Category: اسلام آباد

پاکستان کی وزارتِ اطلاعات و نشریات نے افغان طالبان کے ایک ترجمان کے حالیہ بیان کو مسترد کرتے ہوئے اسے حقائق کی غلط ترجمانی اور عوامی رائے کو گمراہ کرنے کی کوشش قرار دیا ہے۔

وزارت کے مطابق مذکورہ دعویٰ زمینی حقائق کے برعکس ہے اور اس کا مقصد سرحد پار دہشت گردی کے حوالے سے اصل صورتحال کو چھپانا ہے۔وزارتِ اطلاعات و نشریات کی جانب سے جاری کردہ فیکٹ چیک میں کہا گیا ہے کہ 16 مارچ کی شب پاکستان نے کابل اور ننگرہار میں مخصوص عسکری تنصیبات اور دہشت گردوں کے معاون ڈھانچے کو نشانہ بنایا۔ ان اہداف میں تکنیکی آلات کے گودام اور اسلحہ و گولہ بارود کے ذخائر شامل تھے، جنہیں افغان طالبان اور فتنہ الخوارج پاکستان کے معصوم شہریوں کے خلاف کارروائیوں کے لیے استعمال کر رہے تھے۔بیان کے مطابق کارروائی کے بعد گولہ بارود کے ذخائر میں ہونے والے دھماکے اس بات کی واضح نشاندہی کرتے ہیں کہ ان مقامات پر عسکری سامان موجود تھا، جو اس دعوے کی تردید کرتا ہے کہ یہ مراکز کسی اور مقصد کے لیے استعمال ہو رہے تھے۔

وزارت نے مزید کہا کہ پاکستان کی جانب سے کیے جانے والے تمام حملے انتہائی درستگی کے ساتھ کیے جاتے ہیں اور اس بات کا خاص خیال رکھا جاتا ہے کہ کسی بھی قسم کا جانی یا مالی نقصان عام شہریوں کو نہ پہنچے۔فیکٹ چیک میں اس بات پر بھی زور دیا گیا کہ ان تنصیبات کو منشیات بحالی مراکز قرار دینے کی کوشش دراصل عوامی جذبات کو بھڑکانے اور سرحد پار دہشت گردی کی مبینہ سرپرستی کو چھپانے کی ایک حکمت عملی ہے۔وزارتِ اطلاعات و نشریات نے واضح کیا کہ طالبان ترجمان کا بیان جھوٹا اور گمراہ کن ہے اور اسے مکمل طور پر مسترد کیا جاتا ہے۔

اسلام آباد: نیشنل ہائی وے اینڈ موٹر وے پولیس نے معروف ٹی وی اینکر منصور علی خان کو اوور اسپیڈنگ پر روکنے کے معاملے میں مبینہ نرمی برتنے کے الزامات پر اپنے اہلکاروں کے خلاف فیکٹ فائنڈنگ انکوائری شروع کر دی ہے۔

سرکاری ذرائع کے مطابق یہ واقعہ 28 فروری کو پیش آیا، جب موٹر وے پولیس کی ایک پیٹرولنگ ٹیم شام تقریباً 5 بج کر 30 منٹ پر چکری انٹرچینج کے قریب رفتار چیک کرنے کی کارروائی کر رہی تھی۔ اس دوران اہلکاروں نے BQB-79 نمبر کی گاڑی کو 166 کلومیٹر فی گھنٹہ کی رفتار سے چلتے ہوئے پایا، جو مقررہ حد سے کہیں زیادہ تھی.پیٹرولنگ ٹیم میں شامل انسپکٹر وسیم مرتضیٰ اور سب انسپکٹر سعادت حسن نے گاڑی کو رکنے کا اشارہ دیا، تاہم ڈرائیور نے مبینہ طور پر چیک پوسٹ پر گاڑی نہیں روکی اور سفر جاری رکھا۔بعد ازاں گاڑی کو اسلام آباد کے قریب انسپکٹر فراز مہدی نے روک لیا، جنہوں نے ڈرائیور کی شناخت منصور علی خان کے طور پر کی۔میڈیا رپورٹس کے مطابق متعلقہ افسر ٹریفک خلاف ورزی پر چالان کرنے کا ارادہ رکھتے تھے، تاہم بعد میں اس معاملے میں مبینہ نرمی کے الزامات سامنے آنے پر موٹر وے پولیس نے باضابطہ تحقیقات شروع کر دی ہیں۔ترجمان نیشنل ہائی وے اینڈ موٹروے پولیس کے مطابق انکوائری کا مقصد واقعے کی مکمل حقیقت معلوم کرنا اور یہ جانچنا ہے کہ آیا اہلکاروں نے مقررہ قواعد و ضوابط کے مطابق کارروائی کی یا نہیں۔تحقیقات مکمل ہونے کے بعد نتائج کی روشنی میں مناسب کارروائی کی جائے گی۔


