Baaghi TV

Category: بین الاقوامی

  • خواتین کے قتل کی شرح میں خطرناک حد تک اضافہ

    خواتین کے قتل کی شرح میں خطرناک حد تک اضافہ

    جنیوا: اقوام متحدہ کی رپورٹ میں انکشاف کیا گیا ہے کہ خواتین کے قتل کی شرح میں خطرناک حد تک اضافہ دیکھنے میں آیا ہے، دنیا بھر میں ہر 10 منٹ میں ایک عورت شریک حیات ، بوائے فرینڈ یا پھر اپنے کسی رشتے دار کے ہاتھوں قتل کردی جاتی ہے۔

    باغی ٹی وی : 107 ممالک کے دستیاب اعداد و شمار پر مبنی رپورٹ خواتین پر تشدد کے خلاف 25 ویں عالمی دن پر یو این ویمن اور اقوام متحدہ کے ادارہ برائے منشیات و جرائم (یو این او ڈی سی) کی جانب سے مشترکہ طور پر جاری کی گئی ہے۔

    رپورٹ کے مطابق 2023 کے دوران ہر 10 منٹ میں ایک عورت کو اپنے کسی ساتھی، شریک حیات یا پھر کسی نہ کسی رشتے دار کے ہاتھوں جان سے جانا پڑا، گزشتہ سال تقریباً 85 ہزار خواتین کو قتل کیا گیا، اس اعداد و شمار میں تقریباً 60 فیصد یا 51 ہزار سے زائد عورتیں اپنے ساتھی یا پھر کسی نہ کسی رشتے دار کے ہاتھوں قتل کی گئیں،دنیا بھر میں عورتوں کے قتل کی شرح روزانہ اوسطاً 140 ہے جہاں گھر میں لڑکیوں اور خواتین کو قتل کیےجانےکا خطرہ سب سے زیادہ موجود ہے،جبکہ خواتین کے مقابلے میں مردوں کو قتل کیے جانے کا امکان 4گنا زیادہ یعنی 80 فیصد بتایا گیا ہے۔

    رپورٹ کے مطابق افریقہ میں شریک حیات اور خاندان کے ہاتھوں قتل کی جانے والی خواتین کی تعداد سب سے زیادہ ہے جہاں 2023 میں 21 ہزار 700 خواتین کو قتل کیا گیا، اس کے بعد امریکا اور اوشیانا کا نمبر ہے جب کہ خواتین کے قتل کی سب سے کم شرح یورپ اور ایشیا میں دیکھی گئی۔

    یو این ویمن کی ایگزیکٹو ڈائریکٹر سیما بہوس کا کہنا ہے کہ خواتین کے خلاف تشدد کو روکنے کے لیے مضبوط قانون سازی، اعلیٰ سطح کی حکومتی جوابدہی اور خواتین کے حقوق کیلئے کام کرنے والی تنظیموں کیلئے جاری فنڈز میں اضافے کی ضرورت ہے-

  • دوسرا ون ڈے:صائم ایوب کی شاندار سنچری،زمبابوے کو 10 وکٹوں سے شکست

    دوسرا ون ڈے:صائم ایوب کی شاندار سنچری،زمبابوے کو 10 وکٹوں سے شکست

    بلاوائیو: پاکستانی اوپنر صائم ایوب کی شاندار سنچری،زمبابوے کو دوسرے ون ڈے میں 10 وکٹوں سے شکست دے کر سیریز ایک ایک سے برابر کر دی۔

    باغی ٹی و ی: پاکستان اور زمبابوے کے درمیان 3 ون ڈے میچز کی سیریز کا آج دوسرا میچ بلاوائیو میں کھیلا گیا جہاں میزبان ٹیم نے پاکستان کے خلاف ٹاس جیت کر بیٹنگ کا فیصلہ کیا،میزبان ٹیم 32.3 اوورز میں 145 رنز بناکر پویلین لوٹ گئی، زمبابوے نے پاکستان کو جیت کے لیے 146 رنز کا ہدف دیا۔

