Category: ڈیرہ غازی خان

ڈیرہ غازی خان(باغی ٹی وی رپورٹ) سرور والی میں الیکٹرک پول پر کام کے دوران کرنٹ لگنے سے نوجوان جاں بحق، شہریوں کا واپڈا کیخلاف احتجاج

ڈیرہ غازی خان میں سرور والی، ملتان روڈ پر افسوسناک واقعہ پیش آیا، جہاں بجلی کے کھمبے پر بجلی کا کام کرتے ہوئے کرنٹ لگنے سے ایک نوجوان جاں بحق ہو گیا۔ جاں بحق ہونے والے شخص کی شناخت امین عرف مینا قریشی کے نام سے ہوئی ہے۔

ریسکیو 1122 کنٹرول روم کو موصول ہونے والی ایمرجنسی کال میں اطلاع دی گئی کہ ایک شخص بجلی کے پول پر کام کرتے ہوئے کرنٹ لگنے کے بعد تاروں پر لٹک گیا ہے۔ اطلاع ملتے ہی قریبی دستیاب موٹر بائیک ایمبولینس، ایک ایمبولینس اور سنٹرل اسٹیشن سے دو ریسکیو وہیکلز جائے حادثہ کی طرف روانہ کر دی گئیں۔ ساتھ ہی اسٹیشن کوآرڈینیٹر کو بھی جائے حادثہ پر بھیجا گیا۔

واقعے کی اطلاع فوری طور پر پولیس کنٹرول روم (عبدالستار)، ڈی ای او سی اور واپڈا کے متعلقہ ایس ڈی او (سید وجاہت حسین) کو بھی فراہم کر دی گئی۔ جائے حادثہ پر پہنچنے کے بعد معلوم ہوا کہ واپڈا کی ٹیم کے ساتھ آیا ہوا شخص ایک تکنیکی خرابی کو ٹھیک کرنے کے لیے بجلی کے پول پر چڑھا تھا جہاں اسے کرنٹ لگ گیا اور وہ موقع پر ہی جان کی بازی ہار گیا۔

کنٹرول روم نے واپڈا سے مسلسل رابطے میں رہتے ہوئے بجلی کی مکمل بندش کی تصدیق کی، جس کے بعد ریسکیو ٹیم نے ایکسٹینڈایبل سیڑھی (Extendable Ladder) کے ذریعے پول پر لٹکے ہوئے متوفی شخص تک رسائی حاصل کی اور لاش کو نیچے اتار کر سی پی آر بھی دی، تاہم وہ پہلے ہی فوت ہوچکا تھا۔

واقعے کی سنگینی کے باعث مقامی افراد جائے حادثہ پر جمع ہو گئے۔ جب ریسکیو ٹیم نے میت کو ایمبولینس کے ذریعے ہسپتال منتقل کرنے کی کوشش کی تو مشتعل شہریوں نے لاش ایمبولینس سے اتار کر واپڈا کیخلاف شدید احتجاج شروع کر دیا اور ملتان روڈ کو 15 سے 20 منٹ تک بند کیے رکھا۔ پولیس کی نفری موقع پر پہنچنے پر احتجاج ختم ہوا اور متوفی کی لاش کو علامہ اقبال ٹیچنگ ہسپتال منتقل کر دیا گیا۔

عینی شاہدین اور شہریوں کا کہنا تھا کہ واپڈا کی غفلت اور حفاظتی انتظامات نہ ہونے کی وجہ سے قیمتی جان ضائع ہوئی، لہٰذا ذمہ داروں کے خلاف فوری کارروائی کی جائے۔

