Category: کشمیر

بھارت کے یومِ آزادی کے موقع پر وادی میں یومِ سیاہ منایا جا رہا ہے۔ کشمیریوں کی کُل جماعتی حریت کانفرنس کی کال پر وادی بھر میں مکمل ہڑتال کی گئی ہے، جس کے باعث کاروباری مراکز، تعلیمی ادارے اور سرکاری دفاتر بند ہیں۔ کشمیری عوام نے بھارتی تسلط کے خلاف اپنی یکجہتی اور احتجاج کے طور پر یہ دن منایا ہے۔

دوسری جانب، مقبوضہ کشمیر میں قابض بھارتی فوج کی بھاری نفری کے باوجود، عوام نے یومِ آزادی پاکستان پر دلی مبارکباد دی ہے۔ وادی کے مختلف علاقوں میں پاکستانی پرچم اور یومِ آزادی کی خوشیاں منانے والے پوسٹرز نظر آئے، جن پر قائدِاعظم محمد علی جناح، علامہ اقبال اور فیلڈ مارشل عاصم منیر کی تصاویر آویزاں کی گئیں۔مزید برآں، کئی مقامات پر یومِ تشکر کے پوسٹرز بھی لگائے گئے، جن پر آپریشن بنیان مرصوص کا ذکر بھی شامل تھا، جو کشمیری آزادی کی جدوجہد کی علامت کے طور پر دیکھا جا رہا ہے۔ یہ آپریشن بھارتی فورسز کے خلاف کشمیریوں کی مزاحمت کی نمائندگی کرتا ہے۔

کشمیری عوام کی اس تحریک نے بھارت کی طرف سے عائد کردہ پابندیوں اور فوجی محاصرے کے باوجود ان کی آزادی کی خواہش کو ظاہر کیا ہے۔ مقبوضہ کشمیر میں یہ دن یومِ سیاہ کے طور پر منایا جانا کشمیریوں کی قربانیوں اور جدوجہد کو خراج تحسین پیش کرنے کے مترادف ہے۔یہ صورتحال کشمیری عوام کے حقِ خودارادیت کی تحریک میں ایک اہم سنگ میل تصور کی جا رہی ہے، جس سے عالمی برادری کی توجہ مقبوضہ کشمیر کے مسئلے کی طرف مبذول کرانے کی توقع کی جا رہی ہے۔

لاہور(خالدمحمودخالد) بھارتی مقبوضہ جموں و کشمیر کے سابق وزیراعلی اور نیشنل کانفرنس کے سربراہ فاروق عبداللہ نے کہا ہے کہ آخر بھارتی حکومت جموں و کشمیر کو ریاست کا درجہ کب واپس دے گی۔ سری نگر میں میڈیا سے بات کرتے ہوئے انہوں نے کہا کہ آرٹیکل 370 کی منسوخی کا جشن منانے کے لیے مودی سرکار کے پاس کچھ نہیں ہے۔ بی جے پی نے 6 سال میں مقبوضہ کشمیر کی بہتری کے لیے کچھ نہیں کیا۔ مقبوضہ جموں و کشمیر میں بڑھتی ہوئی بے روزگاری اور بڑھتی ہوئی قیمتوں پر حکومت خاموش تماشائی بنی ہوئی ہے۔ ہمارے اعلیٰ تعلیم یافتہ لڑکے اور لڑکیاں بے روزگار ہیں، قیمتیں آسمان کو چھو رہی ہیں۔ غریب غریب تر ہوتا جا رہا ہے جب کہ امیر امیر تر ہوتا جا رہا ہے۔ کیا بی جے پی کا یہی کارنامہ ہے۔ فاروق عبداللہ نے مزید کہا کہ انہیں کشمیر میں امن آتا نظر نہیں آرہا ہے۔ مجھے لگتا ہے کہ ہم ایک بے وقوف دنیا میں یہ سوچ کر رہ رہے ہیں کہ امن راتوں رات آ جائے گا۔ ہمارا ایک مضبوط پڑوسی ہے، چاہے وہ چین ہو یا پاکستان۔ انہوں نے کہا کہ جنگ کوئی راستہ نہیں ہے۔ بالآخر دونوں ملکوں کے ساتھ مذاکرات کرنا ہوں گے۔ سابق وزیر اعلیٰ نے کہا کہ مودی حکومت نے کہا تھا کہ جیسے ہی انتخابات ہوں گے اور حکومت بنے گی مقبوضہ کشمیر کا درجہ بحال ہو جائے گا لیکن ابھی تک ایسا نہیں ہوا۔ انہوں نے کہا کہ اب مرکز والے کہہ رہے ہیں کہ وہ دو خالی اسمبلی سیٹوں پر الیکشن کرائیں گے لیکن راجیہ سبھا کی چار سیٹوں کا کیا ہوگا، وہ عوام کو ایوانوں میں جانے اور اپنے مسائل بتانے کے حق سے کیوں محروم کر رہے ہیں۔ 

