وفاق سے سندھ حکومت کو منتقلی کے بعد گرین لائن بی آر ٹی کی رائیڈرشپ میں نمایاں اضافہ ہوا ہے
گزشتہ چھ ماہ کے دوران گرین لائن بی آر ٹی کی یومیہ رائیڈرشپ 52 ہزار سے بڑھ کر 72 ہزار تک پہنچ گئی،سینئر وزیر شرجیل انعام میمن کی زیر صدارت ماس ٹرانزٹ اتھارٹی کی 15ویں بورڈ اجلاس ہوا.گرین لائن بی آر ٹی کی رائیڈرشپ کو روزانہ ڈیڑھ لاکھ مسافروں تک پہنچانے کے لیے جامع اقدامات کا فیصلہ کر لیا گیا،اجلاس میں میئر سکھر ارسلان اسلام شیخ، سیکریٹری ٹرانسپورٹ اسد ضامن، ایم ڈی ایس ایم ٹی اے کمال دایو اور دیگر حکام شریک ہوئے،اجلاس میں ایم ڈی ایس ایم ٹی اے نے ادارے کی کارکردگی، شہری ٹرانسپورٹ کے جاری منصوبوں پر بریفنگ دی ،ایس ایم ٹی اے بورڈ کی جانب سے 2025-26 کے سالانہ ترقیاتی پروگرام کے پورٹ فولیو کی توثیق، فی الفور تکمیل کے احکامات دیئے گئے،گرین اور اورنج لائن بس منصوبوں کے پراپرٹی مینجمنٹ کے لیے نان فیئر ریونیو فرم کی خدمات حاصل کرنے کی منظوری دی گئی
شرجیل میمن کا کہنا تھا کہ وفاق سے گرین لائن کی حوالگی کے بعد سندھ حکومت نے اس نظام کو بہتر انداز میں چلانے کے لیے مؤثر اقدامات کیے، جس کا نتیجہ رائیڈرشپ میں مسلسل اضافے کی صورت میں سامنے آیا، گرین لائن اور اورنج لائن کو آپس میں منسلک کرنے سے عوام کو سہولت میسر آئی ہے اور روزمرہ کے سفر میں بہتری آئی ہے، ہم نان فیئر ریونیو ماڈلز کو بروئے کار لا کر ان منصوبوں کو مالی طور پر خود کفیل بنانے کی کوشش کر رہے ہیں،سندھ حکومت شہریوں کو جدید، معیاری اور ماحول دوست سفری سہولیات فراہم کرنے کے لیے پُرعزم ہے، سندھ حکومت شہری ٹرانسپورٹ کے شعبے میں انقلابی تبدیلی کے لیے سنجیدہ اور عملی اقدامات کر رہی ہے،
کراچی کی انسداد دہشت گردی عدالت نے 28 سال بعد سابق منیجنگ ڈائریکٹر (ایم ڈی) کراچی الیکٹرک سپلائی کمپنی (کے ای ایس سی) شاہد حامد قتل کیس کا فیصلہ سنادیا۔
عدالت نے عدم شواہد کی بناء پر منہاج قاضی اور محبوب غفران کو بری کردیاپراسیکیوشن کے مطابق مقدمے میں ملوث صولت مرزا کو عدالت نے 1999ء میں سزائے موت سنائی تھی جبکہ 2016 میں پولیس نے منہاج قاضی اور محبوب غفران کو گرفتار کیا تھا، صولت مرزا، منہاج قاضی اور دیگر کے خلاف ڈیفنس پولیس نے مقدمہ درج کیا تھا،ملزمان پر شاہد حامد کو 1997 میں قتل کرنے کا الزام تھا۔
واضح رہے کہ اس سے قبل شاہد حامد قتل کیس میں صولت مرزا کو بلوچستان کی مچھ جیل میں پھانسی دی جاچکی ہے، صولت مرزا پر شاہد حامد، ان کے ڈرائیور اور ایک محافظ کو کراچی کے علاقے ڈیفنس میں 1997ء میں قتل کرنے کا جرم ثابت ہوا تھاصولت مرزا شاہد حامد کے قتل کے بعد 1998 میں تھائی لینڈ فرار ہوگیا تھا، تاہم اپنی والدہ کی برسی میں شرکت کے لیے آنے کے 2 ہفتے بعد اسے گرفتار کرلیا گیا تھا۔
