Category: گوجرانوالہ

گوجرانوالہ (باغی ٹی وی، ڈویژنل بیوروچیف شاہد ریاض سے)ڈسکہ میں سانحہ سوات کے متاثرہ خاندانوں کو خیبر پختونخواہ حکومت کی جانب سے 2 کروڑ روپے کے امدادی چیکس تقسیم کیے گئے۔ پاکستان تحریک انصاف کے رہنما فیصل امین گنڈاپور، معروف وکیل سلمان اکرم راجہ، ریحانہ ڈار اور دیگر شخصیات نے چیکس متاثرہ خاندانوں کے حوالے کیے۔

اس موقع پر جاں بحق ہونے والوں کے ایصالِ ثواب کے لیے دعائے مغفرت اور فاتحہ خوانی بھی کی گئی۔ فیصل امین گنڈاپور نے میڈیا سے گفتگو کرتے ہوئے کہا کہ وزیراعلیٰ خیبرپختونخواہ خود ڈسکہ آنا چاہتے تھے، تاہم موجودہ حالات کے باعث یہ ممکن نہ ہو سکا۔

فیصل امین گنڈاپور نے کہا کہ "ریاست ماں کی طرح ہوتی ہے، اور ہماری حکومت صرف ایک صوبے تک محدود ہے۔ ہم جانتے ہیں کہ جو نقصان ہوا، اس کی مکمل تلافی ممکن نہیں، مگر ہم دکھ کی اس گھڑی میں متاثرین کے ساتھ کھڑے ہیں۔”

اس موقع پر وکیل اور رہنما سلمان اکرم راجہ نے کہا کہ "عمران خان اس وقت جیل میں ہیں کیونکہ وہ عوام کے درد کو سمجھتے ہیں۔ وہ پاکستان کو صرف اشرافیہ کا نہیں، بلکہ عوام کا پاکستان دیکھنا چاہتے ہیں۔ ان کا مشن عوام کی خدمت ہے اور ہم اسی پر عمل پیرا ہیں۔”

پی ٹی آئی قیادت نے متاثرین سے اظہار یکجہتی کرتے ہوئے ان کے غم میں شریک ہونے کا اعادہ کیا اور حکومت خیبر پختونخواہ کی جانب سے تعاون کا یقین دلایا۔

گوجرانوالہ (باغی ٹی وی، ڈویژنل بیوروچیف شاہد ریاض سے)تحصیلدار پسرور شوکت چوہان کو اینٹی کرپشن پولیس سیالکوٹ نے لاہور ہائی کورٹ کی جانب سے عبوری ضمانت منسوخ کیے جانے کے بعد گرفتار کر لیا۔ محترمہ جسٹس ابر گل خان نے ضمانت منسوخ کرنے کے احکامات جاری کیے، جس کے بعد اینٹی کرپشن ٹیم نے فوری کارروائی کرتے ہوئے تحصیلدار کو حراست میں لے لیا۔

ذرائع کے مطابق شوکت چوہان پر الزام ہے کہ انہوں نے پسرور شہر میں واقع ایک پلاٹ کی رجسٹری محمد اسلم ساکن چھچریالی کے نام منتقل کی، حالانکہ پلاٹ کے فروخت کنندگان احسان اور عرفان کے پاس ملکیت کا کوئی قانونی ثبوت موجود نہیں تھا۔ پلاٹ کے اصل مالکان رفاقت شاہ اور وحید شاہ نے اینٹی کرپشن پولیس کو تحریری درخواست دی، جس پر مقدمہ نمبر 07/2024 درج کیا گیا۔

متاثرہ فریق نے عدالت میں رجسٹری منسوخی کی درخواست بھی دائر کر رکھی تھی۔ مقدمے میں تحصیلدار شوکت چوہان کے علاوہ رجسٹری محرر اور گرداور کو بھی نامزد کیا گیا تھا۔ رجسٹری محرر کو پہلے ہی گرفتار کیا جا چکا ہے، جبکہ گرداور غلام باری کچھ عرصہ قبل انتقال کر چکے ہیں۔

