Category: صحت

‎ڈرگ ریگولیٹری اتھارٹی پاکستان نے صحتِ عامہ کے تحفظ کے لیے اہم اقدام کرتے ہوئے 11 مختلف کمپنیوں کی 17 آٹو ڈس ایبل سرنجز کو غیر معیاری قرار دے کر ان کی فروخت اور استعمال پر فوری پابندی عائد کر دی ہے۔
‎ڈریپ کی جانب سے جاری کردہ میڈیکل پراڈکٹ الرٹ کے مطابق ان سرنجز کے نمونوں کی جانچ سینٹرل ڈرگ لیبارٹری اور ڈرگ ٹیسٹنگ لیبارٹری کراچی میں کی گئی، جہاں یہ مصنوعات معیار پر پوری نہ اتر سکیں۔
‎رپورٹ کے مطابق 3 سے 5 ایم ایل کی یہ سرنجز “آٹو ڈس ایبلیٹی ٹیسٹ” میں ناکام رہیں، جس کا مطلب ہے کہ استعمال کے بعد ان کا خودکار طور پر ناکارہ ہونے والا نظام درست طریقے سے کام نہیں کر رہا۔
‎حکام کے مطابق ان سرنجز کو دوبارہ استعمال کیا جا سکتا ہے، جو صحتِ عامہ کے لیے انتہائی خطرناک ثابت ہو سکتا ہے کیونکہ اس سے ہیپاٹائٹس بی، ہیپاٹائٹس سی اور ایچ آئی وی جیسے موذی امراض پھیلنے کا خدشہ بڑھ جاتا ہے۔
‎ڈریپ نے بتایا کہ ان غیر معیاری سرنجز کی تیاری میں چین، پنجاب اور خیبرپختونخوا سے تعلق رکھنے والی کمپنیاں شامل ہیں، جبکہ دو چینی کمپنیوں کے تیار کردہ تین بیجز بھی متاثرہ فہرست میں شامل ہیں۔
‎ریگولیٹری اتھارٹی نے تمام صوبائی حکومتوں، محکمہ صحت اور متعلقہ اداروں کو ہنگامی بنیادوں پر کارروائی کی ہدایت جاری کرتے ہوئے کہا ہے کہ مارکیٹ میں موجود متاثرہ بیجز فوری ضبط کیے جائیں۔
‎ڈریپ نے فیلڈ فورس کو ملک بھر میں مارکیٹ سروے کرنے اور ان سرنجز کی سپلائی روکنے کے احکامات بھی جاری کیے ہیں۔
‎اس کے علاوہ مینوفیکچررز، امپورٹرز اور ڈسٹری بیوٹرز کو ہدایت دی گئی ہے کہ وہ متاثرہ سرنجز فوری طور پر مارکیٹ سے واپس منگوائیں۔
‎ماہرین صحت کا کہنا ہے کہ غیر معیاری سرنجز کا استعمال پاکستان میں پہلے سے موجود ہیپاٹائٹس اور دیگر متعدی بیماریوں کے بحران کو مزید سنگین بنا سکتا ہے، اس لیے عوام کو صرف مستند اور محفوظ طبی مصنوعات استعمال کرنی چاہئیں۔

