Category: حیدرآباد

ٹھٹھہ (باغی ٹی وی، ڈسٹرکٹ رپورٹر بلاول سموں) سول ہسپتال مکلی میں لیاقت میڈیکل یونیورسٹی جامشورو (لمس) کے ڈاکٹر معشوق خواجہ پر غریب شہری اللہ بچایو سموں نے بیٹے کے غلط آپریشن کا سنگین الزام عائد کرتے ہوئے انصاف کی اپیل کی ہے۔ عوامی پریس کلب ٹھٹھہ میں پریس کانفرنس کرتے ہوئے اللہ بچایو سموں کا کہنا تھا کہ اس کے 14 سالہ بیٹے غلام علی کو اچانک پیٹ میں شدید درد ہوا، جس پر اسے فوری طور پر سول ہسپتال مکلی لایا گیا، جہاں ڈاکٹر معشوق خواجہ نے اسے اپنے پرائیویٹ سینٹر "حسینی ہسپتال مکلی” لے جانے کا مشورہ دیا۔

اللہ بچایو کے مطابق ڈاکٹر نے وہاں پہلے 75 ہزار روپے کی رقم کاؤنٹر پر جمع کرانے کا مطالبہ کیا، جو اس نے غربت کے باوجود قرض لے کر ادا کی۔ تاہم ڈاکٹر معشوق نے غیر ذمہ دارانہ طور پر غلط آپریشن کیا جس سے بچے کی حالت مزید بگڑ گئی۔ اللہ بچایو کا کہنا ہے کہ دوبارہ سول ہسپتال مکلی میں لے جا کر دوسرا آپریشن بھی کروایا گیا جو ناکام رہا اور بعد ازاں کراچی کے جناح ہسپتال ریفر کر دیا گیا، جہاں بچے کو داخل تک نہیں کیا گیا۔

متاثرہ باپ نے الزام عائد کیا کہ ڈاکٹر نے محض مالی لالچ میں آ کر اس کے بیٹے کی جان کو خطرے میں ڈالا اور اب تک وہ ڈھائی سے تین لاکھ روپے خرچ کر چکا ہے لیکن بیٹے کی حالت بدستور خراب ہے۔ اللہ بچایو سموں نے وزیر اعلیٰ سندھ، وزیر صحت، سیکریٹری صحت، وائس چانسلر لمس، اور ٹھٹھہ کے منتخب نمائندوں حاجی علی حسن زرداری، سید ریاض شاہ شیرازی اور صادق علی میمن سے مطالبہ کیا ہے کہ ڈاکٹر معشوق خواجہ کے خلاف فوری کارروائی کی جائے اور اس کے بیٹے کے علاج کے لیے حکومتی مدد فراہم کی جائے۔

علاقائی سطح پر یہ واقعہ میڈیکل نظام کی خامیوں اور ڈاکٹروں کی مبینہ تجارتی سوچ پر ایک بڑا سوالیہ نشان بن کر ابھرا ہے۔ متاثرہ خاندان کو فوری انصاف اور بچے کے بہتر علاج کی فوری ضرورت ہے تاکہ ایک اور قیمتی جان ضائع ہونے سے بچائی جا سکے۔

ٹھٹھہ (باغی ٹی وی ،ڈسٹرکٹ رپورٹر)ٹھٹھہ میں "ایس ایچ او مبین پرہیار ہٹاؤ، ٹھٹھہ بچاؤ تحریک” کا باقاعدہ آغاز کر دیا گیا ہے۔ اس سلسلے میں عوامی پریس کلب ٹھٹھہ کے سامنے ایک زبردست احتجاجی مظاہرہ کیا گیا، جس میں صحافیوں، سول سوسائٹی، اور مختلف علاقوں سے آئے متاثرین نے شرکت کی۔ مظاہرین نے ایس ایچ او تھانہ دھابیجی مبین پرھیار کے خلاف شدید نعرے بازی کی اور مطالبہ کیا کہ اسے فوری طور پر برطرف کیا جائے۔

