Category: گوجرانوالہ

گوجرانوالہ سے ایک بھارتی شہری گرفتار تفصیلات کے مطابق ایف آئی اے نے گوجرانوالہ سے ایک بھارتی شہری کو گرفتار کر لیا ، گرفتار ملزم پنجم تیواری دس سال پہلے غیر قانونی طور پر پاکستان آیا اور پاکستانی دوست کی مدد سے ادھر بلال نام سے پاکستانی شناختی کارڈ بنوایا اور پاکستانی لڑکی سے شادی بھی کرلی ،ڈپٹی ڈائریکٹر ایف آئی اے عامر نواز کے مطابق گرفتار ملزم پنجم تیواری نے 2009 میں گوجرانوالہ کے رہائشی کامران سے دوستی لگائی اور یہ دس سال پہلے غیر قانونی طریقے سے پاکستان آیا اور پاکستان آ کر کامران کی مدد سے بلال کے نام سے نہ صرف پاکستانی شناختی کارڈ بنوا لیا بلکہ گرفتار بھارتی ملزم نے دوست کامران کی بہن سے شادی بھی کر لی، ملزم کے خلاف مقدمہ درج کر کے تحقیقات کی جارہی ہیں ،مقدمہ میں کامران سمیت اسکی معاونت کرنیوالے پانچ افراد کو بھی نامزد کیا گیا ہے ۔ نادرا ملازمین کو بھی شامل تفتیش کرنے کا فیصلہ کیا گیا ہے ۔

گوجرانوالہ۔ پاکستان تحریک انصاف کے مرکزی راہنما حاجی چوہدری یونس علی انصاری نے کہا ہے کہ سینیٹ میں تحریک اعتماد کا مسترد ہونا ملک اور عوام کی جیت ہے، اپوزیشن کو چاہئے کہ ملکی ترقی کی راہ میں روڑے نہ اٹکائے، وزیر اعظم عمران خان سنگین بحرانوں کا مقابلہ کرتے ہوئے ملک کے روشن مستقبل کی راہ میں حائل رکاوٹیں دور کر رہے ہیں، وہ دن دور نہیں جب خوشحالی اور بے مثال ترقی قوم کا مقدر بن کر ر ہے گی، ان خیالات کا اظہار انہوں نے اپنی رہائش پر پارٹی کارکنوں سے گفتگو کرتے ہوئے کیا، انہوں نے کہاکہ سینیٹ میں چیئرمین کے خلاف تحریک عدم اعتماد لانے والا ٹولہ اب عوام کا اعتماد کھو چکا ہے، آئندہ الیکشن میں ن لیگ اور پیپلز پارٹی کو عوامی نفرت اور غیض وغضب کا نشانہ بننا پڑے گا، انہوں نے کہاکہ مسلم لیگ ن کے نام نہادشریف برادران ملک کو 30سا ل تک بے دردی سے لوٹتے رہے اور اپنی پارٹی کے لوگوں سے بھی پارٹی فنڈ کے نام پر بھتہ وصول کرتے رہے، عوام اور ملک کو دس دس ہاتھوں سے لوٹنے والوں کا یوم حساب آچکا، ان کا اب کوئی سیاسی مستقبل نہیں ہے،ان کا کہنا تھا کہ وہ گوجرانوالہ شہر میں عام آدمی کی عزت نفس کی بحالی کی جدو جہد کرر ہے ہیں، عوام اپنی اہمیت کو پہچانیں اورجھوٹے خداؤں کے خلاف علم بغاوت بلند کر دیں، سیاسی کارکن اللہ کے گھر کے علاوہ کسی سیاسی گھر کو بڑا گھر تسلیم نہ کریں اور نہ ہی ٹکٹوں یا پارٹی عہدوں کے لالچ میں کسی انسان کے پاؤں پکڑیں،