    پاکستان کی جانب سے ڈیبیو کرنے والے ابرار احمد نے 4، سلمان علی آغا نے 3 اور صائم ایوب اور فیصل اکرم نے ایک ایک کھلاڑی کو آؤٹ کیا،جواب میں 146 رنز کا ہدف پاکستان نے بغیر وکٹ گنوائے 19ویں اوور میں با آسانی حاصل کرلیا، صائم ایوب نےون ڈے کیریئر کی پہلی سنچری اسکور کرتے ہوئے 113 رنز بنائے جبکہ عبداللہ شفیق 32 رنز بناکر ناقابل شکست رہے۔

    واضح رہے کہ بارش سے متاثرہ پہلےمیچ میں زمبابوے نے ڈک ورتھ لوئیس میتھڈ کے تحت 80 رنز سے کامیابی حاصل کی تھی، بلاوائیو میں کھیلے گئے میچ میں پاکستان کی جانب سے 2 کھلاڑی ابرار احمد اور طیب طاہر پہلی مرتبہ پاکستان کی جانب سے ون ڈے انٹرنیشنل کھیل رہے تھے۔

  • ٹرمپ کا تین ممالک سے آنے والی اشیاء پر بھاری ٹیکس کا اعلان

    ٹرمپ کا تین ممالک سے آنے والی اشیاء پر بھاری ٹیکس کا اعلان

    نومنتخب امریکی صدر ڈونلڈ ٹرمپ نے تین ممالک سے آنے والی اشیاء پر بھاری ٹیکس عائد کرنے کا اعلان کیا ہے۔

    امریکی میڈیا کے مطابق، ڈونلڈ ٹرمپ نے اپنی صدارت کا عہدہ سنبھالنے کے بعد میکسیکو، کینیڈا اور چین سے آنے والی اشیاء پر ٹیکس لگانے کا فیصلہ کیا۔ ٹرمپ نے کہا کہ وہ 20 جنوری کو میکسیکو اور کینیڈا سے آنے والی تمام اشیاء پر 25 فیصد ٹیرف عائد کرنے کی منظوری دیں گے۔ یہ ٹیرف اس وقت تک نافذ رہے گا جب تک ان ممالک سے منشیات کی اسمگلنگ اور غیر قانونی تارکین وطن کی امریکا میں داخلے کی روک تھام نہیں کی جاتی۔ٹرمپ نے مزید کہا کہ چین سے آنے والی اشیاء پر بھی موجودہ ٹیرف سے 10 فیصد زیادہ ٹیکس عائد کیا جائے گا، اور یہ اضافی ٹیکس اس وقت تک برقرار رہے گا جب تک چین منشیات کی اسمگلنگ روکنے کے لیے موثر اقدامات نہیں کرتا۔ چینی حکام نے وعدہ کیا تھا کہ وہ منشیات کے اسمگلروں کے خلاف سخت کارروائی کریں گے۔

    اس حوالے سے چینی سفارتخانے کے ترجمان نے کہا کہ چین اور امریکا منشیات کے خلاف اقدامات پر رابطے میں رہیں گے اور چین کا موقف ہے کہ دونوں ممالک کے درمیان اقتصادی اور تجارتی تعلقات باہمی فائدے کی بنیاد پر ہیں۔ انہوں نے یہ بھی کہا کہ تجارتی یا ٹیرف کی جنگ میں کسی کو بھی فتح حاصل نہیں ہوگی۔

  • آئی پی ایل فرنچائز راجستھان رائلز نے 13سالہ کرکٹر کو اپنی ٹیم کے لیے خرید لیا

    آئی پی ایل فرنچائز راجستھان رائلز نے 13سالہ کرکٹر کو اپنی ٹیم کے لیے خرید لیا

    ممبئی: 13 سالہ بھارتی کرکٹر ویبھوو سوریاونشی انڈین پریمیئر لیگ ( آئی پی ایل) کا حصہ بننے والے کم عمر ترین کھلاڑی بن گئے۔