‎پنجاب حکومت نے صوبے بھر میں پرائمری اور سیکنڈری صحت کے شعبے کے 2,115 جنرل کیڈر ڈاکٹروں کے مستقل عہدے ختم کرکے انہیں عارضی عہدوں میں تبدیل کر دیا ہے، جس کے بعد طبی برادری میں شدید ردعمل پیدا ہوا اور اسے صحت کے نظام کے لیے ایک بڑا نقصان قرار دیا گیا ہے۔
‎یہ فیصلہ صوبائی کابینہ کے 15 دسمبر کے اجلاس میں منظور کیے گئے قواعد کے تحت کیا گیا، جس کے مطابق سیکنڈری سطح کے عملے کو خصوصی مراعات کے ساتھ بھرتی کیا جائے گا۔ محکمہ مالیات نے بھی اس کی منظوری دی اور اتنے ہی نئے عارضی عہدے تخلیق کیے۔
‎ان مختلف زمروں کے جنرل کیڈر اور کنسلٹنٹ ڈاکٹروں کے عہدے ضلعی اور تحصیل ہیڈکوارٹر اسپتالوں سے منسلک تھے، جو پرائمری اور سیکنڈری ہیلتھ ڈیپارٹمنٹ کے انتظامی کنٹرول میں تھے۔ ڈاکٹروں کا کہنا ہے کہ اس اقدام سے صحت کا نظام شدید متاثر ہوگا، کیونکہ روزانہ ڈاکٹروں کی تبدیلی سے مریضوں کو یہ معلوم نہیں ہوگا کہ پہلی ملاقات میں کس ڈاکٹر سے ملاقات ہوئی اور دوسری ملاقات میں کس سے ہوگی۔
ایک سرکاری اہلکار کے مطابق ختم کیے گئے عہدے گزشتہ ایک سال سے خالی تھے اور انہیں "عارضی عہدے ” قرار دیا گیا۔ انہوں نے کہا کہ یہ اقدام حکومت کی وسیع اصلاحاتی حکمت عملی کا حصہ ہے تاکہ انتظامی اخراجات کم کیے جائیں اور مالی استحکام بہتر بنایا جا سکے۔ اس کا تعلق بین الاقوامی مالیاتی اداروں کے ساتھ کیے گئے وعدوں سے بھی ہے۔
دوسری جانب پاکستان میڈیکل ایسوسی ایشن نے پنجاب حکومت کے اس فیصلے کی سخت مذمت کی ہے۔ ایسوسی ایشن کے صدر پروفیسر ڈاکٹر شاہد ملک نے کہا کہ گریڈ 18، 19 اور 20 کے مستقل عہدے ختم کرکے انہیں عارضی عہدوں میں تبدیل کرنا ڈاکٹروں کے ساتھ ناانصافی ہے جو پہلے سے مستقل بنیادوں پر خدمات انجام دے رہے ہیں۔
‎انہوں نے کہا کہ محکمہ مالیات کی موجودہ بیوروکریسی حکومت کو گمراہ کر رہی ہے اور مختص فنڈز کو دیگر بجٹ خانوں میں منتقل کر رہی ہے، جو نہایت افسوسناک اور قابل مذمت ہے۔
‎پروفیسر شاہد ملک نے خبردار کیا کہ عارضی یا یومیہ اجرت پر ڈاکٹروں کی تقرری سے پورا صحت کا نظام متاثر ہوگا اور تربیت یافتہ ڈاکٹروں کے کیریئر اور ترقی کے مواقع محدود ہو جائیں گے، جس کا براہِ راست اثر مریضوں پر پڑے گا۔ انہوں نے چیف جسٹس لاہور ہائی کورٹ سے اپیل کی ہے کہ فوری نوٹس لے کر محکمہ مالیات کا جاری کردہ نوٹیفکیشن معطل کیا جائے تاکہ بیوروکریسی کو ایسے اقدامات کرنے سے روکا جا سکے اور مستقبل میں دوبارہ ایسے اقدامات نہ کیے جائیں۔
‎مزید برآں، اس اقدام کے طبی نظام پر منفی اثرات واضح ہیں۔ مستقل ڈاکٹروں کے عہدوں کو عارضی پوسٹس میں بدلنے سے اسپتالوں میں مریضوں کے لیے علاج کا تسلسل متاثر ہوگا۔ روزانہ ڈاکٹروں کی تبدیلی سے مریض نہیں جان پائیں گے کہ ان کی پہلی ملاقات کے ڈاکٹر سے دوسری ملاقات میں کس ڈاکٹر سے ہو رہی ہے۔
‎یہ فیصلہ ڈاکٹروں کی پیشہ ورانہ ترقی اور ترقیاں بھی متاثر کرے گا، کیونکہ گریڈ 18، 19 اور 20 میں ترقی کے لیے مستند عہدوں کی دستیابی ضروری ہے۔ اس سے نہ صرف کیریئر کے مواقع محدود ہوں گے بلکہ صحت کے نظام کی مجموعی کارکردگی بھی متاثر ہوگی۔

حالیہ سائنسی تحقیق میں انکشاف ہوا ہے کہ ٹیٹو بنانے کے لیے استعمال ہونے والی سیاہی انسانی مدافعتی نظام کو متاثر کر سکتی ہے۔
جرنل میں شائع ہونے والی تحقیق کے مطابق مدافعتی خلیات ٹیٹو کی سیاہی کے ذرات کو پہچان لیتے ہیں اور انہیں لمف نوڈز تک منتقل کر دیتے ہیں، جہاں یہ وقت کے ساتھ جمع ہو کر سوزش کا باعث بنتے ہیں۔
تحقیق میں یہ بھی سامنے آیا کہ ٹیٹو کی سیاہی ویکسین کے اثرات پر بھی اثر ڈال سکتی ہے، نتائج کے مطابق ٹیٹو رکھنے والے افراد میں کووِڈ 19 ویکسین کا اثر کچھ حد تک کم ہو سکتا ہے جبکہ غیر فعال فلو ویکسین کے لیے مدافعتی ردعمل بہتر دیکھا گیا ہے۔
‎یونیورسٹی آف ویسٹرن اونٹاریو کی کیمسٹ یولانڈا ہیڈبرگ کے مطابق جدید دور میں استعمال ہونے والی ٹیٹو سیاہیاں ماضی کے مقابلے میں کہیں زیادہ محفوظ ہیں۔

