیے قومی ایکشن پلان کے مطابق ملک کے دیگر حصوں میں بھی اسی نوعیت کے عوام دوست اقدامات کی ضرورت پر زور دیا۔فورم نے کشمیری عوام کی حقِ خودارادیت کی جائز جدوجہد کے لیے پاکستان کے غیر متزلزل عزم کا اعادہ کیا اور مسئلہ فلسطین پر پاکستان کے اصولی مؤقف کی توثیق کرتے ہوئے فوری اور مستقل جنگ بندی، غزہ تک بلا رکاوٹ انسانی امداد کی فراہمی، اور فلسطینی ریاست کے قیام کے لیے قابلِ اعتماد راستے کا مطالبہ کیا۔

اختتامی کلمات میں چیف آف آرمی اسٹاف اور چیف آف ڈیفنس فورسز نے کمانڈرز کو ہدایت کی کہ وہ آپریشنل تیاری، نظم و ضبط، تربیت، جسمانی فٹنس، تکنیکی جدت اور میدانِ جنگ میں مطابقت کے اعلیٰ ترین معیارات برقرار رکھیں۔ انہوں نے اس اعتماد کا اظہار کیا کہ پاکستان آرمی روایتی، غیر روایتی، ہائبرڈ اور غیر متناسب چیلنجز سمیت ہر نوعیت کے خطرات سے مؤثر طور پر نمٹنے کی مکمل صلاحیت رکھتی ہے اور قومی خودمختاری و علاقائی سالمیت کے تحفظ کے لیے ثابت قدم رہے گی۔

فورم نے دہشت گردی، جرائم اور مخصوص سیاسی مفادات کے گٹھ جوڑ کو دوٹوک انداز میں مسترد کرتے ہوئے واضح کیا کہ ایسے عناصر قومی سلامتی کے لیے براہِ راست خطرہ ہیں۔ فورم نے اس عزم کا اعادہ کیا کہ قومی وحدت، سلامتی اور استحکام کو نقصان پہنچانے والی کسی بھی بدنیتی چاہے وہ سیاسی ہو یا کسی اور نوعیت کی کو ہرگز برداشت نہیں کیا جائے گا اور افواجِ پاکستان اور عوام کے درمیان دراڑ ڈالنے کی کسی بھی کوشش کو ناکام بنایا جائے گا۔ کانفرنس میں بلوچستان میں خصوصی ترقیاتی اقدامات کو سراہا گیا جو مقامی لوگوں کی بااختیاری، سماجی روابط اور عوامی شمولیت کے ذریعے دہشت گردی سے جڑے گورننس کے مسائل کے پائیدار حل کی جانب مؤثر قدم ہیں۔ شرکاء نے اس امر پر زور دیا کہ اسی نوعیت کے عوام دوست اور ترقیاتی اقدامات خیبر پختونخوا میں بھی ناگزیر ہیں تاکہ نیشنل ایکشن پلان کے تحت پائیدار امن و استحکام کو یقینی بنایا جا سکے، حکومت، افواجِ پاکستان کی مشترکہ کاوشوں اور پاکستانی عوام کی ثابت قدم حمایت کے باعث ملک بتدریج مگر یقینی طور پر استحکام، بہتر مواقع اور عالمی سطح پر وقار کی جانب گامزن ہے

اسلام آباد: متحدہ عرب امارات کے صدر شیخ محمد بن زاید النہیان 26 دسمبر کو پاکستان کے سرکاری دورے پر پہنچیں گے۔ اس دورے کا مقصد پاکستان اور متحدہ عرب امارات کے درمیان برادرانہ، سفارتی، معاشی اور اسٹریٹجک تعلقات کو مزید مضبوط بنانا ہے۔

صدر شیخ محمد بن زاید کی پاکستان آمد پر ان کا پُرتپاک اور شاندار استقبال کیا جائے گا۔ ایوانِ صدر میں ہونے والی استقبالیہ تقریب میں صدرِ پاکستان خود اماراتی صدر کا استقبال کریں گے، جبکہ انہیں گارڈ آف آنر بھی پیش کیا جائے گا۔ دورے کے تمام انتظامات مکمل کر لیے گئے ہیں اور سکیورٹی کے خصوصی انتظامات کیے گئے ہیں۔دورے کے دوران متحدہ عرب امارات کے صدر پاکستان کی اعلیٰ سول و عسکری قیادت سے اہم ملاقاتیں کریں گے۔ ان ملاقاتوں میں دوطرفہ تعلقات، سرمایہ کاری، تجارت، توانائی، دفاعی تعاون اور خطے کی مجموعی صورتحال پر تبادلۂ خیال کیا جائے گا۔ دونوں ممالک کے درمیان مختلف شعبوں میں تعاون کو فروغ دینے کے امکانات پر بھی گفتگو متوقع ہے۔