کراچی کے مصروف علاقے ایم اے جناح روڈ پر واقع 17 منزلہ کثیرالمنزلہ عمارت کے زمین میں دھنسنے کا انکشاف ہوا ہے، جس پر ادارہ ترقیات کراچی نے دو مرتبہ سندھ بلڈنگ کنٹرول اتھارٹی (ایس بی سی اے) کو تحریری طور پر آگاہ کیا، مگر مبینہ طور پر کوئی کارروائی عمل میں نہیں لائی گئی۔
ادارہ ترقیات کراچی کے مطابق یہ عمارت لائنز ایریا کے سیکٹر ون میں واقع ہے، جو 1986 میں تعمیر ہوئی تھی اور گزشتہ 38 برسوں سے خالی پڑی ہے۔ تاہم حالیہ دنوں میں اس پر رنگ و روغن کر کے اسے دوبارہ شہریوں کو فروخت کرنے کا سلسلہ جاری ہے۔خط میں نشاندہی کی گئی ہے کہ بارشوں اور زلزلوں کے باعث عمارت کا اسٹرکچر بری طرح متاثر ہو چکا ہے، جبکہ بیسمنٹ میں مسلسل پانی کھڑے رہنے سے بنیادیں بھی کمزور ہو گئی ہیں۔
ادارہ ترقیات نے زور دیا ہے کہ ایس بی سی اے فوری طور پر عمارت کو "خطرناک” قرار دے اور اسے مسمار کرنے کے اقدامات کرے، کیونکہ یہ نہ صرف اردگرد کی آبادی بلکہ ایم اے جناح روڈ پر چلنے والی ٹریفک کے لیے بھی شدید خطرے کا باعث بن سکتی ہے۔یاد رہے کہ ادارہ ترقیات نے 2024 اور 2025 میں دو بار تحریری خطوط کے ذریعے خطرے سے آگاہ کیا تھا، تاہم تاحال کسی عملی اقدام کی اطلاع نہیں ملی۔
عالمی اور مقامی صرافہ مارکیٹوں میں آج سونے کی قیمت میں معمولی کمی ریکارڈ کی گئی، جس کے باعث ملک بھر میں مسلسل چوتھے روز بھی سونے کی قیمت میں 100 روپے کی کمی واقع ہوئی۔
آل پاکستان جیمز اینڈ جیولرز ایسوسی ایشن کے مطابق کاروباری ہفتے کے پہلے روز 24 قیراط فی تولہ سونا 100 روپے سستا ہو کر 3 لاکھ 56 ہزار 300 روپے کا ہوگیا۔ اسی طرح 24 قیراط 10 گرام سونا 85 روپے کمی کے بعد 3 لاکھ 5 ہزار 470 روپے میں فروخت ہوا جبکہ 22 قیراط 10 گرام سونے کی قیمت 2 لاکھ 80 ہزار 14 روپے ریکارڈ کی گئی۔ادھر چاندی کی قیمت میں کسی قسم کی تبدیلی نہیں آئی، فی تولہ چاندی 3 ہزار 963 روپے اور 10 گرام چاندی 3 ہزار 397 روپے کی سطح پر مستحکم رہی۔
دوسری جانب عالمی مارکیٹ میں بھی سونے کی قیمت میں ایک ڈالر کی معمولی کمی دیکھنے میں آئی، جس کے بعد فی اونس سونا 3 ہزار 336 ڈالر پر آگیا۔واضح رہے کہ 24 جولائی کو سونے کی قیمت میں 5 ہزار 900 روپے کی بڑی کمی ہوئی تھی، جس کے بعد 24 قیراط سونے کی فی تولہ قیمت 3 لاکھ 59 ہزار روپے ریکارڈ کی گئی تھی۔
