Category: صحت

کراچی میں منکی پاکس کا ایک اور کیس سامنے آگیا، جس کے بعد ملک میں اس وائرس کے تصدیق شدہ کیسز کی تعداد 41 ہوگئی۔

حکام کے مطابق اندرون سندھ سے تعلق رکھنے والے 19 سالہ نوجوان کو گزشتہ روز نیپا اسپتال لایا گیا تھا۔ نوجوان کے جسم پر دانے موجود تھے، جس پر ڈاکٹروں نے اس کے سیمپلز ٹیسٹ کے لیے بھجوائے۔ پی سی آر ٹیسٹ میں ایم پاکس کی تصدیق ہوگئی۔

حکام کے مطابق کراچی میں ایم پاکس کے اب تک 13 کیسز رپورٹ ہوچکے ہیں، جبکہ سندھ بھر میں کیسز کی تعداد 28 ہوگئی ہے۔ ملک میں مجموعی طور پر منکی پاکس کے تصدیق شدہ کیسز 41 تک پہنچ گئے ہیں۔

منکی پاکس کیا ہے؟

منکی پاکس، جسے اب ایم پاکس بھی کہا جاتا ہے، ایک وائرل بیماری ہے جو بنیادی طور پر جانوروں سے انسانوں میں منتقل ہوسکتی ہے، تاہم متاثرہ شخص سے دوسرے انسان میں بھی پھیل سکتی ہے۔ یہ وائرس پاکس وائرسز کے خاندان سے تعلق رکھتا ہے۔

منکی پاکس کا آغاز افریقا سے بتایا جاتا ہے اور اس کی مختلف اقسام وسطی اور مغربی افریقا میں پائی جاتی ہیں۔ انسانوں میں اس کا پہلا تصدیق شدہ کیس 1970 میں ڈیموکریٹک ریپبلک آف کانگو میں ایک بچے میں سامنے آیا تھا۔

منکی پاکس کی علامات کیا ہیں؟

ماہرین کے مطابق منکی پاکس کی علامات چیچک سے ملتی جلتی ہوسکتی ہیں، تاہم عام طور پر اس کی شدت چیچک کے مقابلے میں کم ہوتی ہے۔

متاثرہ شخص میں ابتدائی طور پر بخار، سر درد، جسم میں درد، کمزوری اور بعض صورتوں میں سانس لینے میں دشواری جیسی علامات ظاہر ہوسکتی ہیں، جس کے بعد جسم پر دانے یا چھالے نمودار ہوجاتے ہیں۔

یہ دانے جسم کے مختلف حصوں پر ظاہر ہوسکتے ہیں اور ان میں پیپ بھی بن سکتی ہے۔ مریض کو خارش، بے چینی اور جسمانی تکلیف کا سامنا بھی ہوسکتا ہے۔

کیا منکی پاکس جان لیوا ہوسکتا ہے؟

ماہرین کے مطابق زیادہ تر مریض صحت یاب ہوجاتے ہیں، تاہم بیماری کی شدت بڑھنے کی صورت میں یہ جان لیوا بھی ثابت ہوسکتی ہے۔ بیماری کی شدت کا انحصار وائرس کی قسم اور مریض کی مجموعی صحت سمیت مختلف عوامل پر ہوتا ہے۔

منکی پاکس سے کیسے بچا جاسکتا ہے؟

منکی پاکس سے بچاؤ کے لیے متاثرہ شخص سے قریبی اور غیر ضروری میل جول سے گریز کرنا چاہیے۔ اگر کسی متاثرہ شخص کی دیکھ بھال ضروری ہو تو ماسک، دستانوں اور دیگر حفاظتی تدابیر کا استعمال کیا جائے۔

جنگلی یا مشتبہ بیمار جانوروں سے براہِ راست رابطے سے بھی گریز کرنا چاہیے اور ہاتھوں کی صفائی کا خاص خیال رکھنا چاہیے۔

اگر کسی شخص میں منکی پاکس کی علامات ظاہر ہوں تو اسے دوسروں سے الگ رہنا چاہیے اور طبی ماہرین سے رابطہ کرنا چاہیے۔ متاثرہ شخص کے زیرِ استعمال کپڑے، تولیے اور دیگر اشیا کو بھی احتیاط سے صاف کیا جائے تاکہ وائرس کے پھیلاؤ کا خطرہ کم کیا جاسکے۔

