Category: بہاولپور

"بہاولپور کے علاقے ہیڈ راجکاں میں مضرِ صحت مٹھائی کھانے سے بچوں سمیت 9 افراد کی طبیعت خراب ہوگئی، جنہیں فوری طور پر بہاول وکٹوریہ اسپتال منتقل کیا گیا۔

اسپتال ذرائع کے مطابق متاثرہ افراد میں 4 کمسن بچے بھی شامل ہیں، جنہیں طبی امداد فراہم کی گئی۔خاندانی ذرائع کا کہنا ہے کہ بچے کی پیدائش کی خوشی میں مقامی دکان سے مٹھائی خریدی گئی تھی، جس کے استعمال کے بعد اہلِ خانہ کی طبیعت بگڑ گئی۔ذرائع کے مطابق تمام متاثرہ افراد کی حالت خطرے سے باہر ہے

بہاول پور: پاکستان مسلم لیگ (ن) کے سینئر رہنما اور رکنِ قومی اسمبلی ملک محمد اقبال چنڑ انتقال کر گئے۔ ان کے اہل خانہ نے انتقال کی تصدیق کرتے ہوئے بتایا کہ وہ گزشتہ کئی ہفتوں سے علیل تھے۔

اہل خانہ کے مطابق ملک محمد اقبال چنڑ کو برین ہیمرج ہوا تھا، جس کے بعد ان کا آپریشن بھی کیا گیا، تاہم وہ جانبر نہ ہو سکے اور انتقال کر گئے۔مرحوم ملک محمد اقبال چنڑ کا شمار مسلم لیگ (ن) کے سینئر رہنماؤں میں ہوتا تھا اور وہ جنوبی پنجاب کی سیاست میں ایک اہم مقام رکھتے تھے۔واضح رہے کہ مرحوم پنجاب اسمبلی کے ڈپٹی اسپیکر ملک ظہیر اقبال چنڑ کے والد تھے۔ ان کے انتقال پر سیاسی و سماجی شخصیات کی جانب سے گہرے دکھ اور افسوس کا اظہار کیا جا رہا ہے، جبکہ مرحوم کی مغفرت اور اہل خانہ کے لیے صبر جمیل کی دعائیں بھی کی جا رہی ہیں۔

بہاولپور: شہر کے یونیورسٹی چوک پر واقع ایک نجی ہوٹل میں اونچی آواز میں بات کرنے سے منع کرنے پر تلخ کلامی جھگڑے میں تبدیل ہوگئی، جہاں مبینہ طور پر لاتوں، گھونسوں اور کرسیوں کا استعمال کرتے ہوئے طالبہ اور اس کے ساتھی پر حملہ کیا گیا۔

واقعے کی سی سی ٹی وی فوٹیج بھی سامنے آگئی ہے، جس میں دیکھا جا سکتا ہے کہ ایک شخص سیڑھیوں سے نیچے اترتا ہے اور ایک لڑکی کے ساتھ بیٹھے شخص پر اچانک حملہ کر دیتا ہے۔ فوٹیج میں حملہ آور کو کرسی اٹھا کر مارتے اور پھینکتے ہوئے بھی دیکھا جا سکتا ہے۔فوٹیج کے مطابق جب لڑکی حملہ آور کو روکنے کی کوشش کرتی ہے تو وہ اسے بھی دھکا دیتا ہے، جس سے وہ زمین پر گر جاتی ہے۔متاثرہ طالبہ کے مطابق وہ اپنے ساتھی کے ساتھ نجی ہوٹل میں بیٹھی ہوئی تھی۔ اس دوران وہاں موجود ایک شخص اور اس کی اہلیہ اونچی آواز میں گفتگو کر رہے تھے، جنہیں خاموشی سے بات کرنے کا کہا گیا۔ طالبہ کا کہنا ہے کہ اس بات پر مذکورہ شخص مشتعل ہوگیا اور خود کو پولیس ملازم ظاہر کیا۔طالبہ کے مطابق ملزم ابتدا میں وہاں سے چلا گیا، تاہم کچھ دیر بعد دو دیگر افراد کے ہمراہ واپس آیا اور اس کے ساتھی سمیت اس پر تشدد کیا۔

پولیس کا کہنا ہے کہ واقعے کا مقدمہ یونیورسٹی کی طالبہ کی مدعیت میں درج کر لیا گیا ہے، جبکہ ملزمان کی تلاش اور واقعے کی مزید تحقیقات جاری ہیں۔

