Category: ڈیرہ غازی خان

دراہمہ(باغی ٹی وی،نامہ نگارمحمدعلی مکھن) علاقہ میں ڈاکو راج قائم ہو چکا ہے، ایک ہی واردات میں تین ہنڈا 125 موٹر سائیکلیں اور درجنوں قیمتی موبائل فون چھین لیے گئے۔ تھانہ دراہمہ پولیس اور موجودہ ایس ایچ او جرائم کی روک تھام میں مکمل طور پر ناکام دکھائی دے رہے ہیں، جس کے باعث شہری خود کو غیر محفوظ محسوس کر رہے ہیں۔

تفصیلات کے مطابق گزشتہ رات ٹھہڑی کے قریب میرو مائنر پر دوست کی شادی سے واپس آنے والے تقریباً ایک درجن افراد کو پانچ مسلح ڈاکوؤں نے گھیر لیا۔ زنگلانی ہاؤس کے قریب ڈاکو اسلحہ کے زور پر تین عدد ہنڈا 125 (ماڈل 2026)، نقدی اور آدھے درجن سے زائد موبائل فون چھین کر فرار ہو گئے، حتیٰ کہ متاثرین کی جیکٹس تک اتار لی گئیں۔

علاقہ مکینوں کے مطابق گزشتہ ایک ہفتے کے دوران پانچ سے زائد موٹر سائیکلیں اور درجنوں موبائل فون لوٹے جا چکے ہیں، جبکہ اوورسیز پاکستانی خاص طور پر ڈاکوؤں کے نشانے پر ہیں۔ مزاحمت پر ایک نوجوان کے قتل کا واقعہ بھی پیش آ چکا ہے، مگر پولیس تاحال نہ ملزمان کو گرفتار کر سکی اور نہ ہی لوٹا گیا سامان برآمد ہو سکا۔

واقعے کی اطلاع پر ڈی ایس پی صدر سرکل اور سی سی ڈی انچارج زاہد خان لغاری موقع پر پہنچے اور شواہد اکٹھے کیے، تاہم عملی پیش رفت سامنے نہیں آ سکی۔ شہریوں کا کہنا ہے کہ موجودہ ایس ایچ او کی ناقص حکمت عملی کے باعث جرائم پیشہ عناصر بے خوف ہو چکے ہیں اور علاقہ عملاً ڈاکوؤں کے رحم و کرم پر ہے۔

شہریوں نے آئی جی پنجاب، آر پی او ڈیرہ غازی خان اور ڈی پی او سے مطالبہ کیا ہے کہ تھانہ دراہمہ میں فوری طور پر مؤثر پولیسنگ یقینی بنائی جائے، موجودہ ایس ایچ او کی کارکردگی کا جائزہ لے کر سخت کارروائی کی جائے، بصورت دیگر احتجاج کرنے پر مجبور ہوں گے.

ڈیرہ غازی خان (باغی ٹی وی/نیوز رپورٹر شاہد خان)ڈیرہ غازی خان میں میونسپل کارپوریشن کی جانب سے رکشہ پرچی کے نظام کے تحت رکشہ ڈرائیوروں کے ساتھ مبینہ بدسلوکی، غنڈہ گردی اور لڑائی جھگڑا معمول بن گیا ہے، جس کے باعث غریب رکشہ ڈرائیور شدید ذہنی اذیت اور پریشانی کا شکار ہیں۔ ذرائع کے مطابق پرچی عملے کا رویہ نہ صرف غیر ذمہ دارانہ ہے بلکہ معمولی باتوں پر تلخ کلامی کرتے ہوئے بات ہاتھا پائی تک پہنچنے کا خدشہ رہتا ہے۔

رکشہ ڈرائیوروں کا کہنا ہے کہ وہ روزانہ کی بنیاد پر محنت مزدوری کر کے اپنے اہلِ خانہ کا پیٹ پالتے ہیں، تاہم میونسپل کارپوریشن کے عملے کی جانب سے آئے روز ہراساں کیا جانا ان کے لیے باعثِ اذیت بن چکا ہے۔ ڈرائیوروں کے مطابق پرچی کے عملے کا رویہ توہین آمیز ہوتا ہے، سوال کرنے یا وضاحت مانگنے پر بدتمیزی کی جاتی ہے اور بعض اوقات بلاجواز دباؤ بھی ڈالا جاتا ہے۔

متاثرہ رکشہ ڈرائیوروں نے ضلعی انتظامیہ اور اعلیٰ حکام سے مطالبہ کیا ہے کہ رکشہ پرچی کے نظام کا فوری نوٹس لیا جائے، اسے شفاف اور منظم بنایا جائے اور عملے کو سختی سے پابند کیا جائے کہ وہ عوام کے ساتھ عزت و احترام سے پیش آئیں۔ ان کا کہنا ہے کہ اگر حالات یہی رہے تو غریب طبقہ مزید مسائل کا شکار ہو جائے گا۔