اسلام آباد کی فضاؤں میں پاک فضائیہ کے جنگی طیاروں کی پروازیں جاری ہیں، جو معزز مہمان کی آمد کے موقع پر دیے جانے والے گارڈ آف آنر کی ریہرسل کا حصہ ہیں۔ پاک فضائیہ کی یہ شاندار تیاریاں دوستی، احترام اور پیشہ ورانہ مہارت کی عکاسی کرتی ہیں۔دوست ملک کے معزز مہمان کے استقبال کے لیے پاک فضائیہ سمیت تمام متعلقہ اداروں کی تیاریاں حتمی مراحل میں داخل ہو چکی ہیں۔ اس دورے کو پاکستان اور متحدہ عرب امارات کے دیرینہ تعلقات میں ایک اہم سنگِ میل قرار دیا جا رہا ہے، جو مستقبل میں باہمی تعاون کے نئے دروازے کھولنے کا سبب بنے گا۔

نیشنل ڈائیلاگ کمیٹی نے وزیراعظم شہباز شریف کی مذاکرات کی دعوت کا خیرمقدم کرتے ہوئے حکومت سے کوٹ لکھپت جیل میں زیرِ حراست پی ٹی آئی کی سینئر قیادت کو پیرول پر رہا کرنے کی درخواست کر دی۔

شاہ محمود قریشی، یاسمین راشد، محمود الرشید، اعجاز چودھری اور عمر چیمہ کی رہائی سے مذاکراتی عمل مؤثر ہوگا۔محمود مولوی، عمران اسمعیل اور فواد چودھری کا کہنا ہے کہ مذاکرات کی کامیابی اعتماد سازی کے بامعنی اقدامات سے مشروط ہے۔ نیشنل ڈائیلاگ کمیٹی کی جانب سے لکھے گئے خط میں کہا گیا ہے کہ نیشنل ڈائیلاگ کمیٹی وزیر اعظم شہباز شریف کی اپوزیشن کو مذاکرات کی تازہ پیشکش کا پرتپاک خیرمقدم کرتی ہے اور شدید امید رکھتی ہے کہ اس بار یہ کوششیں ضرور کامیابی سے ہمکنار ہوں گی اور ملک کو درپیش سیاسی، معاشی اور اداراتی بحرانوں سے نجات دلائیں گی۔ مذاکرات کا بیڑا ہم نے اس وقت اٹھایا جب حکومت اور پاکستان تحریک انصاف کسی قسم کی بات چیت کی حامی نہ تھیں، مگر آج وزیر اعظم کی جانب سے واضح اور مثبت پالیسی بیان نیشنل ڈائیلاگ کمیٹی کی مسلسل جدوجہد اور کوششوں کا نتیجہ ہے۔ یہ پیشکش ملک میں سیاسی استحکام، جمہوری تسلسل اور قومی ترقی کے لیے ایک سنہری موقع فراہم کرتی ہے، جسے تمام فریقین کو ضائع نہیں ہونے دینا چاہیے۔ہماری خواہش ہے کہ حکومت مذاکرات کے آغاز سے قبل یکطرفہ طور پر کوٹ لکھپت جیل میں قید سیاسی اسیران، جن میں سینئر پی ٹی آئی قیادت جیسے ڈاکٹر یاسمین راشد، عمر سرفراز چیمہ، میاں محمود الرشید اور سابق سینیٹر اعجاز چوہدری شامل ہیں، کی رہائی کا اعلان کرے اور خواتین سیاسی قیدیوں کے لیے خصوصی ریلیف کا اقدام اٹھائے، تاکہ مذاکرات ایک انتہائی مثبت، خوشگوار اور اعتماد بھرے ماحول میں شروع ہو سکیں۔ یہ اعتماد سازی کا قدم نہ صرف مذاکرات کو پائیدار بنائے گا بلکہ ملک میں سیاسی مفاہمت کی نئی بنیاد بھی رکھے گا۔ نیشنل ڈائیلاگ کمیٹی کا ماننا ہے کہ موجودہ حالات میں بات چیت ہی واحد راستہ ہے جو پاکستان کو تقسیم اور تنازعات سے نکال کر اتحاد اور ترقی کی طرف لے جا سکتا ہے۔ ہم تمام سیاسی جماعتوں سے اپیل کرتے ہیں کہ وہ قومی مفاد کو مقدم رکھتے ہوئے اس عمل کا حصہبنیں اور ایک جامع چارٹر آف ڈیموکریسی اور چارٹر آف اکانومی پر اتفاق رائے پیدا کریں، تاکہ ملک مستقل سیاسی استحکام اور معاشی خوشحالی کی طرف گامزن ہو سکے۔