مظاہرے میں ایوانِ صحافت مکلی کے سرپرست نظیر قریشی، صدر اکبر دلوانی اور ان کے رفقا، گھارو سے ممتاز لاشاری، بوہارا سے عزیز سومرو، ٹھٹھہ سے اسد سبزپوش، روزنامہ کوشش کے نمائندہ حسن عباس، سماجی رہنما صالح خانیو، مظہر جکھڑ اور ایس ایچ او کے مبینہ مظالم کا شکار محمد بلوچ، سید انور شاہ، اکبر کچھی سمیت متعدد افراد نے شرکت کی۔ شرکاء نے ہاتھوں میں پلے کارڈز اور بینرز اٹھا رکھے تھے جن پر ایس ایچ او کے خلاف نعرے درج تھے۔

احتجاجی مظاہرے سے خطاب کرتے ہوئے ایوانِ صحافت مکلی کے صدر اکبر دلوانی، روزنامہ کوشش کے رپورٹر حسن عباس، سینیئر صحافی شبیر مانجھند اور عوامی پریس کلب کے جنرل سیکریٹری محمد عمر سرائی نے عوامی پریس کلب کے صدر بلاول سموں سے مکمل اظہارِ یکجہتی کیا۔ مقررین نے اعلیٰ حکام سے مطالبہ کیا کہ ایس ایچ او مبین پرھیار کو فوری طور پر معطل کر کے اس کے خلاف قانونی کارروائی کی جائے۔

عوامی پریس کلب ٹھٹھہ کے صدر بلاول سموں نے اپنے خطاب میں سنگین الزامات عائد کرتے ہوئے کہا کہ ایس ایچ او مبین پرھیار منشیات کی ترسیل، زمینوں پر قبضے، اغوا برائے تاوان، غیرقانونی آئل ایجنسیوں اور چوری شدہ پیٹرول و ڈیزل کی اسمگلنگ جیسے جرائم میں ملوث ہے۔ انہوں نے انکشاف کیا کہ ایس ایچ او نے تھانے کا کنٹرول ایک پرائیویٹ شخص حاجن ڈاهری کے سپرد کر رکھا ہے، جو تمام غیرقانونی کاموں کا فرنٹ مین ہے۔

بلاول سموں نے بتایا کہ عوامی پریس کلب کی جدوجہد کے نتیجے میں ایس ایس پی ٹھٹھہ نے متعدد چھاپے مارے اور ہماری طرف سے لگائے گئے الزامات درست ثابت ہوئے، جن میں غیر قانونی آئل ڈپو، گٹکا، ماوا، منشیات فروشی، اغوا برائے تاوان اور زمینوں پر قبضے شامل ہیں۔

انہوں نے اعلیٰ حکام سے مطالبہ کیا کہ ایس ایچ او مبین پرھیار کو "ڈسمس فرام سروس” کیا جائے۔ بصورت دیگر عوامی پریس کلب کی زیر قیادت احتجاجی تحریک کو مزید وسعت دی جائے گی۔

احتجاج کے اختتام پر اعلان کیا گیا کہ تحریک کا دوسرا مرحلہ جمعرات کے روز ایس ایس پی آفس ٹھٹھہ کے سامنے دھرنے کی صورت میں شروع کیا جائے گا، جہاں مزید سخت اقدامات کا عندیہ دیا گیا ہے۔

ٹھٹھہ (باغی ٹی وی،ڈسٹرکٹ رپورٹربلاول سموں)میرپور ساکرو میں بااثر افراد کی زمین پر قبضے کی کوشش، بیوہ خاتون انصاف کے لیے عوامی پریس کلب پہنچ گئی

تفصیلات کے مطابق میرپورساکرو تعلقہ کے گاؤں حاجی بچل تنیو کی رہائشی بیوہ مسمات حاجیانی زوجہ سلیم تنیو نے عوامی پریس کلب مکلی ،ٹھٹھہ میں پہنچ کر فریاد کی ہے کہ ان کے مرحوم شوہر سلیم تنیو کی ملکیتی زمین، جو دیہہ ڈارکی تعلقہ میرپورساکرو میں واقع ہے اور جس کا رقبہ 17 .3 ایکڑ ہے، اس پر ان ہی کی برادری کے بااثر اور جرائم پیشہ افراد جن میں بدنام زمانہ علی تنیو، اس کے ساتھی مٹھو تنیو اور یوسف تنیو شامل ہیں جو زبردستی زمین پرقبضہ کرنا چاہتے ہیں۔

