Category: ڈیرہ غازی خان

ڈیرہ غازی خان ،رپورٹ،شاہد خان
پاکستان جرنلسٹ ایسوسی ایشن رجسٹرڈ کی بھرپور مذمت رنگ لے آئی، ضلع وہاڑی میں صحافی پر تشدد کرنے والے اہلکاروں کے خلاف مقدمہ درج کر لیا گیا جبکہ متعلقہ اہلکاروں کے خلاف محکمانہ کارروائی بھی باقاعدہ طور پر شروع کر دی گئی ہے۔

تفصیلات کے مطابق چند روز قبل ضلع وہاڑی میں فرائض کی انجام دہی کے دوران ایک صحافی کو مبینہ طور پر محکمہ وائلڈ لائف کے اہلکاروں کی جانب سے تشدد کا نشانہ بنایا گیا تھا، جس پر صحافتی حلقوں میں شدید غم و غصہ پایا جاتا تھا۔ اس واقعہ کے خلاف پاکستان جرنلسٹ ایسوسی ایشن رجسٹرڈ نے بھرپور آواز بلند کی اور ذمہ داران کے خلاف فوری کارروائی کا مطالبہ کیا۔پاکستان جرنلسٹ ایسوسی ایشن کے صدر جنوبی پنجاب و ممبر سپریم کونسل شیخ رمضان ندیم نے اس پیش رفت کو خوش آئند قرار دیتے ہوئے کہا کہ صحافیوں پر تشدد کسی صورت برداشت نہیں کیا جائے گا۔ انہوں نے کہا کہ صحافی معاشرے کی آنکھ اور آواز ہوتے ہیں، اور ان پر حملہ دراصل آزادی صحافت پر حملہ ہے۔

شیخ رمضان ندیم نے مزید کہا کہ تنظیم نے ہمیشہ صحافیوں کے حقوق کے تحفظ کے لیے آواز بلند کی ہے اور آئندہ بھی کسی قسم کی زیادتی پر خاموش نہیں رہا جائے گا۔ انہوں نے حکومت سے مطالبہ کیا کہ ملوث اہلکاروں کو قرار واقعی سزا دی جائے تاکہ آئندہ ایسے واقعات کی روک تھام ممکن ہو سکے۔انہوں نے ضلعی انتظامیہ اور پولیس کی جانب سے فوری کارروائی کو سراہتے ہوئے کہا کہ یہ اقدام انصاف کی فراہمی کی جانب مثبت پیش رفت ہے۔ انہوں نے کہا کہ اگر اسی طرح فوری ایکشن لیا جاتا رہا تو صحافی برادری خود کو زیادہ محفوظ تصور کرے گی۔آخر میں انہوں نے ملک بھر کے صحافیوں سے اپیل کی کہ وہ اتحاد و یکجہتی کا مظاہرہ کریں اور حق و سچ کی آواز بلند کرتے رہیں، کیونکہ ایک مضبوط اور متحد صحافتی برادری ہی اپنے حقوق کا بہتر تحفظ کر سکتی ہے۔

ڈیرہ غازیخان ،رپورٹ،شاہد خان

محکمہ سوئی گیس کے متعلقہ اہلکار وں نے اپنی وہی فرسودہ روش کو قائم رکھتے ہوئے بلاک 28 کے گھریلو گیس صارفین کو اذیت دینے کو اپنا فریضہ سمجھ کر ادا کرتے ہوئے گیس کے اوقات اپنی من مرضی سے جاری کئے ہوئے ہیں۔صبح 6تا8 فل سپلائی دینے کے پابند ہیں مگر 7تا 8 گیس ملتی ہے اور وہ بھی انتہائی کم پریشر اس طرح دوپہر 12تا2 بجے کی بجائے پونےایک بجے سے دو بجے تک پھر شام چھ تا آٹھ بجے کے بجائے شام سات بجے سے آٹھ بجے تک سپلائی دے رہے ہیں.