پیپلز پارٹی کی سینیٹر پلوشہ خان نے سینیٹ کمیٹی برائے مواصلات کے اجلاس میں ہونے والی تلخ کلامی کے معاملے پر وفاقی وزیر عبدالعلیم خان کے خلاف تحریک استحقاق جمع کرا دی۔

قائمہ کمیٹی برائے مواصلات کے اجلاس میں تلخ کلامی پر پیپلز پارٹی کی سینیٹر پلوشہ خان نے سحر کامران کے ہمراہ پریس کانفرنس کی جس میں انہوں نے وزیراعظم شہباز شریف سے مطالبہ کیا کہ اپنے نتیش کمار جیسے وزیروں کو سنبھالیں،پلوشہ خان کا کہنا تھا ہم عوامی نمائندے ہیں اور سینیٹ کمیٹی کے اجلاس میں ایک سوال کا جواب مانگا تھا، اجلاس کے دوران جو بھی تلخ کلامی ہوئی اس معاملے کو ہر فورم پر اٹھائیں گے، بزدل مرد ہمیشہ پہلے خاتون پر حملہ آور ہوتے ہیں، اگر کسی آوارہ جانور نے مجھے کاٹنے کی کوشش کی تو ٹیکے اس آوارہ جانور کو لگیں گے، وفاقی وزیر کے خلاف تحریک استحقاق جمع کرادی ہے، اب بات سینیٹ میں ہوگی اور فیصلہ صدر آصف علی زرداری کریں گے، سوال ٹیکس کے پیسوں سے بنی سڑک کا تھا کہ وہ سڑک عوام کے لیے ہے یا ایک ہاؤسنگ سوسائٹی کے لیے؟ وزرا ایوان کو جوابدہ ہیں، مسئلہ سوال کا نہیں جواب کا ہے،کسی بھی آوارہ جانور نے مجھے کاٹنے کی کوشش کی تو ٹیکے اُس آوارہ جانور کو لگیں گے،

دوسری جانب سینیٹر پلوشہ خان کے خلاف منظم آن لائن کردار کشی کا معاملے میں بڑی پیشرفت سامنے آئی ہے،سینیٹرپلوشہ نے پیکا ایکٹ کے تحت کردار کشی مہم کے خلاف نیشنل سائبر کرائم انویسٹی گیشن ایجنسی کو کارروائی کی درخواست دے دی،درخواست کے متن میں کہا گیا ہے کہ پلوشہ خان کے خلاف سوشل میڈیا پر جھوٹا اورہتک آمیز مواد پھیلایا گیا، جعلی ویڈیوز کے ذریعےساکھ کو نقصان پہنچایا گیا،سوشل میڈیا پر نفرت انگیز مہم، صنفی زبان، دھمکیوں کا استعمال کیا گیا، جعلی اکاؤنٹس اور بوٹ نیٹ ورکس کے ذریعےمہم کو بڑھایا گیا،درخواست کے متن میں مزید کہا گیا ہے کہ مخصوص ہیش ٹیگز کےذریعے بدنیتی پر مبنی مواد ٹرینڈ کرایا گیا، سینیٹر کے سرکاری فرائض کے دوران ٹارگٹڈ آن لائن حملے کیے گئے۔

خیبر پختونخوا اور بلوچستان میں دہشتگردوں کیخلاف سیکورٹی فورسز کی کاروائیاں جاری ہیں