ڈیرہ غازی خان (باغی ٹی وی، نیوز رپورٹر شاہد خان) اسسٹنٹ کمشنر ہیڈ کوارٹر نذر حسین کورائی نے ضلع بھر میں صحت و خوراک کے نظام کی بہتری کے لیے متعدد کارروائیاں کیں۔ آر ایچ سی کالا کے دورے کے دوران انہوں نے اسٹاف کی حاضری ڈیوٹی روسٹر کے مطابق چیک کی، مریضوں کی عیادت کی اور مفت فراہم کی جانے والی ادویات و دیگر سہولیات کا جائزہ لیا۔ اس موقع پر اسسٹنٹ کمشنر نے ہسپتال میں صفائی کے ناقص انتظامات پر برہمی کا اظہار کرتے ہوئے فوری بہتری کی ہدایات جاری کیں۔

دریں اثنا نذر حسین کورائی نے پنجاب فوڈ اتھارٹی کے ہمراہ شاہ صدر دین، ریتڑہ اور دیگر علاقوں میں غیر معیاری خوراک کی تیاری و فروخت کے خلاف سخت کارروائیاں کیں۔ ریتڑہ میں حفظانِ صحت کے اصولوں کی خلاف ورزی پر ایک چھوٹی بسکٹ فیکٹری کو سیل کر دیا گیا جبکہ دو بیکریوں اور ایک کریانہ سٹور کو بھاری جرمانے کیے گئے۔ اسسٹنٹ کمشنر کا کہنا تھا کہ شہریوں کو معیاری اور صحت بخش خوراک کی فراہمی اولین ترجیح ہے اور ایسی کارروائیاں مستقبل میں بھی جاری رہیں گی۔

انہوں نے پرائس کنٹرول ایکٹ کے تحت ناجائز منافع خوروں کے خلاف بھی سخت ایکشن کی ہدایت دیتے ہوئے کہا کہ اشیائے خورونوش کی سرکاری نرخوں پر فراہمی ہر صورت یقینی بنائی جائے گی تاکہ عوام کو ریلیف مل سکے۔

ڈیرہ غازی خان (باغی ٹی وی نیوزرپورٹرشاہدخان) پرانی سبزی منڈی بلاک 3 اور 7 کے درمیانی روڈ پر واقع ایک دکان سے مردہ مرغیوں کا اڑھائی من گوشت برآمد کر لیا گیا۔ کارروائی اسسٹنٹ کمشنر ہیڈکوارٹر نذر حسین کورائی نے ڈپٹی کمشنر محمد عثمان خالد کی ہدایت پر پنجاب فوڈ اتھارٹی کے ہمراہ کی۔ دکان سے برآمد ہونے والے گوشت میں 100 کلوگرام فوری طور پر تلف کر دیا گیا جبکہ موقع پر موجود دو افراد کو گرفتار کرا دیا گیا۔

اے سی ہیڈکوارٹر نذر حسین کورائی کے مطابق مردہ مرغیوں کے گوشت کی فروخت انسانی صحت کیلئے سنگین خطرہ ہے، جس کے خلاف سخت کارروائی کی جا رہی ہے۔ انہوں نے بتایا کہ قانونی کارروائی کیلئے مقامی پولیس کو استغاثہ جمع کرا دیا گیا ہے تاکہ گرفتار ملزمان کے خلاف سخت قانونی اقدام اٹھایا جا سکے۔

اسسٹنٹ کمشنر نے مزید کہا کہ شہریوں کو صاف، حلال اور معیاری گوشت کی فراہمی حکومت کی اولین ترجیح ہے اور اس ضمن میں کسی قسم کی غفلت یا کوتاہی برداشت نہیں کی جائے گی۔

علاوہ ازیں اسسٹنٹ کمشنر نے تحصیل چوٹی زیریں کا دورہ بھی کیا، جہاں انہوں نے گوشت، پھل، سبزیاں اور دیگر اشیائے خورد و نوش کی مارکیٹوں کا معائنہ کیا۔ انہوں نے نرخ نامے، معیار اور اشیاء کی دستیابی کا جائزہ لیا اور خریداروں سے براہ راست معلومات بھی حاصل کیں۔