    باغی ٹی وی : انڈین پریمیئر لیگ( آئی پی ایل) سیزن 2025 کے لیے کھلاڑیوں کی بولی کی 2 روزہ تقریب گزشتہ روز سعودی عرب کے شہر جدہ میں شروع ہوئی جس میں فرنچائزز نے اپنی ٹیم میں شامل کرنے کے لیے بہترین کھلاڑیوں کو کروڑوں روپے میں خریدا۔

    فرنچائزز نے جہاں بڑے ناموں کو اپنی ٹیم کا حصہ بنایا وہیں ایک 13 سالہ بھارتی کرکٹر ویبھوو سوریاونشی بھی پہلی بار آئی پی ایل کا حصہ بن گئے۔ پیر کو سعودی عرب کے شہر جدہ میں ہونے والی آئی پی ایل کی میگا نیلامی میں راجستھان رائلز نے سوریاونشی کو ایک کروڑ 10 لاکھ بھارتی روپے میں خریدا۔جس کے بعد سوریاونشی آئی پی ایل کی تاریخ میں کسی بھی ٹیم کی جانب سے خریدے جانے والے کم عمر ترین کھلاڑی بن گئے۔

  • اسرائیلی وزیر اعظم نے حزب اللہ کے ساتھ جنگ ​​بندی کے معاہدے کی منظوری دیدی

    اسرائیلی وزیر اعظم نے حزب اللہ کے ساتھ جنگ ​​بندی کے معاہدے کی منظوری دیدی

    تل ابیب: اسرائیلی وزیر اعظم نیتن یاہو نے لبنانی گروپ حزب اللہ کے ساتھ جنگ ​​بندی کے معاہدے کی ”اصولی طور پر“ منظوری دیدی ہے ۔

    باغی ٹی وی: عالمی خبررساں ادارے کے مطابق معاہدے کے حوالے سے فریقین میں اہم امور پرابتدائی بات چیت جاری ہے ، جس کے بعد حتمی معاہدے کا اعلان کیا جائے گا،یہودیوں کا کہنا ہے کہ معاہدے کے حوالے سے اسرائیلی کابینہ کو جنگ بندی کے معاہدے کی منظوری دینا چاہیے، مسائل حل ہونے تک معاہدے کو حتمی نہ سمجھا جائے گا ۔

    ترجمان اسرائیلی حکومت نے کہا کہ ہم معاہدے کی جانب تیزی سے بڑھ رہے ہیں، لیکن ابھی کچھ مسائل حل کرنا باقی ہے، ہماری بات چیت معاہدے کی طرف جا رہی ہے، لیکن حزب اللہ کی ایک غلطی بات چیت کو پٹڑی سے اتار سکتی ہے۔

    گزشتہ ہفتے امریکی ایلچی آموس ہوچسٹین نے مذاکرات کی پیشرفت کا جائزہ لینے کے لیے دورہ بیروت کے دوران کہا تھا کہ اسرائیل اور حزب اللہ کے درمیان جنگ بندی کا معاہدہ ”ہماری گرفت میں“ ہے،معاہدہ بالآخر ”فریقین کا فیصلہ“ ہے، ہمارے پاس تنازعات کو ختم کرنے کا حقیقی موقع موجود ہے۔

  • برطانیہ نے بھی نیتن یاہو کی گرفتاری کا عندیہ دے دیا

    برطانیہ نے بھی نیتن یاہو کی گرفتاری کا عندیہ دے دیا

    لندن: عالمی فوجداری عدالت کی جانب سے اسرائیلی وزیراعظم نیتن یاہو کے وارنٹ جاری کرنے پر برطانیہ نے ردعمل دیتے ہوئے کہا کہ نیتن یاہو برطانیہ آئے تو عالمی عدالت کے جاری وارنٹ کی پیروی کی جائے گی۔

    باغی ٹی وی: برطانوی وزیر خارجہ ڈیوڈ لیمی نے کہا کہ نیتن یاہوکے برطانیہ آنے پر عدالتی فیصلےکی پیروی اور اس پر مناسب کارروائی کریں گے برطا نیہ ہمیشہ بین الاقوامی قانون اور عالمی انسانی قانون کا پابند رہاہے۔