سیکیورٹی فورسز نے بولان کے علاقے میں انٹیلی جنس بنیادوں پر کارروائی کرتے ہوئے کالعدم بلوچ لبریشن آرمی (بی ایل اے) سے تعلق رکھنے والے دو دہشت گردوں کو ہلاک کر دیا۔ پولیس ذرائع کے مطابق یہ کارروائی شدت پسندوں کی موجودگی سے متعلق خفیہ اطلاعات پر کی گئی۔ کارروائی کے دوران فائرنگ کے تبادلے میں دو دہشت گرد مارے گئے جبکہ سیکیورٹی اہلکار محفوظ رہے۔ ذرائع کے مطابق ہلاک دہشت گرد شہریوں کی گاڑیاں روکنے، لوٹ مار کرنے اور مسافروں کو ہراساں کرنے میں ملوث تھے۔ کارروائی کے بعد علاقے کو مکمل طور پر محفوظ بنانے کے لیے کلیئرنس آپریشن جاری ہے۔

بلوچستان کے نصیرآباد علاقے میں ریلوے ٹریک کو دھماکہ خیز مواد کے ذریعے اڑا دیا گیا۔ پولیس کے مطابق یہ آئی ای ڈی دھماکہ شہید عزیز بلوچ (نوٹل) پولیس اسٹیشن کی حدود میں ہوا۔ دھماکے میں کوئی جانی یا مالی نقصان نہیں ہوا، تاہم ریلوے ٹریک کا تقریباً تین فٹ حصہ متاثر ہوا۔ پولیس کے مطابق واقعے کے بعد احتیاطی تدابیر کے طور پر پشاور سے کوئٹہ جانے والی جعفر ایکسپریس کو ڈیرہ مراد جمالی ریلوے اسٹیشن پر روک لیا گیا۔ مزید بتایا گیا کہ الطاف آباد ریلوے پل کے قریب 4 سے 5 کلو وزنی آئی ای ڈی دھماکہ ہوا جبکہ 10 کلو وزنی ایک اور آئی ای ڈی کو بروقت ناکارہ بنا دیا گیا۔ پولیس، سی ٹی ڈی، اسپیشل برانچ اور دیگر اداروں نے علاقے کو گھیرے میں لے کر تحقیقات شروع کر دی ہیں۔

بنوں ،ڈومیل آدمی پل کے قریب دہشت گردوں نے واپڈا کے ملازمین پر فائرنگ کی جس کے نتیجے میں دو اہلکار زخمی ہو گئے۔ زخمیوں کی شناخت ڈرائیور عبداللہ خان اور لائن مین نور محمد کے طور پر ہوئی ہے۔ دونوں کی حالت خطرے سے باہر بتائی گئی ہے۔ ذرائع کے مطابق حملہ آوروں نے واپڈا سپرنٹنڈنٹ عمر در علی کو اغوا کرنے کی بھی کوشش کی جو ناکام رہی، جس کے بعد دہشت گرد فرار ہو گئے۔ سیکیورٹی فورسز نے سرچ آپریشن شروع کر دیا ہے۔

سیکیورٹی فورسز نے جانی خیل کے علاقے میں انٹیلی جنس بنیادوں پر کارروائی کرتے ہوئے دہشت گردوں کے ٹھکانے کو نشانہ بنایا۔ کارروائی میں 3 سے 4 دہشت گرد زخمی ہونے کی اطلاعات ہیں جبکہ فورسز کو کوئی نقصان نہیں پہنچا۔ علاقے میں سرچ آپریشن جاری ہے۔

سی ٹی ڈی اور کرک پولیس نے بندہ داؤد شاہ کے پہاڑی علاقے میں انٹیلی جنس بنیادوں پر کارروائی کرتے ہوئے کالعدم تنظیم سے تعلق رکھنے والے کم از کم آٹھ دہشت گردوں کو ہلاک کر دیا۔ پولیس کے مطابق یہ کارروائی گُرگُری میں پانچ پولیس اہلکاروں کی شہادت کے بعد کی گئی۔ علاقے میں کلیئرنس آپریشن جاری ہے۔