ڈیرہ غازی خان (باغی ٹی وی رپورٹ) ڈیرہ غازی خان میں میونسپل کارپوریشن کی مجرمانہ غفلت ایک بار پھر انسانی جانوں کے ضیاع کا باعث بنی۔ جَامپُور روڈ پر سیوریج لائن کی صفائی کے دوران حفاظتی اقدامات کے بغیر مین ہول میں اترنے والے دو نوجوان سیورمین محمد آصف ولد واحد بخش بعمر26 سال سکنہ رازی کالونیاور صابر حسین ولد بشیر احمد عمر30 سالہ، رہائشی شمس آبادکالونی) دم گھٹنے سے جاں بحق ہو گئے۔

ریسکیو 1122 کو ر اطلاع ملی کہ دو افراد گٹر کی صفائی کے دوران بے ہوش ہو گئے ہیں۔ اطلاع ملنے پر ریسکیو کی 6 گاڑیاں جائے وقوعہ پر پہنچیں اور ریسکیو آپریشن ڈسٹرکٹ ایمرجنسی آفیسر انجینئر احمد کمال کی نگرانی میں کیا گیا، لیکن دونوں کو مردہ حالت میں نکالا گیا۔ لاشیں علامہ اقبال ٹیچنگ ہسپتال منتقل کر دی گئیں۔

مبینہ طور پر یہ افسوسناک واقعہ سی ای او میونسپل کارپوریشن ڈیرہ غازی خان کی کھلی نااہلی اور لاپرواہی کا منہ بولتا ثبوت ہے، جن کی نااہلی کی وجہ سے بغیر کسی حفاظتی سامان کے مزدوروں کو جان لیوا ماحول میں اتارا گیا۔ یہ پہلا سانحہ نہیں ہے اس سے قبل بزدار دور حکومت میں بھی فیصل آباد سے تعلق رکھنے والے دو سیورمین ڈیرہ غازی خان میں ہی دوران صفائی دم گھٹنے سے جاں بحق ہو گئے تھے۔ ایک اور دل دہلا دینے والے واقعے میں مقامی نوجوان سیورمین کی لاش اس کے بوڑھے والد نے خود مین ہول سے نکالی تھی۔ ان تمام حادثات کے باوجود سی ای او میونسپل کارپوریشن کے خلاف آج تک کوئی محکمانہ انکوائری نہیں کی گئی اور ہر بار ان انسانی المیوں کو دبا دیا گیا۔

شہریوں اور سماجی حلقوں نے حکومت پنجاب، وزیراعلیٰ مریم نواز اور آئی جی پنجاب سے مطالبہ کیا ہے کہ سی ای او میونسپل کارپوریشن ڈیرہ غازی خان کے خلاف فوری انکوائری کی جائے، انہیں برطرف کیا جائے اور غفلت برتنے والے دیگر اہلکاروں کو بھی قانون کے کٹہرے میں لایا جائے۔ مزید برآں، سیوریج ورکرز کے لیے حفاظتی سامان، تربیت اور انشورنس کا مستقل بندوبست کیا جائے تاکہ مزید کسی مزدور کی جان ضائع نہ ہو۔

یہ سوال اب جواب مانگتا ہے کہ کب تک غریب مزدور اپنی جانیں گنواتے رہیں گے اور نااہل افسران عہدوں پر براجمان رہیں گے؟

ڈیرہ غازی خان (باغی ٹی وی،سٹی رپورٹر جواد اکبر) پل شوریا، جامپور روڈ نزد ٹول پلازہ پر اس وقت خطرے کی گھنٹی بجی جب ایک ایل پی جی کیپسول سے گیس کا شدید اخراج شروع ہو گیا۔ گیس لیکج کسی بھی لمحے خوفناک دھماکے میں تبدیل ہو سکتی تھی، تاہم ریسکیو 1122 ڈیرہ غازی خان نے برق رفتاری اور پیشہ ورانہ مہارت کا مظاہرہ کرتے ہوئے ممکنہ تباہی کو ٹال دیا۔