    اس سےقبل اٹلی اور نیدرلینڈز بھی اسرائیلی وزیر اعظم کی گرفتاری کاعندیہ دے چکے ہیں،واضح رہے کہ عالمی فوجداری عدالت نے گز شتہ ہفتےغزہ میں جنگی جرائم کے ارتکاب کے الزام میں اسرائیلی وزیر اعظم نیتن یاہو کے وارنٹ جاری کیے تھے، عالمی فوجداری عدالت نے جنگی جرائم کے ارتکاب کے الزام میں سابق اسرائیلی وزیر دفاع یواف گیلنٹ کے وارنٹ گرفتاری بھی جاری کیے ہیں۔

  • جرمنی سے لیتھوانیا جانے والا کارگو طیارہ تباہ،ایک ہلاک،تین زخمی

    جرمنی سے لیتھوانیا جانے والا کارگو طیارہ تباہ،ایک ہلاک،تین زخمی

    جرمنی سے لیتھوانیا جانے والا کارگو طیارہ لینڈنگ سے کچھ دیر قبل گر کر تباہ ہو گیا ہے
    غیر ملکی خبرایجنسی کے مطابق طیارے میں سوار عملے کے 4 افراد میں سے 1 شخص ہلاک جبکہ 3 زخمی ہو گئے ہیں،سربراہ نیشنل کرائسس مینجمنٹ کے مطابق کارگو طیارہ رن وے سے کچھ کلو میٹر دور گھر پر گرا، تاہم گھر میں موجود 12 افراد کو بحفاظت نکال لیا گیا ہے، طیارے کے گرنے کی وجوہات جاننے کے لیے تحقیقات جاری ہیں۔

    لیتھوانیا کے شہر ولنیئس کے قریب پیر کی صبح کارگو طیارہ گر کر تباہ ہوگیا، جس کے نتیجے میں عملے کے ایک رکن کی ہلاکت کی تصدیق ہوئی ہے جبکہ تین افراد معجزانہ طور پر زندہ بچ گئے۔ حادثہ ولنیئس ایئرپورٹ کے قریب ایک رہائشی گھر سے ٹکرا کر آگ لگنے کے بعد پیش آیا، جرمنی کے شہر لیپزگ سے آنے والا بوئنگ 737-400 کارگو طیارہ ولنیئس ایئرپورٹ پر لینڈنگ کے دوران رن وے سے چند کلومیٹر پہلے گر گیا۔ طیارہ زمین پر سیکڑوں میٹر تک گھسٹتا ہوا ایک گھر سے ٹکرا گیا۔ خوش قسمتی سے، گھر میں موجود 12 افراد کو بحفاظت نکال لیا گیا۔طیارے میں موجود عملے کے چار افراد میں سے ایک موقع پر ہی جان کی بازی ہار گیا۔ لیتھوانیا کے نیشنل کرائسز مینجمنٹ سینٹر کے سربراہ ولمانتاس وٹکاؤسکاس نے اس ہلاکت کی تصدیق کی۔ دیگر تین زخمی افراد جن میں ایک لیتھوانین، ایک جرمن، اور ایک ہسپانوی شہری شامل ہیں اسپتال میں زیر علاج ہیں۔

    دہشت گردی کے امکان کو مسترد نہیں کیا گیا
    لیتھوانیا کے انسدادِ جاسوسی کے سربراہ داریوس جانیسکیس نے کہا کہ دہشت گردی کے امکان کو نظرانداز نہیں کیا جا سکتا، لیکن فی الحال کوئی ٹھوس شواہد موجود نہیں ہیں۔ پولیس اور پراسیکیوشن نے تحقیقات کا آغاز کردیا ہے۔