مرکزی مسلم لیگ ہاؤس میں 7 روزہ اسمارٹ پروڈکشن ورکشاپ کا کامیاب انعقاد کیا گیا، جس میں مختلف علاقوں سے تعلق رکھنے والے نوجوانوں اور میڈیا ورکرز نے بھرپور شرکت کی۔ ورکشاپ کا مقصد نوجوانوں کی تخلیقی صلاحیتوں کو جدید میڈیا تقاضوں کے مطابق نکھارنا اور انہیں پیشہ ورانہ انداز میں عوامی رائے تک رسائی کے قابل بنانا تھا۔ورکشاپ کے دوران میڈیا مینجمنٹ، پریس ریلیز رائٹنگ، جدید صحافتی اصول و ضوابط، اور سوشل میڈیا کے مؤثر استعمال پر خصوصی لیکچرز دیے گئے۔ شرکاء کو موجودہ میڈیا ماحول میں مؤثر اور مثبت پیغام رسانی کی تکنیکوں سے روشناس کرایا گیا۔ورکشاپ کے اختتام پر شرکاء میں اسناد تقسیم کی گئیں، جبکہ ٹرینرز کو اعزازی شیلڈز پیش کی گئیں۔
مرکزی مسلم لیگ کے صدر خالد مسعود سندھو نے اپنے خطاب میں کہاکہ صحافت کو سچائی، دیانتداری اور قومی ذمہ داری کے اصولوں پر استوار کرنا وقت کی ضرورت ہے۔ریٹنگ اور وائرل مواد کے جنون میں پھیلائی جانے والی غیر مصدقہ معلومات معاشرے میں انتشار اور بے یقینی کو جنم دیتی ہیں۔ہم چاہتے ہیں کہ نوجوان مثبت سوچ اور ذمہ دارانہ بیانیے کے ذریعے میڈیا کا مؤثر استعمال سیکھیں۔ مرکزی مسلم لیگ کا میڈیا وژن اصلاحی، تعمیری اور قومی مفادات سے ہم آہنگ ہے۔مرکزی مسلم لیگ سندھ کے صدر فیصل ندیم کاکہناتھاکہ نوجوانوں کو تعلیم، ہنر، اور اخلاق کے زیور سے آراستہ کرنا ہماری ترجیح ہے تاکہ وہ باشعور، باکردار اور مؤثر شہری بن سکیں۔ملک و قوم کے خلاف پھیلائی جانے والی منفی مہمات کا جواب مثبت اور مدلل انداز میں دینے کے لیے میڈیا ورکرز کی تربیت ناگزیر ہے۔ کراچی کے صدر احمد ندیم اعوان نے کہامیڈیا کی برق رفتاری سے ہم آہنگ ہونے کے لیے ہمیں روایتی طریقے چھوڑ کر جدید ڈیجیٹل ذرائع اپنانے ہوں گے۔ یہی آج کی صحافت کا تقاضا ہے۔
مرکزی ترجمان تابش قیوم نے اختتامی گفتگو میں کہامرکزی مسلم لیگ ڈیجیٹل میدان میں نوجوانوں کی صلاحیتیں نکھار کر انہیں روزگار کے مؤثر مواقع فراہم کر رہی ہے۔ ‘صلاحیت بڑھاؤ، اپناؤ، کماؤ’ جیسے پروگرام ہماری جدوجہد کی عملی مثال ہیں۔مرکزی مسلم لیگ آئندہ بھی نوجوانوں کی تربیت، میڈیا کے فروغ اور قومی بیانیے کی ترویج کے لیے ایسے عملی اقدامات کرتی رہے گی۔سندھ کے ترجمان طٰہ منیب کا کہنا تھا کہ اسمارٹ پروڈکشن ورکشاپ کا بنیادی مقصد نوجوانوں کو میڈیا میں مثبت کردار ادا کرنے کے قابل بنانا ہے، تاکہ وہ جماعت کے پیغام کو پیشہ ورانہ انداز میں عوام تک پہنچا سکیں۔
سابق وفاقی وزیر خزانہ مفتاح اسماعیل نے کہا ہے کہ مسلم لیگ ن کے ایک سینیٹر اور ایک رکن قومی اسمبلی نے مجھ پرجھوٹےالزامات لگائے، مجھ سے بینظیر انکم سپورٹ پروگرام کیلیے کچھ نہیں لیاگیا، بےبنیاد الزامات لگائے گئے،