سوال یہ ہے کہ یہ جو پونے تین گھنٹے کی گیس غائب کرتے ہیں وہ کہاں اور کس کے کھاتے میں جاتی ہے؟ عوام کو بیوقوف بناتے ہیں اہلیان محلہ کی گھریلو خواتین شدید پریشانی سے دوچار ہیں اسکا ہنگامی بنیادوں پر فوری حل نکالا جائے اور متعلقہ حکام بالا سے التماس ہے کی ڈیرہ غازیخان کے محکمہ سوئی گیس کے اہلکاروں کے مختلف اضلاع میں تبادلے کر دیئے جائیں تاکہ ان کو احساس ہو کہ ان کے نام منسوب رویوں کی وجہ سے عوام کتنی سخت پریشان ہیں نا ہی ان کے آفس کا فون آن ہے ناہی یہ اپنا پرسنل نمبرز سے بات سنتے ہیں خدارا اہلیان محلہ کو بنیادی حق سے محروم نا کریں ، کمشنر چوہدری اشفاق احمد گجر ، اور ایم پی محمد حنیف خان پتافی ،ایم پی اے اسامہ عبدالکریم سے مودبانہ گزارش کرتے ہیں کہ آپ ذاتی دلچسپی لیتے ہوئے مستقل بنیادوں پر یا لائن تبدیل کرنے کا حکم صادر فرمائیں یا مقررہ وقت پر گیس سپلائی فل پریشر کے ساتھ جاری رکھنے کا حکم صادر کیا جائے۔یہ تمام متعلقہ اہلکار ٹس سے مس نہیں ہو رہے۔عوام کو بنیادی حق سے محروم نا کیا جائے

ڈیرہ غازیخان باغی ٹی وی نیوز رپورٹر (شاہد خان ) برصغیر پاک و ہند کے عظیم روحانی پیشوا حضرت سید احمد سلطان المعروف سخی سرورؒ کے 870 ویں سالانہ عرس کی چار روزہ تقریبات کا باقاعدہ آغاز ہو گیا۔ ڈپٹی کمشنر محمد عثمان خالد نے ڈی پی او صادق حسین بلوچ، محکمہ اوقاف کے افسران، مجاوران اور ضلعی انتظامیہ کے ہمراہ مزار اقدس پر چادر چڑھا کر عرس تقریبات کا افتتاح کیا۔

اس موقع پر ملک کی سلامتی، ترقی و خوشحالی، افواجِ پاکستان کی کامیابی اور مشرقِ وسطیٰ میں امن کے لیے خصوصی دعائیں مانگی گئیں۔ مجاوران کی جانب سے ڈپٹی کمشنر اور ڈی پی او کا پرتپاک استقبال کیا گیا جبکہ خصوصی دستار بندی بھی کی گئی۔اس موقع پر کمانڈنٹ بارڈر ملٹری پولیس امیر تیمور خان، اے ڈی سی جی محمد اسد چانڈیہ، ڈی او سپیشل برانچ سید احمد بخاری، اسسٹنٹ کمشنرز تیمور عثمان اور حافظ عمر سعید، زونل ایڈمنسٹریٹر اوقاف قاضی اظہر، منیجر طارق جاوید سمیت دیگر افسران بھی موجود تھے۔ڈپٹی کمشنر محمد عثمان خالد نے عرس کے انتظامات، کنٹرول روم، سی سی ٹی وی کیمروں، داخلی و خارجی راستوں اور چیکنگ پوائنٹس کا معائنہ کیا۔ انہوں نے زائرین میں لنگر تقسیم کیا اور سہولیات سے متعلق دریافت کیا۔ اس موقع پر انہوں نے ہدایت کی کہ وزیر اعلیٰ پنجاب کی ہدایات کے مطابق زائرین کو بہترین سہولیات فراہم کی جائیں اور انتظامات میں کوئی کمی نہ رہنے دی جائے۔ڈپٹی کمشنر کا کہنا تھا کہ حضرت سخی سرورؒ کی تعلیمات امن، محبت، بھائی چارے اور اخوت کا درس دیتی ہیں اور ضلعی انتظامیہ نے عرس کے لیے مثالی انتظامات مکمل کر لیے ہیں۔

ڈی پی او صادق حسین بلوچ نے کہا کہ عرس کے موقع پر پولیس اور بارڈر ملٹری پولیس کی جانب سے فول پروف سکیورٹی انتظامات کیے گئے ہیں۔ درگاہ کے اطراف خار دار تاروں، سی سی ٹی وی کیمروں اور سیف سٹی سسٹم کے ذریعے نگرانی کی جا رہی ہے جبکہ زائرین کو مکمل چیکنگ کے بعد داخلے کی اجازت دی جا رہی ہے۔ زائرین کی جان و مال کے تحفظ کے لیے تمام وسائل بروئے کار لائے جا رہے ہیں.