اینٹی کرپشن پولیس نے تمام شواہد کی روشنی میں تحصیلدار کی گرفتاری عمل میں لائی اور معاملے کی مزید تفتیش جاری ہے۔

گوجرانوالہ (باغی ٹی وی، نامہ نگار محمد رمضان نوشاہی)گوجرانوالہ پولیس کی منشیات فروشوں کے خلاف بڑی کارروائی: 5 ملزمان گرفتار، 6 کلو سے زائد ہیروئن و چرس برآمد،سماجی حلقوں کا پولیس کو خراج تحسین، سی پی او کا نوجوان نسل کے تحفظ کے عزم کا اظہار

گوجرانوالہ پولیس نے منشیات فروشوں کے خلاف ایک اور بڑی کارروائی کرتے ہوئے 5 خطرناک ملزمان کو گرفتار کرلیا۔ پولیس کے مطابق گرفتار ملزمان کے قبضے سے مجموعی طور پر 5 کلو 430 گرام ہیروئن اور 740 گرام چرس برآمد کی گئی ہے۔ ان ملزمان کے خلاف مقدمات درج کر کے مزید تفتیش شروع کر دی گئی ہے۔

یہ کامیاب کارروائیاں سٹی پولیس آفیسر محمد ایاز سلیم کی خصوصی ہدایات پر عملدرآمد کرتے ہوئے کی گئیں۔ سی پی او نے تمام تھانوں کو منشیات فروشوں کے خلاف بلاامتیاز کارروائی کے احکامات دے رکھے ہیں۔ اس سلسلے میں تھانہ کینٹ، تھانہ دھلے، تھانہ سیٹلائٹ ٹاؤن اور تھانہ کھیالی کی پولیس ٹیموں نے گشت، ناکہ بندی اور سرچ آپریشن کے دوران اہم کامیابیاں حاصل کیں۔

تھانہ کینٹ پولیس نے منشیات فروش کبیر احمد سے 1.460 کلوگرام ہیروئن برآمد کی۔
تھانہ دھلے پولیس نے جاوید بٹ سے 1.410 کلوگرام ہیروئن اور سلیمان سے 740 گرام چرس برآمد کی۔
تھانہ سیٹلائٹ ٹاؤن پولیس نے ارسلان عرف شانی سے 1.320 کلوگرام ہیروئن برآمد کی۔
تھانہ کھیالی پولیس نے عدنان لطیف سے 1.240 کلوگرام ہیروئن برآمد کی۔

دورانِ تفتیش انکشاف ہوا کہ ملزمان دوسرے اضلاع سے منشیات لاکر گوجرانوالہ بھر میں فروخت کرتے تھے۔ پولیس کے مطابق مزید تفتیش جاری ہے اور قوی امکان ہے کہ اس نیٹ ورک کے دیگر ارکان بھی جلد گرفتار کیے جائیں گے۔

ان کامیاب کارروائیوں پر سماجی و سیاسی تنظیموں اور اہلِ علاقہ نے پولیس کی کوششوں کو سراہا اور خراجِ تحسین پیش کیا۔ شہریوں نے کہا کہ نوجوان نسل کو منشیات جیسے زہر سے بچانے کے لیے ایسی جرات مندانہ کارروائیاں نہایت ضروری ہیں۔

اس موقع پر سی پی او محمد ایاز سلیم نے کہا کہ گوجرانوالہ میں منشیات فروشوں کے لیے کوئی جگہ نہیں، نوجوان نسل کا محفوظ مستقبل یقینی بنانے کے لیے ان مجرموں کے گرد دائرہ مزید تنگ کیا جا رہا ہے۔ انہوں نے کامیاب کارروائی پر تھانہ کینٹ، تھانہ دھلے، تھانہ سیٹلائٹ ٹاؤن اور تھانہ کھیالی کے ایس ایچ اوز اور ان کی ٹیموں کو شاباش دیتے ہوئے ان کے جذبے کو سراہا۔

پولیس کا کہنا ہے کہ یہ مہم جاری رہے گی اور گوجرانوالہ کو منشیات سے پاک ضلع بنانے کا مشن ہر قیمت پر مکمل کیا جائے گا۔