گوجرانوالہ : ڈپٹی کمشنر گوجرانوالہ نائلہ باقر،ایم پی اے شاھین رضا،اسسٹنٹ کمشنر سٹی عثمان سکندر، عوامی نمائندوں (چوہدری صدیق مہر،رضوان اسلم بٹ)اور دیگر کے ہمراہ سیٹلائٹ ٹاؤن مارکیٹ میں صاف اور سر سبز پنجاب مہم کے تحت،نومور پلاسٹک بیگ مہم کا باقاعدہ افتتاح کرتے ہوئے شہریوں میں ماحول دوست اور دوبارہ قابل استعمال کپڑے کے تھیلے مفت تقسیم کیے اور شہریوں سے اپیل کی کہ وہ سیوریج نظام کی تباہی،آلودگی اور گندگی میں اضافے کا سبب بننے والے پلاسٹک کے شاپروں کا استعمال ترک کرتے ہوئے ماحول دوست تھیلوں کا استعمال کریں۔انہوں نے خریداری کے لیے آئے ہوئے صارفین میں کپڑے کے سینکڑوں تھیلے تقسیم کیے۔شہریوں نے ڈپٹی کمشنر گوجرانوالہ کے اس اقدام کو خوش آئند قرار دیتے ہوئے سراہا اور مکمل تعاون کی بھی یقین دہانی کرائی۔
اس موقع پر انہوں نے میڈیا کے نمائندوں سے گفتگو کرتے ہوئے کہا کہ ضلع گوجرانوالہ پنجاب کا پہلا ضلع ہے جہاں پلاسٹک کے تھیلوں پر پابندی عائد کی جا رہی ہے جس سے شہر و ضلع میں سیوریج اورصفائی کے مسائل پر قابو پانے میں بھرپور مدد ملے گی۔ ایک ماہ کے بعد ضلع کی حدود میں پلاسٹک بیگز پر پابندی عائد کر دی جائے گی،اس سلسلہ میں تمام سٹیک ہولڈرزکو آگاہی بھی دی جارہی ہے کہ وہ آلودگی میں اضافے کا باعث بننے والے پلاسٹک بیگز کی خرید و فروخت اور استعمال کو ترک کرتے ہوئے ماحول دوست کپڑے اور کاغذ کے تھیلوں کو پرموٹ کریں۔ انہوں نے دوکانداروں، سپر سٹور ز مالکان کو بھی ہدایت کی وہ اپنے صارفین کو صرف ماحول دوست تھیلے فراہم کرتے ہوئے اس مہم کو کامیاب بنائیں، شہر و ضلع کو مل کر صاف ستھرا بنایا جا سکتا ہے۔ شرکاء نے دوکانداروں کو بھی مفت تھیلے فراہم کیے اور ساتھ انہیں تنبیہ بھی جاری کی کہ ایک ماہ کے بعد عمل نہ کرنے والے دوکانداروں کے خلاف کاروائی کی جائے گی۔

محکمہ اینٹی کرپشن گوجرانوالہ کی میگا کرپشن اسکینڈل کیسز کی تحقیقات میں تیزی! میگا کرپشن اسکینڈل ،سٹی ہاؤسنگ سوسائٹی گوجرانوالہ اور ملوث کرپٹ سینئر سرکاری افسران و اہلکاران کے خلاف کاروائی کا آغاز!

ریجنل ڈائریکٹر اینٹی کرپشن گوجرانوالہ ،زوہیب مشتاق، کی خصوصی ہدایت پر محکمہ اینٹی کرپشن گوجرانوالہ کی جانب سے میگا کرپشن کیس سکینڈل میں 500 کنال سے زائد کا رقبہ غیر قانونی طور پر سکیم میں شامل کر کے دھوکہ دہی، فراڈ اور جعل سازی سے فروخت کرنے اور سرکاری خزانے کو اربوں کا سٹی ہاؤسنگ سوسائٹی گوجرانوالہ اور ملوث کرپٹ سرکاری افسران و اہلکاران کے خلاف کاروائی کا آغاز کر دیا گیا۔ میگا کرپشن اسکینڈل کیس کی فائل کو کرپٹ مافیا کی جانب سے اثر رسوخ استعمال کرتے ہوئے دبا دیا گیا تھا۔ جس پر تحقیقات کا آغاز کر کے ملوث کرپٹ سینئر افسران کی ذمہ داری کا تعین کیا جا رہا ہے۔ میگا کرپشن اسکینڈل کیس میں جلد بڑی گرفتاریاں متوقع!

