چنیوٹ (نامہ نگار) ڈسٹرکٹ پریس کلب رجسٹرڈ چنیوٹ کی کابینہ اور اعزازی ممبران کے درمیان ایک شاندار تعارفی اجلاس منعقد ہوا، جس میں مثبت اور ذمہ دارانہ صحافت کے فروغ پر زور دیا گیا۔ اجلاس کا آغاز تلاوتِ قرآن پاک اور نعتِ رسول مقبول ﷺ سے کیا گیا، جس کے بعد صحافتی امور پر تفصیلی گفتگو کی گئی۔
اجلاس میں صدر پریس کلب چوہدری شاہد محمود، جنرل سیکرٹری ڈاکٹر مزمل حسین، چیئرمین پروفیشنل میڈیا گروپ چوہدری اللہ رکھا سمیت صحافی برادری کے دیگر معزز اراکین نے شرکت کی۔
صدر پریس کلب چوہدری شاہد محمود نے اجلاس سے خطاب کرتے ہوئے کہا کہ ڈسٹرکٹ پریس کلب ایک رجسٹرڈ اور باوقار ادارہ ہے جہاں صحافت کو ایک مقدس امانت سمجھا جاتا ہے۔ انہوں نے اس بات پر زور دیا کہ مثبت اور تعمیری صحافت کی ترویج ہی ہمارا اولین مقصد ہے، اور صحافیوں پر لازم ہے کہ وہ اپنی تحریروں اور خبروں کے ذریعے عوامی مسائل کو اجاگر کریں، سچائی کو سامنے لائیں اور کسی بھی دباؤ یا ذاتی مفاد سے بالاتر ہو کر حقائق پر مبنی رپورٹنگ کریں۔
جنرل سیکرٹری ڈاکٹر مزمل حسین نے کہا کہ پریس کلب میں ممبرشپ صرف ان صحافیوں کو دی جاتی ہے جو تعلیم یافتہ ہوں اور میرٹ پر پورا اترتے ہوں تاکہ غیر جانبداری اور پیشہ ورانہ معیار کو برقرار رکھا جا سکے۔ انہوں نے کہا کہ ہمارے ادارے کا مقصد معیاری صحافت کو فروغ دینا اور صحافیوں کو ایک مضبوط پلیٹ فارم فراہم کرنا ہے جہاں وہ آزادی اور دیانت داری کے ساتھ اپنے فرائض انجام دے سکیں۔
چیئرمین پروفیشنل میڈیا گروپ چوہدری اللہ رکھا نے زرد صحافت کے مضر اثرات پر روشنی ڈالتے ہوئے کہا کہ یہ ایک ایسا زہر ہے جو معاشرے میں بگاڑ پیدا کرتا ہے اور عوام میں غلط فہمیاں پھیلانے کا باعث بنتا ہے۔ انہوں نے اس عزم کا اظہار کیا کہ ڈسٹرکٹ پریس کلب چنیوٹ ہر قسم کی منفی اور بے بنیاد خبروں کے خلاف ڈٹ کر کھڑا رہے گا اور ذمہ دارانہ صحافت کو فروغ دے گا۔
اجلاس میں شامل تمام ممبران نے ادارے سے وفاداری، سچائی اور دیانت داری کے ساتھ صحافت کا حق ادا کرنے کا عہد کیا۔ اجلاس کے اختتام پر تمام شرکاء نے اس بات پر اتفاق کیا کہ صحافت کو عوامی خدمت کا ذریعہ بنایا جائے گا اور کسی بھی قسم کے مفاداتی ایجنڈے کو مسترد کیا جائے گا۔
یہ اجلاس صحافتی اصولوں کی پاسداری اور مثبت صحافت کے فروغ کی جانب ایک اہم قدم ثابت ہوا۔
