Category: ڈیرہ غازی خان

ڈیرہ غازی خان(باغی ٹی وی رپورٹ) پنجاب اور خیبرپختونخوا کی سرحد پر واقع تھانہ وہوا کے علاقے کوتانی تل میں پولیس، سی ٹی ڈی اور رینجرز کی مشترکہ کاروائی کے دوران خوارجی دہشتگردوں سے شدید مقابلہ ہوا، جس میں دو دہشتگرد ہلاک جبکہ متعدد زخمی ہو گئے۔

تفصیلات کے مطابق دہشتگردوں کی موجودگی کی خفیہ اطلاع پر پٹرولنگ پر مامور پولیس، رینجرز اور سی ٹی ڈی ٹیموں نے فوری ایڈوانس کیا۔ تھانہ وہوا کے علاقے کوتانی تل میں دہشتگردوں سے آمنے سامنے ٹکراو ہوا، جن کے پاس راکٹ لانچر، ہینڈ گرنیڈ اور بھاری اسلحہ موجود تھا۔ دہشتگردوں نے شدید مزاحمت کی، تاہم قانون نافذ کرنے والے اداروں کے جوانوں نے دلیری سے مقابلہ کرتے ہوئے دو دہشتگردوں کو جہنم واصل کر دیا۔

ذرائع کے مطابق جھڑپ کے دوران دہشتگرد جھاڑیوں اور ٹیلوں کی آڑ لے کر فرار ہو گئےجبکہ ایلیٹ فورس کے اہلکار عدنان حبیب اور سی ٹی ڈی اہلکار غضنفر معمولی زخمی ہوئے۔

پولیس ترجمان کے مطابق دہشتگردوں کی نقل و حرکت کے باعث پہلے ہی علاقے میں ہائی الرٹ جاری تھا۔ اطلاع ملتے ہی ڈسٹرکٹ پولیس آفیسر سید علی کی قیادت میں بیک اپ ٹیمیں موقع پر پہنچ گئیں اور مشترکہ کاروائی کی قیادت کی۔

آر پی او ڈیرہ غازی خان کیپٹن (ر) سجاد حسن خان نے خراج تحسین پیش کرتے ہوئے کہا کہ جوانوں نے جرأت و بہادری کی نئی مثال قائم کی۔ آئی جی پنجاب ڈاکٹر عثمان انور نے خوارجی دہشتگردوں کے خلاف کامیاب کاروائی پر پولیس، سی ٹی ڈی اور رینجرز ٹیموں کو شاباش دی۔

پولیس ترجمان کے مطابق علاقے میں سرچ اور سویپ آپریشن بدستور جاری ہے تاکہ ممکنہ فرار ہونے والے دہشتگردوں کو بھی گرفتار یا انجام تک پہنچایا جا سکے۔

ڈیرہ غازیخان(باغی ٹی وی رپورٹ) ڈاکوؤں سے مقابلے میں شہید اے ایس آئی غلام شبیر اور کانسٹیبل غلام فرید کی نماز جنازہ سرکاری اعزاز کے ساتھ ادا، اعلیٰ حکام کی شرکت

تفصیل کے مطابق تھانہ صدر تونسہ کی حدود میں ڈاکوؤں سے مقابلے کے دوران جامِ شہادت نوش کرنے والے اے ایس آئی غلام شبیر اور کانسٹیبل غلام فرید کی نماز جنازہ پولیس لائنز ڈیرہ غازیخان میں مکمل سرکاری اعزاز کے ساتھ ادا کر دی گئی۔ پولیس کے چاک و چوبند دستے نے شہداء کو سلامی پیش کی، جبکہ قومی پرچم میں لپٹے جسدِ خاکی پر اعلیٰ افسران نے پھولوں کی چادر چڑھائی۔

نماز جنازہ میں ایڈیشنل آئی جی ساؤتھ پنجاب محمد کامران خان، آر پی او ڈی جی خان کیپٹن (ر) سجاد حسن خان، کمشنر اشفاق احمد چوہدری، ڈی پی او سید علی، ڈپٹی کمشنر عثمان خالد، رینجرز، پولیس، انتظامیہ، بار ایسوسی ایشن، پریس کلب کے نمائندگان، سیاسی و سماجی رہنماؤں، شہریوں اور شہداء کے لواحقین کی بڑی تعداد نے شرکت کی۔ اس موقع پر سکیورٹی اداروں کے سربراہان بھی موجود تھے۔