اس موقع پر ریجنل ڈائریکٹر اینٹی کرپشن گوجرانوالہ ، زوہیب مشتاق نے میڈیا کو بتایا کہ وزیراعظم پاکستان کے کرپشن فری پاکستان کے وژن کے عین مطابق اور ڈائریکٹر جنرل اینٹی کرپشن پنجاب سید اعجاز حسین شاہ کی ہدایات کے مطابق صوبہ پنجاب میں میگا کرپشن کاروائیوں کی تحقیقات میں تیزی کر دی گئی ہے۔ اس سلسلے میں گوجرانوالہ ریجن بھر میں تما م ڈپٹی دائریکٹرز اور سرکل افسران کو فیلڈ میں پوری طرح سے متحرک کر دیا گیا ہے۔ جبکہ دیگر اور ہاؤسنگ سکیموں کے خلاف تحقیقات بھی جاری ہیں۔ کرپٹ مافیا کو کسی صورت چھوڑا نہیں جائے گا۔ ان سے لوٹی ہوئی رقم، ریکور کر کے سرکاری خزانے میں جمع کروائی جائے گی۔ سرکاری خزانے کو لوٹنے والوں کو جلد قانون کے کٹہر ے میں لا کر کیفر کردار تک پہنچایا جائے گا۔

گوجرانوالہ: ایڈیشنل ڈپٹی کمشنر(ریونیو) ڈاکٹر ذیشان حنیف نے کہا ہے کہ کمشنر گوجرانوالہ ڈویژن وقاص علی محمود اور ڈپٹی کمشنر نائلہ باقر کی ہدایت پر جی ٹی روڈ سے تجاوزات کے خاتمہ کیلئے گرینڈ آپریشن کا آغاز آئندہ ہفتے کردیا جائے گا- اس ضمن میں تمام متعلقہ محکمے اپنا ٹھوس لائحہ عمل تشکیل دیں تاکہ مل جل کر اس مہم کو کامیاب بنایا جاسکے-
ان خیالات کا اظہار انہوں نے اینٹی انکروچمنٹ مہم کے سلسلہ میں منعقدہ اجلاس سے خطاب کرتے ہوئے کیا- تمام تحصیلوں کے اسسٹنٹ کمشنرز سٹی عثمان سکندر، صدر حناء ارشد، نوشہرہ ورکاں فیضان عارف، اے سی ہیڈ کوارٹر ماجد بن احمد، وزیرآباد وقار حسین، کامونکی شاہد جوتہ، سی ای او ایم ڈی جی ڈبلیو ایم سی میاں عتیق الرحمان، سی ای او ہیلتھ ڈاکٹر فرجاد احمد سی ای او کارپوریشن امجد ڈھلوں، ضلع کونسل، پی ایچ اے، واسا، میونسپل کمیٹی، سوئی گیس، ہائی ویز کے علاوہ دیگر متعلقہ محکموں کے افسران نے اجلاس میں شرکت کی-
ایڈیشنل ڈپٹی کمشنر ریونیو ڈاکٹر ذیشان حنیف نے ضلع کونسل، میونسپل کارپوریشن، واسا، ویسٹ مینجمنٹ کمپنی، پی ایچ اے اور محکمہ ہائی وے افسران کو تنبیہ کی کہ وہ آپس میں کوآرڈینشین مضبوط بناتے ہوئے مشترکہ لائحہ عمل کے تحت آپریشن شروع کریں – انہوں نے کہا کہ سرکار کی ایک ایک انچ سے قبضہ واگزا کروایا جائیگا- انہوں نے عوام الناس سے اپیل کی کہ وہ ضلعی انتظامیہ کے ساتھ تعاون کریں اور رضا کارانہ طور پر تجاوزات گرا دیں بصورت دیگر ان کے خلاف سخت کاروائی عمل میں لائی جائے گی- انہوں نے محکمہ واپڈا اور سوئی گیس کے افسران کو سختی سے ہدایت کی کہ وہ موقع پر موجود رہیں تاکہ آپریشن کے دوران کسی قسم کی لیکیج کی صورت میں فوری طو رپر کنٹرول کیا جاسکے-انہوں نے مزید کہا کہ پلاسٹک کے پولی تھین بیگ انسانی صحت کیلئے نقصان دہ ہیں ان کی حوصلہ شکنی بھی ضروری ہے