ڈیرہ غازی خان(باغی ٹی وی ،سٹی رپورٹرجواد اکبر) نمازِ عیدالاضحی کے 314 مقامات پر اجتماعات، سیکیورٹی ہائی الرٹ، پولیس کی بھاری نفری تعینات
ضلع بھر میں عیدالاضحی کے موقع پر 314 مقامات پر نمازِ عید کے اجتماعات منعقد ہوں گے، جن کے لیے پولیس کی جانب سے سیکیورٹی ہائی الرٹ کر دی گئی ہے۔ ڈی پی او سید علی کی خصوصی ہدایات پر جامع سیکیورٹی پلان مرتب کر لیا گیا ہے، جس کے تحت شہر بھر میں پکٹ پوائنٹس قائم کر دیے گئے ہیں، مشکوک اور شرپسند عناصر پر کڑی نظر رکھنے کے احکامات جاری کیے گئے ہیں اور بھاری گاڑیوں کا شہر میں داخلہ بند کر دیا گیا ہے۔
ڈی پی او سید علی کا کہنا ہے کہ "عیدالاضحی کی خوشیوں کے موقع پر عوام کو پُرامن ماحول فراہم کرنے کے لیے تمام دستیاب وسائل بروئے کار لائے جا رہے ہیں۔ ہم اپنے فرائض کو جذبۂ حب الوطنی سے سرشار ہو کر انجام دیتے ہوئے دشمن عناصر کے ناپاک عزائم کو ناکام بنائیں گے۔”
ضلع بھر میں امن و امان قائم رکھنے کے لیے 1000 سے زائد پولیس افسران اور اہلکار ڈیوٹی انجام دیں گے، جن میں ڈی ایس پیز، ایلیٹ فورس، ڈولفن فورس، محافظ اسکواڈ، لیڈیز پولیس، QRF اور پولیس موبائلز کے گشتی دستے شامل ہیں۔ یہ فورسز شہر کے بازاروں، شاپنگ سینٹرز، تجارتی مراکز، اہم شاہراہوں اور داخلی و خارجی راستوں پر مسلسل گشت کریں گی۔
عوامی مقامات پر سماجی کمیٹیوں کے ارکان بھی پولیس کے ساتھ تعاون کریں گے، جب کہ ٹریفک نظام کی روانی کے لیے ٹریفک پولیس اہلکاروں کو بائی نیم ڈیوٹیز سونپ دی گئی ہیں۔ ان اہلکاروں کو سختی سے ہدایت کی گئی ہے کہ وہ اپنے فرائض ذمہ داری سے انجام دیں۔
ڈی پی او نے تمام مساجد کے منتظمین کو ہدایت کی ہے کہ نمازِ عید کے مقامات پر پارکنگ کا نظام ایس او پیز کے مطابق بنایا جائے اور داخلی راستوں پر مقامی رضا کاروں کے ذریعے چیکنگ اور شناختی عمل کو یقینی بنایا جائے۔ صرف وہی تنظیمیں اور فلاحی ادارے قربانی کی کھالیں جمع کر سکیں گے جن کے پاس ضلعی انتظامیہ سے باقاعدہ اجازت نامہ موجود ہو، خلاف ورزی کرنے والوں کے خلاف فوری کارروائی کی جائے گی۔
سیکیورٹی اہلکاروں کو ہدایت کی گئی ہے کہ وہ مشکوک افراد، گاڑیوں، پارسلز، بیگز اور موٹر سائیکلوں پر کڑی نظر رکھیں، جب کہ ہوٹل اور گیسٹ ہاؤس مالکان کو ہدایت دی گئی ہے کہ وہ کسی مشکوک شخص کو رہائش فراہم نہ کریں۔
عید کے دن ون ویلنگ، ہوائی فائرنگ، غیر نمونہ یا بغیر نمبر پلیٹ گاڑیوں، ہلڑ بازی، اور لاؤڈ اسپیکر کے غلط استعمال پر سخت قانونی کارروائی کی جائے گی۔ عوام سے اپیل کی گئی ہے کہ کسی بھی مشکوک سرگرمی کی اطلاع فوری طور پر ریسکیو 15، مقامی تھانے یا ضلعی کنٹرول روم کے نمبر 0649260113 پر دیں تاکہ پرامن عید کو یقینی بنایا جا سکے۔