    قریبی نگرانی کیمرے کی فوٹیج میں دیکھا جا سکتا ہے کہ طیارہ نیچے آتے ہوئے زمین کی طرف جھکتا ہے اور پھر عمارت کے پیچھے غائب ہوجاتا ہے۔ چند لمحوں بعد آگ کا شعلہ اور دھویں کے بادل آسمان کی طرف بلند ہوتے دکھائی دیتے ہیں۔حادثہ مقامی وقت کے مطابق صبح 5:30 بجے زرنیو اسٹریٹ کے قریب پیش آیا۔ فائر ڈیپارٹمنٹ نے 7:33 بجے تک آگ پر قابو پالیا۔ حادثے کی وجہ ابھی تک معلوم نہیں ہوسکی، لیکن ابتدائی اطلاعات کے مطابق یہ "تکنیکی خرابی یا انسانی غلطی” کی وجہ سے پیش آیا۔

    حادثے کا شکار ہونے والا طیارہ سوئفٹ ایئر کا تھا، جو ڈی ایچ ایل کے لیے کام کر رہا تھا۔ ڈی ایچ ایل نے اپنے بیان میں کہا کہ طیارے نے "ولنیئس ایئرپورٹ سے ایک کلومیٹر دور ہنگامی لینڈنگ کی۔”ولنیئس کے میئر، والڈاس بینکونسکاس، نے کہا کہ طیارہ گھر سے بالکل قریب گرنے سے بچا اور قریبی صحن میں جا گرا۔

    لیتھوانین پولیس کے سربراہ ارونس پاؤلاوسکاس نے کہا کہ حادثے کی وجوہات کی تفتیش کی جا رہی ہے اور ابتدائی شواہد کے مطابق دہشت گردی کو خارج از امکان قرار نہیں دیا جاسکتا۔ انہوں نے مزید کہا کہ شواہد جمع کرنے اور نتائج پر پہنچنے میں کئی دن لگ سکتے ہیں۔

  • ترکی،روسی جہاز میں آگ بھڑک اٹھی،عملے سمیت 95 مسافر تھے سوار

    ترکی،روسی جہاز میں آگ بھڑک اٹھی،عملے سمیت 95 مسافر تھے سوار

    ترکی میں روسی جہاز میں آگ بھڑک اٹھی،عملے سمیت95 مسافر سوار تھے،

    روسی طیارے میں آگ لگنے کے واقعہ کے بعد 90 سے زائد مسافروں اور عملے کو نکال لیا گیا ، جنوبی ترکیہ کے ہوائی اڈے پر لینڈنگ کے دوران طیارے کے ایک انجن میں آگ لگ گئی اور وہ پھیلتی چلی گئی، اس دوران ایئر پورٹ پر ایمرجنسی نافذ کر دی گئی، واقعہ روس کی ازیموت ایئرلائنز کے زیرِ انتظام چلنے والے سکھوئی سپر جیٹ 100 (ایس یو 95) کے ساتھ پیش آیا۔

    اس ضمن میں حکام کاکہنا ہے کہ طیارہ ابھی ترکیہ کے بحیرۂ روم کے ساحل پر واقع انطالیہ ایئرپورٹ پر اترا ہی تھا کہ اس کے ایک انجن میں آگ بھڑک اٹھی،جہاز میں موجود 89 مسافروں اور عملے کے چھے ارکان کو بحفاظت نکال لیا گیا اور کوئی جانی نقصان نہیں ہوا، ایئرپورٹ پر تمام طے شدہ لینڈنگ صبح 3:00 بجے تک منسوخ کر دی گئی۔ واقعہ کے بعد حکام پائلٹ کی غلطی کو بھی دیکھ رہے ہیں،تحقیقات جاری ہیں، سکھوئی سپر جیٹ 100 (ایس یو 95) طیارہ سات برس سے زیر استعمال تھا،

    روسی ٹیلی گرام چینلز کے مطابق، اسی طیارے نے اکتوبر میں Mineralnye Vody سے Ivanovo کی پرواز کے دوران ماسکو کے ایئرپورٹ پر ہنگامی لینڈنگ کی تھی، جب اس کے ہائیڈرولک سسٹم میں خرابی ہوئی تھی۔ مزید یہ کہ، ایوی ایشن ماہرین نے اس بات کا ذکر کیا ہے کہ اس طیارے کے لینڈنگ گیئر کے فلیپس پہلے بھی خراب ہو چکے ہیں۔