جاپانی حکومت نے پاکستان میں تپِ دق (ٹی بی) کی بروقت تشخیص اور اسکریننگ کے لیے آلات اور گاڑی کی خریداری کی غرض سے ڈوپسی فاؤنڈیشن کو 21 ملین ین، تقریباً ایک لاکھ 42 ہزار 500 امریکی ڈالر کی گرانٹ فراہم کرنے کا فیصلہ کیا ہے۔

گرانٹ کے معاہدے پر یکم ستمبر 2026 کو پاکستان میں جاپان کے سفیر اکامٹسو شیوچی اور ڈوپسی فاؤنڈیشن کے نمائندے نے دستخط کیے۔ اس منصوبے کا مقصد پسماندہ اور بنیادی صحت کی سہولیات سے محروم آبادیوں تک ٹی بی کی تشخیص سمیت دیگر ضروری طبی خدمات پہنچانا ہے۔

ڈوپسی فاؤنڈیشن کئی سال سے پاکستان کی پسماندہ کمیونٹیز کو بنیادی صحت کی سہولیات فراہم کرنے کے لیے کام کر رہی ہے۔ منصوبے کے تحت اسلام آباد، راولپنڈی اور ضلع چکوال میں مکمل طور پر لیس موبائل ہیلتھ یونٹ تعینات کیا جائے گا۔

موبائل ہیلتھ یونٹ کے ذریعے پسماندہ علاقوں کے شہریوں کو ڈیجیٹل چیسٹ ریڈیوگرافی، ٹی بی اسکریننگ، خاندانی منصوبہ بندی سے متعلق مشاورت اور بنیادی طبی سہولیات فراہم کی جائیں گی۔

منصوبے کے تحت ٹی بی کی تشخیص کے لیے جدید کمپیکٹ ایکسرے سسٹم کے ساتھ مصنوعی ذہانت (اے آئی) ٹیکنالوجی بھی استعمال کی جائے گی، جس سے بیماری کی بروقت نشاندہی اور اسکریننگ کے عمل کو مزید مؤثر بنانے میں مدد ملے گی۔

اس منصوبے کے ذریعے ہر سال تقریباً 20 ہزار افراد کو معیاری طبی اسکریننگ کی سہولت فراہم کرنے کا ہدف مقرر کیا گیا ہے، جس سے دور دراز اور پسماندہ علاقوں میں رہنے والے افراد کو بھی جدید تشخیصی سہولیات تک رسائی حاصل ہوسکے گی۔

جاپانی سفیر اکامٹسو شیوچی نے کہا کہ بیماری کی بروقت تشخیص زندگیوں کو بچانے اور خاندانوں کو بیماری کے خطرے سے محفوظ رکھنے میں براہِ راست اہم کردار ادا کرتی ہے۔

انہوں نے امید ظاہر کی کہ یہ منصوبہ پاکستان میں بنیادی صحت کی سہولیات کی فراہمی میں معاون ثابت ہوگا اور جاپان اور پاکستان کے درمیان دیرینہ دوستانہ تعلقات کو مزید مضبوط بنانے میں بھی کردار ادا کرے گا۔

محکمہ اسپیشلائزڈ ہیلتھ کیئر اینڈ میڈیکل ایجوکیشن نے پنجاب کے تمام طبی درسگاہوں اور ہسپتالوں میں آتشزدگی کے واقعات کی روک تھام اور برقی حفاظت کے مؤثر انتظامات یقینی بنانے کی ہدایت کردی ہے۔

محکمے کی جانب سے صوبے کے طبی اداروں اور ہسپتالوں کو باقاعدہ مراسلہ جاری کرتے ہوئے میڈیکل انسٹیٹیوشنز کے سربراہان سے 24 گھنٹے کے اندر حفاظتی اقدامات پر عملدرآمد کی تصدیق شدہ رپورٹ طلب کرلی گئی ہے۔

مراسلے میں ہدایت کی گئی ہے کہ ہسپتالوں میں الیکٹریکل سیفٹی کو ترجیحی بنیادوں پر یقینی بنایا جائے اور بجلی کے نظام کا تازہ لوڈ اسسمنٹ سرٹیفکیٹ حاصل کیا جائے، تاکہ یہ معلوم کیا جاسکے کہ منظور شدہ برقی لوڈ ہسپتال کی موجودہ اور مستقبل کی ضروریات کے لیے کافی ہے یا نہیں۔