کراچی میں پریس کانفرنس کرتے ہوئے مفتاح اسماعیل کا کہنا تھا کہ طارق فضل چودھری کو کہا ہے کہ وہ معافی مانگیں یا عدالت میں سامنا کریں،معاملہ 2019کاہے،اُس وقت میں جیل میں تھا،الزامات کاکوئی ثبوت ہےتوسامنےلایاجائے،یہ جھوٹ بول رہےہیں کیونکہ میں انکےبارےمیں سچ بولتاہوں، طارق فضل چودھری کیا شکست نظر آنے پر ریٹرننگ افسر کے پاس نہیں گیا؟ طارق فضل قرآن پر حلف دے دے کہ وہ فارم 47 پر نہیں جیتا۔ شہباز شریف کے بیٹوں کی 2 شوگر ملز ہیں، چینی کے فیصلے کرتے وقت کیا مفادات کا ٹکراؤ نہیں؟ تاریخ میں پہلی بار وزیر خارجہ اسحاق ڈار کو شوگر ایڈوائزی بورڈ کا رکن بنانا ٹکراؤ نہیں؟ انوشے رحمان کی وزارت میں شوہر کو ڈائریکٹر بنانا مفادات کا ٹکراؤ نہیں؟
مفتاح اسماعیل کا مزید کہنا تھا کہ حکومت نے چینی "مہنگی” کرنے کیلئے جان بوجھ کر برآمد کی اجازت دی، اب جان بوجھ کر چینی درآمد کی اجازت دے رہے ہیں، نومبر تک درآمدی چینی آئے گی، تب چینی سستی ہو گی تو "گنا سستا” ہو گا، شوگر ملز پورے سال کا گنا سستا خریدیں گی، یہ مصلحت ہے۔
کراچی میں ساحل سمندر کے قریب سے نا معلوم مرد و خاتون کی لاشیں برآمد، فوری طور پر دونوں کی شناخت نہیں ہوسکی۔
ڈپٹی انسپکٹر جنرل (ڈی آئی جی) جنوبی سید اسد رضا نے کہا ہے کہ،مرنے والے مرد اور عورت کی عمریں تقریباً 25 سے 30 سال کے درمیان ہیں، لاشوں پر گولیاں لگنے کے نشانات موجود ہیں، موقع سے 9 ایم ایم کے دو خول بھی برآمد ہوئے ہیں، کرائم سین سے شواہد جمع کیے جارہے ہیں، ملنے والی مرد کی لاش سے موبائل فون برآمد ہوا ہے،مقتولین کی شناخت اور مزید تفتیش کا عمل جاری ہے، لاشوں کو جناح ہسپتال منتقل کر دیا گیا ہے، لاشوں کی شناخت تاحال نہیں ہوسکی۔
پولیس حکام نے واقعے کی تحقیقات شروع کر دی ہیں، واقعہ قتل ہے یا کوئی حادثہ، اس حوالے سے کچھ بھی کہنا مشکل ہے، ابتدائی تفتیش اور لاشوں کے پوسٹ مارٹم کے بعد حقائق معلوم ہوسکیں گے۔
ادھر گارڈن، جمن شاہ مزار کے قریب سے ملنے والی لاش کی شناخت ریٹائرڈ پولیس اہلکار کے بیٹے کے نام سے ہوئی ہے،پولیس حکام کا بتانا ہے کہ مقتول عبداللہ کا والد پولیس میں اکاونٹنٹ تھا، مقتول عبداللہ کو نامعلوم افراد اس کے گھر گارڈن ہیڈ کوارٹر سے بلاکر لے گئے تھے، 12گھنٹے بعد عبداللہ کی گولی لگی لاش ملی۔
پیپلز پارٹی پارلیمنٹیرینز کی مرکزی ترجمان شازیہ مری نے شکارپور میں جعفر ایکسپریس کو نشانہ بنانے والے ریلوے ٹریک دھماکے کی شدید مذمت کی ہے۔ انہوں نے اس واردات کو نہ صرف قابل مذمت بلکہ افسوسناک بھی قرار دیا ہے۔
