Category: ڈیرہ غازی خان

ڈیرہ غازی خان (باغی ٹی وی رپورٹ)عید الفطر سے قبل امن و امان اور سیکیورٹی کو یقینی بنانے کے لیے پرعزم پنجاب پولیس نے خیبر پختونخوا بارڈر پر واقع سرحدی چوکی لکھانی پر خوارجی دہشت گردوں کا حملہ ناکام بنا دیا۔ پولیس کی جوابی کارروائی میں ایک دہشت گرد ہلاک ہو گیا۔

پنجاب پولیس کے ترجمان کے مطابق، 20 سے 25 خوارجی دہشت گردوں نے لکھانی چیک پوسٹ پر چاروں اطراف سے حملہ کیا۔ دہشت گردوں نے حملے میں مارٹر گولوں، راکٹ لانچرز، سنائپر رائفلز اور دیگر بھاری ہتھیاروں کا بے دریغ استعمال کیا۔

تاہم، پولیس، ایلیٹ فورس اور ایس او یو کے جوانوں نے جرات اور بہادری سے چیک پوسٹ کا دفاع کیا۔ الرٹ پولیس جوانوں کی بھرپور جوابی کارروائی سے دہشت گرد پسپا ہونے پر مجبور ہو گئے۔ پولیس کی جوابی کارروائی میں ایک دہشت گرد ہلاک ہوا، جبکہ متعدد دہشت گردوں کے زخمی ہونے کی اطلاعات ہیں۔

آئی جی پنجاب ڈاکٹر عثمان انور نے ڈیرہ غازی خان پولیس کو دہشت گردوں کے خلاف کامیاب کارروائی پر شاباش دی اور کارروائیاں جاری رکھنے کا حکم دیا۔ ترجمان پنجاب پولیس نے بتایا کہ حملے کے دوران پولیس کے تمام جوان محفوظ رہے۔

آر پی او ڈیرہ غازی خان کیپٹن (ر) سجاد حسن خان نے آپریشن کی نگرانی کی، جبکہ ڈی پی او ڈیرہ غازی خان سید علی کی قیادت میں کیو آر ایف ٹیموں نے بروقت کارروائی کی۔

پنجاب خیبر پختونخوا سرحدی علاقوں میں پولیس ٹیموں کا سرچ آپریشن جاری ہے۔

تونسہ (باغی ٹی وی) پنجاب کے ضلع ڈیرہ غازی خان کی تحصیل تونسہ میں دہشت گردوں نے پولیس چیک پوسٹ پر حملہ کیا، تاہم پولیس کی مستعدی اور جوابی کارروائی کے باعث دہشت گرد پسپا ہوگئے۔

ذرائع کے مطابق یہ واقعہ پنجاب اور خیبرپختونخوا کے سرحدی علاقے جھنگی میں پیش آیا، جہاں 20 سے 25 دہشت گردوں نے پولیس چیک پوسٹ پر اچانک حملہ کر دیا۔ دہشت گردوں نے جدید خودکار ہتھیاروں اور راکٹ لانچروں کا استعمال کرتے ہوئے مختلف اطراف سے حملہ کیا۔ یہ حملہ رات کی تاریکی میں کیا گیا تاکہ پولیس کو حیرت میں ڈال کر بھاری نقصان پہنچایا جا سکے۔

چیک پوسٹ پر موجود پنجاب پولیس کے مستعد اہلکاروں نے فوری طور پر جوابی کارروائی کی اور دہشت گردوں کے حملے کا بھرپور جواب دیا۔ پولیس نے تھرمل کیمروں کی مدد سے دہشت گردوں کی نقل و حرکت کا پتہ لگا کر ان پر جوابی فائرنگ کی، جس کے نتیجے میں دہشت گرد پسپا ہونے پر مجبور ہوگئے۔

پولیس کی موثر جوابی کارروائی کے نتیجے میں ایک دہشت گرد ہلاک ہو گیا جبکہ باقی دہشت گرد اندھیرے کا فائدہ اٹھاتے ہوئے فرار ہونے میں کامیاب ہو گئے۔ پولیس کے مطابق اس حملے میں کسی بھی اہلکار کو جانی نقصان نہیں پہنچا۔

یہ حملہ رواں ماہ میں پنجاب اور خیبرپختونخوا کے سرحدی علاقوں میں دہشت گردوں کا آٹھواں حملہ تھا۔ جھنگی پولیس چیک پوسٹ کو پہلے ہی پنجاب حکومت کی جانب سے مزید محفوظ بنایا جا چکا تھا، جہاں اضافی نفری، جدید آلات اور ہتھیار فراہم کیے گئے تھے۔

آر پی او ڈیرہ غازی خان سجاد حسن خان اور ڈی پی او ڈیرہ غازی خان سید علی موقع پر پہنچے اور پولیس اہلکاروں کا حوصلہ بڑھایا۔ مفرور دہشت گردوں کی تلاش کے لیے علاقے میں سرچ آپریشن جاری ہے، جبکہ پولیس نے علاقے کی ناکہ بندی کر کے داخلی و خارجی راستوں کی کڑی نگرانی شروع کر دی ہے۔