‎انہوں نے مزید وضاحت کی کہ آج کل زیادہ تر ٹیٹو سیاہی مصنوعی رنگوں (Synthetic Pigments) پر مشتمل ہوتی ہے، جس میں ایزو ڈائیز شامل ہیں، ان رنگوں کو حفاظتی خول میں بند کیا جاتا ہے تاکہ وہ جلد میں ٹوٹ پھوٹ کا شکار نہ ہوں۔
‎تاہم، ماہرین کے مطابق خطرات اب بھی موجود ہیں، سب سے عام مسئلہ الرجک ردِعمل ہے اور ایک بار اگر الرجی پیدا ہو جائے تو ٹیٹو کو مکمل طور پر ختم کرنا ممکن نہیں ہوتا۔
‎تحقیق میں یہ بھی بتایا گیا کہ لیزر کے ذریعے ٹیٹو ختم کرنے سے رنگ کے ذرات جسم میں مزید پھیل سکتے ہیں۔
‎مزید برآں، حالیہ طویل المدتی مطالعات سے پتا چلا ہے کہ ٹیٹو رکھنے والے افراد میں لمفوما اور جلد کے کینسر کا خطرہ معمولی حد تک بڑھ جاتا ہے، اگرچہ یہ خطرہ زیادہ نہیں، لیکن ماہرین اس بات پر متفق ہیں کہ ٹیٹوز صحت پر معمولی مگر قابلِ پیمائش اثرات ضرور ڈالتے ہیں۔


اوپن اے آئی کے مقبول آرٹیفیشل انٹیلی جنس چیٹ بوٹ چیٹ جی پی ٹی کو دنیا بھر میں روزانہ کروڑوں افراد استعمال کر رہے ہیں۔ کمپنی کی جانب سے جاری ایک تازہ رپورٹ میں انکشاف کیا گیا ہے کہ روزانہ تقریباً 4 کروڑ صارفین صحت سے متعلق سوالات کے لیے چیٹ جی پی ٹی سے مدد لیتے ہیں۔
رپورٹ کے مطابق صارفین چیٹ جی پی ٹی سے بیماریوں کی علامات، ادویات، علاج کے طریقوں اور دیگر طبی معلومات کے بارے میں سوالات کرتے ہیں۔ بتایا گیا ہے کہ چیٹ جی پی ٹی سے کیے جانے والے مجموعی سوالات میں 5 فیصد سے زائد کا تعلق صحت کے شعبے سے ہوتا ہے۔
‎اعداد و شمار کے مطابق چیٹ جی پی ٹی کے مجموعی 80 کروڑ صارفین میں سے تقریباً 20 کروڑ افراد ہر ہفتے کم از کم ایک بار صحت سے متعلق کوئی نہ کوئی سوال ضرور پوچھتے ہیں۔ ان میں سے بیشتر صارفین سر درد کی نوعیت، کسی پیچیدہ تشخیص کے مفہوم یا نئی ادویات کے ممکنہ اثرات، جیسے تھکن، کے بارے میں معلومات حاصل کرنے کی کوشش کرتے ہیں۔
‎رپورٹ میں مزید بتایا گیا کہ 55 فیصد صارفین علامات کو سمجھنے کے لیے چیٹ جی پی ٹی کا سہارا لیتے ہیں، 52 فیصد صحت سے متعلق عمومی سوالات پوچھتے ہیں، جبکہ 48 فیصد طبی اصطلاحات یا ہدایات کو سمجھنے کے لیے اس اے آئی ٹول کو استعمال کرتے ہیں۔ اسی طرح 44 فیصد افراد علاج کے مختلف آپشنز کے بارے میں معلومات حاصل کرتے ہیں۔
‎اوپن اے آئی کے مطابق اے آئی ٹیکنالوجی خاص طور پر ان افراد کے لیے مددگار ثابت ہو رہی ہے جنہیں فوری طور پر ڈاکٹر یا طبی سہولیات تک رسائی حاصل نہیں ہوتی۔