کنٹرول روم کو اطلاع ملتے ہی فوری ردعمل دیتے ہوئے دو فائر وہیکلز (KCF&R-01، DGF-01) اور ایک ریسکیو وہیکل جائے وقوعہ کی جانب روانہ کی گئیں، جو صرف 13 منٹ میں موقع پر پہنچ گئیں۔ ٹیم نے حفاظتی اقدامات کے تحت فوری آپریشن کا آغاز کیا اور گیس کے پھیلاؤ کو محدود کرتے ہوئے علاقے کو محفوظ بنانے کی کوششیں شروع کر دیں۔

ڈسٹرکٹ ایمرجنسی آفیسر جناب احمد کمال خود موقع پر موجود رہے اور پورے ریسکیو آپریشن کی براہ راست نگرانی کی۔ ان کی قیادت میں ریسکیو ٹیم نے نہ صرف جائے وقوعہ کو کلیئر کیا بلکہ اطراف کے علاقے سے شہریوں کو محفوظ مقامات پر منتقل کیا۔ کسی بھی ممکنہ دھماکے سے بچاؤ کے لیے ہنگامی اقدامات کیے گئے، جس سے بڑی انسانی و مالی تباہی سے بچا جا سکا۔

ریسکیو 1122 کے اس بروقت اور مؤثر رسپانس پر احمد کمال، اسسٹنٹ کمشنر تیمور عثمان، اور سی ڈی او عمران مہدی کو بھرپور خراجِ تحسین پیش کیا جا رہا ہے۔ شہریوں اور سماجی حلقوں نے ادارے کی کارکردگی کو سراہتے ہوئے کہا ہے کہ اگر ریسکیو 1122 تاخیر سے پہنچتی تو حالات انتہائی خطرناک ہو سکتے تھے۔

شہریوں نے خراج تحسین پیش کرتے ہوئے کہا کہ ویلڈن ریسکیو 1122 ڈیرہ غازی خان آپ نے ثابت کر دیا کہ مستعدی، مہارت اور جذبے سے کسی بھی بڑے سانحے کو روکا جا سکتا ہے۔

پیر عادل (باغی ٹی وی، نامہ نگار باسط علی گاڈی) یوروویگن کی ٹکر سے بچی شدید زخمی، حالت تشویشناک،تونسہ روڈ پر حادثہ، پولیس نے تحقیقات شروع کر دیں

تھانہ کوٹ مبارک کی حدود میں انڈس ہائی وے پر واقع پی ٹی شاہ پمپ کے قریب افسوسناک حادثہ پیش آیا۔ ایک کارسوار نے سڑک کراس کرتی ہوئی بچی کو بچانے کی کوشش کی مگر یورو گاڑی کی زد میں آ کر بچی شدید زخمی ہوگئی۔

ریسکیو ٹیم نے موقع پر پہنچ کر فوری طور پر زخمی بچی کو ابتدائی طبی امداد دینے کے بعد علامہ اقبال ٹیچنگ ہسپتال ڈیرہ غازیخان منتقل کیا، جہاں ڈاکٹروں نے اس کی حالت کو تشویشناک قرار دیا ہے۔

پولیس نے جائے حادثہ پر پہنچ کر شواہد اکٹھے کیے اور قانونی کارروائی کا آغاز کر دیا ہے۔ اہل علاقہ نے سڑک پر بڑھتے حادثات پر تشویش کا اظہار کرتے ہوئے متعلقہ حکام سے حفاظتی اقدامات کا مطالبہ کیا ہے۔

ڈیرہ غازیخان ،پیرعادل،باغی ٹی وی(سٹی رپورٹرجواداکبر،نامہ نگارباسط علی)ڈی جی خان کے مختلف علاقوں میں پرانی دشمنیوں کی بنا پر پیش آنے والے دو فائرنگ کے واقعات میں 4 افراد گولیاں لگنے سے زخمی ہو گئے، جن میں سے دو افراد کو ہسپتال منتقل کر دیا گیا جبکہ دو نے ابتدائی طبی امداد لینے سے انکار کر دیا۔

