Category: کراچی

کراچی: محتسبِ اعلیٰ سندھ جسٹس (ر) شاہ نواز طارق نے کے الیکٹرک کے چیف ایگزیکٹو آفیسر (سی ای او) مونس علوی کو عہدے سے ہٹانے کا حکم دے دیا ہے۔ یہ فیصلہ ایک خاتون ملازم کی جانب سے ہراسانی کی شکایت پر تفصیلی سماعت کے بعد سنایا گیا۔

جاری کردہ فیصلے میں کہا گیا ہے کہ سی ای او کے الیکٹرک پر خاتون کو ہراساں کرنے کا الزام ثابت ہو چکا ہے، جس پر مونس علوی کو نہ صرف فوری طور پر عہدے سے ہٹایا جائے گا بلکہ ان پر 25 لاکھ روپے کا جرمانہ بھی عائد کیا گیا ہے۔ محتسب اعلیٰ نے ہدایت دی ہے کہ جرمانے کی رقم ایک ماہ کے اندر اندر ادا کی جائے۔جسٹس (ر) شاہ نواز طارق نے فیصلے میں کہا کہ مونس علوی نے شکایت کنندہ کو مسلسل ذہنی اذیت کا نشانہ بنایا، جو کہ اخلاقی و قانونی حدود کی سنگین خلاف ورزی ہے۔ انہوں نے مزید کہا کہ اگر مونس علوی مقررہ وقت میں جرمانے کی ادائیگی میں ناکام رہے تو ان کی منقولہ اور غیر منقولہ جائیداد کو ضبط کر لیا جائے گا۔فیصلے میں مزید سخت اقدامات کا عندیہ بھی دیا گیا ہے۔ محتسب اعلیٰ سندھ نے یہ بھی کہا کہ اگر جرمانہ ادا نہ کیا گیا تو مونس علوی کا قومی شناختی کارڈ اور پاسپورٹ بلاک کر دیا جائے گا۔

یہ فیصلہ ایسے وقت میں سامنے آیا ہے جب پاکستان میں دفاتر میں خواتین کو ہراساں کیے جانے کے واقعات پر سماجی اور قانونی سطح پر آوازیں تیز ہو رہی ہیں۔ محتسب اعلیٰ سندھ کے اس فیصلے کو ایک اہم مثال کے طور پر دیکھا جا رہا ہے جو کارپوریٹ سیکٹر میں جوابدہی اور خواتین کے تحفظ کے حوالے سے ایک سنگ میل ثابت ہو سکتا ہے۔

کراچی، ڈیفنس فیز 6 کے فلیٹ میں مردہ پائی جانے والی اداکارہ حمیرا اصغر کےکیس میں اہم پیش رفت سامنے آئی ہے۔

نجی ٹی وی جیو نیوز نے اداکارہ حمیرا اصغر کے فلیٹ سے لیےگئے مختلف سیمپلز کی رپورٹ حاصل کرلی ہے۔رپورٹ کے مطابق اداکارہ حمیرہ اصغر کےگھر سے 6 سیمپل اکٹھےکیےگئے تھے، سیمپل جائے وقوعہ سے ملنے والے پانچ پیالوں سے حاصل کیےگئے تھے۔رپورٹ کے مطابق چھٹا سیمپل کچن میں رکھے نمک کا تھا جب کہ پانچ پیالوں میں سے ملنے والا سفوف سمندری نمک ہے۔ گھرکےکچن سے ملنے والا نمک پیالوں سے ملنے والے نمک سے مختلف ہے۔رپورٹ میں بتایا گیا ہےکہ سمندری نمک بدبو کو کم کرنے اور کیڑے بھگانے کے کام آتا ہے۔تفتیشی حکام کا کہنا ہےکہ رپورٹ سے تفتیش میں مزید پیشرفت ہوگی۔

خیال رہے کہ حمیرا اصغر کی لاش 8 جولائی کو اتحاد کمرشل کے ایک فلیٹ سے اس وقت ملی جب کرائے کی عدم ادائیگی پر مالک مکان کے عدالت پہنچنے پر عدالتی بیلف ان کے گھر پہنچا اور فلیٹ کا دروازہ نہ کھولنے پر دروازہ توڑا گیا تو اداکارہ کی لاش برآمد ہوئی،لاش کے پوسٹ مارٹم کی ابتدائی رپورٹ میں بتایا گیا ہے کہ لاش ڈی کمپوز کے آخری اسٹیج پر ہے جسے دیکھ کر اندازہ کیا جاسکتا ہےکہ اداکارہ کی موت تقریباً 8 ماہ پرانی ہے،تفتیشی حکام کے مطابق لگتا ہے حمیرا اصغر مالی طور پر پریشان تھیں، انہوں نے ستمبر 2024 میں آخری کمرشل شوٹ کیا تھا اور وہ کام سے متعلق اکتوبر2024 میں لوگوں سے رابطے میں تھی۔