    2019 میں اسی ماڈل کے طیارے کے ساتھ Sheremetyevo ایئرپورٹ پر بھی ایک بڑا حادثہ پیش آیا تھا۔ لینڈنگ کے دوران لینڈنگ گیئر نے ایندھن کے ٹینک کو نقصان پہنچایا، جس کے نتیجے میں طیارے میں آگ بھڑک اٹھی تھی اور 41 افراد جان کی بازی ہار گئے تھے۔

  • ایران کا اسرائیلی ربی کے قتل میں ملوث ہونے سے انکار

    ایران کا اسرائیلی ربی کے قتل میں ملوث ہونے سے انکار

    ایران نے متحدہ عرب امارات میں اسرائیلی ربی کے قتل میں ملوث ہونے کا الزام مسترد کر دیا ہے

    ابوظبی میں ایرانی سفارت خانے کی جانب سے کہا گیا ہے کہ ایران اسرائیلی ربی زوی کوگن کے قتل میں ملوث نہیں ہے۔ایران نے اسرائیلی شہری کے قتل میں ملوث ہونے کی تردید کی ہے، دوسری جانب اماراتی میڈیا کا کہنا ہے کہ یو اے ای میں لاپتہ ہونے والے یہودی ربی زوی کوگن کے قتل کے شبے میں 3 افراد کو گرفتار کیا گیا ہے،واضح رہے کہ اسرائیلی ربی جمعرات سے لاپتہ تھے اور اتوار کو ان کی لاش ملی تھی،اسرائیلی میڈیا کے مطابق 28 سالہ اسرائیلی ربی کے پاس مشرقی یورپی ملک مالدووا کا پاسپورٹ بھی تھا۔

    آرتھوڈوکس یہودی تنظیم کےلیے کام کرنے والے ربی زوی کوگن جمعرات کو دبئی میں لاپتہ ہوئے تھے، یہودی ربی زوی کوگن کے پاس یورپی ملک مالدووا کی شہریت بھی تھی، زوی کوگن نے مالدووا کے پاسپورٹ پر دبئی کا سفر کیا تھا، زوی کوگن کے قتل کی تحقیقات متحدہ عرب امارات، اسرائیل، مالدووا حکام کر رہے ہیں

    اماراتی وزارت داخلہ کا کہنا ہے کہ سوسائٹی کو غیر مستحکم کرنے کی کسی بھی کوشش کے خلاف تمام قانونی اختیارات استعمال کیے جائیں گے۔

    پی ٹی آئی کا سوشل میڈیا بھی "وڑ”گیا

    عمران خان کی جانب سے "فائنل کال” پنجاب میں "مس کال” بن گئی

    پی ٹی آئی احتجاج،خیبر پختونخوا سے 12 سو سے زائد چھوٹی بڑی گاڑیاں،شرکا کی تعداد

    برطانیہ،عمران خان کی رہائی کیلئے پی ٹی آئی کا تاریخی احتجاج

    پی ٹی آئی احتجاج،قیادت بشریٰ بی بی نے سنبھال لی،کینٹینر پر چڑھ گئیں

    پی ٹی آئی احتجاج، بشریٰ تو آ گئیں، علیمہ خان منظر سے غائب

    اسلام آباد، مظاہرین پتھراؤ سے متعدد پولیس اہلکار زخمی

    24 نومبردن ختم،لاہورسے نہ قافلہ نکلا نہ کوئی بڑا مظاہرہ

    سپریم کورٹ پر حملہ کرنے والوں کو سزا مل جاتی تو نومئی نہ ہوتا، مبشرلقمان

    بشریٰ کو خون چاہیے،مولانا کو 3 میسج کس نے بھجوائے؟

    بشریٰ کا خطاب،عمران خان تو”وڑ” گیا. مبشر لقمان

    خود گرفتاریاں دے رہے،پی ٹی آئی قیادت کہیں نظر نہیں آرہی،مصدق ملک

    گاڑیوں میں بیٹھیں،تیز چلیں، خان کو لئے بغیر واپس نہیں آنا، بشریٰ بی بی کا شرکا سے خطاب