متاثرہ بیوہ کا کہنا ہے کہ مذکورہ افراد انہیں مسلسل دھمکیاں دے رہے ہیں کہ زمین ان کے نام منتقل کر دی جائے، ورنہ وہ انہیں قتل کر دیں گے۔ بیوہ حاجیانی کے مطابق گزشتہ دنوں ان جرائم پیشہ عناصر نے طاقت کے زور پر ان کی زمین پر ٹریکٹر چلانے کی کوشش کی، جب انہوں نے منع کیا تو ان پر تشدد کیا گیا۔

بیوہ کا کہنا ہے کہ انہوں نے اس واقعے کی اطلاع تھانہ ساکرو کے ایس ایچ او کو دی اور تحفظ کی درخواست کی، تاہم پولیس نے تاحال کوئی کارروائی نہیں کی اور ملزمان مسلسل سنگین دھمکیاں دے رہے ہیں۔

متاثرہ خاتون نے ڈی ایس پی ساکرو، ایس ایس پی ٹھٹھہ، ڈی آئی جی حیدرآباد، ڈپٹی کمشنر ٹھٹھہ، آئی جی سندھ اور دیگر اعلیٰ حکام سے مطالبہ کیا ہے کہ وہ اس سنگین معاملے کا فوری نوٹس لیں، بااثر غاصبوں کے خلاف سخت قانونی کارروائی کریں اور انہیں انصاف و تحفظ فراہم کیا جائے۔

ٹھٹھہ (باغی ٹی وی، ڈسٹرکٹ رپورٹر بلاول سموں) پاکستان مسلم لیگ (ن) حیدرآباد ڈویژن کے جنرل سیکریٹری عبداللہ جاکرو، ضلع ٹھٹھہ کے نائب صدر عبداللہ صابرو، اور مسلم لیگ لیبر ونگ کے جنرل سیکریٹری یعقوب سمون نے عوامی پریس کلب ٹھٹھہ میں ہنگامی پریس کانفرنس کرتے ہوئے بینظیر انکم سپورٹ پروگرام (BISP) میں 50 کروڑ روپے سے زائد کی کرپشن کا سنگین انکشاف کیا ہے۔

رہنماؤں کے مطابق ضلع ٹھٹھہ میں 86 ہزار سے زائد مستحق خواتین اس پروگرام سے مستفید ہو رہی ہیں، تاہم ہر قسط کے موقع پر خواتین کے وظیفے اور بچوں کے تعلیمی وظائف میں سے 2000 سے 3000 روپے تک ناجائز طور پر کاٹے جا رہے ہیں، جس سے اندازاً فی قسط 50 کروڑ روپے سے زائد کی کرپشن ہو رہی ہے۔

انہوں نے کہا کہ بی آئی ایس پی کے نجی ایجنٹس اور ڈیوائس ہولڈرز کھلے عام نہ صرف رقوم کاٹ رہے ہیں بلکہ خواتین سے بدتمیزی اور تضحیک آمیز سلوک بھی کیا جا رہا ہے۔ رہنماؤں نے الزام عائد کیا کہ پروگرام کے ضلعی افسران بھی اس بدعنوانی میں برابر کے شریک ہیں، جبکہ ڈی جی سندھ اور ڈی سی ٹھٹھہ سب کچھ جاننے کے باوجود خاموش تماشائی بنے ہوئے ہیں۔

رہنماؤں نے مزید انکشاف کیا کہ بی آئی ایس پی میں بڑی تعداد میں غیر مستحق اور جعلی افراد کو بھی شامل کیا گیا ہے، جس کی فوری انکوائری کی ضرورت ہے تاکہ اصل حقدار خواتین کو ان کا حق بغیر کسی کٹوتی یا تذلیل کے فراہم کیا جا سکے۔

مسلم لیگ ن کے رہنماؤں نے وزیرِاعظم پاکستان، چیئرمین بی آئی ایس پی، اور دیگر اعلیٰ حکام سے فوری نوٹس لینے اور بدعنوان مافیا کے خلاف سخت قانونی کارروائی کرنے کا مطالبہ کیا ہے۔ پریس کانفرنس کے دوران شہریوں اور سماجی حلقوں نے بھی اس مطالبے کی تائید کی اور مطالبہ کیا کہ ٹھٹھہ میں شفافیت کے ساتھ بی آئی ایس پی کی ازسرنو جانچ پڑتال کی جائے۔