سیکیورٹی فورسز نے گوارھو کے علاقے میں دہشت گردی کی ایک بڑی کوشش ناکام بنا دی۔ شمولی پولیس اسٹیشن کی حدود میں دیسی ساختہ بم (آئی ای ڈی) کو بروقت ناکارہ بنا دیا گیا۔ کسی جانی نقصان کی اطلاع نہیں۔ علاقے میں سرچ آپریشن کیا گیا جبکہ تحقیقات جاری ہیں۔

بکاخیل، گورا کے علاقے میں دہشت گردوں نے دھماکہ خیز مواد کے ذریعے ایک اور پل کو اڑا دیا۔ پولیس کے مطابق یہ واقعہ میریان پولیس اسٹیشن کی حدود میں پیش آیا۔ دھماکے سے پل کو شدید نقصان پہنچا تاہم کوئی جانی نقصان نہیں ہوا۔ یاد رہے کہ ایک رات قبل بھی اسی علاقے میں ایک پل کو نشانہ بنانے کی کوشش کی گئی تھی۔

کالعدم حافظ گل بہادر گروپ نے تصدیق کی ہے کہ بنوں میں سیکیورٹی فورسز کی کارروائی کے دوران اس کے پانچ دہشت گرد مارے گئے۔ ہلاک افراد کی شناخت اکرامہ، کلیم اللہ، خالد، اسامہ (بکاخیل) اور ایک نامعلوم دہشت گرد کے طور پر ہوئی ہے۔ کارروائی احمدزئی پولیس اسٹیشن کی حدود میں خفیہ اطلاعات پر کی گئی۔ علاقے کو مکمل طور پر محفوظ بنانے کے لیے مزید کارروائیاں جاری ہیں۔

ترکیہ میں طیارہ اڑان بھرنے کے بعد گر کر تباہ ہوگیا، طیارے حادثے میں لیبیا کے فوجی سربراہ بھی جاں بحق ہوگئے۔

لیبیا کے وزیرِاعظم عبد الحمید دبیبہ نے تصدیق کی ہے کہ لیبیا کے آرمی چیف آف اسٹاف جنرل محمد علی احمد الحداد اور چار دیگر اعلیٰ لیبیائی عہدیدار ترکی کے دارالحکومت انقرہ کے قریب ایک فضائی حادثے میں جاں بحق ہو گئے۔ یہ افسوسناک حادثہ منگل کی شب اس وقت پیش آیا جب یہ وفد انقرہ کے دورے کے بعد وطن واپسی کے لیے روانہ ہو رہا تھا۔وزیرِاعظم عبد الحمید دبیبہ نے اپنے بیان میں اس واقعے کو ایک “دلخراش حادثہ” قرار دیتے ہوئے کہا کہ یہ سانحہ پوری قوم، عسکری ادارے اور عوام کے لیے ایک عظیم نقصان ہے۔ ان کا کہنا تھا“ہم نے ایسے افراد کو کھو دیا ہے جنہوں نے اخلاص، لگن اور ذمہ داری کے ساتھ اپنے وطن کی خدمت کی، اور جو نظم و ضبط، قومی وابستگی اور فرض شناسی کی مثال تھے۔”

ترکی کے وزیرِ داخلہ علی یرلیکایا کے مطابق فالکن 50 بزنس جیٹ نے منگل کی شام 8 بج کر 10 منٹ (17:10 GMT) پر انقرہ کے ایسن بوغا ایئرپورٹ سے طرابلس کے لیے پرواز بھری۔ طیارے سے آخری ریڈیو رابطہ 8 بج کر 52 منٹ (17:52 GMT) پر ہوا۔انہوں نے بتایا کہ پرواز کے دوران ہایمانا ضلع کے اوپر طیارے نے ہنگامی لینڈنگ کی درخواست کی، تاہم اس کے بعد رابطہ قائم نہ ہو سکا۔

ترکی کی جینڈرمیری نے طیارے کا ملبہ انقرہ سے تقریباً 74 کلومیٹر (45 میل) دور ہایمانا ضلع کے علاقے کیسیق کاواک گاؤں کے جنوب میں تقریباً دو کلومیٹر کے فاصلے پر تلاش کر لیا۔

ترکی کی وزارتِ دفاع نے اس سے قبل اعلان کیا تھا کہ جنرل الحداد اس ہفتے سرکاری دورے پر انقرہ آئے تھے، جہاں انہوں نے اپنے ترک ہم منصب اور دیگر اعلیٰ عسکری کمانڈروں سے ملاقاتیں کیں۔ یہ دورہ دونوں ممالک کے درمیان عسکری تعاون کے تناظر میں اہم سمجھا جا رہا تھا۔