ایڈیشنل آئی جی محمد کامران خان نے شہداء کے لواحقین سے ملاقات کی، ان سے اظہار تعزیت کیا اور شہداء کی قربانی کو زبردست خراجِ عقیدت پیش کرتے ہوئے کہا کہ یہ خون رائیگاں نہیں جائے گا، جرائم پیشہ عناصر کے خلاف کارروائیاں مزید تیز کی جائیں گی۔ آر پی او سجاد حسن خان نے شہداء کو پولیس فورس کا فخر قرار دیتے ہوئے کہا کہ پنجاب پولیس قیامِ امن کے لیے ہر قربانی دینے کو تیار ہے، اور شہداء کے بچوں کی مکمل کفالت کی جائے گی۔

نماز جنازہ کی ادائیگی کے بعد شہداء کے جسد خاکی کو مکمل سرکاری اعزاز کے ساتھ ان کے آبائی علاقوں روانہ کیا گیا، جہاں تدفین عمل میں لائی جائے گی۔ شہید اے ایس آئی غلام شبیر نے سوگواران میں بیوی اور پانچ بچے، جبکہ شہید کانسٹیبل غلام فرید نے بیوی اور دو بیٹیاں چھوڑی ہیں۔

ڈیرہ غازی خان (سٹی رپورٹر: جواد اکبر)ڈیرہ غازی خان پولیس نے ایک بار پھر جانفشانی، فرض شناسی اور قربانی کی روشن مثال قائم کر دی۔ تھانہ صدر تونسہ میں تعینات اے ایس آئی غلام شبیر اور کانسٹیبل غلام فرید دری شاہ پل کے قریب ڈاکوؤں سے مقابلے کے دوران جامِ شہادت نوش کر گئے۔

تفصیلات کے مطابق پولیس کو اطلاع موصول ہوئی کہ دری شاہ پل کے علاقے میں مسلح ڈاکو موجود ہیں۔ اطلاع ملتے ہی اے ایس آئی غلام شبیر اپنی ٹیم کے ہمراہ فوری طور پر موقع پر پہنچے۔ پولیس پارٹی کے پہنچتے ہی ڈاکوؤں نے اندھا دھند فائرنگ شروع کر دی، جس کے نتیجے میں اے ایس آئی غلام شبیر اور کانسٹیبل غلام فرید نے اپنی جان کا نذرانہ پیش کرتے ہوئے شہادت کا بلند مقام حاصل کیا۔

واقعے کی اطلاع ملتے ہی ڈی پی او ڈیرہ غازی خان سید علی، ایس ڈی پی او تونسہ، ایس ایچ او اور دیگر پولیس افسران موقع پر پہنچ گئے اور پورے علاقے کو گھیرے میں لے کر ملزمان کی تلاش شروع کر دی گئی۔

ڈیرہ غازی خان پولیس کی جانب سے شہداء کو خراجِ عقیدت پیش کیا گیا ہے اور اس عزم کا اظہار کیا گیا ہے کہ عوام کے جان و مال کے تحفظ کے لیے پولیس فورس ہر لمحہ تیار ہے اور اس واقعے میں ملوث عناصر کو جلد قانون کے کٹہرے میں لایا جائے گا۔

ڈیرہ غازی خان (خصوصی رپورٹ): پنجاب اور خیبر پختونخوا کے سرحدی قبائلی علاقوں میں خوارجی دہشت گردوں کی بڑھتی ہوئی سرگرمیوں کے خلاف مقامی قبائل نے اعلانِ جنگ کر دیا ہے۔ قبائلی عمائدین نے دوٹوک الفاظ میں کہا ہے کہ وہ اپنی سرزمین کو دہشت گردوں کے ناپاک عزائم سے محفوظ رکھنے کے لیے کسی بھی قربانی سے دریغ نہیں کریں گے اور ہر سطح پر بھرپور مزاحمت کریں گے۔

اس عزم کا اظہار باجھہ کے قبائلی علاقے میں منعقدہ ایک بڑے جرگے کے دوران کیا گیا، جس میں علاقے کے درجنوں معتبر عمائدین نے شرکت کی۔ جرگے میں یہ متفقہ فیصلہ کیا گیا کہ مقامی عوام اپنی مدد آپ کے تحت اپنے علاقوں کی حفاظت کریں گے۔ اس مقصد کے لیے ایک منظم حکمت عملی کے تحت 50 افراد پر مشتمل ایک مقامی لشکر دن کے وقت گشت کرے گا جبکہ مزید 50 افراد رات کے اوقات میں پہرہ دیں گے تاکہ کسی بھی مشکوک نقل و حرکت کو فوری طور پر روکا جا سکے۔