گوجرانوالہ (باغی ٹی وی، نامہ نگار محمد رمضان نوشاہی)نواحی علاقہ ونیہ والا میں غربت اور بے بسی ایک اور جان لے گئی۔ بجلی بل کی عدم ادائیگی پر گیپکو حکام نے شہری انور کو گرفتار کروا دیا، جس پر اس کا بیٹا فراز دلبرداشتہ ہو کر خودکشی کر بیٹھا۔

تفصیلات کے مطابق تین ماہ کا 38 ہزار روپے کا بل ادا نہ کرنے پر گیپکو نے انور کا بجلی میٹر منقطع کر دیا۔ انور نے وقتی طور پر ہمسایوں سے بجلی لینا شروع کی تو گیپکو حکام نے بجلی چوری کا مقدمہ درج کروا کر اسے گرفتار کروا دیا۔

ریسکیو ذرائع کے مطابق مسلسل تین دن تک گھر میں بجلی نہ ہونے اور والد کی گرفتاری سے متاثر ہو کر انور کا نوجوان بیٹا فراز شدید ذہنی دباؤ کا شکار ہو گیا اور بالآخر تیزاب پی کر زندگی کا خاتمہ کر لیا۔

مرحوم کی والدہ نے بتایا کہ فراز والد کی رہائی اور بجلی کی بحالی کے لیے گیپکو دفتر کے چکر لگاتا رہا، مگر کوئی شنوائی نہ ہوئی، جس سے دلبرداشتہ ہو کر اس نے انتہائی قدم اٹھایا۔

یہ افسوسناک واقعہ سوال چھوڑ گیا ہے کہ کیا بجلی چوری کے خلاف کارروائی انسانی جان سے زیادہ ضروری ہے؟ حکام بالا کی خاموشی اس سوال کا جواب دینے سے قاصر ہے۔

گوجرانوالہ (باغی ٹی وی، نامہ نگار محمد رمضان نوشاہی)تھانہ کینٹ پولیس نے منشیات فروشوں، ناجائز اسلحہ رکھنے والوں اور پتنگ فروشوں کے خلاف بھرپور کریک ڈاؤن کرتے ہوئے شاندار کارکردگی کا مظاہرہ کیا۔ پولیس نے کارروائی کے دوران بدنام زمانہ منشیات فروش اشرف عرف اچھو کو گرفتار کر کے اس کے قبضہ سے 3 کلو 580 گرام چرس، ایک رائفل 222 بور، ایک 30 بور پسٹل اور متعدد گولیاں برآمد کر لیں۔

ایس پی سول لائن محمد عمران خان کی زیر ہدایت، ایس ایچ او تھانہ کینٹ انسپکٹر غازی عدنان اعجاز نے پولیس ٹیم کے ہمراہ گشت و ناکہ بندی کے دوران مخبر کی اطلاع پر کارروائی کرتے ہوئے یہ کامیابی حاصل کی۔ گرفتار ملزم اشرف عرف اچھو نے انکشاف کیا ہے کہ وہ بیرونِ اضلاع سے منشیات لا کر گوجرانوالہ میں فروخت کرتا تھا۔ ملزم سے مزید تفتیش جاری ہے۔

اسی طرح پتنگ بازی اور پتنگ فروشی کے خلاف کارروائی کرتے ہوئے ایک اور ملزم نعیم کو گرفتار کیا گیا، جس کے قبضہ سے 27 عدد رنگ برنگی پتنگیں اور 2 عدد ڈور کی گوٹیں برآمد ہوئیں۔

سٹی پولیس آفیسر محمد ایاز سلیم نے اس کامیاب کارروائی پر ایس ایچ او تھانہ کینٹ اور ان کی ٹیم کو شاباش دیتے ہوئے کہا کہ منشیات فروشوں، ناجائز اسلحہ رکھنے والوں اور پتنگ فروشوں کے خلاف زیرو ٹالرنس کی پالیسی پر سختی سے عملدرآمد جاری ہے۔ قانون شکن عناصر کسی بھی قسم کی رعایت کے مستحق نہیں۔ پولیس کا یہ کریک ڈاؤن آئندہ بھی جاری رہے گا۔