جنرل الحداد کی عسکری خدمات
سیاسی تجزیہ کار ٹرائنا کے مطابق جنرل محمد علی احمد الحداد ایک پیشہ ور اور بااصول فوجی تھے جنہیں لیبیا کے مغربی علاقوں میں وسیع احترام حاصل تھا۔انہوں نے کہا“وہ ایک ایسے فوجی تھے جو ہمیشہ قانون کے مطابق چلتے، کسی بھی طاقتور ملیشیا کا ساتھ نہیں دیتے تھے اور اصولوں پر قائم رہتے تھے۔ لیبیائی فوجی ادارے کے لیے یہ واقعی ایک بہت بڑا نقصان ہے۔”ٹرائنا کے مطابق اگرچہ جنرل الحداد کئی دہائیوں تک فوج سے وابستہ رہے، تاہم معمر قذافی کے خلاف بغاوت کے دوران انہوں نے باغیوں کے ساتھ نمایاں کردار ادا کیا تھا۔

چیف آف ڈیفنس فورسز و چیف آف آرمی اسٹاف فیلڈ مارشل سید عاصم منیر نے آج نیشنل ڈیفنس یونیورسٹی (این ڈی یو) اسلام آباد کا دورہ کیا، جہاں انہوں نے قومی سلامتی کے بدلتے ہوئے اور پیچیدہ چیلنجز پر تفصیلی خطاب کیا۔

ڈی جی آئی ایس پی آر کے مطابق اس موقع پر نیشنل سیکیورٹی اینڈ وار کورس میں شریک سول اور عسکری افسران کے پینل کی جانب سے فیلڈ مارشل کو پاکستان کو درپیش سلامتی کے مسائل اور ان سے نمٹنے کے لیے درکار اقدامات پر جامع بریفنگ دی گئی،اپنے خطاب میں فیلڈ مارشل سید عاصم منیر نے کہا کہ پاکستان کو بیک وقت متعدد اور مسلسل نوعیت کے چیلنجز کا سامنا ہے، جن میں روایتی اور غیر روایتی خطرات کے ساتھ ساتھ انٹیلی جنس، سائبر، اطلاعاتی، عسکری اور معاشی محاذ شامل ہیں۔ انہوں نے عالمی، علاقائی اور داخلی سطح پر تیزی سے بدلتے ہوئے سلامتی کے منظرنامے کو انتہائی پیچیدہ قرار دیتے ہوئے کہا کہ ان حالات میں مؤثر دفاع اور استحکام کے لیے ہمہ جہتی تیاری ناگزیر ہے۔فیلڈ مارشل نے زور دیا کہ موجودہ چیلنجز سے نمٹنے کے لیے مسلسل خود کو ڈھالنے کی صلاحیت اور قومی طاقت کے تمام عناصر کے درمیان مربوط ہم آہنگی انتہائی ضروری ہے۔ انہوں نے کہا کہ دشمن عناصر براہِ راست محاذ آرائی کے بجائے بالواسطہ اور مبہم حکمتِ عملی اختیار کر رہے ہیں، جن میں پراکسیز کے ذریعے داخلی کمزوریوں سے فائدہ اٹھانا شامل ہے۔