  • ایرانی حکومت کا طلبہ کی گرفتاری پر روس سے احتجاج

    ایرانی حکومت کا طلبہ کی گرفتاری پر روس سے احتجاج

    ایران نے روس کے شہر کازان کی یونیورسٹی میں ایرانی طالبعلموں کی پرتشدد گرفتاریوں پر ماسکو سے احتجاج کیا ہے۔

    ایران کے سرکاری خبررساں ادارے ’ارنا‘ نے ایرانی قونصلیت سے جاری بیان کا حوالہ دیتے ہوئے بتایا ہے کہ جمعے کو کازان یونیورسٹی کے ویزا توسیع مرکز جانے والے 2 ایرانی طلبہ کو پولیس نے غیرپیشہ ورانہ اور غیرانسانی تشدد کا نشانہ بنانے کے بعد گرفتار کرلیا۔ واقعے کے ردعمل میں ایران نے روسی وزارت خارجہ میں ایک احتجاجی نوٹ جمع کروایا ہے جس میں ایرانی طلبہ کے ساتھ پولیس کے پرتشدد سلوک کی مذمت کی گئی ہے۔روس کے قریبی اتحادی ایران نے واقعے پر وضاحت طلب کی ہے، گرفتار ایرانی طلبہ کو جمعے کو ایرانی قونصلیٹ کی مداخلت کے بعد رہا کردیا گیاتھا۔کازان پولیس کی پریس سروس نے ٹیلی گرام کے ذریعے جمعے کو جاری پیغام میں کہا ہے کہ طلبہ کے درمیان ایک تنازع ہاتھا پائی میں تبدیل ہوگیا جس پر پولیس نے لڑائی میں پہل کرنے والے طلبہ کو حراست میں لیا تھا، بیان میں گرفتار طلبہ کی قومیت کا حوالہ نہیں دیا گیا۔
    کازان کی علاقائی تحقیقاتی کمیٹی نے بھی جمعے کو بتایا کہ سرکاری نمائندے سے پرتشدد رویہ اپنانے کے الزام میں دو غیر ملکی طلبہ کو گرفتار کیا گیا تھا۔ماسکو میں روس کے سفیر کاظم جلالی نے ایکس پوسٹ میں بتایا کہ ایران کے سینئر سفارتکار عباس آراغچی مسلسل واقعے کی پیروی کرتے رہے، ایرانی سفیر نے ایک ایکس پوسٹ میں ایرانی طلبہ کے ساتھ کسی بھی قسم کی بدسلوکی کی مذمت کرتے ہوئے ملوث روسی حکام کے خلاف کارروائی کا مطالبہ کیا تھا۔واضح رہے کہ ایران اور روس قریبی اتحادی ہیں ، دونوں ممالک کے امریکا اور مغربی طاقتوں کے خلاف مشترکہ مفادات کے پیش نظر قریبی تعلقات ہیں جبکہ حالیہ تاریخ میں پہلی بار ایران کی جانب سے کسی مسئلے پر روس سے احتجاج کیا گیا ہے، رواں سال ستمبر میں امریکا نے ایران پر روس کو بیلسٹک میزائلوں کی فراہمی کا الزام عائد کرتے ہوئے تہران پر نئی پابندیاں عائد کرنے کا عندیہ دیا تھا۔

    بیلاروس کا 75 رکنی وفد اسلام آباد،محسن نقوی نے استقبال کیا

    یو اے ای، مغوی اسرائیلی ربی کی لاش مل گئی

    کرم تصادم، فریقین نے 7 دن کے لئے سیز فائر پر اتفاق کر لیا

    پی ٹی آئی سیاسی سے زیادہ انتشاری جماعت بن گئی ہے، سعید غنی