محکمہ صحت نے طبی اداروں کی انتظامیہ کو ہدایت کی ہے کہ ہسپتالوں میں مقررہ مقامات پر واٹر ہائیڈرنٹس، آگ بجھانے والے آلات اور دیگر ضروری حفاظتی سامان مناسب تعداد میں دستیاب رکھا جائے جبکہ ہنگامی صورتحال میں ان تک عملے اور ریسکیو اہلکاروں کی آسان رسائی بھی یقینی بنائی جائے۔

مراسلے کے مطابق آگ بجھانے والے آلات کی باقاعدگی سے جانچ، معائنہ اور ضروری مرمت و دیکھ بھال بھی کی جائے تاکہ کسی بھی ہنگامی صورتحال میں یہ آلات فوری طور پر قابل استعمال ہوں۔

محکمہ اسپیشلائزڈ ہیلتھ نے ہسپتال انتظامیہ کو ریسکیو 1122 کے تعاون سے طبی عملے اور دیگر متعلقہ ملازمین کو آگ سے بچاؤ، ہنگامی صورتحال سے نمٹنے اور حفاظتی اقدامات کے حوالے سے تربیت دلوانے کی بھی ہدایت کی ہے۔

مراسلے میں واضح کیا گیا ہے کہ ہسپتالوں اور طبی درسگاہوں میں برقی حفاظت سے متعلق تمام ضروری اقدامات فوری طور پر مکمل کیے جائیں اور حفاظتی انتظامات میں کسی قسم کی غفلت نہ برتی جائے۔

‎ڈرگ ریگولیٹری اتھارٹی پاکستان نے صحتِ عامہ کے تحفظ کے لیے اہم اقدام کرتے ہوئے 11 مختلف کمپنیوں کی 17 آٹو ڈس ایبل سرنجز کو غیر معیاری قرار دے کر ان کی فروخت اور استعمال پر فوری پابندی عائد کر دی ہے۔
‎ڈریپ کی جانب سے جاری کردہ میڈیکل پراڈکٹ الرٹ کے مطابق ان سرنجز کے نمونوں کی جانچ سینٹرل ڈرگ لیبارٹری اور ڈرگ ٹیسٹنگ لیبارٹری کراچی میں کی گئی، جہاں یہ مصنوعات معیار پر پوری نہ اتر سکیں۔
‎رپورٹ کے مطابق 3 سے 5 ایم ایل کی یہ سرنجز “آٹو ڈس ایبلیٹی ٹیسٹ” میں ناکام رہیں، جس کا مطلب ہے کہ استعمال کے بعد ان کا خودکار طور پر ناکارہ ہونے والا نظام درست طریقے سے کام نہیں کر رہا۔
‎حکام کے مطابق ان سرنجز کو دوبارہ استعمال کیا جا سکتا ہے، جو صحتِ عامہ کے لیے انتہائی خطرناک ثابت ہو سکتا ہے کیونکہ اس سے ہیپاٹائٹس بی، ہیپاٹائٹس سی اور ایچ آئی وی جیسے موذی امراض پھیلنے کا خدشہ بڑھ جاتا ہے۔
‎ڈریپ نے بتایا کہ ان غیر معیاری سرنجز کی تیاری میں چین، پنجاب اور خیبرپختونخوا سے تعلق رکھنے والی کمپنیاں شامل ہیں، جبکہ دو چینی کمپنیوں کے تیار کردہ تین بیجز بھی متاثرہ فہرست میں شامل ہیں۔
‎ریگولیٹری اتھارٹی نے تمام صوبائی حکومتوں، محکمہ صحت اور متعلقہ اداروں کو ہنگامی بنیادوں پر کارروائی کی ہدایت جاری کرتے ہوئے کہا ہے کہ مارکیٹ میں موجود متاثرہ بیجز فوری ضبط کیے جائیں۔
‎ڈریپ نے فیلڈ فورس کو ملک بھر میں مارکیٹ سروے کرنے اور ان سرنجز کی سپلائی روکنے کے احکامات بھی جاری کیے ہیں۔
‎اس کے علاوہ مینوفیکچررز، امپورٹرز اور ڈسٹری بیوٹرز کو ہدایت دی گئی ہے کہ وہ متاثرہ سرنجز فوری طور پر مارکیٹ سے واپس منگوائیں۔
‎ماہرین صحت کا کہنا ہے کہ غیر معیاری سرنجز کا استعمال پاکستان میں پہلے سے موجود ہیپاٹائٹس اور دیگر متعدی بیماریوں کے بحران کو مزید سنگین بنا سکتا ہے، اس لیے عوام کو صرف مستند اور محفوظ طبی مصنوعات استعمال کرنی چاہئیں۔