بھارت کے غیرقانونی زیرِقبضہ جموں کشمیر کے ضلع پونچھ میں قابض بھارتی فورسز نے ریاستی دہشت گردی کی تازہ کارروائی میں مزید دو کشمیری نوجوانوں کو شہید کر دیا ۔

کشمیر میڈیا سروس کے مطابق فورسز اہلکاروں نے نوجوانوں کو ضلع پونچھ کے کسیلیان میں محاصر ے اور تلاشی کی کارروائی کے دوران ایک جعلی مقابلے میں شہید کیا ۔ بھارتی فورسز نے ضلع کے دیگر علاقوں میں بھی تلاشی آپریشن شروع کر رکھا ہے۔آخری اطلاعات تک آپریشن جاری تھا۔یاد رہے کہ بھارتی فوجیوں نے پیر کے روز سرینگر کے علاقے داچھی گام میں تین نوجوانوں کو شہید کر دیا تھا۔

غیرقانونی طورپر بھارت کے زیرِقبضہ جموں کشمیر میں قابض بھارتی فورسز نے ضلع کٹھوعہ میں محاصرے اور تلاشی کی کارروائی شروع کی۔کشمیر میڈیا سروس کے مطابق قابض بھارتی فوج اور پیراملٹری فورسز کے اہلکاروں نے ضلع کے علاقے راجباغ کا محاصرہ کرکے تلاشی کی کارروائی شروع کی ہے۔فورسز اہلکاروں نے علاقے کے تمام داخلی اور خارجی راستوں کو بند کر دیا اور لوگوں کی نقل و حرکت پر پابندی لگائی ۔دریں اثناء بھارتی فورسز نے ضلع راجوری کے مختلف علاقوں میں بھی محاصرے اور تلاشی کی کارروائیاں شروع کی ہیں۔ آخری اطلاعات آنے تک ان علاقوں میں فوجی آپریشن جاری تھے۔

بھارتی مقبوضہ جموں کشمیر میں جموں کی ایک عدالت نے دہائیوں پرانے ایک جھوٹے مقدمے میں دو کشمیریوں کو عمرقید کی سزا سنائی ہے۔

کشمیر میڈیا سروس کے مطابق پرنسپل سیشن جج رام بن دیپک سیٹھی نے محمد ممتاز اور فاروق احمد کو 20 سال سے زائد عرصہ قبل درج کئے گئے اغوا اور قتل کے جھوٹے مقدمے میں عمرقید کی سزا سنائی۔ جج نے اپنے فیصلے میں تسلیم کیا کہ کیس کے بارے میں معلوم ہونے پر دونوں افراد رضاکارانہ طور پر خود عدالت میں پیش ہوئے تھے۔ اس نے یہ بھی اعتراف کیا کہ اُنہوں نے خود کو عدالت کے رحم و کرم پر بھی چھوڑ دیا تھا۔اس اعتراف کے باوجود ، عدالت نے دونوں کو مجریہ ہند کی دفعہ 302 کے تحت عمرقید اور دفعہ 364 کے تحت دس سال قید کی سزا سنائی۔قانونی ماہرین نے عدالتی فیصلے کی مذمت کرتے ہوئے کہا ہے کہ بھارتی قانونی اور عسکری اداروں کی جانب سے کشمیری نوجوانوں کو قانون کی آڑ میں نشانہ بنایا جا رہا ہے۔ ان کا کہنا تھا کہ اس طرح کے طویل عرصے سے زیرالتوا مقدمات سیاسی اختلاف پر کشمیریوں کو سزا دینے اور آزادی پسند جذبات کو کچلنے کیلئے ایک ہتھیار کے طور پر استعمال کئے جاتے ہیں۔ اُنہوں نے مزید کہا کہ یہ فیصلہ بھارتی عدلیہ اورمودی کی ہندوتو حکومت کے درمیان گہرے گٹھ جوڑ کو بے نقاب کرتا ہے، جس کا مقصد مقبوضہ علاقے میں آزادی پسند کشمیریوں کی آواز کو خاموش کرنا ہے۔

لاہور(خالدمحمودخالد) بھارتی مقبوضہ کشمیر میں مودی کے نمائیندہ لیفٹیننٹ گورنر نے برطانوی تسلط میں مہاراجہ ہری سنگھ کی آمرانہ حکومت کے خلاف لڑائی میں مارے جانے والوں کو خراج عقیدت پیش کرنے کے لیے ‘یوم شہدا’ تقریب کی اجازت دینے سے انکار کر دیا اور یوم شہداء کشمیر منانے سے روکنے کیلئے کٹھ پتلی وزیر اعلیٰ عمر عبداللہ کو بھی دہلی سے واپس آنے کے فوراً بعد ان کے گھر میں نظر بند کر دیا۔ ان کے ساتھ ساتھ ان کی حکومت کے کئی وزراء، ایم ایل ایز اور حکمران جماعت اور اپوزیشن کے سرکردہ رہنماؤں کو یوم شہداء کشمیر منانے سے روکنے کے لیے گھروں میں نظر بند کر دیا گیا۔