فیلڈ مارشل سید عاصم منیر نے مستقبل کی قیادت پر زور دیا کہ وہ ان پیچیدہ، کثیرالجہتی اور فکری و ادراکی چیلنجز کو بروقت پہچاننے اور انہیں مؤثر انداز میں ناکام بنانے کی صلاحیت پیدا کرے۔ فیلڈ مارشل سید عاصم منیر نے اس امر پر بھی زور دیا کہ غیر یقینی حالات میں واضح، بروقت فیصلے کرنے کی صلاحیت اور فکری مضبوطی آج کے پھیلے ہوئے اور متنازع سلامتی ماحول میں انتہائی اہم اوصاف ہیں،فیلڈ مارشل نے نیشنل ڈیفنس یونیورسٹی کے کردار کو سراہتے ہوئے کہا کہ این ڈی یو اسٹریٹجک سوچ رکھنے والے رہنماؤں کی تیاری میں کلیدی کردار ادا کر رہا ہے، جو علمی اور پیشہ ورانہ تربیت کو مؤثر پالیسی سازی اور عملی نتائج میں ڈھالنے کی صلاحیت رکھتے ہیں۔ انہوں نے کہا کہ پیشہ ورانہ عسکری تعلیم ادارہ جاتی صلاحیت مضبوط بنانے، مقامی استعداد بڑھانے اور طویل المدتی قومی استحکام کے لیے ایک بنیادی ستون کی حیثیت رکھتی ہے۔ فیلڈ مارشل سید عاصم منیر نے کورس میں شریک افسران کی تجزیاتی سوچ اور فکری معیار کو سراہا اور انہیں دیانت، نظم و ضبط اور بے لوث خدمت کی اقدار پر ثابت قدم رہنے کی تلقین کی۔ نیشنل ڈیفنس یونیورسٹی پہنچنے پر یونیورسٹی کے صدر نے چیف آف آرمی اسٹاف اور چیف آف ڈیفنس فورسز کا پرتپاک استقبال کیا۔

متحدہ عرب امارات کے پاکستان میں سفیر، عزت مآب سالم محمد سالم البواب الزابی نے آج وزیراعظم ہاوس اسلام آباد میں وزیرِاعظم محمد شہباز شریف سے ملاقات کی۔

ملاقات میں وزیراعظم کےمعاون خصوصی طارق فاطمی اور سیکریٹری خارجہ آمنہ بلوچ بھی موجود تھیں۔ملاقات کے دوران وزیراعظم نے سفیر کا پرتپاک خیرمقدم کیا اور انہیں پاکستان میں انکی حالیہ تقرری پر مبارکباد دی۔ وزیراعظم نے پاکستان اور متحدہ عرب امارات کے درمیان دیرینہ اور برادرانہ تعلقات کو سراہتے ہوئے کہا کہ دونوں ممالک کے تعلقات کئی دہائیوں سے باہمی احترام، دوستی اور قریبی تعاون پر مبنی ہیں۔

وزیراعظم نے متحدہ عرب امارات کی قیادت کے لیے نیک تمناوں اور خیرسگالی کے جذبات کا اظہار کرتے ہوئے کہا کہ وہ متحدہ عرب امارات کے صدر اور ابوظہبی کے حکمران، عزت مآب شیخ محمد بن زاید النہیان کے آئندہ دورۂ پاکستان کے منتظر ہیں۔وزیرِاعظم نے دونوں ممالک کے درمیان دوطرفہ تجارت کے حجم پر اطمینان کا اظہار کرتے ہوئے اس امر پر زور دیا کہ اقتصادی تعلقات کو مزید فروغ دینے، تجارت اور سرمایہ کاری کے مواقع بڑھانے کے ساتھ توانائی، معدنیات، آئی ٹی، ریلوے اور ہوا بازی جیسے شعبوں میں تعاون کو مزید وسعت دینے کی ضرورت ہے۔وزیراعظم نے پاکستان اور متحدہ عرب امارات کے تعلقات کو مزید مضبوط بنانے کے لیے پاکستان کے پختہ عزم کا اعادہ کیا اور پاکستان کی اقتصادی ترقی اور استحکام کے لیے اہم شعبوں میں یو اے ای کو سرمایہ کاری کی دعوت دی۔ انہوں نے مشکل وقت میں پاکستان کے لیے متحدہ عرب امارات کی مسلسل حمایت، بشمول انسانی ہمدردی کی بنیاد پر امداد اور ترقیاتی منصوبوں، کو بھی سراہا۔

سفیر سالم محمد سالم البواب الزابی نے وزیراعظم کا شکریہ ادا کیا اور متحدہ عرب امارات کے صدر عزت مآب شیخ محمد بن زاید النہیان کی جانب سے نیک خواہشات اور خیرسگالی کا پیغام پہنچایا۔انہوں نے پاکستان کے ساتھ تمام شعبوں میں شراکت داری کو مزید گہرا کرنے کے لیے متحدہ عرب امارات کے پختہ عزم کا اعادہ کیا اور وزیراعظم کو یقین دلایا کہ وہ دونوں ممالک کے باہمی مفاد میں تعاون کے نئے مواقع تلاش کرنے کے لیے بھرپور کوشش کریں گے۔