عوامی حلقوں نے بھی میونسپل کارپوریشن کی کارکردگی پر سوال اٹھاتے ہوئے مطالبہ کیا ہے کہ رکشہ ڈرائیوروں کے ساتھ ناروا سلوک بند کرایا جائے اور ذمہ دار اہلکاروں کے خلاف فوری کارروائی عمل میں لائی جائے، تاکہ شہر میں امن و امان کی صورتحال خراب نہ ہو اور محنت کش طبقہ سکھ کا سانس لے سکے۔

ڈیرہ غازی خان (باغی ٹی وی/نیوز رپورٹر شاہد خان)ڈیرہ غازی خان شہر کے اندر موٹر سائیکل سواروں پر عائد ہیلمٹ پابندی ختم کرنے کا مطالبہ زور پکڑنے لگا ہے۔ شہریوں کا مؤقف ہے کہ ڈیرہ غازی خان ایک چھوٹا اور محدود رقبے پر مشتمل شہر ہے، جہاں اندرونِ شہر سفر نہایت کم وقت میں مکمل ہو جاتا ہے، اس لیے بڑے شہروں کی طرز پر سخت ہیلمٹ پابندی شہریوں کے لیے غیر ضروری مشکلات کا سبب بن رہی ہے۔

شہریوں کے مطابق ڈیرہ غازی خان شہر کا مجموعی رقبہ تقریباً دو سے اڑھائی کلومیٹر پر محیط ہے، جہاں قادریہ چوک سے گھنٹہ گھر، گھنٹہ گھر سے کلمہ چوک، کلمہ چوک سے گولائی کمیٹی، گولائی کمیٹی سے ٹریفک چوک اور ٹریفک چوک سے لاری اڈا جیسے مصروف روٹس پر سفر عموماً دو سے چار منٹ جبکہ زیادہ سے زیادہ پانچ منٹ میں طے ہو جاتا ہے۔ ایسے مختصر فاصلے اور کم دورانیے کے سفر میں ہیلمٹ پابندی کو شہری غیر عملی قرار دے رہے ہیں۔

عوامی حلقوں کا کہنا ہے کہ ڈیرہ غازی خان کو ملتان یا لاہور جیسے بڑے شہروں کے ساتھ موازنہ کرنا درست نہیں، کیونکہ یہاں کی جغرافیائی ساخت، ٹریفک کا دباؤ اور شہری ضروریات یکسر مختلف ہیں۔ بڑے شہروں میں طویل فاصلے، شدید ٹریفک رش اور حادثات کی شرح زیادہ ہوتی ہے، جبکہ ڈیرہ غازی خان میں اندرونِ شہر ٹریفک کی نوعیت اور فاصلوں کی صورتحال اس کے برعکس ہے۔

شہریوں نے متعلقہ حکام سے مطالبہ کیا ہے کہ ڈیرہ غازی خان شہر کی حدود میں ہیلمٹ پابندی پر نظرثانی کی جائے اور مقامی حالات کو مدنظر رکھتے ہوئے مناسب فیصلہ کیا جائے، تاکہ عوام کو روزمرہ کے مختصر سفروں میں سہولت میسر آ سکے اور غیر ضروری جرمانوں اور مشکلات سے نجات حاصل ہو۔

ڈیرہ غازی خان (باغی ٹی وی، نیوز رپورٹر شاہد خان)ڈیرہ غازی خان کی یونین کونسل 17 عبداللہ ٹاؤن کالونی میں منشیات نے ڈیرے ڈال لیے، نوجوان نسل تباہی کے دہانے پر پہنچ گئی۔ علاقے میں خطرناک منشیات آئس اور نشہ آور گپیکا کیپسول کا استعمال تشویشناک حد تک بڑھ چکا ہے، جس کے باعث کم عمر اور نوجوان طبقہ تیزی سے نشے کی لت میں مبتلا ہو رہا ہے۔

علاقہ مکینوں کے مطابق منشیات فروش بلا خوف و خطر کھلے عام نوجوانوں کو نشہ فراہم کر رہے ہیں، جبکہ کم سن لڑکے بھی اس مکروہ دھندے کا آسان شکار بن رہے ہیں۔ صورتحال نے والدین کو شدید ذہنی اذیت میں مبتلا کر دیا ہے اور پورے علاقے میں خوف و بے چینی کی فضا قائم ہے۔

شہریوں کا کہنا ہے کہ اگر بروقت اور مؤثر کارروائی نہ کی گئی تو یہ ناسور پورے علاقے کو اپنی لپیٹ میں لے لے گا۔ اہلِ علاقہ نے تھانہ صدر اور سٹی تھانہ پولیس سے فوری اور بلاامتیاز کارروائی کا مطالبہ کرتے ہوئے کہا ہے کہ منشیات فروشوں کے خلاف سخت کریک ڈاؤن کیا جائے اور عبداللہ ٹاؤن کالونی کو منشیات سے پاک کیا جائے۔

عوامی حلقوں نے اعلیٰ پولیس حکام سے بھی فوری نوٹس لینے، مستقل بنیادوں پر نگرانی اور مؤثر حکمتِ عملی اپنانے کا مطالبہ کیا ہے، تاکہ نوجوان نسل کو مزید تباہی سے بچایا جا سکے اور علاقے میں امن و امان بحال ہو۔