وزیراعلی عمر عبداللہ نے اپنی نظر بندی کو جموں و کشمیر میں غیر منتخب لوگوں کا ظلم قرار دیا۔ انہوں نے اپنے گھر کے باہر پولیس کی ایک بڑی نفری اور مین گیٹ کے باہر کھڑی بکتر بند گاڑیوں کی سوشل میڈیا پلیٹ فارم ایکس پر متعدد تصاویر شیئر کیں۔ لیفٹیننٹ گورنر کا نام لیے بغیر وزیراعلی عمر عبداللہ نے ایک پوسٹ میں کہا کہ غیر منتخب حکومت نے منتخب حکومت کو بند کر دیا۔ نئی دہلی کے غیر منتخب امیدواروں نے جموں و کشمیر کے عوام کے منتخب نمائندوں کو بند کر دیا۔ انہوں نے پابندیوں اور گھروں میں نظربندیوں کی شدید مذمت کی اور کشمیر کے 1931 کے شہداء کو ’’جلیانوالہ باغ‘‘ کے شہداء کے برابر قرار دیا۔ انہوں نے کہا کہ 13 جولائی کا قتل عام ہمارا جلیانوالہ باغ ہے جن لوگوں نے اپنی جانیں قربان کی انہوں نے انگریزوں کے خلاف جہاد کیا، کشمیر پر انگریزوں کی بالادستی کے تحت حکومت کی جا رہی تھی کتنی شرم کی بات ہے کہ برطانوی راج کے خلاف ہر طرح سے لڑنے والے حقیقی ہیروز کو آج صرف اس لیے ولن کے طور پر پیش کیا جاتا ہے کہ وہ مسلمان تھے۔ ہمیں ان کی قبروں پر جانے کا موقع نہیں دیا جارہا لیکن ہم ان کی قبروں کو نہیں بھولیں گے۔

پہلگام کے واقعے کے بعد سے کشمیری مسلمانوں کے خلاف انتظامی قتل کا سلسلہ معمول بن گیا

کشمیری مسلمان مقبوضہ وادی میں ہی نہیں، بلکہ پورے بھارت میں خوف کے سائے تلے زندگی گزار نے پر مجبورہیں،بھارتی پولیس کی پر تشدد کاروائیوں نے اور کشمیری نوجوان کی جان لے لی،حال ہی میں دہلی کے لجپت نگر میں 30 سالہ کشمیری نوجوان زبیر احمد کو بے دردی سے قتل کیا گیا،زبیر احمد بٹ کی تشدد زدہ لاش دہلی کے ایک عوامی پارک میں ملی،التجا مفتی کا کہنا ہے کہ زبیر احمد بٹ کا قتل کوئی معمہ نہیں، دہلی پولیس نے گرفتار کر کے وحشیانہ تشدد کیا،تیس سالہ زبیر اپنی والدہ اور بہن بھائیوں کا واحد کفیل تھا، بے گناہ کشمیریوں کی جانوں کو بغیر ثبوت ختم کرنے کا یہ سلسلہ کب ختم ہوگا؟،

جموں و کشمیر اسٹوڈنٹس ایسوسی ایشن نے زبیر احمد بٹ کے واقعے کی فوری اور شفاف تحقیقات کا مطالبہ کر دیا اور کہا کہ ذمہ داروں کو گرفتار کر کے انصاف فراہم کیا جائے،

بنیان مرصوص“ کی کامیابی، مقبوضہ کشمیر کے مختلف علاقوں میں بڑے پیمانے پر پوسٹرز چسپاں کئے گئے ہیں

مقبوضہ کشمیر میں جو پوسٹر لگائے گئے ہیں ان پر پاک فوج کے حق میں تحریر درج ہے، پوسٹر پر لکھا گیا ہے،بھارتی فوجی جارحیت کے خلاف پاکستان کا دندان شکن جواب،پاکستان نے کشمیریوں کے دل جیت لیے ہیں۔ پاک افواج انتہائی مبارکباد کی مستحق ہیں۔پیشہ وارانہ مہارت سے بھرپور طریقے سے لیس پاکستانی افواج نے بھارتی عسکری صلاحت کا پول کھول دیا۔کشمیری بھارتی تسلط سے آزادی تک ہرگز چین سے نہیں بیٹھیں گے، پاکستان نے بھارتی جارحیت کا اقوام متحدہ کے چارٹر 51 کے تحت جواب دیا اور اسکے توسیع پسندانہ عزائم خاک میں ملا دیے۔ خطے کے امن پسند ملکوں کو پاکستان کا مشکور ہونا چاہیے جس نے خطے پر فرقہ وارانہ بھارتی ایجنڈے اور جارحانہ تسلط اور بالادستی کا بی جے پی ، آر ایس ایس کا خواب چکناچور کر دیا ۔پاکستان نے فرقہ وارانہ بھارتی ایجنڈے کے آگے بند باندھ دیا اور خطے میں طاقت کے توازن کو متوازی کیا۔