جرگے کے شرکاء نے شدید تشویش کا اظہار کرتے ہوئے کہا کہ خوارجی دہشت گرد گروہ علاقے میں بھتہ خوری اور اغوا برائے تاوان کی وارداتوں میں ملوث ہو چکے ہیں، جس سے عوام میں خوف و ہراس کی فضا پھیل گئی ہے۔ عمائدین نے اعلان کیا کہ یہ لشکر نہ صرف دفاعی کردار ادا کرے گا بلکہ دہشت گردوں کے خلاف منظم مزاحمت بھی کرے گا۔

علاقہ باجھہ کو اس کی حساس جغرافیائی حیثیت کے باعث خاص اہمیت حاصل ہے کیونکہ یہ پنجاب اور خیبر پختونخوا کے درمیان ایک اہم سرحدی پٹی پر واقع ہے۔ یہاں دہشت گرد عناصر کی موجودگی اور سرگرمیاں پورے خطے کے امن و امان کے لیے سنگین خطرہ بن سکتی ہیں۔

وہوا اور بستی باجھہ کے عوام نے ایک بڑے اجتماع میں شرکت کرتے ہوئے اتحاد اور یکجہتی کا مظاہرہ کیا اور دشمنوں کو پیغام دیا کہ وہ اپنی سرحدی حدود کی حفاظت کے لیے ہر دم تیار ہیں۔ عوام نے حلفاً اعلان کیا کہ وہ اپنے علاقے کے چپے چپے کی حفاظت کریں گے اور کسی بھی دہشت گرد کو داخلے کی اجازت نہیں دیں گے۔

یہ اتحاد اس وقت مزید مضبوط ہوا جب مٹھوان کے نوجوانوں کا ایک بڑا قافلہ اپنے بزرگوں کی قیادت میں مٹھوان سے باجھہ روانہ ہوا۔ اس قافلے نے باجھہ کے عوام سے مکمل یکجہتی کا اظہار کرتے ہوئے علاقے میں امن و امان کی بحالی کے لیے دعائیں کیں اور عملی تعاون کی یقین دہانی کرائی۔

علاقائی ذرائع کے مطابق گزشتہ رات کچھ دہشت گرد مسلح ہو کر بستی باجھہ میں داخل ہونے کی کوشش کر رہے تھے، جن کا مقصد مبینہ طور پر سرکاری ملازمین کو نشانہ بنانا تھا۔ تاہم بستی کے بہادر عوام نے مثالی اتحاد کا مظاہرہ کرتے ہوئے ان کے سامنے دیوار بن کر کھڑے ہو گئے اور انہیں پسپائی پر مجبور کر دیا۔ یہ واقعہ عوام کے حوصلوں کو مزید بلند کرنے کا باعث بنا ہے اور ان کے عزم کو نئی تقویت ملی ہے۔

قبائلی عمائدین اور عوام نے حکومت اور قانون نافذ کرنے والے اداروں سے مطالبہ کیا ہے کہ وہ اس سنگین صورتحال کا سنجیدگی سے نوٹس لیں اور مقامی عوام کے ساتھ مکمل تعاون کرتے ہوئے علاقے میں امن و امان کی بحالی کو یقینی بنائیں۔ انہوں نے تجویز دی کہ ایک مشترکہ حکمت عملی اختیار کی جائے تاکہ دہشت گردوں کا مکمل خاتمہ ممکن ہو سکے۔

یہ عوامی ردعمل اس بات کی واضح علامت ہے کہ ڈیرہ غازی خان کے سرحدی قبائل دہشت گردی کے ناسور کو جڑ سے اکھاڑ پھینکنے کے لیے متحد، پرعزم اور مکمل طور پر متحرک ہو چکے ہیں۔ ان کا یہ اقدام نہ صرف مقامی امن کے لیے سنگ میل ثابت ہو سکتا ہے بلکہ پورے خطے میں استحکام کی راہ ہموار کر سکتا ہے۔ اب دیکھنا یہ ہے کہ حکومت اس عوامی جذبے کو کس طرح جواب دیتی ہے اور آیا ریاستی ادارے قبائلی عوام کے اس بے مثال عزم کا ساتھ دیتے ہیں یا نہیں۔

ڈیرہ غازی خان،باغی ٹی وی (خصوصی رپورٹ) کیا ماحولیاتی قوانین صرف کاغذ کے ٹکڑے بن کر رہ گئے ہیں؟ ڈیرہ غازی خان میں جس بے حسی کا مظاہرہ کیا جا رہا ہے وہ کسی المیے سے کم نہیں۔ یہاں ماربل اور گرینائٹ کی فیکٹریاں، ماحولیاتی تحفظ کے تمام تر اصولوں کو بالائے طاق رکھتے ہوئے، دھڑلے سے رہائشی کالونیوں کے قلب میں قائم ہیں۔ یہ فیکٹریاں صرف غیر قانونی ہی نہیں بلکہ شہریوں کی صحت اور زندگیوں کے لیے ایک واضح اور سنگین خطرہ بن چکی ہیں۔