‎بہاولپور: شیر باغ چڑیا گھر میں خوشی کی ایک اور خبر سامنے آئی ہے جہاں شیرنی سامسن نے تین صحت مند بچوں کو جنم دیا ہے۔ چڑیا گھر کی انتظامیہ کے مطابق نومولود بچوں اور ان کی ماں کی حالت تسلی بخش ہے اور دونوں کو خصوصی نگرانی میں رکھا گیا ہے۔
‎شیر باغ چڑیا گھر کے میڈیکل آفیسر ڈاکٹر فیاض نے بتایا کہ شیرنی اور اس کے تینوں بچوں کو انتہائی نگہداشت کے لیے ایک علیحدہ انکلوژر میں منتقل کیا گیا ہے، جہاں ماہر عملہ مسلسل ان کی صحت اور نشوونما پر نظر رکھے ہوئے ہے۔
‎انتظامیہ کے مطابق شیرنی کو غذائیت سے بھرپور قیمہ فراہم کیا جا رہا ہے تاکہ وہ صحت مند رہے اور اپنے بچوں کی بہتر انداز میں دیکھ بھال کر سکے۔ دوسری جانب نومولود بچے اپنی ماں کا دودھ پی رہے ہیں اور ان کی نشوونما معمول کے مطابق جاری ہے۔
‎چڑیا گھر کے حکام کا کہنا ہے کہ تقریباً ڈھائی ماہ قبل ایک اور شیرنی مانو نے بھی دو بچوں کو جنم دیا تھا۔ تازہ پیدائش کے بعد شیر باغ چڑیا گھر میں شیروں کی مجموعی تعداد بڑھ کر 19 ہو گئی ہے، جو چڑیا گھر کے لیے ایک خوش آئند پیش رفت قرار دی جا رہی ہے۔
‎انتظامیہ کے مطابق جانوروں کی افزائش نسل کے کامیاب پروگرام اور بہتر نگہداشت کے باعث چڑیا گھر میں جنگلی حیات کی تعداد میں مسلسل اضافہ ہو رہا ہے۔ نومولود بچوں کی صحت پر خصوصی توجہ دی جا رہی ہے تاکہ وہ مکمل طور پر صحت مند ہو کر عوام کی توجہ کا مرکز بن سکیں۔
‎شیر باغ چڑیا گھر بہاولپور ملک کے اہم چڑیا گھروں میں شمار ہوتا ہے، جہاں مختلف اقسام کے جنگلی جانوروں کی افزائش، نگہداشت اور تحفظ کے لیے خصوصی اقدامات کیے جا رہے ہیں۔

احمد پور شرقیہ: دریائے ستلج میں بستی کبیر خان، موضع سرور آباد کے قریب ایک نامعلوم شخص کی لاش پانی میں تیرتی ہوئی دیکھی گئی، جس پر مقامی افراد نے فوری طور پر ریسکیو 1122 اور مقامی پولیس کو اطلاع دی۔

اطلاع ملتے ہی ریسکیو 1122 اور پولیس کی ٹیمیں موقع پر پہنچ گئیں۔ ریسکیو اہلکاروں نے کارروائی کرتے ہوئے دریا کے دوسرے کنارے سے لاش کو نکال کر اپنی تحویل میں لے لیا۔بعد ازاں لاش کو ضروری قانونی کارروائی اور شناخت کے عمل کے لیے تحصیل ہیڈکوارٹر (ٹی ایچ کیو) ہسپتال احمد پور شرقیہ کے سرد خانے منتقل کر دیا گیا۔
پولیس کے مطابق متوفی کی شناخت تاحال نہیں ہو سکی، جبکہ واقعے کی مزید تحقیقات جاری ہیں۔ حکام کا کہنا ہے کہ لاش کی شناخت اور موت کی وجوہات کا تعین پوسٹ مارٹم رپورٹ اور تفتیش مکمل ہونے کے بعد کیا جائے گا۔

رپورٹ،حبیب خان

(بہاولنگر باغی ٹی وی محمد عرفان نامہ نگار )محرم الحرام کے پرامن انعقاد اور سیکیورٹی انتظامات کا جائزہ لینے کے لیے ڈی پی او بہاولنگر محمد عمران اور ڈی سی بہاولنگر ذوالفقار احمد بھون کا چشتیاں شہر کا اہم دورہ۔

تفصیلات کے مطابق ڈسٹرکٹ پولیس آفیسر بہاولنگر محمد عمران نے ڈپٹی کمشنر بہاولنگر ذوالفقار احمد بھون کے ہمراہ چشتیاں شہر کا تفصیلی دورہ کیا۔ اس دورے کا مقصد محرم الحرام کے دوران سیکیورٹی انتظامات، جلوسوں اور مجالس کے روٹس کا جائزہ لینا تھا۔ دورانِ وزٹ دونوں افسران نے سیکیورٹی اور دیگر انتظامات کو فول پروف بنانے کے لیے فیلڈ افسران کو اہم ہدایات جاری کیں۔ڈی پی او اور ڈی سی نے چشتیاں شہر میں محرم الحرام کے روایتی اور لائسنس یافتہ جلوسوں کے راستوں کا باریک بینی سے معائنہ کیا۔ڈی پی او محمد عمران نے واضح کیا کہ محرم الحرام کے دوران امن و امان کا قیام اولین ترجیح ہے۔ سیکیورٹی پر کوئی سمجھوتہ نہیں کیا جائے گا۔حساس مقامات اور جلوس کے راستوں پر سی سی ٹی وی کیمروں کی تنصیب اور مانیٹرنگ کو یقینی بنانے کے احکامات دیے گئے۔