وفاقی وزیر خزانہ محمد اورنگزیب نے کہا ہے کہ پاکستان میں پیٹرولیم مصنوعات کی فراہمی مستحکم ہے اور ملک میں فیول کے وافر ذخائر موجود ہیں۔
وزارت خزانہ میں کابینہ کمیٹی کے اجلاس میں توانائی کے شعبے کی صورتحال کا جائزہ لیا گیا۔ اجلاس کے دوران وزیر خزانہ کو بریفنگ دی گئی کہ مارچ کے مہینے کے لیے پیٹرولیم مصنوعات کی تمام ضروریات پوری ہیں جبکہ کارگو پلاننگ کے تحت اپریل کے وسط تک فیول سپلائی یقینی بنائی جائے گی۔
‎اجلاس میں بتایا گیا کہ حکومت اپریل کے آخر تک فیول سپلائی مزید بڑھانے کے لیے اقدامات کر رہی ہے۔
‎محمد اورنگزیب نے عوام سے اپیل کی کہ وہ گھبراہٹ میں پیٹرول خریدنے یا ذخیرہ کرنے سے گریز کریں کیونکہ ملک میں فیول کی دستیابی برقرار ہے۔
‎اعلامیے کے مطابق اجلاس میں یہ بھی فیصلہ کیا گیا کہ حکومت کسی ایک سپلائی روٹ پر انحصار کم کرے گی اور عالمی منڈی سے پیٹرولیم مصنوعات کی درآمد کے ذرائع کو مزید متنوع بنایا جائے گا۔
‎کمیٹی نے اوگرا اور صوبائی حکومتوں کو ہدایت کی کہ مارکیٹ کی کڑی نگرانی رکھی جائے جبکہ توانائی سپلائی چین کو مضبوط بنانے کے لیے نئی حکمت عملی پر بھی غور کیا گیا۔


ملک میں جاری معاشی مشکلات کے باوجود سینیٹ کے چیئرمین یوسف رضا گیلانی کے لیے تقریباً 9 کروڑ روپے مالیت کی ایک لگژری گاڑی خریدے جانے کی تصدیق سامنے آئی ہے۔
ذرائع کے مطابق یہ گاڑی سینیٹ کے بجٹ سے خریدی گئی اور اب سینیٹ سیکرٹریٹ پہنچ چکی ہے۔ اس حوالے سے یوسف رضا گیلانی نے بھی گاڑی کی خریداری کی تصدیق کرتے ہوئے بتایا کہ یہ گاڑی گزشتہ سال مئی میں آرڈر کی گئی تھی۔
‎ان کا کہنا تھا کہ گاڑی سینیٹ کے گزشتہ سال کے بجٹ کی بچت سے خریدی گئی تھی۔ انہوں نے یہ بھی کہا کہ ملک کی موجودہ معاشی صورتحال کو دیکھتے ہوئے انہوں نے گاڑی واپس کرنے کی کوشش کی تھی تاہم انہیں بتایا گیا کہ گاڑی پہلے ہی پاکستان پہنچ چکی ہے۔
‎یہ معاملہ ایسے وقت سامنے آیا ہے جب ملک کو مہنگائی اور معاشی دباؤ کا سامنا ہے، جس کے باعث عوامی اور سیاسی حلقوں میں اس خریداری پر تنقید بھی کی جا رہی ہے۔