ٹھٹھہ(باغی ٹی وی ،نامہ نگار بلاول سموں )ٹھٹھہ پولیس نے منشیات فروشوں اور گٹکا سپلائرز کے خلاف کریک ڈاؤن کرتے ہوئے اہم کامیابیاں حاصل کیں۔ اس کارروائی کے دوران 19 گٹکا فروشوں اور انڈین گٹکا سپلائرز سمیت 3 منشیات فروشوں کو گرفتار کر لیا گیا۔ مجموعی طور پر 22 ملزمان کے خلاف مختلف تھانوں میں مقدمات درج کیے گئے ہیں۔
اس کارروائی کے دوران 9770 پیکٹ انڈین عاداب گٹکا، 4650 پیکٹ گٹکا ماوا، 103 کلو گٹکا مٹیریل، 40 ساشے تمباکو پتی، 510 گرام چرس، 40 بیگز دیسی شراب، ایک ڈاٹسن پک اپ اور ایک سوزوکی پک اپ بھی برآمد کی گئی۔ ٹھٹھہ پولیس کی جانب سے مختلف مقامات پر کی گئی اس کارروائی کا مقصد منشیات فروشوں، گٹکا سپلائرز اور جرائم پیشہ عناصر کو قانون کے دائرے میں لانا تھا۔
آئی جی پی سندھ غلام نبی میمن اور ڈی آئی جی پی حیدرآباد رینج طارق رزاق دہاریجو کی ہدایات پر عمل کرتے ہوئے ایس ایس پی ٹھٹھہ ڈاکٹر محمد عمران خان کے احکامات کے تحت یہ کریک ڈاؤن کیا گیا۔ مختلف تھانوں بشمول ٹھٹھہ، مکلی، کینجھر، جھمپیر، گاڑہو، گھوڑاباڑی، دہابیجی، گھارو، ساکرو، کیٹی بندر اور سی آئی اے ٹھٹھہ پولیس نے مربوط کارروائیاں کیں۔
کارروائی کے دوران گرفتار کیے جانے والے ملزمان میں کریم بخش نوتیار، حبیب گندرو، حاجن لغاری، گل حسن عرف گل ماچھی، رحیم شاہ پٹھان، اکرم کھیو، عبد الطیف ملاح، محمد عثمان خاصخیلی، اختر شاہ پٹھان، سفیع اللہ شاہ پٹھان، منصور حسین جوکھیو، طیب کنبھار، محمد جمن سوڈھو، وحید شاہ، شاہین حسین بہاری شیخ، عامر علی راجپوت، حفیظ عرف سھنو جوکھیو، عبد المجید کنبھار اور دلدار خاصخیلی شامل ہیں۔ منشیات فروشوں میں منظور جاکھرو، سرفراز شاہ اور شاہد ملاح شامل ہیں۔
گرفتار ملزمان کے خلاف گٹکا ایکٹ، نارکوٹکس ایکٹ اور منشیات آرڈیننس کے تحت مقدمات درج کر لیے گئے ہیں۔ ٹھٹھہ پولیس کی یہ کارروائی عوامی سلامتی اور قانون کی عمل داری کو یقینی بنانے کے لیے جاری رہے گی۔