ڈیرہ غازی خان (سٹی رپورٹر جواد اکبر) عیدالفطر کے مقدس موقع سے قبل اور عید کے دنوں میں وزیر اعلیٰ پنجاب مریم نواز کے ویژن پر عملدرآمد کرتے ہوئے ڈائیوو ویسٹ مینجمنٹ کمپنی نے شہر بھر میں صفائی ستھرائی کے شاندار انتظامات کر کے ڈیرہ غازی خان کو حقیقی معنوں میں چمکا دیا، جس پر شہریوں نے خوشی اور اطمینان کا بھرپور اظہار کیا۔

ریجنل منیجر ڈائیوو ویسٹ مینجمنٹ نے میڈیا سے گفتگو کرتے ہوئے بتایا کہ کمپنی نے ہمیشہ کی روایت کو برقرار رکھتے ہوئے اس سال بھی عیدالفطر کے موقع پر خصوصی صفائی پلان ترتیب دیا۔ انہوں نے کہا کہ ڈپٹی کمشنر ڈیرہ غازی خان عثمان خالد کی واضح ہدایات اور مسلسل نگرانی میں شہر کے تمام اہم مقامات، بازاروں اور شاہراہوں کو نہ صرف صاف کیا گیا بلکہ انہیں مثالی انداز میں سنوارا بھی گیا۔انہوں نے مزید کہا کہ چاند رات سے ہی خصوصی صفائی آپریشن کا آغاز کر دیا گیا تھا، کیونکہ اس موقع پر شہریوں کی بڑی تعداد خریداری کے لیے بازاروں کا رخ کرتی ہے۔ اس صورتحال کو مدنظر رکھتے ہوئے ویسٹ مینجمنٹ ٹیموں نے دن رات محنت کر کے شہر کو صاف ستھرا رکھنے کو یقینی بنایا۔عیدالفطر کی نماز اور اس کے بعد شہریوں کی جانب سے قبرستانوں کا رخ کرنے کے پیش نظر عیدگاہوں اور قبرستانوں کی جانب جانے والے تمام راستوں کو خصوصی طور پر صاف کیا گیا۔ قبرستانوں کے اندرونی و بیرونی حصوں میں بھی صفائی کے اعلیٰ انتظامات کیے گئے تاکہ شہری اپنے پیاروں کی قبروں پر حاضری کے دوران کسی قسم کی پریشانی کا سامنا نہ کریں۔

شہریوں نے ڈائیوو ویسٹ مینجمنٹ کمپنی کی اس کاوش کو سراہتے ہوئے کہا کہ عید کے موقع پر ایسے مثالی انتظامات نہ صرف خوشی میں اضافہ کرتے ہیں بلکہ حکومتی اداروں پر اعتماد کو بھی مضبوط بناتے ہیں۔
ڈائیوو ویسٹ مینجمنٹ کی بروقت اور مؤثر حکمت عملی نے ایک بار پھر ثابت کر دیا کہ اگر نیت اور قیادت مضبوط ہو تو عوامی خدمت کے میدان میں نمایاں نتائج حاصل کیے جا سکتے ہیں۔

پنجاب کاؤنٹر ٹیررازم ڈیپارٹمنٹ (سی ٹی ڈی) پنجاب نے ڈی جی خان کے سرحدی گاؤں جوتر کے قریب کاروائی کے دوران 4 دہشت گرد مارے گئے سی ٹی ڈی کو خفیہ اطلاع ملی تھی کہ جو تر گاؤں کے قریب فتنہ الخوارج کے 15 کے قریب دہشت گرد موجود ہیں جو پولیس اور دیگر اداروں پر حملے کی منصوبہ بندی مکمل کر چکے ہیں

سی ٹی ڈی کے ترجمان کے مطابق خفیہ اطلاع پر کارروائی کی۔ اس دوران دہشت گردوں نے فائرنگ کردی، سی ٹی ڈی اہلکاروں نے جوابی فائرنگ کی، جس کے نتیجے میں کاؤنٹر ٹیررازم ڈیپارٹمنٹ اور دہشت گردوں کے درمیان فائرنگ کے تبادلے کے نتیجے میں 4 دہشت مارے گئے، جب کہ 11 دہشت گرد فرار ہونے میں کامیاب ہوگئے۔

سی ٹی ڈی نے عسکریت پسندوں کے قبضے سے دھماکہ خیز مواد.رائفلیں ۔گولیاں اور دیگر اشیاء بھی برآمد کیا، دہشت گرد پولیس اور دیگر اداروں پر حملے کی منصوبہ بندی مکمل کر چکے تھے انہوں نے کہا کہ ان کی شناخت کا عمل جاری ہے جبکہ فرار ہونے والے دہشت گردوں کی گرفتاری کے لیے سرچ آپریشن شروع کر دیا گیا ہے۔

ترجمان نے مزید کہا کہ کاؤنٹر ٹیررازم ڈیپارٹمنٹ پنجاب تندہی سے محفوظ پنجاب کے اپنے ہدف پر عمل پیرا ہے اور دہشت گردی کی لعنت کو جڑ سے اکھاڑ پھینکنے کے لیے پرعزم ہے۔ انہوں نے کہا کہ دہشت گردی سے متعلق کسی بھی قسم کی اطلاع کی صورت میں شہری کاؤنٹر ٹیررازم ڈیپارٹمنٹ پنجاب کی ہیلپ لائن 0800-11111 پر اطلاع دیں۔