آئی جی پنجاب ڈاکٹر عثمان انور نے پولیس کی کارکردگی کو سراہتے ہوئے کہا کہ پنجاب پولیس کے جوان ملک و قوم کے دشمنوں کے خلاف سیسہ پلائی دیوار کی طرح کھڑے ہیں اور کسی بھی قیمت پر دہشت گردوں کو کامیاب نہیں ہونے دیا جائے گا۔

ڈیرہ غازی خان (باغی ٹی وی) پنجاب خیبرپختونخوا بارڈر پر خوارجی دہشت گردوں کا رواں ماہ کا ساتواں حملہ ناکام بنا دیا گیا۔ پولیس، سی ٹی ڈی اور ایلیٹ ٹیمیں سرحدی علاقوں میں گشت اور سرچنگ آپریشن پر مامور تھیں۔

اطلاعات کے مطابق کوٹ مبارک کے قریب خوارجی دہشت گردوں کی موجودگی کی اطلاع پر پولیس ٹیموں نے پیش قدمی کی۔ کوٹ مبارک کے قریب گھات لگائے دہشت گردوں نے پولیس ٹیموں پر آئی ای ڈی (IED) سے حملہ کیا۔ حملے میں بکتر بند گاڑی کو معمولی نقصان پہنچا، تاہم تمام جوان محفوظ رہے۔

پولیس ٹیموں اور گھات لگائے دہشت گردوں کے درمیان شدید فائرنگ کا تبادلہ ہوا۔ جوانوں کی فوری اور بھرپور جوابی فائرنگ سے خوارجی دہشت گرد پسپا ہو گئے۔ ڈی پی او سید علی کی زیر کمانڈ کیو آر ٹیمیں فوری طور پر موقع پر پہنچیں۔

علاقے کا مکمل گھیراؤ کر کے پولیس ٹیموں کا سرچ آپریشن جاری ہے۔ ڈی پی او سید علی نے بتایا کہ سرحدی علاقے میں سیکیورٹی اقدامات کو مزید سخت کر دیا گیا ہے۔ آر پی او ڈیرہ غازی خان نے کہا کہ پنجاب پولیس خوارجی دہشت گردوں کے ناپاک عزائم خاک میں ملانے کے لیے پرعزم ہے۔ انہوں نے مزید کہا کہ تمام وسائل بروئے کار لا کر شہریوں کا تحفظ کیا جائے گا۔

آئی جی پنجاب ڈاکٹر عثمان انور نے دہشت گردوں سے مردانہ وار مقابلہ کرنے والے جوانوں کو خراج تحسین پیش کیا۔ انہوں نے کہا کہ پنجاب پولیس ہر محاذ پر دہشت گردوں کو شکست دے گی اور عوام کے جان و مال کا تحفظ یقینی بنائے گی۔

ڈیرہ غازی خان(باغی ٹی وی رپورٹ) پولیس نے ایک بار پھر خوارجی دہشت گردوں کے عزائم کو ناکام بنا دیا۔ لکھانی چیک پوسٹ پر رواں ماہ کا پانچواں حملہ ناکام بنا دیا گیا۔ پنجاب پولیس کے ترجمان کے مطابق، خیبر پختونخوا (کے پی کے) کے بارڈر پر واقع لکھانی چیک پوسٹ پر دہشت گردوں نے سحری کے وقت 10 سے 12 خوارجی دہشت گردوں نے تین اطراف سے حملہ کیا۔ دہشت گردوں نے حملے میں راکٹ لانچرز اور دیگر بھاری اسلحہ استعمال کیا۔

جوانوں کے الرٹ ہونے کی وجہ سے تھرمل امیج کیمروں سے دہشت گردوں کی بروقت نشاندہی کر لی گئی۔ پولیس کے جوانوں کی بھرپور جوابی کارروائی سے دہشت گرد چیک پوسٹ کے قریب نہیں پہنچ سکے۔ دو گھنٹے تک مقابلہ جاری رہنے کے بعد دہشت گرد بھاری نقصان اٹھا کر فرار ہو گئے۔ ترجمان پولیس کے مطابق سرحدی چوکی لکھانی پر یہ رواں ماہ میں پانچواں بڑا حملہ پسپا کیا گیا۔

آر پی او ڈیرہ غازی خان کیپٹن (ر) سجاد حسن خان نے آپریشن کی مکمل کمانڈ کی جبکہ ڈی پی او ڈیرہ غازی خان سید علی کی زیرِ کمانڈ کیو آر ایف ٹیمیں بروقت لکھانی چوکی پہنچیں۔ سرحدی علاقے میں پولیس اور دیگر قانون نافذ کرنے والے اداروں کا سرچ آپریشن جاری ہے۔ آئی جی پنجاب ڈاکٹر عثمان انور نے دہشت گردوں کا مردانہ وار مقابلہ کرنے والے جوانوں کو شاباش دی۔

ڈی پی او ڈیرہ غازی خان سید علی نے کہا کہ خوارجی دہشت گرد بزدلانہ حملوں سے ہمارے عزم کو متزلزل نہیں کر سکتے۔ پنجاب پولیس ہر قیمت پر عوام کے جان و مال کا تحفظ یقینی بنائے گی۔ آر پی او کیپٹن (ر) سجاد حسن خان نے کہا کہ پولیس فورس کا مورال بلند ہے اور دہشت گردوں کا ہر حملہ ناکام بنایا جائے گا۔ ہم دہشت گردوں کے ہر وار کا بھرپور جواب دیں گے۔