شازیہ مری نے کہا کہ ریلوے نظام کو نشانہ بنانا دراصل عوام کی زندگیوں سے کھیلنے کے مترادف ہے کیونکہ ریلوے پاکستان کے اہم ترین رابطہ نظام میں سے ایک ہے جو لاکھوں مسافروں کو روزانہ سفر فراہم کرتا ہے۔ انہوں نے کہا کہ ایسے حملے نہ صرف ریاست کے امن و امان کے لیے خطرہ ہیں بلکہ ملک کی ترقی میں بھی رکاوٹ ہیں۔مرکزی ترجمان نے مطالبہ کیا کہ اس واردات کے ذمہ دار عناصر کو فوری گرفتار کر کے قانون کے مطابق سخت سزا دی جائے تاکہ آئندہ ایسے واقعات کی حوصلہ شکنی ہو سکے۔ شازیہ مری نے اس بات پر زور دیا کہ ریلوے ٹریک پر حملے میں ملوث افراد انسانیت کے دشمن ہیں اور انہیں کیفر کردار تک پہنچانا ناگزیر ہے۔انہوں نے حکومت اور متعلقہ اداروں پر زور دیا کہ وہ اس واقعہ کی مکمل تحقیقات کر کے ذمہ داروں کو بے نقاب کریں اور اس قسم کے حملوں کی روک تھام کے لیے موثر اقدامات کریں تاکہ عوام کا سفر محفوظ بنایا جا سکے۔
سینئر اداکار، ہدایتکار و براڈکاسٹر محسن گیلانی نے نوجوان اداکاراؤں کی جانب سے شوبز انڈسٹری پر کی جانے والی تنقید پر ردعمل دیتے ہوئے کہا ہے کہ اگر یہ فیلڈ محفوظ نہیں لگتی تو اسے چھوڑ دینا چاہیے-
حال ہی میں محسن گیلانی نے ’آر ٹی ایس وِد 24 پلس‘ کے پوڈکاسٹ میں شرکت کی، جہاں انہوں نے اداکار نے کہا کہ ڈراما انڈسٹری کا زوال اس وقت شروع ہوا جب فلم کی طرز کا ماحول ڈراموں میں آگیا، جیسے فلم میں ڈسٹری بیوٹر ہوتا تھا ویسے ہی ڈراموں میں چینل اور مارکیٹنگ کا عنصر آگیا، جو اب صرف گلیمر کو اہم سمجھتے ہیں، کہانی کا معیار گر گیا ہے، ایک لڑکی دو لڑکے، دو لڑکے ایک لڑکی، ان کہانیوں میں دکھایا کیا جاتا ہے؟ کہ ان کی شادیاں نہیں ہو رہیں اور پھر آخر میں ان کی شادی ہو جاتی ہے یہ کہانی پچھلے پندرہ سال سے چل رہی ہے اور چینلز کا یہ ماننا ہے کہ اس طرز کے ڈراموں کی وجہ سے انہیں ریٹنگ ملتی ہے۔
ان کے مطابق جیسے فلم میں ہمیشہ مرکزی کرداروں کو اہمیت دی جاتی تھی اور معاون کرداروں پر زیادہ توجہ نہیں دی جاتی تھی، اب یہی سب کچھ ڈراما انڈسٹری میں بھی ہو رہا ہے، معاون کرداروں کی کوئی اہمیت نہیں رہی، صرف مرکزی کردار کو ہی اہم سمجھا جاتا ہے، کچھ نوجوان اداکارائیں ایسی ہیں جو اکثر یہ تبصرہ کرتی ہیں کہ شوبز لڑکیوں کے لیے صحیح جگہ نہیں ہے، ان سے سوال ہے کہ اگر آپ کو لگتا ہے کہ شوبز ٹھیک نہیں ہے، یہاں غلط کام ہو رہے ہیں، تو پھر وہ اس فیلڈ کا حصہ کیوں ہیں؟ چھوڑ کیوں نہیں دیتیں؟ اس فیلڈ میں کام کیوں کرتی ہیں، وہ بھی بن سنور کر؟
انہوں نے اداکارہ ماہم عامر کی مثال دی کہ وہ ایسے افراد کو تھپڑ مار دیتی ہیں جو ان کے ساتھ بدتمیزی کرنے کی کوشش کرتے ہیں،اداکار کے مطابق انہوں نے خود دیکھا ہے کہ طاقتور مردوں کو خواتین سے مار پڑی جب وہ کچھ غلط کرنے کی کوشش کرتے ہیں، اس لیے بہتر ہے کہ یا تو شوبز چھوڑ دیں یا پھر اس کے خلاف بات نہ کریں. اگر انہیں اس فیلڈ میں ہراساں کیا جا رہا ہے تو انہیں اس فیلڈ کو چھوڑ دینا چاہیے اور اگر انہیں مذہب کے لحاظ سے یہ فیلڈ درست نہیں لگتی، تو بھی انہیں اس فیلڈ میں کام نہیں کرنا چاہیے۔