پہلا واقعہ پائیگاں چوک موضع منگھیر میں پیش آیا، جہاں دو گروپوں کے درمیان پرانی دشمنی کی بنیاد پر تصادم ہوا۔ فائرنگ کے نتیجے میں منصور ولد غلام شبیر، فخرالدین ولد مشتاق احمد اور کلیم ولد اسماعیل زخمی ہو گئے۔ منصور کو دائیں بازو، فخرالدین کو منہ اور کلیم کو بائیں بازو پر گولی لگی۔ دو زخمیوں نے قانونی کارروائی کے مؤقف کے تحت فوری طبی امداد لینے سے انکار کر دیا اور بعدازاں اپنی مدد آپ کے تحت ہسپتال منتقل ہو گئے جبکہ تیسرے زخمی کلیم کو ریسکیو 1122 کی ٹیم نے ابتدائی طبی امداد کے بعد علامہ اقبال ٹیچنگ ہسپتال منتقل کر دیا۔

واقعے کے دوران ایک گروپ نے مخالف پارٹی کی موٹر سائیکل کو آگ لگا دی، جس پر قابو پا لیا گیا۔ ریسکیو نے بروقت کارروائی کرتے ہوئے تین گاڑیاں جائے وقوعہ پر روانہ کیں اور پولیس کو اطلاع دی گئی۔

دوسرا واقعہ بستی رحیم والا، پیر عادل میں پیش آیا، جہاں پرانی دشمنی کے نتیجے میں عبدالمجید ولد غلام شبیر کو دائیں ٹانگ میں گولی مار دی گئی۔ ریسکیو 1122 کی ٹیم نے دو منٹ کے اندر موقع پر پہنچ کر زخمی کو ابتدائی طبی امداد فراہم کی اور اسے فوری طور پر علامہ اقبال ٹیچنگ ہسپتال منتقل کر دیا۔

دونوں واقعات میں پولیس کو بروقت اطلاع دے دی گئی اور قانونی کارروائی جاری ہے۔

ڈیرہ غازی خان (باغی ٹی وی، نیوز رپورٹر شاہد خان) سلاٹر ہاؤس میں مویشی ذبح نہ کرنے اور بغیر ویٹرنری مہر کے گوشت مارکیٹ میں فروخت کرنے پر تین قصابوں کو گرفتار کر لیا گیا۔ یہ کارروائی ڈپٹی کمشنر محمد عثمان خالد کی ہدایت پر اسسٹنٹ کمشنر ہیڈ کوارٹر نذر حسین کورائی نے کی۔

پتھر بازار، فوارہ چوک، قادریہ چوک اور دیگر مقامات پر اچانک معائنے کے دوران انکشاف ہوا کہ بعض دکانوں پر فروخت ہونے والے گوشت پر ویٹرنری ڈاکٹر کی تصدیقی مہر موجود نہیں تھی، جس سے یہ بات سامنے آئی کہ مویشی سلاٹر ہاؤس کے بجائے غیر قانونی طریقے سے ذبح کیے جا رہے تھے۔

اسسٹنٹ کمشنر نذر حسین کورائی نے بتایا کہ تمام قصابوں کو پہلے ہی پابند کیا گیا تھا کہ وہ صرف سلاٹر ہاؤس میں جانور ذبح کریں اور گوشت پر ویٹرنری ڈاکٹر کی مہر لازمی ثبت ہو۔ مہر کے بغیر گوشت غیر قانونی تصور کیا جائے گا۔

انہوں نے واضح کیا کہ شہریوں کو صحت مند اور معیاری گوشت کی فراہمی حکومت کی اولین ترجیح ہے، اس لیے ایسے عناصر کے خلاف سخت قانونی کارروائی جاری رکھی جائے گی۔ غیر قانونی مذبحہ خانوں کے خلاف بھی آپریشن تسلسل سے جاری رہے گا۔