شہریوں کی چیخیں اب بلند ہو رہی ہیں! ان فیکٹریوں سے اٹھنے والی زہریلی دھول، جو ماربل اور گرینائٹ کی پروسیسنگ کا لازمی نتیجہ ہے، فضا میں گھل کر سانس کی بیماریوں، الرجی اور نہ جانے کتنے موذی امراض کو جنم دے رہی ہے۔ بچے، بوڑھے اور جوان سب اس خاموش قاتل کی زد میں ہیں۔ کیا کسی کو ان معصوم زندگوں کی پرواہ ہے؟کیا یہ ان فیکٹریوں کی ماحولیاتی دہشت گردی نہیں ہے؟

قوانین کا مذاق اڑایا جا رہا ہے! ماحولیاتی تحفظ ایجنسی (ای پی اے) کہاں سو رہی ہے؟ کیا ان فیکٹریوں کی نگرانی اور ان پر ماحولیاتی قوانین کا نفاذ اس قدر ناممکن ہو چکا ہے؟ ماربل فیکٹریوں میں پانی کی ری سائیکلنگ اور کیچڑ کو محفوظ طریقے سے ٹھکانے لگانے کے لیے فلٹر پریس ٹیکنالوجی کا استعمال لازمی ہے، لیکن بیشتر فیکٹریاں ان بنیادی اصولوں کو بھی روند رہی ہیں۔ فیکٹریوں سے نکلنے والا گدلا اور زہریلا پانی اور کیچڑ براہ راست سیوریج کے نظام میں ڈالا جا رہا ہے، جس سے نہ صرف سیوریج لائنیں بند ہو رہی ہیں بلکہ زیر زمین پانی بھی آلودہ ہو رہا ہے۔ یہ ماحولیاتی دہشت گردی کب تک جاری رہے گی؟

محکمہ تحفظ ماحولیات کو اب اپنی آنکھیں کھولنی ہوں گی! شہریوں کا مطالبہ ہے کہ فوری طور پر تمام ماربل فیکٹریوں کا سروے کیا جائے اور جو فیکٹریاں غیر قانونی طور پر رہائشی علاقوں میں قائم ہیں، انہیں فی الفور سیل کیا جائے۔ قانونی فیکٹریوں کو بھی سخت ترین ماحولیاتی قوانین پر عمل کرنے کا پابند بنایا جائے، ورنہ ان کے لائسنس منسوخ کر دیے جائیں۔

یہ محض ایک مطالبہ نہیں، ایک التجا ہے! ڈیرہ غازی خان کے شہریوں کی زندگیاں خطرے میں ہیں۔ کیا کوئی صاحب اختیار اس سنگین صورتحال کا نوٹس لے گا؟ کیا ان بے بس شہریوں کو اس زہریلے ماحول سے نجات دلائی جائے گی؟ اگر اب بھی کوئی ٹھوس قدم نہ اٹھایا گیا، تو اس غفلت کے نتائج نہ صرف موجودہ نسل بھگتے گی بلکہ آنے والی نسلیں بھی اس کا خمیازہ اٹھائیں گی۔ حکام ہوش کے ناخن لیں اور اس ماحولیاتی اور انسانی المیے کو فوری طور پر روکیں۔

ڈیرہ غازی خان (سٹی رپورٹر جواد اکبر)سٹی پولیس کی کارروائی، منشیات فروش خاتون گرفتار، 1080 گرام چرس برآمد

تفصیل کے مطابق شہر میں بڑھتی ہوئی وارداتوں اور بالخصوص منشیات فروشی کے ناسور کے خلاف ایس ایچ او سٹی طاہر سلیم کے احکامات پر عمل کرتے ہوئے تھانہ سٹی پولیس نے اہم کارروائی کی ہے۔ اس کارروائی کے نتیجے میں بہاری چوک کے قریب سے ایک منشیات فروش خاتون کو گرفتار کر لیا گیا ہے۔

پولیس کے مطابق گرفتار شدہ خاتون کے قبضے سے 1080 گرام چرس برآمد ہوئی ہے۔ ملزمہ کے خلاف باقاعدہ مقدمہ درج کر لیا گیا ہے اور پولیس اس معاملے کی مزید تفتیش کر رہی ہے۔ ایس ایچ او سٹی طاہر سلیم نے اس عزم کا اظہار کیا ہے کہ شہر کو منشیات کے لعنت سے پاک کرنے کے لیے کارروائیاں جاری رہیں گی۔