انہوں نے بتایا کہ وہ عائشہ خان کو تقریباً چھببیس سے ستائیس سال سے جانتے تھے اور ان کے ساتھ کئی ڈراموں میں کام کر چکے تھے، اس لیے ان کے درمیان ایک خاص تعلق قائم ہو گیا تھا،اداکار نے بتایا کہ عائشہ خان مائیک پھینک دیتی تھیں جس سے ان کے ساتھی اداکاروں کو مشکل ہوتی تھی میں نے ان کو بتایا کہ کچھ نوجوان اداکاروں کو ان کا مائیک پھینکنا پسند نہیں ہے اور وہ اس سے پریشان ہوتے ہیں تو وہ میری بات کو سمجھتی تھیں۔
ان کا کہنا تھا کہ اسی پراجیکٹ میں اداکارہ نازلی نصر ان کی بیوی کا کردار ادا کر رہی تھیں اور وہ عائشہ خان کی بہت خدمت کرتی تھیں، کبھی ان کے پیر دباتی تھیں، کبھی کپڑے پہننے میں مدد دیتی تھیں، عائشہ خان اکثر ان سے کہا کرتی تھیں، تم گواہ رہنا نازلی میرا خیال رکھتی ہے، اگر میں کبھی اکیلی رہ گئی تو نازلی کے پاس چلی جاؤں گی۔
محسن گیلانی نے بتایا کہ،وہ اکیلے رہنا پسند کرتی تھیں، ان کے بچے بھی اپنی زندگی میں مصروف ہو گئے‘،محسن گیلانی نے جذباتی انداز میں بتایا کہ ایک اداکار نے ایک وائس نوٹ شیئر کی جس میں عائشہ خان بتا رہی تھیں کہ بچے مجھے پیسے بھیجتے ہیں محسن گیلانی نے سوال اُٹھایا کہ کیا ایک ماں کو بڑھاپے میں صرف پیسوں کی ضرورت ہوتی ہے جس نے اس قدر مشکل حالات میں اپنے بچوں کو پالا ہو؟ کیا اس کی دیکھ بھال کرنا ان کی ذمہ داری نہیں ہے؟
اداکارہ علیزے شاہ نے جان سے مارنے کی دھمکیاں ملنے کا دعویٰ کیاہے۔
اداکارہ علیزے شاہ جو گزشتہ کئی دنوں سے سوشل میڈیا پر اپنے مشہور اسکینڈلز کی حقیقت بیان کرنے کیلئے مختلف ویڈیوز شیئر کر رہی ہیں اب انہوں نے ساتھی اداکارہ کی جانب سے جان سے مار دینے کی دھمکیاں ملنے کا دعویٰ کیا ہے۔
سوشل میڈیا پر جاری ایک حالیہ ویڈیو بیان میں علیزے شاہ نے کہا کہ ان کی ساتھی اداکارہ منسا ملک انہیں قتل کروانے کی دھمکیاں دے رہی ہیں انہوں نے مختلف چیٹ کی ویڈیوز شیئر کرتے ہوئے بتایا کہ ساتھی اداکارہنے ان کا نمبر کسی مشکوک شخص کو فراہم کیا ہے جس سے ان کی ساکھ خراب کرنے کی کوشش بھی کی جارہی ہے۔
ایک انسٹاگرام اسٹوری میں انہوں نے لکھا کہ ’وہ مجھے مختلف نامعلوم نمبرز سے کالز کر رہی ہے اور قتل کی دھمکیاں دے رہی ہے، اگر مجھے کچھ ہوا تو جان لیں کہ یہ اسی میسنی کا کام ہے‘۔
ایک اور انسٹاگرام اسٹوری میں علیزے نے کہا کہ ’ 3 سال پہلے بھی اس گھٹیا عورت نے مجھے بدنام کرنے کی کوشش کی تھی جو بھی کمایا آج کل عزت اور حلال کا کمایا لیکن جو خود حرام کھاتا ہے اسے نہ خدا کا خوف ہوتا ہے نہ اپنے زوال کا‘۔
